Hechos 9 - Tz'utujil (Ja Cꞌacꞌa Chominem)

¹ Ja cꞌa Saulo arjaꞌ ni cꞌo wiꞌ ryewal chique ja kachꞌalal, rmajon rcanoxic nak nuban chique chi quicamsaxic. Rmalcꞌariꞌ ja tok be ruqꞌuin ja lokꞌlaj sacerdote.

² Ja tok xekaj ruqꞌuin quewaꞌ xbij tre riꞌ: —Tatzꞌibajel juleꞌ carta ja nayaꞌel chwe ja nenbanaꞌ presentar pa tak jay xin molbal riꞌil ja cꞌo chipan ja tinamit Damasco. Jariꞌ nuyaꞌ lugar chwe chi neꞌencanoj ja winak ja quiniman chic ja Jesús in tok xquenuwil nenucojto preso chi ixokiꞌ chi achiꞌiꞌ in nenucꞌamto waweꞌ pa Jerusalén, neꞌe ja Saulo tre.

³ In queriꞌ xuban be ja pa Damasco. Kas cꞌa rmajon binem, xa chinakaj chic ja tinamit cꞌo wiꞌ ja tok chaka jalal cꞌo jun luz kajto chilaꞌ chicaj in xuqꞌuiak riꞌ trij.

⁴ Be chi tokꞌulew rmal ja luz in cꞌo jun kulaj xcꞌaxaj, quewaꞌ xbij ja kulaj tre riꞌ: —Saulo, Saulo ¿nak tre ja tok naban pokon chwe? Queriꞌ xbij tre.

⁵ —¿Nak abiꞌ? neꞌxi rmal ja Saulo. —Anin in Jesús, chwe anin ja ramajon wiꞌ rbanic pokon pro jariꞌ xa ayon nasoc awiꞌ caniꞌ nuban jun wacax ajcareta tok cꞌo jun cheꞌ chꞌut rutzaꞌm nya̱ꞌoc ruqꞌuin in nuyaꞌ jun akan tre, neꞌe ja Jesús.

⁶ Ja cꞌa Saulo congana nbirboti, kas cꞌascꞌoꞌi xcꞌaxaj ja bix tre: —Wajaw ¿nak nawajoꞌ chwe chi nban? neꞌ tre ja Jesús. —Catyictaji, jat chipan ja tinamit leꞌ in triꞌ nbix wiꞌ chawe nak ja naban, neꞌxi rmal ja kajaw Jesús.

⁷ Ecꞌo juleꞌ achiꞌiꞌ e rachbil ja Saulo ejeꞌeꞌ congana quixbej quiꞌ como cꞌoli ja kulaj quicꞌaxaj pro ma xecowin ta quetzꞌat ja ntzijoni.

⁸ Ja cꞌa Saulo yictaji ja chi tokꞌulew pro maticaꞌy chic, moyiri. Rmalcꞌariꞌ tok yukexel chi rukꞌaꞌ, cꞌamarel chipan ja tinamit Damasco.

⁹ Oxiꞌ kꞌij moyiri in mta nak ta xutij.

¹⁰ Cꞌo jun kachꞌalal pa Damasco Ananías rubiꞌ. Ja cꞌa kajaw Jesucristo arjaꞌ xucꞌut riꞌ chwach ja rAnanías caniꞌ pan achicꞌ in quewaꞌ xbij tre riꞌ: —Ananías, neꞌ tre. —Wajaw ¿nak nawajoꞌ chwe chi nban? neꞌxi rmal ja rAnanías.

¹¹ —Camic jat, tacꞌamaꞌel ja bey ja cꞌo jun rubiꞌ nbix tre Derecha neꞌxi, in natbe chi rochoch ja Judas. Ja tok xcatekaji triꞌ nacanoj wiꞌ jun achi aj Tarso Saulo rubiꞌ. Ja cꞌa Saulo arjaꞌ rmajon rbanic oración camic

¹² in cꞌoli ja rtzꞌaton caniꞌ pan achicꞌ chi atat xatbe ruqꞌuin in xayaꞌ akꞌaꞌ pa rwiꞌ utzcꞌa chi ncowini ncaꞌy chic jutij rwach, neꞌe ja kajaw Jesucristo tre.

