Hechos 5 - Tz'utujil (Ja Cꞌacꞌa Chominem)

¹ Pro cꞌo chi na jun ja rachi Ananías rubiꞌ in ja rxjayil Safira rubiꞌ. Ejeꞌeꞌ cꞌo jun ulew quicꞌayij chakajaꞌ.

² Ja rAnanías cꞌo jalal rjil ja rulew qꞌuejeꞌ can ruqꞌuin in ja cꞌa jalal chic jariꞌ xucꞌamel, xujach pa quekꞌaꞌ ja rapóstol pro xbij chique chi xa jariꞌ rjil nojelal ja rulew. Xa junan quechꞌob ruqꞌuin ja rxjayil chi queriꞌ nqueban.

³ Ja cꞌa tok jachtaj rmal quewaꞌ bix tre rmal ja Pedro riꞌ: —Ananías, cꞌo jalal rjil ja rulew qꞌuejeꞌ can awqꞌuin. ¿Nak tre ja tok xaban queriꞌ? ¿Nak tre ja tok xayaꞌ lugar tre ja Satanás chi xoc pan awanma in xatrtakchiꞌij chi xatzꞌak tzij chwach ja rEspíritu Santo?

⁴ ¿La ma awxin ta laꞌan chewiꞌ ja rulew? in cꞌol akꞌaꞌ tre chi xacꞌayij. In ja rjil chakajaꞌ awqꞌuin atat cꞌo wiꞌ nak naban tre pro ja ma utz ta xaban xatzꞌak tzij. ¿Nak tre ja tok xaban queriꞌ? Chwach Dios xatzꞌak wiꞌ tzij, ma chiquewach ta winak, neꞌxi ja rAnanías.

⁵ Ja cꞌa rAnanías tok xcꞌaxaj ja bix tre be chi tokꞌulew in cami. Ja cꞌa winak tok quicꞌaxaj chi cami ja rAnanías congana quixbej quiꞌ rmal.

⁶ Ecꞌo cꞌa juleꞌ cꞌajolaꞌ ejeꞌeꞌ xebe ruqꞌuin ja camnak chi rbatzꞌic. Ja tok batzꞌtaj cumal quitelejel in xequimukuꞌ.

⁷ Cꞌo la oxiꞌ hora ticami ja rAnanías ja tok xekaji rxjayil cuqꞌuin ja rapóstol. Arjaꞌ ni majun nak ta rnaben chi cami ja rchajil.

⁸ Ja cꞌa Pedro quewaꞌ xbij tre riꞌ: —Tabij chwe, ja tok xecꞌayij ja rulew ¿la xa jariꞌ rjil nojelal ja caniꞌ xejach pa kakꞌaꞌ? Queriꞌ xbij tre. —Xa jariꞌ rjil nojelal, neꞌxi rmal ja rixok.

⁹ —¿Nak tre tok xa junan xechꞌob ruqꞌuin ja rawachajil, nak tre tok laj xewajoꞌ xecꞌambajaj ja rEspíritu Santo xin Dios ja kajaw? Tatzꞌataꞌ mpeꞌ leꞌ, camic xemelojto ja xeꞌemuku rxin ja rawachajil in camic natcam chic atat, natquitelejel in natequimukuꞌ chakajaꞌ, neꞌe ja Pedro tre.

¹⁰ Ja cꞌa tok bitaji tzij riꞌ be chi tokꞌulew ja Safira, chwach ja Pedro puneꞌ kaj wiꞌ in cami. Ja cꞌajolaꞌ tok xeꞌurkaji quetzꞌat chi camnak chic. Cꞌacꞌariꞌ quitelejel in xequimukuꞌ chic. Pa rxquin ja rchajil quemuk wiꞌ.

¹¹ Ja cꞌa riglesia congana quixbej quiꞌ canojelal in queriꞌ queban canojel ja juleꞌ chic winak chakajaꞌ ja tok quicꞌaxaj ja bantaji.

* * * * * * * * * *

¹² Ja cꞌa rapóstol cꞌo juleꞌ nimak tak milagro nqueban chiquewach ja winak. Ja kachꞌalal xa jun quibanon canojelal. Cꞌo jun pa rkan jay chuchiꞌ ja nimlaj templo xin Dios in cꞌo rubiꞌ ja pa rkan jay, xin Salomón neꞌxi, in triꞌ nquemol wiꞌ quiꞌ ja kachꞌalal.

¹³ Ja cꞌa juleꞌ chic winak ejeꞌeꞌ nquixbej quiꞌ chi xqueꞌoc ta chiquicojol ja kachꞌalal pro utz xetzꞌati ja kachꞌalal cumal ja tinamit.

¹⁴ Más chi na e qꞌuiy ja winak yukeꞌ quecꞌuꞌx ruqꞌuin ja Jesucristo tanto chique achiꞌiꞌ in chique ixokiꞌ chakajaꞌ in xeꞌoc cachbil ja kachꞌalal.

