San Juan 6 - Tz'utujil (Ja Cꞌacꞌa Chominem)

¹ Cꞌacꞌariꞌ be chic ja Jesús chajuparaj mar xin Galilea ja cꞌo chic jun rubiꞌ mar xin Tiberias neꞌxi.

² Congana e qꞌuiy ja winak xetreꞌ trij rmal ja nimak tak milagro xuban chiquewach como ecꞌoli ja yawaꞌiꞌ xertzursaj.

³ Joteꞌ chwach jun jayuꞌ in xuwil jun lugar ja bar tzꞌabeꞌ wiꞌ e rachbil ja rdiscípulo.

⁴ Xa nnakajinto ja nmakꞌij pascua ja ncꞌu̱l cumal ja raj Israel.

⁵ Ja Jesús tok xutzꞌat chi congana winak xeꞌekaj ruqꞌuin xbij tre ja Felipe: —¿Bar nekalokꞌoꞌ wiꞌ queway ja winak leꞌ? neꞌ tre.

⁶ Pro jawaꞌ tzij xbij xa ncꞌambajbej rxin ja Felipe como ja Jesús arjaꞌ bien rotak nak xtuban ja nertzukbej ja winak.

⁷ Ja cꞌa Felipe xbij tre: —Ja wixta cꞌo caꞌiꞌ ciento quetzal caxlanway maqueruban ja winak leꞌ xtiquetij ta tak tzꞌit chiquijujunal, neꞌe.

⁸ Cꞌo jun chique ja discípulo rbinaꞌan Andrés, arjaꞌ rchꞌalal ja Simón Pedro in quewaꞌ xbij tre ja Jesús riꞌ:

⁹ —Cꞌo jun talaꞌ waweꞌ riꞌ, arjaꞌ cꞌo joꞌoꞌ rkan caxlanway ruqꞌuin cebada ocnak in e caꞌiꞌ tak cakan chꞌuꞌ pro ¿la neruban ta cꞌalaꞌ winak leꞌ? congana e qꞌuiy, neꞌe.

¹⁰ Ja cꞌa Jesús xbij chique ja rdiscípulo: —Queꞌetzꞌubaꞌ canojel ja winak leꞌ, neꞌ chique. Como chipan ariꞌ lugar ja recꞌo wiꞌ cꞌo buen tak kꞌayis netzꞌabeꞌ chipan. In canojel ja winak xekaj chi tzꞌubulem, ecꞌo la joꞌoꞌ mil ja xa queyon achiꞌiꞌ.

¹¹ Ja cꞌa Jesús xucꞌam ja caxlanway, xmaltioxij tre ja Dios in xujach chique ja discípulo. Ja cꞌa discípulo quemaj rjachic chique canojel ja winak ja retzꞌubuli in queriꞌ queban chique ja chꞌuꞌ chakajaꞌ. Ja winak quetij janiꞌ ja kas cꞌo quigana quetij.

¹² Ja tok tzuri waꞌim cumal xenoji chi utz in quewaꞌ xbij ja Jesús chique ja discípulo riꞌ: —Temoloꞌ ruchiꞌ nojelal ja totaji, matinwajoꞌ xtitzꞌilox ta, neꞌ chique.

¹³ Ja cꞌa discípulo quemaj rmolic ruchiꞌ nojelal. Ja cꞌa tok moltaj cumal cablajuj chacach xuban pro ni noji chi cablajuj. Jariꞌ totaji tre ja joꞌoꞌ rkan caxlanway ja ma xecowin ta ja winak trij chi rtijic.

¹⁴ Ja winak tok quetzꞌat ja milagro ja xuban ja Jesús chiquewach quewaꞌ quibij riꞌ: —Jalaꞌ jun achi leꞌ ni katzij wiꞌ chi arjaꞌ ja profeta xin Dios ja tzꞌibtal can chi npi na, xecheꞌe.

¹⁵ Ja cꞌa Jesús bien chꞌobtaj rmal chi ncajoꞌ nqueban puersa tre chi arjaꞌ noc rey pa quewiꞌ rmalcꞌariꞌ xelel chipan ja lugar, joteꞌ chic jutij chwach jun jayuꞌ ruyon in xuwil jun lugar ja bar qꞌuejeꞌ wiꞌ.

* * * * * * * * * *

¹⁶ Ja cꞌa tok xuban hora tok kas nmalal chic xexuleꞌe ja discípulo chiꞌ mar.