¹³ —Pro Wajaw, e qꞌuiy ja winak quibin chwe nak rbanon ja Saulo chi congana pokon rbanon chique ja ratinamit ja recꞌo pa Jerusalén.

¹⁴ In cꞌuluto camic urkajnak chic waweꞌ, yaꞌonto tre cumal ja jefe quixin sacerdote chi cꞌo rukꞌaꞌ chake chi nokrucojel preso kanojel ja nkanataj abiꞌ, neꞌxi rmal ja rAnanías.

¹⁵ —Jat ruqꞌuin como arjaꞌ ocnak jun ajsamajel ja nchaꞌon chi neryaꞌaꞌ nbixic anin chique ja winak ja ma e aj Israel ta e cachbil ja rey ja nebano mandar quixin in chique ja tinamit Israel chakajaꞌ.

¹⁶ Como anin nchꞌobo chwach chi congana rpokonal nutij na pa nubiꞌ, neꞌe ja kajaw Jesucristo tre.

¹⁷ Ja cꞌa rAnanías be. Ja tok xekaji xoqui ja pa jay, xuyaꞌ rukꞌaꞌ pa rwiꞌ ja Saulo in quewaꞌ xbij tre riꞌ: —Wachꞌalal Saulo, ja kajaw Jesús arjaꞌ xucꞌut riꞌ chawach tokoriꞌ tok amajon bey atpenak. Arjaꞌ takyonto wxin awqꞌuin camic utzcꞌa chi ncaꞌy chic jutij ja rawach utzcꞌa chakajaꞌ chi nnoji ja rEspíritu Santo pan awanma, neꞌ tre.

¹⁸ Ja cꞌa Saulo chaka jalal tok bitaj queriꞌ tre cꞌoli caniꞌ rsolal chꞌuꞌ tzakel pa rwach in ncaꞌy chic jutij. Cꞌacꞌariꞌ yictaji in ban bautizar.

¹⁹ Xumaj chic jutij waꞌim in pi chic jutij ja rchokꞌakꞌ. Qꞌuejeꞌ chi na jun tiempo cuqꞌuin ja kachꞌalal ja recꞌo triꞌ pa Damasco.

* * * * * * * * * *

²⁰ Cꞌacꞌariꞌ xumaj oquem pa tak jay xin molbal riꞌil ja bar nquemol wiꞌ quiꞌ ja raj Israel in xumaj rbixic chique nak ocnak wiꞌ ja Jesús: —Ja Jesús arjaꞌ Ralcꞌwal Dios, neꞌ chique.

²¹ Canojel ja winak tok nquicꞌaxaj ja nbij ja Saulo congana nsa̱ch quinaꞌoj rmal, quewaꞌ nquibij chibil tak quiꞌ riꞌ: —¿La ma ja ta cꞌawaꞌ ja Saulo ja congana pokon xuban chique ja winak pa Jerusalén ja nquinataj rubiꞌ ja Jesús? ¿La ma urkajnak ta cꞌa chakajaꞌ chi neꞌurcꞌamaꞌ ja recꞌo waweꞌ chi nerucojel preso in nerujachel pa quekꞌaꞌ ja jefe quixin sacerdote? necheꞌe.

²² Pro ja cꞌa Saulo arjaꞌ xa más chi na nuyaꞌ rbixic ja rtzobal Dios, bien claro nuchꞌob chiquewach ja winak chi ja Jesús arjaꞌ ja Cristo ja chaꞌon rmal ja Dios. Ja cꞌa raj Israel ja recꞌo triꞌ pa Damasco ejeꞌeꞌ sach quinaꞌoj rmal como maquecowini nquechꞌaꞌ tre ja Saulo ja nbij.