¹⁵ Ecꞌoli ja yawaꞌiꞌ xelasaxel pa tak bey eyaꞌon chwach tak quiwarbal. Queriꞌ ban chique utzcꞌa ja Pedro tok npeti masqui xa rnatuꞌ nkꞌax chiquij ni netzuri.

¹⁶ In chakajaꞌ e qꞌuiy chique ja winak ja recꞌo pa tak tinamit ja cꞌo chinakaj ja tinamit Jerusalén ejeꞌeꞌ xequecꞌamto ja yawaꞌiꞌ ja recꞌo cuqꞌuin, xequecꞌamto ja remajtajnak cumal itzel tak espíritu in xetzuri canojel.

* * * * * * * * * *

¹⁷ Pro yictaji ja lokꞌlaj sacerdote in xeyictaji chakajaꞌ canojel ja recꞌo ruqꞌuin, ejeꞌeꞌ riꞌ ja saduceo, ejeꞌeꞌ congana quiakirnak canma chiquij ja rapóstol.

¹⁸ Xequechap in xequecoj pa cheꞌ.

¹⁹ Pro cꞌo jun ángel xin Dios xurkaji chakꞌaꞌ, xujak ruchiꞌ ja cheꞌ in xerlasajto ja rapóstol. Ja cꞌa tok xelastajto quewaꞌ bix chique rmal ja ángel riꞌ:

²⁰ —Camic jix chipan ja nimlaj templo xin Dios, jeyaꞌaꞌ rbixic chique ja winak nak rbanic ja cꞌacꞌa cꞌaslemal ja nuyaꞌ ja Jesucristo, xecheꞌxi.

²¹ Ja tok quicꞌaxaj ja bix chique xebe, kas nsamukeꞌe xeꞌekaj chipan ja templo in quemaj quitijoxic ja winak. Ja lokꞌlaj sacerdote in ja recꞌo ruqꞌuin ejeꞌeꞌ quemol quiꞌ cuqꞌuin ja kꞌetol tak tzij rxin ja tinamit Israel, xequetakel juleꞌ pulisiyaꞌ chi quicꞌamaric ja rapóstol.

²² Pro ja pulisiyaꞌ tok xeꞌekaji quetzꞌat chi ma ecꞌo chi ta ja rapóstol pa cheꞌ. Cꞌacꞌariꞌ xemelojto, xurquiyaꞌaꞌ rbixic ja bantaji.

²³ Quewaꞌ quibij riꞌ: —Ja tok xokekaji chuchiꞌ ja cheꞌ bien tzꞌapali in bien chajin cumal ja soldado chakajaꞌ. Pro ja tok kajak ruchiꞌ ni majun winak cꞌo chi ta chipan, xecheꞌe.

²⁴ Ja lokꞌlaj sacerdote rachbil ja jefe quixin ja chajil templo e rachbil ja juleꞌ chic sacerdote ja nimak quekꞌij ejeꞌeꞌ congana sach quinaꞌoj rmal ja bix chique in quewaꞌ quibij chibil tak quiꞌ riꞌ: —¿Nak la cꞌa xtuban awaꞌ ja bantaji riꞌ? xecheꞌe.

²⁵ Cꞌacꞌariꞌ cꞌo jun achi xekaj cuqꞌuin in xbij chique: —Ja rachiꞌiꞌ ja xeꞌecoj pa cheꞌ, camic quimajon quitijoxic ja winak chipan ja nimlaj templo xin Dios. Queriꞌ xbij chique.

²⁶ Ja cꞌa jefe quixin ja chajil templo e rachbil ja pulisiyaꞌ xebe chi quicꞌamaric ja rapóstol. Ja cꞌa tok xeꞌekaj cuqꞌuin xequechap pro xarwariꞌ mta pokon queban ta chique como nquixbej quiꞌ chiquewach ja winak: —Matzij koqueqꞌuiak tzaꞌn abaj, xecheꞌe. Cꞌacꞌariꞌ xequecꞌamto ja rapóstol.

²⁷ Ja cꞌa tok xeꞌurkaji xequejach pa quekꞌaꞌ ja kꞌetol tak tzij. Ja cꞌa lokꞌlaj sacerdote quewaꞌ xbij chique ja rapóstol riꞌ:

²⁸ —Ajoj cow xixkachap, kabij chewe chi ma tenataj chi ta rubiꞌ ja Jesús chiquewach ja winak. ¿Nak cꞌa tre ja tok matenimaj ja kabij chewe? Como ja tijonem neyaꞌ congana benak pa nim camic waweꞌ chipan ja tinamit Jerusalén in cꞌuluto newajoꞌ neyaꞌ chakij chi ajoj xokcamsan rxin ja Jesús, neꞌ chique.

