Hechos 3 - Tz'utujil (Ja Cꞌacꞌa Chominem)

¹ Queban jutij ja Pedro rachbil Juan xebe chipan ja nimlaj templo xin Dios a las tres xin takakꞌij, jariꞌ hora xin oración.

² Nojel tak kꞌij ni cꞌo wiꞌ jun achi triꞌ arjaꞌ ti cojo, ni pa ralaxic wiꞌ chi cojo. Cꞌamonel ja ti cojo chipan ja templo, yaꞌon chuchiꞌ jun puerta. Cꞌo rubiꞌ nbix tre ja puerta, La Hermosa neꞌxi. Triꞌ nya̱ꞌ can wiꞌ ja ti cojo chi rcꞌutuxic limosna chique ja winak ja neꞌoc chipan ja templo.

³ Ja cꞌa tok xerutzꞌat ja Pedro rachbil Juan chi neꞌoc chipan ja templo cꞌo jun limosna xcꞌutuj chique.

⁴ Ja cꞌa rejeꞌeꞌ quitzꞌelwachij in ja Pedro quewaꞌ xbij tre riꞌ: —Koꞌatzꞌelwachij, neꞌ tre.

⁵ Ja ti cojo congana xuyaꞌ rxquin, ja xuchꞌob arjaꞌ chi cꞌoli nsipax can tre.

⁶ Pro ja Pedro quewaꞌ xbij tre riꞌ: —Anin ni majun pwok cꞌo wqꞌuin pro ja Dios arjaꞌ ryaꞌon chwe chi nincowini natntzursaj. Camic nbij chawe, pa rubiꞌ ja Jesucristo ja raj Nazaret catyictaji in catbini, neꞌ tre.

⁷ Cꞌacꞌariꞌ ja Pedro xuchap chi riquikꞌaꞌ, xuyic in ni jariꞌ hora tzuri ja rkan.

⁸ Ja cꞌa cojo xuqꞌuiak riꞌ chicaj, peꞌi in xumaj binem. Xerachbilajel ja Pedro in Juan, xeꞌoc chipan ja templo. Congana nuqꞌuiak riꞌ chicaj, janila nuyaꞌ rukꞌij ja Dios.

⁹ Canojel ja winak quetzꞌat chi ncowin chic nbini, quetzꞌat chi rmajon ryaꞌic rukꞌij ja Dios.

¹⁰ Congana sach quinaꞌoj rmal, congana cꞌascꞌoꞌi quetzꞌat ja milagro ja bantaji. Queriꞌ queban como bien cotak chi ja rachi arjaꞌ mismo ja ni ntzꞌabeꞌ wiꞌ chipan ja templo ja bar cꞌo wiꞌ jun puerta rbinaꞌan La Hermosa in triꞌ ncꞌutuj wiꞌ ja limosna.

* * * * * * * * * *

¹¹ Ja rachi ni maqueruyaꞌ can wiꞌ ja Pedro in Juan. Ecꞌo chipan ja templo ja bar cꞌo wiꞌ jun nimlaj rkan jay ja binaꞌan tre xin Salomón neꞌxi. Ja cꞌa winak matichꞌobtaj cumal ja bantaji in xebe alnak canojel cuqꞌuin ja Pedro.

¹² Ja cꞌa Pedro tok xerutzꞌat quewaꞌ xbij chique riꞌ: —Achiꞌiꞌ ja rix kach tak aj Israel ¿nak tre ja tok matichꞌobtaj emwal ja bantaji riꞌ? ¿Nak tre ja tok kas emajon katzꞌelwachixic? ¿La ajoj xoktzursani ja rachi nechꞌob ixix? Ja rachi arjaꞌ ncowin chic nbini pro ma rmal ta jun poder kaxin ta ajoj xa chewiꞌ tok tzuri in ma rmal ta chakajaꞌ chi ajoj ok utzlaj tak winak.

¹³ Ja Dios quixin ja rAbraham, ja rIsaac in Jacob, ja Dios quixin ja katiꞌt kamamaꞌ arjaꞌ bien xkꞌalasaj chi congana nim rukꞌij ja Jesús ja Ralcꞌwal. Pro ixix xejach ja Jesús pa quekꞌaꞌ ja kꞌetol tak tzij. Ja Pilato arjaꞌ rajoꞌ ta xsokpijel pro ma xewajoꞌ ta ixix.

¹⁴ Ja Jesús arjaꞌ chaꞌon rmal ja Dios, arjaꞌ ni majun ril rumac pro ma xeyaꞌ ta lugar tre chi nsokpixel pro ja xeban, cꞌo jun achi camsanel jariꞌ xecꞌutuj chi sokpixel.