* * * * * * * * * *

²³ Cꞌo chic tiempo turkaji ja Saulo pa Damasco ja tok ja raj Israel ejeꞌeꞌ chomtaj cumal chi nquicamsaj.

²⁴ Pro ja Saulo xekaj rbixic ruqꞌuin nak ja quichꞌobon trij. Ejeꞌeꞌ chi pa kꞌij chi chakꞌaꞌ ni ncaybej wiꞌ ja Saulo chiꞌ tak puerta ja bar natel wiꞌ chipan ja tinamit como ncajoꞌ nquicamsaj.

²⁵ Pro ja kachꞌalal ejeꞌeꞌ cꞌo jun nimlaj chacach quicanoj, queyaꞌ ja Saulo chipan in chakꞌaꞌ quikajsaj trij ja tabia ja rsutin riꞌ trij ja tinamit. Queriꞌ xuban totaji ja Saulo.

* * * * * * * * * *

²⁶ Cꞌacꞌariꞌ be pa Jerusalén. Ja tok xekaji rajoꞌ ta qꞌuejeꞌ ta cuqꞌuin ja kachꞌalal pro ejeꞌeꞌ xa nquixbej quiꞌ chwach canojel como matiquinimaj chi arjaꞌ yukul chic rucꞌuꞌx ruqꞌuin ja Jesucristo.

²⁷ Pro ja Bernabé arjaꞌ cꞌamoꞌel rxin, xercojoꞌ chiquewach ja rapóstol. Xumaj rcholic chiquewach nak xuban ja Saulo tokoriꞌ tok xutzꞌat ja kajaw Jesucristo pa bey in tok kꞌilox rmal. In xuchol chiquewach chakajaꞌ chi ja Saulo ma xbej ta riꞌ xuyaꞌ rbixic ja rtzobal ja Jesús chiquewach ja winak ja recꞌo pa Damasco.

²⁸ Cꞌacꞌariꞌ ja Saulo cꞌul cumal ja kachꞌalal in xoc cachbil pa Jerusalén.

²⁹ Arjaꞌ matixbej riꞌ nuyaꞌ rbixic ja rtzobal ja kajaw Jesús. Ja tok xuyaꞌ rbixic chique ja raj Israel ja netzijon pa griego ejeꞌeꞌ xa nquechꞌaꞌ tre ja nbij in quemaj rcanoxic rij rwach nak nqueban tre chi rcamsaxic.

³⁰ Ja cꞌa kachꞌalal tok xurkaj rbixic cuqꞌuin chi najoꞌxi ncamsaxi ja Saulo ejeꞌeꞌ quecꞌamel pa Cesarea. Ja tok xeꞌekaji pa Cesarea quetakel chic pa Tarso.

³¹ Ja cꞌa riglesia ejeꞌeꞌ mchita pokon ban chique tanto chique ja recꞌo chipan ja departamento Judea in chique ja recꞌo chipan ja departamento Galilea in chique chakajaꞌ ja recꞌo chipan ja departamento Samaria. Xeqꞌuiy más chipan ja rtzobal Dios. Nquixbej quiꞌ chwach ja kajaw Dios. Ja rEspíritu Santo arjaꞌ toꞌo quixin in xebe más pa nim rmal.

* * * * * * * * * *

³² Ja cꞌa Pedro arjaꞌ ni cꞌo wiꞌ viaje nuban chi quikꞌiloxic ja kachꞌalal. Xuban jutij be cuqꞌuin ja kachꞌalal ja recꞌo chipan ja tinamit Lida.

³³ Ja tok xekaji triꞌ cꞌo wiꞌ jun achi xuwil Eneas rubiꞌ. Ja cꞌa rEneas arjaꞌ tuban waxakiꞌ junaꞌ tiqꞌuejeꞌ chwach rwarbal como siquirnak.

