San Juan 9 - Tz'utujil (Ja Cꞌacꞌa Chominem)

¹ Ja Jesús arjaꞌ rmajon binem tok xutzꞌat jun achi ti moy ja ni pa ralaxic wiꞌ chi moy.

² Ja cꞌa rdiscípulo quicꞌaxaj tre: —Rabí ¿nak tre cꞌalaꞌ tok ni moy wiꞌ tok xalaxi ja rachi leꞌ, nak cꞌo ril chewiꞌ, la ril arjaꞌ owi quil rtataꞌ ruteꞌ? xecheꞌ tre.

³ Ja cꞌa Jesús xbij chique: —Ma queriꞌ ta, ma ril ta arjaꞌ chewiꞌ tok rbanon quelaꞌ nixtacꞌa quil rtataꞌ ruteꞌ chakajaꞌ. Quelaꞌ rbanon ja rachi leꞌ utzcꞌa chi cꞌo jun nimlaj samaj xin Dios nkꞌalajin na ja tok xtitzuri.

⁴ Ja tok cꞌa incꞌo na waweꞌ chwachꞌulew rjawaxic chi nban ja rsamaj ja takyonpi wxin. Caniꞌ tre ja tok noc akꞌaꞌ macatcowini natsamaj chic.

⁵ Jaruꞌ pa tiempo xquinqꞌuejeꞌ waweꞌ chwachꞌulew anin inocnak in caniꞌ kꞌij rxin ja rwachꞌulew, neꞌ chique.

⁶ Ja tok tzuri tzij rmal cꞌacꞌariꞌ chuban kaj pa tokꞌulew in xumaj rbanic chꞌabak tre ja ruchub, cꞌacꞌariꞌ xucꞌam, xuyaꞌ chi rwach ja ti moy

⁷ in xbij tre: —Jat, jachꞌajaꞌ rawach pa yaꞌ ja rbinaꞌan Siloé, neꞌ tre. (Ja biꞌaj Siloé tibij tzij nta̱kel.) In queriꞌ xuban ja rachi be. Ja tok xekaji xuchꞌaj ja rwach. Ja cꞌa tok chꞌajtajto rmal melojto, ncaꞌy chic.

⁸ Ja cꞌa rvecino ja rachi e cachbil juleꞌ chic winak ja bien quitzꞌaton chi moy nabey ejeꞌeꞌ quibij: —¿La ma ja ta cꞌalaꞌ ja rachi leꞌ ja ni ntzꞌabeꞌ wiꞌ chi rcꞌutuxic limosna? xecheꞌe.

⁹ Ecꞌoli chique quibij: —Arjaꞌ nacꞌa, xecheꞌe. In juleꞌ chic quibij: —Mni, ni quelaꞌ ncaꞌyi pro ma arjaꞌ ta, xecheꞌe. Pro ja rachi arjaꞌ xbij chique: —Anin nacꞌa, neꞌ chique.

¹⁰ —¿Pro nak cꞌa xaban, natcaꞌy chic takaꞌan? xecheꞌ tre.

¹¹ —Cꞌo jun achi rbinaꞌan Jesús, arjaꞌ xchomij juleꞌ chꞌabak in tok chomtaj rmal xuyaꞌ chi nwach in xbij chwe: —Jat, jachꞌajaꞌ rawach pa yaꞌ rbinaꞌan Siloé, neꞌ chwe. In queriꞌ xinban xinbe. Ja cꞌa tok xinekaji xinchꞌaj ja nwach in queriꞌ xuban jaktaji, neꞌ chique.

¹² —¿Bar cꞌa cꞌo wiꞌ ja Jesús camic? xecheꞌ tre. —Jariꞌ ma wotak ta ba la cꞌo wiꞌ, neꞌ chique.

¹³ Cꞌacꞌariꞌ cꞌamarel ja rachi ja jaktaj rwach, xeyaꞌ chiquewach ja fariseo.

¹⁴ Ja Jesús tok xchomij ja chꞌabak in tok xujak rwach ja rachi jariꞌ pa jun xulaꞌnbal kꞌij xuban wiꞌ.

¹⁵ Ja cꞌa rachi cꞌaxax chic tre cumal ja fariseo: —¿Nak xaban tok jaktaji ja rawach? xecheꞌ tre. —Ja rachi xchomij juleꞌ chꞌabak in tok chomtaj rmal xuyaꞌ chi nwach. Cꞌacꞌariꞌ xinchꞌaj ja nwach in queriꞌ xuban jaktaji, neꞌ chique.

