Hechos 28 - Tz'utujil (Ja Cꞌacꞌa Chominem)

¹ Ja tok katoꞌon chic kiꞌ cꞌa tokoriꞌ kotakij rubiꞌ ja lugar ja bar okcꞌo wiꞌ, Malta rubiꞌ.

² Ja winak ja raj Malta congana lokꞌ xokquenaꞌ. Como congana tew in najin jab chakajaꞌ rmalcꞌariꞌ tok quebox jun kꞌakꞌ, kas quiꞌil kacꞌulic queban.

³ Ja cꞌa Pablo arjaꞌ cꞌo juleꞌ xcꞌaꞌy rcanon, kas rmajon ryaꞌic pa kꞌakꞌ tok chaka jalal cꞌo jun itzel cumatz xelto rmal ja cꞌatan, ni tzakeꞌ chi rukꞌaꞌ ja Pablo.

⁴ Ja cꞌa raj Malta tok quetzꞌat chi tzakal jun itzel cumatz chi rukꞌaꞌ quewaꞌ quibij chibil tak quiꞌ riꞌ: —Jalaꞌ jun achi leꞌ xa camsanel, kꞌalaj. Masqui xutoꞌ riꞌ pa mar pro ja camic nutoj na ja ritzelal ja rbanon, ncami, xecheꞌe.

⁵ Ja cꞌa Pablo xquiraj rukꞌaꞌ in tzak kaj pa kꞌakꞌ ja cumatz, mta nak ta xuban ja Pablo.

⁶ Ja cꞌa winak quimajon rtzꞌelwachixic ja Pablo, ja nquechꞌob ejeꞌeꞌ nsapoji owi chaka jalal nbe pa tokꞌulew in ncami. Nim ja tiempo quitzꞌelwachij pro ja tok mta nak ta xuban junwiꞌ chic nquechꞌob trij: —Jalaꞌ jun dios, xecheꞌe.

⁷ Cꞌo juleꞌ ulew chinakaj ja bar okcꞌo wiꞌ, rxin jun achi, Publio rubiꞌ. Ja cꞌa Publio arjaꞌ gobernador xin Malta. Xokrucꞌul pa rochoch in oxiꞌ kꞌij xokqꞌuejeꞌ ruqꞌuin, congana lokꞌ xokrunaꞌ.

⁸ Cꞌo rtataꞌ ja Publio, xuban jutij yawaji, cꞌo chwa chꞌat, majtajnak rmal cꞌatan in chꞌuculem. Be ja Pablo chi rkꞌiloxic. Ja cꞌa tok xekaj ruqꞌuin xumaj jun oración. Ja cꞌa tok tzuri ja roración rmal xuyaꞌ rukꞌaꞌ parwiꞌ in xtzursaj.

⁹ Cꞌacꞌariꞌ xepeti ja juleꞌ chic yawaꞌiꞌ ja recꞌo pa Malta, ejeꞌeꞌ xetzursaxi chakajaꞌ.

¹⁰ Congana xel quecꞌuꞌx chakij, cꞌo ta man ta queban ta chake in pior cꞌa tok xokoquel chic jutij pa lancha quecoj chipan xa nak ta ja ncꞌatzin tre kaviaje.

* * * * * * * * * *

¹¹ Oxiꞌ icꞌ xokqꞌuejeꞌ triꞌ pa Malta ja tok xokoquel chic jutij pa lancha. Ja cꞌa lancha penak chipan ja tinamit Alejandría in pa Malta cꞌo chi wiꞌ como rayben nak kꞌij nocꞌowi ja rtiempo ikꞌ. Ecꞌo caꞌiꞌ cachbal dios quibanon ja winak pa rutzaꞌm ja lancha, jun Cástor rubiꞌ, in jun chic Pólux.

¹² Xokbe, xokekaj chipan ja tinamit Siracusa in triꞌ xokqꞌuejeꞌ chi wiꞌ oxiꞌ kꞌij.