¹⁷ Ja cꞌa tok xeꞌekaji xeꞌoquel chipan jun lancha, xebe pa Capernaum ja cꞌo chajuparaj chic mar. Ocnak chic akꞌaꞌ pro majaꞌn tekaji ja Jesús cuqꞌuin.

¹⁸ Pro chaka jalal tok jaktajto jun nimlaj ikꞌ chiquij, congana nimak tak baloj chic chipan ja mar.

¹⁹ Cꞌo la joꞌoꞌ wakiꞌ kilómetro quiyaꞌon can chic ja chiꞌ mar ja tok chaka jalal quetzꞌat ja Jesús, arjaꞌ rmajon binem parwiꞌ yaꞌ in xekaj chinakaj ja lancha ja recꞌo chipan. Ja cꞌa rejeꞌeꞌ congana quixbej quiꞌ rmal.

²⁰ Pro ja Jesús xbij chique: —Ma texbej ta ewiꞌ, xwaꞌn anin, neꞌ chique.

²¹ Congana xequicoti, quecojel chic ja Jesús cuqꞌuin pa lancha in cꞌa jaꞌ quenaꞌ ecꞌo chic chipan ja lugar ja bar nebe wiꞌ.

* * * * * * * * * *

²² Ja cꞌa chi rcab kꞌij ecꞌo can ja winak chiꞌ mar. Quetzꞌat chi ma xoquel ta ja Jesús pa lancha cuqꞌuin ja rdiscípulo tok xebe pa Capernaum, xa queyon xebe in mchita jun ja lancha, xa ni xarwariꞌ jun.

²³ Pro cꞌo juleꞌ ja lancha xelel pa Tiberias, be kꞌax chic chajuparaj chic mar. Ja lugar ja bar xekaj wiꞌ chinakaj ja mismo lugar ja bar qꞌuejeꞌ wiꞌ ja Jesús tokoriꞌ tok xmaltioxij tre ja Dios in xerutzuk ja winak.

²⁴ Ja cꞌa winak ja recꞌo can chiꞌ mar tok quetzꞌat chi mchita ja Jesús in nixtacꞌa rdiscípulo chi ta chakajaꞌ cꞌacꞌariꞌ xeꞌoquel pa tak lancha, xebe pa Capernaum chi rcanoxic ja Jesús.

²⁵ Ja cꞌa tok xeꞌekaji ja chajuparaj chic mar pa Capernaum triꞌ quewil wiꞌ in quewaꞌ quibij tre riꞌ: —Rabí ¿nak hora xaturkaji ja waweꞌ? xecheꞌ tre ja Jesús.

²⁶ Ja cꞌa Jesús xbij chique: —Ixix ninecanoj pro ma rmal ta chi chꞌobtaj emwal nak ja kas mero rcꞌamonto ja juleꞌ milagro ja xinban chewach. Ninecanoj pro xa rmal chi xixnutzuk tre ja caxlanway in xixnoji chi utz.

²⁷ Ixix congana samaj neban chi rcanoxic ja reway pro juleꞌ way ja xa nocꞌowi pro ma xar tawaꞌ samaj teban. Pro ja neban, congana ta nixsamaji chi rcanoxic ja way ja ni mta wiꞌ ocꞌowem nuban, juleꞌ way ja rcꞌamonto ja utzlaj cꞌaslemal ja mta qꞌuisic trij. Ja Ralcꞌwalaxel ja xoc alaxic cuqꞌuin ja winak arjaꞌ nsipan chewe ja way ja cꞌa xinbij chewe riꞌ. Como Dios ja Tatixel arjaꞌ bien rkꞌalasan chic chi arjaꞌ takyonto rxin ja Ralcꞌwalaxel, xecheꞌxi ja winak rmal ja Jesús.

²⁸ —¿Nak cꞌa chi samajil nkaban utzcꞌa chi samaj xin Dios ja nkaban? xecheꞌ chic tre.

²⁹ —Tiyukeꞌ ecꞌuꞌx ruqꞌuin ja Ralcꞌwalaxel ja takonto rmal ja Dios in tok nyukeꞌ ecꞌuꞌx ruqꞌuin ja cꞌariꞌ samaj xin Dios, xecheꞌxi rmal ja Jesús.

³⁰ In quibij chic tre: —¿Nak cꞌa chi milagroꞌil naban ja nacꞌutbej chikawach chi ni katzij wiꞌ chi Dios attakyonto? ¿Nak cꞌa nacꞌut chikawach utzcꞌa chi nkatzꞌat in rmalariꞌ xcatkanimaj? ¿Nak cꞌa chi samajil naban atat chewiꞌ?

