Hechos 13 - Tz'utujil (Ja Cꞌacꞌa Chominem)

¹ Ja chipan ja riglesia ja cꞌo pan Antioquía ecꞌo juleꞌ profeta in maestro. Quewaꞌ quebiꞌ riꞌ, Bernabé, Simón ja cꞌo chic jun rubiꞌ nbixi Niger, Lucio ja raj Cirene, Manaén ja re jun aqꞌuiyic ruqꞌuin ja Herodes ja gobernador xin Galilea, in Saulo.

² Queban cꞌa jutij quimolon quiꞌ chi ryaꞌic rukꞌij ja Dios, quimajon rbanic ja rayuno ja tok cꞌoli bix chique rmal ja rEspíritu Santo quewariꞌ: —Anin enchaꞌon ja Bernabé in Saulo chi rbanic jun samaj. Camic queꞌepartiꞌij chi nequibanaꞌ ja samaj, queriꞌ bix chique.

³ Cꞌacꞌariꞌ quemaj rbanic jun oración. Ja cꞌa tok tzuri ja roración in tok tzuri ja rayuno cumal queyaꞌ quekꞌaꞌ pa quewiꞌ ja Bernabé in Saulo chi nequipartiꞌij. Cꞌacꞌariꞌ xequetakel chi rbanic ja samaj.

* * * * * * * * * *

^4-5 Queriꞌ queban ja Bernabé in Saulo, xetakel rmal ja rEspíritu Santo, xebe, xeꞌekaj chipan ja tinamit Seleucia, cachbilanel ja Juan ja cꞌo chic jun rubiꞌ Marcos. Ja cꞌa Juan arjaꞌ nerutoꞌ chipan ja samaj. Cꞌacꞌariꞌ xeꞌoquel chipan jun lancha, xebe chic chipan jun lugar Chipre rubiꞌ, cꞌo pa mar. Xeꞌekaj chipan ja tinamit Salamina ja cꞌo pa rcuenta Chipre. Triꞌ cꞌa quemaj wiꞌ rbixic ja rtzobal Dios pa tak jay xin molbal riꞌil ja bar nquemol wiꞌ quiꞌ ja raj Israel.

⁶ Xebe nat nakaj chipan ja lugar Chipre. Ja tok xeꞌekaj chipan ja tinamit Pafos triꞌ cꞌo wiꞌ jun achi quewil aj Israel, Barjesús rubiꞌ. Ja cꞌa Barjesús arjaꞌ ajꞌitz. Arjaꞌ nbij chi profeta ocnak wiꞌ pro xa banol engaño.

⁷ Nsamaj pa rcuenta ja gobernador xin Chipre. Ja cꞌa gobernador arjaꞌ jun achi congana rnaꞌoj, Sergio Paulo rubiꞌ. Xutak quisiqꞌuixic ja Bernabé in Saulo como cꞌo rgana ncꞌaxaj ja rtzobal Dios.

⁸ Ja Barjesús arjaꞌ cꞌo chic jun rubiꞌ nbix tre, Elimas neꞌxi. Elimas tibij tzij ajꞌitz. Ja cꞌa xuban ja rajꞌitz, ja tok xeꞌekaji ja Bernabé in Saulo arjaꞌ xuchꞌaꞌ chique ja tijonem ja nqueyaꞌ utzcꞌa ja gobernador matiyukeꞌ rucꞌuꞌx ruqꞌuin ja Jesucristo.

⁹ Ja Saulo arjaꞌ cꞌo chic jun rubiꞌ nbix tre, Pablo neꞌxi. Ja cꞌa Pablo nojnak ja rEspíritu Santo pa ranma, kas xtzꞌelwachij ja rajꞌitz

¹⁰ in quewaꞌ xbij tre riꞌ: —Atat xa at banol engaño, xa at itzel achi, xa at ralcꞌwal diablo, ni mta wiꞌ agana ruqꞌuin ja rutzil. ¿Nak cꞌa tre ja tok nachꞌaꞌ ja rtzobal Dios? ¿Nak cꞌa tre ja tok matayaꞌ lugar chique ja winak chi nquinimaj?