²⁹ Ja cꞌa Pedro e rachbil ja juleꞌ chic apóstol quewaꞌ quibij chique riꞌ: —Ajoj puersa nkanimaj ja nbij ja Dios chake chi nkaban chwach ja nixkanimaj ixix.

³⁰ Ixix xecꞌutuj rcamic ja Jesús, xecꞌutuj chi nri̱p chwach cruz. Pro ja katataꞌ Dios ja Dios quixin ja katiꞌt kamamaꞌ arjaꞌ xucꞌas chiquicojol camnakiꞌ.

³¹ Ja Dios congana xucoj rchokꞌakꞌ, xuyaꞌ tre ja Jesús chi más nim chi na rukꞌij in ja camic rcojon como Jefe pa kawiꞌ, rcojon como Toꞌonel kaxin. Queriꞌ xuban ja Dios como ja kas nrajoꞌ chewe ja rix wach tak aj Israel chi neqꞌuex ja renaꞌoj in neyaꞌ can ja ritzelal utzcꞌa chi ncuytaji ja rewil emac.

³² Nojel ja cꞌa kabij kaj chewe riꞌ jariꞌ katzꞌaton in kacꞌaxan in chakajaꞌ ja rEspíritu Santo arjaꞌ rmajon rkꞌalasaxic chi ni katzij wiꞌ. Ja Dios arjaꞌ rtakonto ja rEspíritu Santo kuqꞌuin kanojel ja nokniman rxin. Queriꞌ quibij ja rapóstol chique.

³³ Ja tok quicꞌaxaj ja bix chique congana pi quiyewal rmal, ncajoꞌ nequicamsaj ja rapóstol.

³⁴ Pro triꞌ cꞌo wiꞌ jun fariseo Gamaliel rubiꞌ, arjaꞌ jun chique ja maestro ja netijon quixin ja winak tre ja ley xin Dios in congana utz ntzꞌa̱t cumal ja tinamit canojel. Ja cꞌa Gamaliel peꞌi in xbij chique ja rapóstol chi neꞌel jurata chiquicojol.

³⁵ Ja cꞌa tok eꞌelnak chic xumaj tzij ja Gamaliel cuqꞌuin ja rach kꞌetol tak tzij: —Achiꞌiꞌ ja rix wach tak aj Israel, kas techꞌoboꞌ na jutzꞌit ja neban chique ja rachiꞌiꞌ.

³⁶ Turkaj chewe nak bantaji ja tok cꞌo jun achi yictaji Teudas rubiꞌ, arjaꞌ xucoj riꞌ ruyon como jun nimlaj achi in ecꞌo la quijiꞌ ciento ja rachiꞌiꞌ ja quecoj quiꞌ ruqꞌuin. Pro ja Teudas arjaꞌ camsaxi in xeꞌanmaji ja rachbil canojelal. Queriꞌ queban, pan ekal xeqꞌuisi, mta nak ta queban.

³⁷ In cꞌo chi na jun ja rachi rbinaꞌan Judas ja raj Galilea queriꞌ xuban chakajaꞌ como arjaꞌ yictaji tokoriꞌ tok cꞌo jun censo bani in e qꞌuiy ja winak ja quecoj quiꞌ ruqꞌuin. Pro ja Judas arjaꞌ camsaxi chakajaꞌ in xechictaji ja rachbil canojelal.

³⁸ Rmalcꞌariꞌ tok nbij chewe camic, maxta cꞌoli nak ta teban chique ja rachiꞌiꞌ pro mejor ja neban, queꞌesokpijel. Queriꞌ nbij chewe como nojel ja quimajon rbanic wi xa tijonem quixin winak jariꞌ xa nqꞌuis kaj ruyon.

³⁹ Pro wi tijonem xin Dios ja nqueyaꞌ jariꞌ mta moda xteyoj ta ixix. Kas tebanaꞌ cuenta, matzij xa ruqꞌuin Dios quixchꞌojin wiꞌ, neꞌe ja Gamaliel chique ja rachbil.

⁴⁰ Ejeꞌeꞌ chꞌobtaj cumal ja bix chique, quetak quicꞌamaric ja rapóstol. Ja tok xeꞌurkaji ja rapóstol xequirapaj in quewaꞌ quibij chic chique riꞌ: —Ma tenataj chi ta rubiꞌ ja Jesús chiquewach ja winak, xecheꞌ chique. Cꞌacꞌariꞌ xequisokpijel.

⁴¹ Xebe ja rapóstol, congana nequicoti como yataj chique chi quetij pokon pa rubiꞌ ja Jesucristo.

⁴² Kꞌij kꞌij ni nequitijoj wiꞌ ja winak chipan ja templo in chi tak jay chakajaꞌ, ni nqueyaꞌ wiꞌ rbixic ja Jesucristo chique.