³¹ Ja katiꞌt kamamaꞌ ejeꞌeꞌ tok xeqꞌuejeꞌ chipan ja lugar chakijlaj ulew ojer cꞌo juleꞌ maná quetij ja takto chicaj caniꞌ tzꞌibtal can quewariꞌ: —Way xin chicaj xuyaꞌ chique chi nquetij, queriꞌ nbij, xecheꞌ tre.

³² Bix chic chique rmal ja Jesús: —Ni katzij wiꞌ ja xtinbij chic chewe riꞌ, ja way ja pi chicaj ma ja ta Moisés yowi, ja nataꞌ Dios arjaꞌ yowi in ja way xin chilaꞌ chicaj ja ni katzij wiꞌ chi way ni ja wiꞌ nataꞌ Dios nyowi chakajaꞌ.

³³ Queriꞌ nbij chewe como ja way ja nuyaꞌ ja Dios jariꞌ ja penak chilaꞌ chicaj jariꞌ ja nuyaꞌ utzlaj cꞌaslemal chique ja winak pro canojelal, xecheꞌxi.

³⁴ —Kajaw ¿nak tre matayaꞌ chake laꞌ ja way ja nabij leꞌ pro ni ta ja wiꞌ nayaꞌ chake nojel tak kꞌij? xecheꞌ tre. Ja cꞌa Jesús xbij chic jutij chique:

³⁵ —Anin cꞌariꞌ ja rin way, anin ninyowi ja utzlaj cꞌaslemal ja mta qꞌuisic trij. Ja winak ja nyukeꞌ quecꞌuꞌx wqꞌuin jariꞌ ni mchita wiꞌ waꞌal xtiquetij ta nixtacꞌa chakichiꞌ ta chakajaꞌ.

³⁶ Pro caniꞌ nbin chic chewe chi ixix masqui inetzꞌaton chic pro ni matiyukeꞌ wiꞌ ecꞌuꞌx wqꞌuin.

³⁷ Canojel ja winak ja neyataj chwe rmal ja Tatixel ejeꞌeꞌ neꞌurkaj wqꞌuin in tok neꞌurkaji mta ariꞌ ja maquita nenucꞌul canojelal.

³⁸ Anin xinkajto chilaꞌ chicaj, inpenak chi rbanic ja rvoluntad ja rintakyonto, ma nvoluntad ta anin nunbanaꞌ kaj ta nuyon.

³⁹ Ja Tatixel ja takyonpi wxin quewaꞌ rvoluntad riꞌ, chi canojel ja reyaꞌon chwe rmal ni majun chique xtintzꞌilaꞌ ta in tok xterilaꞌ ja qꞌuisbal tiempo nenuyic canojelal chipan ja camíc.

⁴⁰ Ja Tatixel ja takyonpi wxin quewaꞌ rvoluntad riꞌ, chi canojel ja winak ja ncotakij rwach ja Ralcꞌwalaxel in nyukeꞌ quecꞌuꞌx ruqꞌuin ejeꞌeꞌ nyataj chique ja utzlaj cꞌaslemal ja mta qꞌuisic trij. Ja cꞌa tok xterilaꞌ ja qꞌuisbal tiempo anin ninyico quixin chipan ja camíc. Queriꞌ xbij ja Jesús chique.

⁴¹ Ja cꞌa raj Israel ejeꞌeꞌ quemaj rtzijoxic ja Jesús como mta quigana ruqꞌuin ja xbij chique chi arjaꞌ ja way kajnakto chilaꞌ chicaj.

⁴² —Jalaꞌ jun achi leꞌ xwaꞌn Jesús ja rcꞌajol José, kotak waꞌan quewach rtataꞌ ruteꞌ alaꞌ. ¿Nak tre tok nbij chi kajnakto chilaꞌ chicaj? xecheꞌe.

⁴³ Ja cꞌa Jesús xbij chique: —Ma quinetzijoj ta.

⁴⁴ Canojel ja winak ja neꞌurkaj wqꞌuin chi nyukeꞌ quecꞌuꞌx wqꞌuin ni majun chique ja xta ruyon nurkaji, ni rjawaxic wiꞌ chi necꞌa̱mto rmal ja Tatixel ja takyonpi wxin. Pro ja neꞌurkaj wqꞌuin, ja tok xterilaꞌ ja qꞌuisbal tiempo anin ninyico quixin chipan ja camíc canojelal.

