Hechos 14 - Tz'utujil (Ja Cꞌacꞌa Chominem)

¹ Ja cꞌa Pablo rachbil Bernabé ja tok xeꞌekaj chipan ja tinamit Iconio xeꞌoc chipan ja jay xin molbal riꞌil quixin ja raj Israel. Quemaj rbixic ja utzlaj tzij in congana e qꞌuiy ja winak yukeꞌ quecꞌuꞌx ruqꞌuin ja Jesucristo rmal tanto chique ja raj Israel in chique ja ma e aj Israel ta chakajaꞌ.

² Pro ja raj Israel ja ma xeniman ta ejeꞌeꞌ xequitakchiꞌij ja ma e aj Israel ta utzcꞌa chi xa itzel nequetzꞌat ja kachꞌalal.

³ Rmalcꞌariꞌ tok ja Pablo rachbil Bernabé ejeꞌeꞌ xeqꞌuejeꞌ na jun tiempo chipan ja tinamit, nqueyaꞌ rbixic ja rtzobal Dios pro ni matiquixbej wiꞌ quiꞌ. Quechꞌob chiquewach ja winak nak rbanic ja rutzil xin Dios chi nucuy ja kil kamac ja rok winak. Ja cꞌa Dios arjaꞌ xuyaꞌ chique ja Pablo in Bernabé chi cꞌo juleꞌ milagro queban utzcꞌa ja winak ncotakij chi ni katzij wiꞌ ja nquibij.

⁴ Pro ja tinamit caꞌiꞌ queban, nicꞌaj quecoj quiꞌ cuqꞌuin ja raj Israel ja ma xeniman ta in nicꞌaj chic quecoj quiꞌ cuqꞌuin ja rapóstol Pablo in Bernabé.

⁵ Cꞌacꞌariꞌ ja raj Israel e cachbil ja ma e aj Israel ta ejeꞌeꞌ quecꞌam quiꞌ cuqꞌuin ja kꞌetol tak tzij xin tinamit chi nequetzꞌuj ja Pablo in Bernabé in nequeqꞌuiak tzaꞌn abaj.

⁶ Ja cꞌa Pablo in Bernabé ja tok xekaj rbixic cuqꞌuin xeꞌanmaji, xebe chipan caꞌiꞌ tinamit ja cꞌo pa rcuenta Licaonia, jun Listra rubiꞌ in jun chic Derbe. In xebe chakajaꞌ pa tak lugar ja cꞌo chinakaj ja caꞌiꞌ tinamit.

⁷ Ja tok xeꞌekaji quemaj rbixic ja utzlaj tzij xin Jesucristo.

* * * * * * * * * *

⁸ Cꞌo jun achi pa Listra arjaꞌ tzꞌubuli, siquirnak rkan. Arjaꞌ ni pa ralaxic wiꞌ chi maticowini nbini, ni mta wiꞌ jutij binnak ta nixtacꞌa jutzꞌit ta.

⁹ Arjaꞌ rmajon rcꞌaxaxic ja ntajini nbij ja Pablo. Ja cꞌa Pablo arjaꞌ kas xtzꞌelwachij ja rachi in xutzꞌat chi cꞌo yukulbal rucꞌuꞌx ruqꞌuin ja Dios chi ntzuri.

¹⁰ Cow tzijon ruqꞌuin: —Catyictaji, neꞌ tre. Chaka cꞌa jalal tok yictaji in xumaj binem.

¹¹ Ja cꞌa winak tok quetzꞌat ja milagro ja xuban ja Pablo quemaj rakic quechiꞌ, quemaj tzij chipan ja tzobal Licaonia: —Tetzꞌataꞌ mpeꞌ leꞌ, e caꞌiꞌ ja dios ekajnakto kuqꞌuin, e caniꞌ winak necaꞌyi, xecheꞌe.

¹² Quibij tre ja Bernabé chi arjaꞌ ja dios rbinaꞌan Júpiter. In quibij tre ja Pablo chi arjaꞌ ja dios rbinaꞌan Mercurio como más ntzijoni ja Pablo.

¹³ Cꞌo jun sacerdote rxin ja dios Júpiter in cꞌo jun templo chakajaꞌ. Ja templo triꞌ cꞌo wiꞌ ja bar natoc wiꞌ chipan ja tinamit. Triꞌ be wiꞌ ja sacerdote, ecꞌo wacax ercꞌamonel in juleꞌ cotzꞌiꞌj chakajaꞌ. Ja nrajoꞌ ja sacerdote nercamsaj ja wacax utzcꞌa chi arjaꞌ e rachbil ja winak nequitzujuj chiquewach ja Pablo in Bernabé como jun sacrificio.

¹⁴ Pro ja rapóstol Bernabé in Pablo ja tok xekaj rbixic cuqꞌuin chi queriꞌ nba̱n chique quemaj rakic quitziak jariꞌ retal chi pokon nquenaꞌ ja nba̱n chique e caniꞌ dios. Cꞌamcꞌol canim xebe, xeꞌoc chiquicojol ja winak, quemaj rakic quechiꞌ in quewaꞌ quibij chique riꞌ:

¹⁵ —¿Nak tre tok neban quewaꞌ chake? Ajoj xa ok winak, xa ok junan ewqꞌuin. Okpenak ewqꞌuin nurkabij chewe chi neꞌeyaꞌ can awaꞌ juleꞌ dios riꞌ ja mta neꞌoc wiꞌ in tiyukeꞌ ecꞌuꞌx ruqꞌuin ja cꞌaslic Dios como arjaꞌ winakarsani ja caj in rwachꞌulew in mar chakajaꞌ. Mta nak ta ja maquita arjaꞌ winakarsyon.