¹⁶ Ecꞌoli chique ja fariseo quibij: —Ja rachi rbinaꞌan Jesús ma Dios ta takyonto rxin como arjaꞌ matuban respetar ja xulaꞌnbal kꞌij como cꞌo samaj nuban chipan, xecheꞌe. Pro juleꞌ chic chique quewaꞌ quibij riꞌ: —¿Pro nak moda cꞌariꞌ jun achi wi xa il mac ja nuban in nuban jun milagro ja caniꞌ nkatzꞌat camic riꞌ? xecheꞌe. In queriꞌ queban, ma junan ta quechꞌob trij ja Jesús.

¹⁷ In quibij chic tre ja rachi ja jaktaj rwach: —In atat ¿nak nabij tre ja rachi rbinaꞌan Jesús? como arjaꞌ xujak awach. ¿Nak ocnak wiꞌ nachꞌob atat? xecheꞌ tre. —Arjaꞌ jun profeta xin Dios, xecheꞌx rmal ja rachi.

¹⁸ Ja cꞌa raj Israel ejeꞌeꞌ ma xquinimaj ta chi ni moy wiꞌ ja rachi nabey, ma xquinimaj ta chi cꞌa jaktaji ja rwach xa chewiꞌ tok quetak quisiqꞌuixic ja rtataꞌ ruteꞌ.

¹⁹ Ja tok xeꞌekaji ja rtataꞌ ruteꞌ ja rachi cꞌaxax chique: —¿La ewalcꞌwal ixix jawaꞌ jun achi riꞌ, la arjaꞌ ja nebij chi ni moy wiꞌ tok xalaxi? ¿Nak cꞌa tre tok ncaꞌy chic camic? xecheꞌxi.

²⁰ —Ajoj kotak chi jalaꞌ kalcꞌwal in kotak chakajaꞌ chi arjaꞌ ni moy wiꞌ tok xalaxi.

²¹ Pro ma kotak ta nak tre tok ncaꞌy chic camic nixtacꞌa kotak ta chakajaꞌ nak jakowi ja rwach. Mejor, tre arjaꞌ tecꞌwaxaj wiꞌ como cꞌo chic rjunaꞌ, riꞌj chic, arjaꞌ cꞌa nbin alaꞌ chewe nak ja xuban, xecheꞌe ja rtataꞌ ruteꞌ.

²² Queriꞌ quibij chique ja raj Israel como nquixbej quiꞌ chiquewach como ja raj Israel ejeꞌeꞌ quichomin chic chi xa nak ta nbini chi ja Jesús arjaꞌ ja Cristo wi neꞌe, jariꞌ maticꞌul chic chipan ja jay xin molbal riꞌil ja bar nquemol wiꞌ quiꞌ ja raj Israel chi rcꞌaxaxic ja rtzobal Dios, nchꞌakixel chijutij.

²³ Rmalcꞌariꞌ ja tok quibij: —Mejor, tre arjaꞌ tecꞌwaxaj wiꞌ como cꞌo chic rjunaꞌ, riꞌj chic waꞌan, xecheꞌe.

²⁴ Cꞌacꞌariꞌ xecꞌamar chic jutij ja rachi ja moy nabey in quewaꞌ quibij tre riꞌ: —Chwach Dios tabij ja kas mero rubey como ajoj kotak chi ja rachi rbinaꞌan Jesús arjaꞌ xa il mac ja nuban, xecheꞌ tre.

²⁵ —Ja wi xa il mac ja nuban jariꞌ ma wotak ta anin xarwariꞌ ja wotak chi anin in moy nabey pro ja camic nincaꞌy chic, xecheꞌx rmal ja rachi.

²⁶ —Pro ¿nak cꞌa xuban chawe? ¿Nak cꞌa xuban tok xujak awach? xecheꞌ chic tre.

²⁷ —Pro jariꞌ nbin chi waꞌan chewe pro ixix mta egana necꞌwaxaj. ¿Nak cꞌa tre tok necꞌwaxaj chic jutij chwe? ¿La maxta cꞌa newajoꞌ ixix chakajaꞌ nixoc rdiscípulo? neꞌ chique.