¹³ Xokbe chic, xokkꞌax chiꞌ tak mar in xokekaj chic chipan ja tinamit Regio. Ja cꞌa chi rcab kꞌij xumaj xcomel in xokbe chic, ja cꞌa chi rox kꞌij xokekaj chic chipan ja tinamit Puteoli.

¹⁴ Triꞌ ecꞌo wiꞌ juleꞌ kachꞌalal xekawil, ejeꞌeꞌ xokqueban invitar chi nokqꞌuejeꞌ jun semana cuqꞌuin. Ja cꞌa tok tzꞌakati ja jun semana kumal cꞌacꞌariꞌ xokbe chic pa Roma.

¹⁵ Ja cꞌa kachꞌalal ja recꞌo pa Roma ejeꞌeꞌ xekaj rbixic cuqꞌuin nak kabanon cꞌacꞌariꞌ xeꞌelto chipan ja tinamit, xokurquicꞌuluꞌ pa bey. Ecꞌo juleꞌ chique kacꞌul kiꞌ cuqꞌuin pa jun lugar, Foro xin Apio rubiꞌ. Ja juleꞌ chic xokcaybej pa jun lugar rbinaꞌan Tres Tabernas. Ja cꞌa Pablo tok xerutzꞌat xmaltioxij tre ja Dios in congana quicot ranma cumal.

¹⁶ Ja cꞌa tok xokekaji pa Roma ja capitán arjaꞌ xerujach can ja preso pa rukꞌaꞌ ja jefe ja paꞌl chiquij juleꞌ soldado ja nechajin quixin ja preso. Pro ja Pablo arjaꞌ yataj lugar tre chi junwiꞌ nqꞌuejeꞌ wiꞌ ruyon rachbil jun soldado ja nchajin rxin.

* * * * * * * * * *

¹⁷ Ja Pablo oxiꞌ kꞌij tekaji pa Roma ja tok xutak quisiqꞌuixic ja principaliꞌ quixin ja raj Israel ja recꞌo triꞌ. Ja tok xeꞌekaj ruqꞌuin quewaꞌ xbij chique riꞌ: —Wach tak aj Israel, anin masqui mta nbanon chique ja kach tak aj tinamit nixtacꞌa itzel ta intzijonnak ta tre ja costumbre quixin ja katiꞌt kamamaꞌ pro ejeꞌeꞌ xinquecoj preso pa Jerusalén in xinquejach pa quekꞌaꞌ ja raj Roma.

¹⁸ Ja cꞌa raj Roma ejeꞌeꞌ tok quicꞌoton chic nuchiꞌ laj xinquiwasajel libre como mta wil in ma yatal ta chwij chi xquinquicamsaj ta.

¹⁹ Pro ja kach tak aj Israel ejeꞌeꞌ ma e conforme ta chi xquinwasaxel ta libre rmalcꞌariꞌ tok puersa xincꞌutuj ja nimlaj rey César chi arjaꞌ nkꞌeto tzij chwij. Pro ma ja ta nwajoꞌ xtinyaꞌ ta parte chiquij ja ntinamit.

²⁰ Rmalcꞌariꞌ tok xintak esiqꞌuixic utzcꞌa chi nutzꞌat riꞌ kawach ewqꞌuin in noktzijon ewqꞌuin chakajaꞌ. Como ajoj ja rok aj Israel nkanimaj chi necꞌastaj na ja camnakiꞌ queriꞌ nnimaj anin in rmalariꞌ tok inbacꞌon pa cadena camic, neꞌ chique.

²¹ Ejeꞌeꞌ quewaꞌ quibij tre riꞌ: —Ajoj mta atzijoxic kacꞌaxan ta nixtacꞌa chipan ta jun carta ja takonpi ta kuqꞌuin pa Judea in nixtacꞌa cumal ta ja kach tak aj Israel ja reꞌurkajnak waweꞌ, mta awil quibinto chake.

²² Pro camic cꞌo kagana nkacꞌaxaj nak ja raniman atat como nojel nat nakaj kacꞌaxan wiꞌ chi xa ma utz ta ja rereligión ja rix xin Jesús. Queriꞌ quibij tre.