⁴⁵ Caniꞌ tzꞌibtal can chipan ja libro quixin profeta quewaꞌ nbij riꞌ: —Nerilaꞌ na jun tiempo chi canojelal netijox na rmal ja Dios, neꞌe. Rmalcꞌariꞌ nbij chewe chi canojel ja winak ja quiyaꞌon quixquin tre ja Tatixel in wi cotakin ja cꞌutun chiquewach rmal ejeꞌeꞌ riꞌ ja neꞌurkaj wqꞌuin chi nyukeꞌ quecꞌuꞌx wqꞌuin.

⁴⁶ Pro ma ja ta nbij chewe chi ecꞌoli winak ja retzꞌatyon rwach ja Tatixel. Cꞌo nacꞌa jun tzꞌatyon rwach pro xa ni xarwariꞌ jun jariꞌ ja Ralcꞌwalaxel ja mero in Dios penak wiꞌ.

⁴⁷ Ni katzij wiꞌ ja xtinbij chic chewe riꞌ, ja winak ja cꞌo yukulbal quecꞌuꞌx wqꞌuin ejeꞌeꞌ cucꞌan chic ja utzlaj cꞌaslemal ja mta qꞌuisic trij.

⁴⁸ Anin ja rin way, anin ninyowi ja utzlaj cꞌaslemal ja mta qꞌuisic trij.

⁴⁹ Ja rewatiꞌt emamaꞌ ojer ejeꞌeꞌ tok xeqꞌuejeꞌ chipan ja lugar chakijlaj ulew masqui quetij ja maná pro ja maná ma xerutoꞌ ta chipan ja camíc.

⁵⁰ Pro ja way ja nmajon rbixic anin chewe camic riꞌ jariꞌ ja kajnakto chilaꞌ chicaj utzcꞌa chi nak xtitijo rxin jariꞌ maticami.

⁵¹ Ja way ja nyowi cꞌacꞌa cꞌaslemal, ja way ja kajnakto chilaꞌ chicaj, anin cꞌariꞌ. Jawaꞌ way ja cꞌa xinbij kaj chewe riꞌ, xa nak ta xtitijo rxin jariꞌ ncꞌaseꞌe pro ni chijutij. Cꞌoli way ja xtinyaꞌ chique ja winak waweꞌ chwachꞌulew utzcꞌa chi cꞌo jun cꞌacꞌa cꞌaslemal nyataj chique. Ja way xtinyaꞌ jariꞌ ncuerpo anin. Queriꞌ xbij ja Jesús chique.

⁵² Ja cꞌa raj Israel ejeꞌeꞌ quemaj chic tzij chibil tak quiꞌ, junwiꞌ nquibij juleꞌ in junwiꞌ chi na nquibij juleꞌ: —¿Nak rbanic cꞌalaꞌ nbij ja jun achi leꞌ chi nuyaꞌ ja rcuerpo chake chi nkatij? necheꞌe.

⁵³ Ja cꞌa Jesús xbij chic chique: —Ni katzij wiꞌ ja xtinbij chic chewe riꞌ, ja wi matetij ja cuerpo rxin ja Ralcꞌwalaxel ja xoc alaxic cuqꞌuin ja winak in wi matetij ja rquiqꞌuel chakajaꞌ jariꞌ ma ewcꞌan ta ja utzlaj cꞌaslemal ja mta qꞌuisic trij.

⁵⁴ Pro xa nak ta netijowi ja ncuerpo rachbil ja nquiqꞌuel jariꞌ cucꞌan chic ja utzlaj cꞌaslemal ja mta qꞌuisic trij in tok xterilaꞌ ja qꞌuisbal tiempo anin ninyico quixin chipan ja camíc.

⁵⁵ Como ja ncuerpo anin jariꞌ ja mero way in ja nquiqꞌuel jariꞌ ja mero camsbal chakichiꞌ.

⁵⁶ Ja netijowi ja ncuerpo rachbil ja nquiqꞌuel ejeꞌeꞌ neqꞌuejeꞌ pa wanma anin in anin chakajaꞌ ninqꞌuejeꞌ pa tak canma ejeꞌeꞌ.

⁵⁷ Ja cꞌaslic Tatixel arjaꞌ inrtakonto in rmal arjaꞌ tok nij incꞌas wiꞌ in queriꞌ cꞌa chique ja winak ja xquetijowi ja ncuerpo rachbil nquiqꞌuel ejeꞌeꞌ necꞌaseꞌ na chijutij mwal anin.