³⁴ Ja cꞌa Pedro xbij tre: —Eneas, camic ja Jesucristo natrtzursaj. Catyictaji, tachomij ja rawarbal, neꞌ tre. In queriꞌ xuban ja rEneas yictaji.

³⁵ Canojel ja winak ja recꞌo pa Lida e cachbil chakajaꞌ ja recꞌo pa Sarón ejeꞌeꞌ quetzꞌat ja rEneas chi tzuri. Rmalcꞌariꞌ ja tok queqꞌuex quinaꞌoj in yukeꞌ quecꞌuꞌx ruqꞌuin ja kajaw Jesucristo.

* * * * * * * * * *

³⁶ Cꞌo cꞌa jun kachꞌalal ixok chipan ja tinamit Jope, Tabita rubiꞌ. Ja chipan ja tzobal griego, Dorcas rubiꞌ. Ja cꞌa Dorcas arjaꞌ ni cꞌo wiꞌ ja rutzil rbanon, ni cꞌo wiꞌ nuyaꞌ chique ja winak ja cꞌo rjawaxic chique.

³⁷ Ja Pedro cꞌa cꞌo na chipan ja tinamit Lida ja tok chaka jalal xoc ryobil ja Dorcas in cami. Quijoskꞌij ja rcuerpo. Ja tok joskꞌtaj cumal queyaꞌ pa jun cuarto ja cꞌo pa caꞌiꞌ piso.

³⁸ Ja tinamit Lida xa ma nim ta rcojol ruqꞌuin ja tinamit Jope. Ja cꞌa kachꞌalal ja recꞌo pa Jope como cotak chi pa Lida cꞌo wiꞌ ja Pedro ecꞌo caꞌiꞌ achiꞌiꞌ xequetakel ruqꞌuin chi nequisiqꞌuij. Ja cꞌa tok xeꞌekaj ruqꞌuin ja Pedro quewaꞌ quibij tre riꞌ: —Camic natsiqꞌuix pa Jope pro chanim, xecheꞌ tre.

³⁹ Yictaji ja Pedro in be chiquij. Ja cꞌa tok xekaji cꞌamarel chipan ja cuarto ja bar cꞌo wiꞌ ja camnak. Ecꞌo cꞌa juleꞌ ixokiꞌ triꞌ e malcaniꞌ, ejeꞌeꞌ quimajon okꞌej, quemaj rcꞌutic chwach ja Pedro nojel ja tziak ja rbanon can ja Dorcas.

⁴⁰ Ja cꞌa Pedro arjaꞌ xerlasajel canojel ja recꞌo chipan ja cuarto. Ja tok xelastajel rmal xuqueꞌe in xuban jun oración. Cꞌacꞌariꞌ be ruqꞌuin ja camnak in quewaꞌ xbij riꞌ: —Tabita, catyictaji, neꞌ tre. Ja cꞌa Dorcas arjaꞌ xujak rwach in tok xutzꞌat ja Pedro tzꞌabeꞌ nojoj.

⁴¹ Ja cꞌa Pedro xuchap chi rukꞌaꞌ in xuyic. Cꞌacꞌariꞌ xersiqꞌuij ja malcaꞌn tak ixokiꞌ e cachbil ja juleꞌ chic kachꞌalal in xucꞌut ja Dorcas chiquewach pro cꞌastajnak chic.

⁴² Xel rbixic ja bantaji nojel nat nakaj chipan ja tinamit Jope in e qꞌuiy ja winak yukeꞌ quecꞌuꞌx ruqꞌuin ja kajaw Jesucristo rmal.

⁴³ Ja cꞌa Pedro arjaꞌ qꞌuejeꞌ chi na jun tiempo pa Jope. Cꞌo jun achi tzacol tzꞌum Simón rubiꞌ, ruqꞌuin qꞌuejeꞌ wiꞌ.