¹¹ Camic natij na pokon pa rukꞌaꞌ ja kajaw Dios como natmoyiri in cꞌo jun tiempo matatzꞌat chic ja sakil, neꞌ tre. Ja cꞌa rajꞌitz tok bitaj queriꞌ tre rmal ja Pablo ni jariꞌ hora moyiri. Cꞌacꞌariꞌ xumaj rcanoxic jun ja nyukenel rxin chi rukꞌaꞌ.

¹² Ja cꞌa gobernador tok xutzꞌat chi xoc moy ja rajꞌitz yukeꞌ rucꞌuꞌx ruqꞌuin ja Jesucristo como congana cꞌascꞌoꞌi xcꞌaxaj ja tijonem ja nqueyaꞌ ja Pablo in Bernabé tre ja kajaw Dios.

* * * * * * * * * *

¹³ Cꞌacꞌariꞌ ja Pablo xeꞌoquel pa lancha, xeꞌelel chipan ja tinamit Pafos, xebe chic chipan ja tinamit Perge ja cꞌo pa rcuenta Panfilia. Pro ja Juan Marcos arjaꞌ xeruyaꞌ can, melojto ja pa Jerusalén.

¹⁴ Ja cꞌa Pablo in Bernabé tok xeꞌelel chipan ja tinamit Perge xebe chic chipan ja tinamit Antioquía ja cꞌo pa rcuenta Pisidia. Ja tok xerilaꞌ ja xulaꞌnbal kꞌij xeꞌoc chipan ja jay xin molbal riꞌil in xetzꞌabeꞌe.

¹⁵ Majtaj rsiqꞌuixic ja rtzobal Dios ja tzꞌiban can rmal ja Moisés in cumal ja juleꞌ chic profeta. Ja tok siqꞌuitaji ecꞌo juleꞌ oficial rxin ja jay xin molbal riꞌil ejeꞌeꞌ cꞌoli quetakel rbixic chique ja Pablo in Bernabé quewariꞌ: —Kach tak aj Israel, wi cꞌo jun paxbanem newajoꞌ nebij chique ja winak nkayaꞌ tiempo chewe camic, xecheꞌel chique.

¹⁶ Ja cꞌa Pablo arjaꞌ peꞌi in xuban rukꞌaꞌ chiquewach ja winak utzcꞌa chi nquicajbaꞌ tzij in quewaꞌ xbij chique riꞌ: —Ixix ja rix kach tak aj Israel in ixix chakajaꞌ ewanojelal ja nexbej ewiꞌ chwach ja Dios, tecꞌwaxaj ja xtinbij chewe riꞌ.

¹⁷ Ja Dios kaxin ajoj ja rok aj Israel arjaꞌ xeruchaꞌ ja katiꞌt kamamaꞌ ojer. Xuyaꞌ chique chi xeꞌoc jun nimlaj tinamit tokoriꞌ ja tok xeqꞌuejeꞌ pan Egipto. Pro ma ja ta Egipto ja kas mero quitinamit in tok qꞌuiswani ja Dios arjaꞌ congana xucoj rchokꞌakꞌ xerlasajto pa quekꞌaꞌ ja raj Egipto.

¹⁸ Ja cꞌa tok xeꞌelto ja pan Egipto caꞌwinak junaꞌ xeqꞌuejeꞌ chipan ja lugar ja chakijlaj ulew in congana itzelal queban triꞌ pro ja Dios arjaꞌ xucochꞌ nojelal.

¹⁹ Ja cꞌa tok xeꞌekaj chipan ja rulew rbinaꞌan Canaán ecꞌo wukuꞌ tinamit ja recꞌo chic chipan pro ja Dios arjaꞌ xercamsaj chi e wukuꞌ in ja rulew jariꞌ xuyaꞌ chique ja katiꞌt kamamaꞌ como herencia.