²⁸ Ejeꞌeꞌ congana pi quiyewal trij in quewaꞌ quibij tre riꞌ: —Ja ratat ni kꞌalaj chi at discípulo rxin arjaꞌ pro ja rajoj ok discípulo rxin ja Moisés.

²⁹ Ajoj kotak chi tzijoni ja Dios ruqꞌuin ja Moisés pro ja rachi rbinaꞌan Jesús jariꞌ ba la penak wiꞌ, nak la takyonto rxin, xecheꞌ tre.

³⁰ —Pro nak moda takaꞌan matichꞌobtaj emwal nak takyonto rxin pro xujak cꞌa nwach, neꞌe ja rachi chique.

³¹ Bien kotak chi ja Dios arjaꞌ maticꞌaxaj ja tok cꞌoli ncꞌutux tre rmal jun achi ja wi xa il mac nuban ja rachi. Pro jun achi wi nuyaꞌ rukꞌij ja Dios in wi nnimaj ja najoꞌx tre rmal ja Dios chi nuban jariꞌ ncꞌaxaxi ja ncꞌutuj tre ja Dios.

³² Jaruꞌ pa tiempo winakarnakto ja rwachꞌulew ni majun kacꞌaxan ta chi cꞌo ta jun achi rjakon ta rwach jun achi ja ni pa ralaxic wiꞌ chi moy.

³³ Ja Jesús wixta ma in Dios ta penak wiꞌ ni ta cꞌa majun nak ta ncowini nuban ariꞌ, queriꞌ xbij ja rachi.

³⁴ Ja cꞌa rejeꞌeꞌ quemaj chic ryokꞌic ja rachi, quewaꞌ quibij tre riꞌ: —Ja ratat xa rmal il mac tok nij at moy wiꞌ xatalaxi ¿in atat nawajoꞌ nokatijoj ajoj? Queriꞌ quibij tre in quiwasajel chiquicojol chijutij in ma xquecꞌul chi ta.

³⁵ Ja cꞌa Jesús tok xcꞌaxaj chi wasaxto ja rachi in maticꞌul chic arjaꞌ be, xerilaꞌ in quewaꞌ xcꞌaxaj tre riꞌ: —¿La yukul chic acꞌuꞌx ruqꞌuin ja Ralcꞌwal Dios? neꞌ tre.

³⁶ —Anin nwajoꞌ nyukeꞌ nucꞌuꞌx ruqꞌuin pro tacꞌutuꞌ chinwach nak chi achiꞌal cꞌariꞌ ja Ralcꞌwal Dios, neꞌe ja rachi.

³⁷ Ja cꞌa Jesús xbij chic tre: —Pro jariꞌ atzꞌaton chic, anin cꞌariꞌ ja rin Ralcꞌwal Dios ja nmajon tzij awqꞌuin camic riꞌ, neꞌ tre.

³⁸ Cꞌacꞌariꞌ ja rachi xbij: —Wajaw, anin camic nyukeꞌ nucꞌuꞌx awqꞌuin. Queriꞌ xbij tre ja Jesús, xuqueꞌ chwach in xumaj ryaꞌic rukꞌij. Cꞌacꞌariꞌ ja Jesús xbij:

³⁹ —Anin inpenak waweꞌ chwachꞌulew utzcꞌa chi bien nkꞌalajin na nak quibanic ja winak. Inpenak utzcꞌa ja moyaꞌ njaktaj quewach utzcꞌa chakajaꞌ ja winak ja nebini chi necaꞌyi ejeꞌeꞌ nekꞌalajin na chi xa e moyaꞌ, neꞌe.

⁴⁰ Ecꞌoli ja fariseo ecꞌo chinakaj ja Jesús tok quicꞌaxaj ja xbij congana pi quiyewal trij in quewaꞌ quibij tre riꞌ: —¿La ok moyaꞌ laꞌan ajoj chakajaꞌ chewiꞌ tok nabij queriꞌ? xecheꞌ tre.

⁴¹ —Ja wixta xeyaꞌ chewij chi pa kꞌekumal ixcꞌo wiꞌ jariꞌ mta nixchapbexi pro como nebij chi: —Ajoj bien kotak chic ja rbey Dios, nixcheꞌe, jariꞌ nixchapbexi. Queriꞌ xbij ja Jesús chique.