²³ Cꞌacꞌariꞌ quicanoj jun kꞌij ja tok xtitzijoni ja Pablo cuqꞌuin. Ja cꞌa tok xerilaꞌ ja kꞌij congana e qꞌuiy ja xebe ruqꞌuin ja bar cꞌo wiꞌ. Ja tok xeꞌekaj ruqꞌuin arjaꞌ xumaj quitijoxic, akꞌabil xumaj quitijoxic in cꞌa takakꞌij xtanbaꞌ. Xuchꞌob chiquewach nak rbanic ja gobierno xin Dios. Xuchꞌob chiquewach nak rcꞌamonto ja tzꞌibtal can chipan ja rtzobal Dios ja caniꞌ tre ja ley xin Dios ja tzꞌibtal can rmal ja Moisés in caniꞌ tre ja quitzꞌiban can ja juleꞌ chic profeta jariꞌ ncꞌutbej chiquewach chi ja Jesús arjaꞌ ja Cristo ja chaꞌon rmal ja Dios. Congana xutij rukꞌij chiquij utzcꞌa chi nchꞌobtaj cumal.

²⁴ Ecꞌoli chique chꞌobtaj cumal ja xbij pro ecꞌo juleꞌ chic chique ejeꞌeꞌ ma xquinimaj ta.

²⁵ Ma junan ta nquechꞌob. Kas benam nqueban ja tok quewaꞌ bix chique rmal ja Pablo riꞌ: —Ja rEspíritu Santo cꞌo jun mensaje xuyaꞌ tre ja profeta Isaías ojer chi jaꞌ Isaías nbij chic chique ja katiꞌt kamamaꞌ in ni rubey wiꞌ ja xbij. Quewaꞌ xbij tre ja rIsaías riꞌ:

²⁶ —Jat cuqꞌuin ja tinamit Israel in quewaꞌ nabij chique riꞌ: —Ixix necꞌwaxaj na ja xtibix chewe pro xa matikaj pan ewiꞌ, netzꞌat na ja xticꞌut chewach pro xa matichꞌobtaj emwal, catcheꞌ chique.

²⁷ Como ja tinamit Israel leꞌ ejeꞌeꞌ xa matoc chic ja rtzobal Dios pa tak canma, xa matoc chic pa tak quixquin ja nbix chique, xa caniꞌ quitzꞌapin quewach. Como ejeꞌeꞌ mta quigana xtiquechꞌob ta ja ncꞌu̱t chiquewach, nixtacꞌa cꞌo ta quigana xtiquicꞌaxaj ta ja nbix chique, nixtacꞌa xtichꞌobtaj ta cumal ja rtzobal Dios pa tak canma, nixtacꞌa xtiqueqꞌuex ta ja quinaꞌoj utzcꞌa chi nentzursaj. Queriꞌ xbij ja rEspíritu Santo tre ja rIsaías, neꞌe ja Pablo chique. In xbij chic chique:

²⁸ —Camic tewotakij, ja utzlaj tzij tre ja totajem xin Dios jariꞌ majtajnak chic rbixic chique ja winak ja ma e aj Israel ta in ejeꞌeꞌ nqueyaꞌ na quixquin tre, neꞌ chique.

²⁹ Ja cꞌa raj Israel tok bitaj queriꞌ chique rmal ja Pablo xebe, congana jun tzij nqueban rmal ja bix chique.

³⁰ Ja cꞌa Pablo arjaꞌ cꞌo jun jay rkajon, caꞌiꞌ junaꞌ qꞌuejeꞌ chipan. Ecꞌoli winak xebe jeꞌe ruqꞌuin chi rkꞌiloxic in arjaꞌ xerucꞌul canojelal.

³¹ Yataj tre chi nuyaꞌ rbixic ja gobierno xin Dios, nertijoj ja winak tre ja kajaw Jesucristo, ni majun nak ta kꞌilo ta rxin chi rbixic.