²⁰ Ja kꞌetbaltzij jariꞌ xuyaꞌ pa quekꞌaꞌ juesaꞌ. Quijiꞌ ciento junaꞌ in nicꞌaj xeꞌucꞌax cumal ja juesaꞌ. Ja qꞌuisbal juez jariꞌ ja rojer profeta Samuel.

²¹ Cꞌacꞌariꞌ quicꞌutuj jun rey tre ja Dios utzcꞌa ja kꞌetbaltzij nqꞌuejeꞌ chic pa rukꞌaꞌ ja rey. In queriꞌ xuban ja Dios, xuyaꞌ chic ja kꞌetbaltzij pa rukꞌaꞌ ja Saúl rcꞌajol Sis. Ja Sis arjaꞌ riy rumam can ja Benjamín. Ja Benjamín arjaꞌ jun chique ja cablajuj rcꞌajol Jacob. Caꞌwinak junaꞌ qꞌuejeꞌe ja Saúl chipan ja kꞌetbaltzij.

²² Ja Dios tok xlasaj ja kꞌetbaltzij pa rukꞌaꞌ ja Saúl xucoj chic pa rukꞌaꞌ ja rey David in quewaꞌ xbij riꞌ: —Anin congana nel nucꞌuꞌx trij ja David ja rcꞌajol Isaí. Arjaꞌ nuban na cumplir ja nvoluntad xa nak ta ja nwajoꞌ tre chi nuban. Queriꞌ xbij ja Dios, neꞌe ja Pablo chique. In xbij chic chique:

²³ —Cꞌo jun riy rumam can ja David, Jesús rubiꞌ. Ja cꞌa Jesús arjaꞌ takonto rmal ja Dios chi katoꞌic ja rok aj Israel como queriꞌ tzujun can rmal ja Dios ojer.

²⁴ Ja Jesús tok majaꞌn tumaj ja rsamaj majtajnak chic rchomarsaxic rubey rmal ja Juan Bautista como ja Juan quewaꞌ nbij chique canojel ja winak ja raj Israel: —Teqꞌuexaꞌ ja renaꞌoj, teyaꞌaꞌ can ja ritzelal in quixban bautizar, neꞌ chique.

²⁵ Ja Juan Bautista tok xajalal majaꞌn tuqꞌuis ja rsamaj quewaꞌ xbij chique ja winak riꞌ: —Anin ma in Cristo ta ja caniꞌ nechꞌob chwij. Ja Cristo arjaꞌ xajalal majaꞌn tumaj ja rsamaj in más na nim rukꞌij arjaꞌ chinwach anin, nixtacꞌa yatal ta chwij chi xtinquir ta rcꞌamal ja rxajab, neꞌ chique.

²⁶ Ixix ja rix kach tak aj Israel ja rix riy rumam can ja kamamaꞌ Abraham in ixix chakajaꞌ ewanojelal ja nexbej ewiꞌ chwach ja Dios, camic nbij chewe chi ewxin ixix ja utzlaj tzij ja kamajon rbixic chewe ja rcꞌamonto ja totajem xin Dios.

²⁷ Como ja winak ja recꞌo pa Jerusalén e cachbil ja kꞌetol tak tzij ja nebano mandar quixin, ejeꞌeꞌ ma xchꞌobtaj ta cumal chi ja Jesús arjaꞌ ja Toꞌonel ja takonto rmal ja Dios nixtacꞌa chꞌobtaj ta cumal chakajaꞌ nak rbanic ja rtzobal Dios ja tzꞌibtal can ojer cumal ja profeta ja nsiqꞌuix pa tak quixquin pa tak xulaꞌnbal kꞌij. Quicꞌutuj rcamic ja Jesús in triꞌ bantaj wiꞌ cumplir ja tzꞌibtal can ojer cumal ja profeta.

²⁸ Quicanoj ril ja Jesús in masqui mta ril pro quicꞌutuj rcamic tre ja Pilato.

²⁹ Ja Jesús tok bantaj cumplir nojel ja tzꞌibtal can tre cꞌacꞌariꞌ kajsax chwach cruz in xemuki.

³⁰ Pro ja Dios arjaꞌ xuyaꞌ tre chi cꞌastaj chiquicojol camnakiꞌ.