¹⁵ Xecamsaj ja Jesús ja Yoꞌl cꞌaslemal pro ja Dios arjaꞌ xuyaꞌ tre chi cꞌastaji chiquicojol camnakiꞌ. Jariꞌ katzꞌat ruqꞌuin kawach in kamajon rbixic camic.

¹⁶ Camic emajon rtzꞌatic ja rachi riꞌ ja tzuri in bien ewotak rwach. Pa rubiꞌ ja Jesús tok tzuri. Ja Dios arjaꞌ tzursan rxin como ajoj cꞌo yukulbal kacꞌuꞌx ruqꞌuin ja Jesús. Ja Jesús arjaꞌ ryaꞌon chake chi cꞌo yukulbal kacꞌuꞌx ruqꞌuin in rmal ja yukulbal kacꞌuꞌx ruqꞌuin ja Jesús chewiꞌ tok utz chic ja rachi, mchita ntiꞌon tre in ni chewach ja tok tzuri.

¹⁷ Ixix ja rix kach tak aj Israel, ja tok xecꞌutuj rcamic ja Jesús wotak chi xa ma ewotak ta ja neban in queriꞌ chique ja kꞌetol tak tzij ja recꞌo checojol chakajaꞌ.

¹⁸ Pro ja xeban jariꞌ ni rchominto wiꞌ ja Dios in queriꞌ bantaji ja caniꞌ rbin can ojer chipan ja rtzobal. Como canojel ja profeta xin Dios ejeꞌeꞌ quitzꞌiban can ojer chi ja Cristo nutij na ja rpokonal.

¹⁹ Rmalcꞌariꞌ tok nbij chewe, teqꞌuexaꞌ ja renaꞌoj in teyaꞌaꞌ can ja ritzelal. In quixmelojto ruqꞌuin ja Dios utzcꞌa chi nchuptaji ja rewil emac. Quirtariꞌ neban utzcꞌa chi newilaꞌ jun tiempo ja tok nqꞌuejeꞌe ja kajaw Dios checojol in nixquicot rmal.

²⁰ Quirtariꞌ neban utzcꞌa ja Dios xtutakpi chic jutij ja Jesús ja Cristo ja chaꞌon rmal ja Dios chi noc Toꞌonel ewxin.

²¹ Ja Jesús arjaꞌ nqꞌuejeꞌ na chilaꞌ chicaj camic pro nerilaꞌ na jun kꞌij ja tok xtipi chic jutij chi nurchomij na nojelal ja yojtajnak tre ja rwachꞌulew ja caniꞌ bin can cumal ja santilaj tak profeta ojer chipan ja rtzobal Dios.

²² Como caniꞌ rbin can ja Moisés chique ja katiꞌt kamamaꞌ ojer quewariꞌ: —Ja kajaw Dios arjaꞌ cꞌo jun profeta ja xtutakto na ewqꞌuin ja caniꞌ xuban anin chwe tok xinrutak. Jariꞌ profeta arjaꞌ kach aj Israel in bien teyaꞌaꞌ ewxquin tre xa nak ta ja xtibij chewe.

²³ Xa nak ta ja mta rgana ncꞌaxaj ja nbij ja profeta ejeꞌeꞌ cꞌo jun juicio npi na chiquij in nelasaxi chijutij chiquicojol ja tinamit xin Dios. Queriꞌ rbin can ja Moisés, neꞌe ja Pedro chique.

²⁴ In xbij chic jutij chique. —Canojel ja profeta xin Dios ejeꞌeꞌ quibin can ojer nak nbantaj na trewaꞌ tiempo ja rokcꞌo wiꞌ riꞌ, majtajto rbixic rmal ja rojer profeta Samuel in xa junan quibin can ja juleꞌ chic profeta chakajaꞌ.

²⁵ Ixix ix quiy quemam can ja profeta xin Dios, ewxin ixix chakajaꞌ ja rutzil ja rtzujun can ja Dios ojer tokoriꞌ xtzujuj can ja tok cꞌo jun chominem ja xchomij cuqꞌuin ja katiꞌt kamamaꞌ ja tok quewaꞌ xbij tre ja rAbraham riꞌ: —Nojel tinamit ja recꞌo chwachꞌulew cꞌoli ja rutzil xin Dios ja nyataj na chique pro rmal ja rawiy amam ja majaꞌn talaxi tok nba̱n queriꞌ chique, neꞌe ja Dios tre.

²⁶ Ja Dios xutakto ja Jesús ja Ralcꞌwal in ewqꞌuin ixix ja rix kach tak aj Israel xutak wiꞌ nabey. Queriꞌ xuban como arjaꞌ nrajoꞌ nuyaꞌ ja rutzil chewe utzcꞌa chi neyaꞌ can ja ritzelal chejujunal. Queriꞌ xbij ja Pedro chique.