Hebreos 9 - Tz'utujil (Ja Cꞌacꞌa Chominem)

¹ Pro ja nabey chominem bien banon rbanic. Ja winak cꞌoli mandamiento ja bin chique ja nqueban jeꞌe chi nquiyabej rukꞌij ja Dios. Cꞌoli chakajaꞌ jun rochoch ja Dios pro xa xin rwachꞌulew.

² Bani ja rochoch Dios, tzꞌum in tziak ocnak. Tzꞌapix ruchiꞌ tre jun tziak in tas chic rpan tre jun chic tziak, caꞌiꞌ cuarto xuyaꞌ. Jawaꞌ coj chipan ja nabey cuarto riꞌ, jun candelero, jun mesa in ja caxlanway ja partiꞌix chwach ja Dios. Jariꞌ nabey cuarto lugar santo neꞌxi.

³ Ja rcab cuarto ja cꞌo trij ja tziak ja tasben rpan jariꞌ santilaj lugar ja más nim rukꞌij neꞌxi.

⁴ In jawaꞌ coj chic chipan ja rcab cuarto riꞌ, jun cojbal pon puro oro ocnak in jun caxa cojon oro trij jariꞌ caxa xin chominem neꞌxi. Jawaꞌ cꞌol chipan ja caxa riꞌ, ja caxlanway xin chilaꞌ chicaj rbinaꞌan maná cꞌolon chipan ja rcꞌolibal oro ocnak, ja chꞌameꞌy xin Aarón ja jotayini, in ja tzꞌalam tak abaj ja tzꞌibtal chwach nak xbij ja Dios tok xchomarsaj ja chominem.

⁵ Ecꞌo caꞌiꞌ querubín ebanon, ja quexicꞌ quiripon quimujan ja rwiꞌ caxa. Ja querubín jariꞌ retal chi triꞌ nqꞌuejeꞌ wiꞌ ja Dios. Ja rwiꞌ caxa sachbal il mac neꞌxi. Pro camic maquintzijon más trewaꞌ wariꞌ.

⁶ Nojel awaꞌ ja cꞌa xinbij kaj chewe riꞌ tok chomtajnak chic ja cꞌa sacerdote ejeꞌeꞌ kꞌij kꞌij neꞌoc chipan ja nabey cuarto chi rbanic ja quisamaj chwach ja Dios.

⁷ Ja cꞌa rcab cuarto xa ruyon ja lokꞌlaj sacerdote noc chipan pro cꞌa chi junaꞌ noc wiꞌ chipan. Arjaꞌ tok noc chipan rcꞌan ja quiquiqꞌuel chicop, jariꞌ quicꞌ ntzujuj chwach ja Dios rumac ja ril rumac arjaꞌ in quixin ja winak chakajaꞌ.

⁸ Jawaꞌ ja cꞌa xinbij chewe riꞌ cꞌoli nucꞌut chikawach ja nkꞌalasax chikawach rmal ja rEspíritu Santo, quewaꞌ nucꞌut chikawach riꞌ, ja nabey cuarto tok majaꞌn tocꞌo rukꞌij cꞌa tzꞌapal na chikawach ja santilaj lugar ja bar cꞌo wiꞌ ja Dios.

⁹ Ja nabey cuarto xa retal jeꞌe, xa ejemplo rcꞌamonpi chake rxin ariꞌ tiempo ja rmajon qꞌuisem. Ja cꞌa rofrenda in sacrificio ja quitzujuj chwach ja Dios jariꞌ mta rpoder xtichomarsaj ta chijutij ja canma ja winak xtichꞌachꞌojirsaj ta chijutij ja quiconciencia.

¹⁰ Ja bix chique chi nqueban jariꞌ xa rxin ja quicuerpo, ma rxin ta ja canma, caniꞌ tre nak ja utz ntiji in nak ja xajan ntiji in tre chakajaꞌ nak tiempo jeꞌe ja rjawaxic chi nquechꞌaj quekꞌaꞌ in cakan. In bix chique chi cꞌa tokoriꞌ matiqueban chic ja tok cꞌoli jun chominem cꞌacꞌa ja xtichomarsaj na ja Dios pa rqꞌuexwach.