³¹ Ja cꞌa tok cꞌastajnak chic qꞌuiylaj kꞌij qꞌuejeꞌ chi na cuqꞌuin juleꞌ discípulo, ejeꞌeꞌ riꞌ ja xerachbilajel ja tok xeꞌelel pa Galilea in xebe pa Jerusalén in camic quimajon rbixic chique winak nojel ja quitzꞌaton tre rcꞌaslemal ja Jesús.

³² Ja camic cꞌo jun utzlaj tzij kacꞌamonto chewe quewariꞌ, ja tzujux can chique ja katiꞌt kamamaꞌ ojer rmal ja Dios

³³ jariꞌ rbanon chic cumplir ja Dios pa katiempo ajoj ja rok quiy quemam can como arjaꞌ xuyic ja Jesús chipan ja camíc. Caniꞌ tzꞌibtal can chipan ja rtzobal Dios chipan ja rcab salmo quewaꞌ nbij ja Dios tre ja Cristo riꞌ: —Atat at Walcꞌwal, camic xincꞌut chiquewach ja winak chi at Walcꞌwal, queriꞌ xbij tre.

³⁴ In cꞌa cꞌo na más ja tzꞌibtal can chipan ja rtzobal Dios ja nucꞌut chikawach chi ja Dios ojer rtzujun can chi nuyaꞌ na tre ja Cristo chi ncꞌastaji chiquicojol camnakiꞌ utzcꞌa chi matakꞌayi ja rcuerpo, quewaꞌ nbij riꞌ: —Anin cꞌoli ja wutzil nyaꞌ na pan ewiꞌ ja caniꞌ ntzujun tre ja rey David, neꞌe ja Dios.

³⁵ In jun chic ja rtzꞌiban can ja David tre ja Cristo, quewaꞌ xbij ja David tre ja Dios riꞌ: —Ja cuerpo rxin ja Santilaj Awalcꞌwal wotak chi mta moda xtayaꞌ ta lugar tre chi xtakꞌay ta, neꞌe.

³⁶ Ja cꞌa David tok xuqꞌuis ja samaj ja yaꞌon tre rmal ja Dios chi nuban bien kotak chi cami in xakꞌayi ja rcuerpo.

³⁷ Pro ja cuerpo rxin ja Jesús jariꞌ ma xakꞌay ta como ja Dios arjaꞌ xuyaꞌ tre chi cꞌastaji chiquicojol camnakiꞌ.

³⁸ Rmalcꞌariꞌ tok nkabij chewe kach tak aj Israel, bien tewotakij chi ja Jesús ja kamajon rbixic chewe arjaꞌ ncuyuwi ja kil kamac ja rok winak.

³⁹ Xa nak ta nyukeꞌ rucꞌuꞌx ruqꞌuin ja Jesucristo jariꞌ nwasaxel libre chipan ja ril rumac. Pro ja ley xin Dios ja tzꞌibtal can rmal ja Moisés jariꞌ mta poder rcꞌan chi xcatrlasajel ta chipan awil amac.

⁴⁰ Rmalcꞌariꞌ tok nbij chewe, tebanaꞌ cuenta matzij tikajto chewij ja juicio xin Dios ja caniꞌ tzꞌibtal can cumal ja profeta ojer, quewaꞌ nbij ja Dios riꞌ:

⁴¹ —Ixix ja rix yokꞌonelaꞌ bien tecꞌwaxaj, congana cꞌascꞌoꞌi xtetzꞌat ja tok xtikaji ja nimlaj juicio chewij. Como anin cꞌo jun nimlaj milagro xtinban pan etiempo ixix pro jariꞌ matenimaj masqui cꞌo jun xtichꞌobo chewach. Queriꞌ rbin can ja Dios, neꞌe ja Pablo chique.

⁴² Ja cꞌa tok xeꞌelto chipan ja jay xin molbal riꞌil quewaꞌ bix chique ja Pablo cumal ja ma e aj Israel ta riꞌ: —Xquixpi chic jutzꞌit kuqꞌuin wukbix ja cha jun chic xulaꞌnbal kꞌij utzcꞌa chi nechꞌob chic jutij chikawach ja xabij chake camic, xecheꞌxi.