¹⁶ Ja chipan ja rojer tak tiempo ja kꞌaxnak can ja Dios xuyaꞌ lugar chique ja winak ja recꞌo pa tak nación chi nquinimaj ja quicostumbre, juleꞌ costumbre ja quiwinakarsaj nojoj queyon.

¹⁷ Pro ni cꞌo wiꞌ ja xuban ja nkꞌalasbej chi cꞌo jun cꞌaslic Dios como ni cꞌo wiꞌ ja rutzil nuban, nkajsaj jab pa kawiꞌ, nuyaꞌ buen tak cosecha, nuyaꞌ ja ncꞌatzin chake chi nkatij in nuyaꞌ quicotemal pa tak kanma. Queriꞌ quibij ja Pablo chique.

¹⁸ Pro masqui queriꞌ quibij chique ni ma kꞌilic ta wiꞌ ncajoꞌ como ja winak ni cꞌo wiꞌ quigana nquitzujuj jun sacrificio chiquewach.

¹⁹ Ecꞌo cꞌa juleꞌ winak e aj Israel xeꞌekaji pa Listra, juleꞌ chique pan Antioquía eꞌelnakel wiꞌ in juleꞌ chic chique pan Iconio eꞌelnakel wiꞌ. Ejeꞌeꞌ xequitakchiꞌij ja winak chi nqueqꞌuiak ja Pablo tzaꞌn abaj. Ja tok qꞌuiaktaj cumal tzaꞌn abaj quilasajto chipan ja tinamit. Cami ja Pablo ja nquechꞌob ejeꞌeꞌ.

²⁰ Ja cꞌa Pablo tok quemol quiꞌ ja kachꞌalal trij yictaji in xoc chic jutij chipan ja tinamit. Ja cꞌa chi rcab kꞌij e caꞌiꞌ ruqꞌuin ja Bernabé xebe chipan ja tinamit Derbe.

²¹ Ja cꞌa tok xeꞌekaji ja pa Derbe quemaj rbixic ja utzlaj tzij xin Jesucristo in e qꞌuiy ja winak yukeꞌ quecꞌuꞌx ruqꞌuin ja Jesucristo rmal. Cꞌacꞌariꞌ xemeloj chic jutij chipan ja roxiꞌ tinamit Listra, Iconio in Antioquía,

²² quemaj ryukbaxic quecꞌuꞌx ja kachꞌalal in cꞌo juleꞌ paxbanem queyaꞌ chique quewariꞌ: —Cow quixpeꞌi, maxta teyaꞌ can ja yukulbal ecꞌuꞌx ruqꞌuin ja Jesucristo. Kanojel ja nokoc chipan ja gobierno xin Dios ni rjawaxic wiꞌ chi qꞌuiy rwach ja rpokonal npi na chakij rmal, xecheꞌ chique.

²³ Ja chipan ja jujun iglesia ecꞌo juleꞌ anciano xequechaꞌ can ja neꞌucꞌan quixin ja kachꞌalal. Quemaj rbanic oración rachbil ayuno. Ja cꞌa tok tzuri ja roración in ayuno cumal quewaꞌ quibij can chique ja kachꞌalal riꞌ: —Camic yukul chic ecꞌuꞌx ruqꞌuin ja kajaw Jesucristo, arjaꞌ ta xquixchajini, xecheꞌ can chique.

* * * * * * * * * *

²⁴ Cꞌacꞌariꞌ xebe, xekꞌax pa tak tinamit ja cꞌo pa rcuenta Pisidia in xeꞌekaj chipan ja tinamit Perge ja cꞌo pa rcuenta Panfilia.

²⁵ Queyaꞌ rbixic ja rtzobal Dios chique ja winak ja raj Perge cꞌacꞌariꞌ xebe chic chipan ja tinamit Atalia.

²⁶ Triꞌ xeꞌoquel wiꞌ pa lancha, xebe chic pan Antioquía ja bar eꞌelnakel wiꞌ nabey tokoriꞌ tok xeba̱n recomendar pa rukꞌaꞌ ja Dios chi rbanic ja samaj. Como tzurnak chic ja samaj chewiꞌ tok xemeloji pan Antioquía.

²⁷ Ja cꞌa tok xeꞌekaji xequemol ja kachꞌalal, quemaj rcholic chiquewach nojel ja samaj ja xuban ja Dios ja tok queyaꞌ rbixic ja rtzobal in quechꞌob chiquewach chakajaꞌ nak rbanon ja Dios chi rjakic quebey ja winak ja ma e aj Israel ta utzcꞌa chi nyukeꞌ quecꞌuꞌx ruqꞌuin ja Jesucristo.

²⁸ Queriꞌ queban, xeqꞌuejeꞌ jun tiempo cuqꞌuin ja kachꞌalal pan Antioquía.