¹¹ Pro camic penak chic ja Cristo, arjaꞌ ja lokꞌlaj sacerdote ja cꞌamyonto ja rutzil ja tzujunto ojer rmal ja Dios. Ja lugar ja bar nuban chi wiꞌ ja rsamaj jariꞌ ja mero rochoch ja Dios, más chi na nim rukꞌij chwach ja bar xesamaj wiꞌ ja rojer tak sacerdote. Ja rochoch Dios ja bar nsamaj chi wiꞌ ja Cristo nixtacꞌa banon ta in ma xin rwachꞌulew ta chakajaꞌ.

¹² Arjaꞌ xajutij xoc chipan ja santilaj lugar chilaꞌ chicaj, rcꞌan ja quicꞌ ja ntzujuj chwach ja Dios pa kacuenta pro ja quicꞌ ma quiquiqꞌuel ta qꞌuisicꞌ, ma quixin ta wacax ja tak ternero, puro rquiqꞌuel arjaꞌ. Queriꞌ xuban chake, xajutij xokrutoꞌ pa rukꞌaꞌ ja il mac, nixtacꞌa cꞌo ta qꞌuisic trij ja totajem nuyaꞌ.

¹³ Cꞌo nacꞌa rsamaj ja quicꞌ quixin qꞌuisicꞌ quixin wacax in cꞌo rsamaj chakajaꞌ ja rchajul jun ti vaca. Jariꞌ nya̱ꞌ chiquij ja winak tok cꞌoli quibanon ja xajan in nbix chique chi ma e chꞌajchꞌojiꞌ ta. Ja cꞌa wi nya̱ꞌ chiquij jariꞌ nechꞌachꞌojiri, e chꞌajchꞌojiꞌ chic.

¹⁴ Pior cꞌa ja rquiqꞌuel ja Cristo jariꞌ más chi na nim rsamaj. Ja Cristo arjaꞌ xtzujuj riꞌ chwach ja Dios, camsaxi, xoc jun sacrificio pro jun sacrificio ja ni majun ja maquita tzꞌakat tre in ja toꞌo rxin chi rbanic ja wariꞌ jariꞌ ja rEspíritu Santo ja ni mta wiꞌ qꞌuisic trij. Ja rquiqꞌuel ja Cristo janila nsamaji, nchꞌachꞌojirsaj chi utz ja kanma chi matitiꞌon chic ja kaconciencia in rmalariꞌ nokcowini nkayaꞌ can ja kabanon jeꞌe ja xa camíc rcꞌamonto in noksamaj chic pa rcuenta ja cꞌaslic Dios.

¹⁵ Rmalcꞌariꞌ tok yatajnak tre ja Cristo chi arjaꞌ cꞌamyonto ja cꞌacꞌa chominem ja nercojbej ja winak chwach ja Dios. Rmal cꞌa ja rcamic ja Cristo tok cuytajnak chic ja il mac ja bantaji chipan ja chominem ja cꞌoli nabey. In camic ja roksiqꞌuin rmal ja Dios nokcowini nkawil ja rutzil ja tzujunto ojer rmal, jariꞌ ja herencia xin Dios ja ni mta wiꞌ qꞌuisic trij.

¹⁶ Tacꞌa jun achi tok ncami ja wi rbanon can jun wuj rxin ja rmebaꞌil, wi rbin can chipan chok chique nja̱ch wiꞌ ja rmebaꞌil, ja cꞌa tok ncami cꞌa tokoriꞌ njachi ja rmebaꞌil.

¹⁷ Ja rachi ja wi cꞌa cꞌas na mta moda noqui ja wuj chi rjachic ja mebaꞌil, ja tok ncami cꞌa tokoriꞌ noqui ja wuj.

¹⁸ Queriꞌ cꞌa tre chakajaꞌ ja nabey chominem ja chomarsax rmal ja Dios, cꞌa tokoriꞌ xoqui ja chominem ja tok cꞌoli quicꞌ coji.