⁴³ Ja cꞌa tok quipaxij quiꞌ e qꞌuiy chique ja raj Israel e cachbil juleꞌ chic ja nquixbej quiꞌ chwach ja Dios ejeꞌeꞌ xebe chiquij ja Pablo in Bernabé. Ja cꞌa Pablo in Bernabé cꞌo jun paxbanem queyaꞌ chique quewariꞌ: —Maxta temestaj ja rutzil xin Dios ja kachꞌob chewach camic, xecheꞌ chique.

⁴⁴ Ja cꞌa cha jun semana chic ja tok xerilaꞌ ja jun chic xulaꞌnbal kꞌij xeyictaji ja tinamit, xebe chi rcꞌaxaxic ja rtzobal Dios.

⁴⁵ Pro ja raj Israel tok quetzꞌat chi congana e qꞌuiy ja winak congana quiakari ja canma. Quemaj rchꞌaꞌic tre ja Pablo ja nbij in cꞌo juleꞌ itzel tak tzij quibij tre.

⁴⁶ Ja cꞌa Pablo in Bernabé ejeꞌeꞌ matiquixbej quiꞌ chiquewach, quewaꞌ quibij chique riꞌ: —Ni rjawaxic wiꞌ chi chewe ixix kabij wiꞌ ja rtzobal Dios nabey pro como mta egana ruqꞌuin jariꞌ nekꞌalasbej chi ma yatal ta chewe chi newil ja utzlaj cꞌaslemal ja mta qꞌuisic trij. Rmalcꞌariꞌ ja tok nokbe chic cuqꞌuin ja winak ja ma e aj Israel ta.

⁴⁷ Como queriꞌ bin chake rmal ja Dios chi nkaban caniꞌ tzꞌibtal can chipan ja rtzobal Dios quewariꞌ: —At ncojon como jun luz ja nsakirsan quebey ja winak ja ma e aj Israel ta utzcꞌa chi nayaꞌ rbixic ja totajem xin Dios chique ja winak nojel nat nakaj chwach ja rwachꞌulew. Queriꞌ nbij ja Dios, neꞌe ja Pablo chique.

⁴⁸ Ja cꞌa ma e aj Israel ta tok quicꞌaxaj ja xbij ja Pablo janila xequicot rmal in congana queyaꞌ rukꞌij ja rtzobal Dios. Ecꞌo juleꞌ chique yukeꞌ quecꞌuꞌx ruqꞌuin ja Jesucristo. Queriꞌ queban canojel ja rechaꞌon rmal ja Dios chi nquewil ja utzlaj cꞌaslemal ja mta qꞌuisic trij.

⁴⁹ Ja cꞌa rtzobal Dios be nat nakaj chipan ja lugar.

⁵⁰ Pro ja cꞌa raj Israel ejeꞌeꞌ xebe cuqꞌuin juleꞌ ixokiꞌ ja nqueban respetar ja Dios ja nimak quekꞌij in cuqꞌuin chakajaꞌ ja principaliꞌ xin tinamit. Ja tok xeꞌekaj cuqꞌuin xequitakchiꞌij chi neyictaj chiquij ja Pablo in Bernabé. In queriꞌ queban, xequilasajto chipan ja lugar.

⁵¹ Ja cꞌa Pablo rachbil Bernabé ejeꞌeꞌ quiquiraj can ja pokok rxin ja tinamit ja cꞌo pa cakan jariꞌ retal chi ja winak nquetij na pokon rmal ja mta quigana ruqꞌuin ja utzlaj tzij xin Jesucristo. Cꞌacꞌariꞌ xebe chic chipan ja tinamit Iconio.

⁵² Pro ja winak ja yukeꞌ quecꞌuꞌx ruqꞌuin ja Jesucristo ejeꞌeꞌ congana nequicoti in nojnak ja rEspíritu Santo pa tak canma.