⁵⁸ Ja way ja nmajon rbixic chewe camic riꞌ jariꞌ ja kajnakto chilaꞌ chicaj, ma junan ta ruqꞌuin ja maná ja tij cumal ewatiꞌt emamaꞌ ojer pro ma xerutoꞌ ta chipan ja camíc. Jawaꞌ way ja nmajon rbixic chewe riꞌ xa nak ta netijowi necꞌaseꞌ na pro ni chijutij. Queriꞌ xbij ja Jesús chique.

⁵⁹ Jawaꞌ tijonem riꞌ xuyaꞌ ja Jesús pa Capernaum chipan ja jay xin molbal riꞌil quixin ja raj Israel.

⁶⁰ Ja cꞌa rdiscípulo ja Jesús ejeꞌeꞌ tok quicꞌaxaj ja xbij e qꞌuiy chique quewaꞌ quibij riꞌ: —Congana takaꞌan cꞌayew ja nbij leꞌ ¿nak ta wiꞌ xtel rucꞌuꞌx chi rcꞌaxaxic? xecheꞌe.

⁶¹ Pro ja Jesús arjaꞌ bien rotak chi ejeꞌeꞌ quimajon rchꞌaꞌic ja xbij chique in xbij chic chique: —¿La pokon xenaꞌ ja tijonem ja cꞌa xinyaꞌ chewe riꞌ?

⁶² Pro ja Ralcꞌwalaxel ja xoc alaxic cuqꞌuin ja winak wi nerilaꞌ na jun kꞌij tok xtetzꞌat chi arjaꞌ njoteꞌ chilaꞌ chicaj ja bar cꞌo wiꞌ nabey ¿nak cꞌa nechꞌob chic ariꞌ trij?

⁶³ Ja rEspíritu arjaꞌ nyowi ja utzlaj cꞌaslemal ja mta qꞌuisic trij, ma ja ta ja cuerpo xin jun winak nyowi. Ja tijonem xinyaꞌ chewe jariꞌ xin ewanma, jun tijonem ja nuyaꞌ chewe ja utzlaj cꞌaslemal ja mta qꞌuisic trij.

⁶⁴ Pro ecꞌoli chewe ja mta yukulbal quecꞌuꞌx wqꞌuin. Queriꞌ xbij ja Jesús como arjaꞌ ni rotakinto wiꞌ echinatak ja matiyukeꞌ quecꞌuꞌx ruqꞌuin in ni rotakinto wiꞌ chakajaꞌ nak xtijacho rxin pa quekꞌaꞌ ja winak ja netzelan rxin.

⁶⁵ In xbij chic chique: —Rmalariꞌ ja tok xinbij chewe chi mta moda xturkaji jun winak wqꞌuin chi nyukeꞌ rucꞌuꞌx wqꞌuin ja wi matiyataj tre rmal ja Tatixel chi nyukeꞌ rucꞌuꞌx wqꞌuin. Queriꞌ xbij ja Jesús chique.

⁶⁶ Ja cꞌa rdiscípulo ja Jesús tok quicꞌaxaj ja tijonem xuyaꞌ e qꞌuiy chique xemeloj can chiquij rmal, ma xetreꞌ chi ta trij.

⁶⁷ Ja cꞌa Jesús xbij chic chique ja cablajuj apóstol: —Ja cꞌa rixix ¿nak neban camic, la nixmeloj ixix chakajaꞌ? neꞌ chique.

⁶⁸ Ja cꞌa Simón Pedro quewaꞌ xbij tre riꞌ: —Wajaw ¿bar cꞌa nokbe chi wiꞌ? como xa ayon atat natyowi ja tijonem ja rcꞌamonto ja utzlaj cꞌaslemal ja mta qꞌuisic trij

⁶⁹ como ja rajoj yukul kacꞌuꞌx awqꞌuin in kotak chi atat ja rat Cristo, kotak chi at Ralcꞌwal ja cꞌaslic Dios, neꞌ tre.

⁷⁰ Ja cꞌa Jesús xbij chic chique: —Ix cablajuj ja rixnchaꞌon pro cꞌo jun chewe ja xa ucꞌan rmal ja diablo, neꞌe.

⁷¹ Jawaꞌ tzij xbij riꞌ, tre ja Judas Iscariote tzijon wiꞌ, rcꞌajol jun achi rbinaꞌan Simón como ja Judas arjaꞌ njachowi ja Jesús pa quekꞌaꞌ ja winak ja netzelan rxin, arjaꞌ jun chique ja cablajuj apóstol.