¹⁹ Queriꞌ xuban ja Moisés chakajaꞌ, nabey xuyaꞌ na rbixic nojelal ja ley chique ja winak ja bin tre rmal ja Dios chi nbij cꞌacꞌariꞌ xchicaj quicꞌ trij ja bar tzꞌibtal wiꞌ ja ley in chiquij canojel ja winak chakajaꞌ. Ja quicꞌ xucoj jariꞌ quixin wacax ja tak ternero in quixin qꞌuisicꞌ, xuyuj ruqꞌuin yaꞌ. Ja xchicbej ja quicꞌ cꞌo jun ti rkꞌaꞌ cheꞌ xucoj rbinaꞌan hisopo rachbil juleꞌ lana quiak.

²⁰ Ja cꞌa tok chictaj rmal cꞌacꞌariꞌ xbij chique ja winak: —Ja quicꞌ ja xinchicaj leꞌ jalaꞌ nuyaꞌ rseguro ja chominem ja bin chewe rmal ja Dios chi rjawaxic nenimaj, neꞌ chique.

²¹ In queriꞌ xuban tre ja rochoch Dios in tre nojel ja nquecoj jeꞌe ja nquiyabej rukꞌij ja Dios, xchicaj quicꞌ trij chakajaꞌ.

²² In queriꞌ tzꞌibtal chipan ja ley chakajaꞌ, ni quicꞌ wiꞌ noqui ja tok cꞌoli nchꞌachꞌojirsaxi, xa jujun ja ma quicꞌ ta noqui chi rchꞌachꞌojirsbexic. Ja wi mta quicꞌ ntixi mta cꞌariꞌ ja cuybal il mac.

* * * * * * * * * *

²³ Chewiꞌ cꞌa tok rjawaxic chi noqui ja quiquiqꞌuel chicop chi rchꞌachꞌojirsbexic ja nakun jeꞌe ja xa rachbal ja cꞌo jeꞌe chilaꞌ chicaj. Pro ja tre ja mero cꞌo jeꞌe chilaꞌ chicaj ja xa ma rachbal ta rjawaxic jun sacrificio ja más chi na utz chwach ja quiquiqꞌuel chicop.

²⁴ Ja rocnak wiꞌ ja Cristo camic ma chipan ta jun rochoch Dios ja xa banon ja xa rachbal ja mero rochoch Dios. Pro mero chilaꞌ chicaj ja rocnak wiꞌ, ni chwach ja Dios xekaj wiꞌ in triꞌ cꞌa cꞌo wiꞌ camic, ntajini nokrucoj chwach ja Dios.

²⁵ Ja juleꞌ chic lokꞌlaj tak sacerdote ejeꞌeꞌ junaꞌ junaꞌ ni xeꞌoc wiꞌ chipan ja santilaj lugar chi rtzujuxic ja quicꞌ pro ma quiquiqꞌuel ta ejeꞌeꞌ. Pro ja Cristo ma queriꞌ ta rbanon, arjaꞌ matitzujuj riꞌ chi ncamsax ta caꞌmul oxmul.

²⁶ Ja wixta queriꞌ jaruꞌ pa tiempo winakarnakto ja rwachꞌulew qꞌuiylaj mul ta cꞌariꞌ camsanto. Pro ja xuban arjaꞌ, xa jutij peti, xtzujuj riꞌ chi camsax pa kacuenta, ja cꞌa rcamic jariꞌ xchupbej ja kil kamac kanojel. Ja tiempo ja pi wiꞌ jariꞌ qꞌuisbal rxin ja tiempo jeꞌe ja rchominto ja Dios ojer.

²⁷ Caniꞌ chique ja winak ejeꞌeꞌ cayben ja camíc pro xa jutij necami, ma caꞌmul ma oxmul ta. Ja cꞌa cajal chic chiquewach xa kꞌetoj tzij chic ja majaꞌn tiban chiquij.

²⁸ Queriꞌ cꞌa tre ja Cristo chakajaꞌ ma qꞌuiylaj mul ta cami ja tok camsax pa kacuenta. Xa jutij cami pro ok qꞌuiy ja xokrutoꞌ, ma jun ta, xrijkaj ja kil kamac chwach ja Dios in xuchup. Arjaꞌ npi chi na jutij pro ma rmal chi ta chi nrijkaj chic jutij ja kil kamac, npi chi na utzcꞌa chi nokrutoꞌ chijutij kanojel ja nokquicoti chi raybexic.