Hebreos 7 - Tz'utujil (Ja Cꞌacꞌa Chominem)

¹ Caniꞌ tzꞌibtal can chipan ja rtzobal Dios ja Melquisedec arjaꞌ rey xin jun tinamit Salem rubiꞌ, chakajaꞌ arjaꞌ sacerdote, nuban ja samaj xin Dios ja katzij chi Dios. Xuban jutij tre ja rAbraham xercꞌuluꞌ pa bey tokoriꞌ tok ja rAbraham ecꞌo juleꞌ rey ercamsan in melojto pa chꞌaꞌoj. Ja cꞌa rAbraham ban bendecir rmal ja Melquisedec.

² In chakajaꞌ nojel rwach ja mebaꞌil ja xuchꞌecto pa quekꞌaꞌ ja rey xlasaj na rdiezmo tre in ja diezmo xujach tre ja Melquisedec. Ja Melquisedec cꞌoli nbij ja rubiꞌ, jun rey utzlaj cucꞌaxic winak nuban, queriꞌ rcꞌamonto ja rubiꞌ. Arjaꞌ rey xin Salem chakajaꞌ cꞌoli nbij, jun rey yoꞌl quicotemal, queriꞌ rcꞌamonto.

³ Ma ecꞌo ta ja rtataꞌ ruteꞌ ja Melquisedec ja nenatax ta chipan ja rtzobal Dios, ma ecꞌo ta ratiꞌt rmamaꞌ nenatax ta chipan chakajaꞌ in mta ja ralaxic nnatax ta in nixtacꞌa rcamic ta chakajaꞌ. Pro ja rbanic, chijutij ocnak sacerdote in ni mta wiꞌ qꞌuisic trij ja rsacerdoteꞌil jariꞌ junan caniꞌ tre rbanic ja Ralcꞌwal Dios.

⁴ Techꞌoboꞌ mpeꞌ chi utz janila nim rukꞌij ja Melquisedec. Más na nim rukꞌij chwach ja kamamaꞌ Abraham. Ja cꞌa rAbraham ojer xuyaꞌ rukꞌij ja Melquisedec, xpartiꞌij ja diezmo rxin ja mebaꞌil ja rchꞌeconto in xujach pa rukꞌaꞌ ja Melquisedec.

⁵ Pro ja nbij ja ley xin Dios, pa quekꞌaꞌ ja riy rumam ja Leví nja̱ch wiꞌ ja diezmo, ejeꞌeꞌ riꞌ ja neꞌoc sacerdote. In queriꞌ queban ja winak, pa quekꞌaꞌ ja riy rumam ja Leví nquejach wiꞌ ja quidiezmo, queriꞌ queban masqui xa e alaxic cuqꞌuin como ja rAbraham arjaꞌ sepyon quixin canojel.

⁶ Pro ja Melquisedec arjaꞌ ma riy rumam ta ja Leví pro pa rukꞌaꞌ jach wiꞌ ja diezmo rmal ja rAbraham. Arjaꞌ cꞌa bano bendecir rxin ja rAbraham. Makanaꞌ maquita cꞌa nim rukꞌij ja rAbraham como tre ja rAbraham tzujun wiꞌ ja rutzil rmal ja Dios.

⁷ Pro ja nbano bendecir jariꞌ ja más na nim rukꞌij chwach ja nuban bendecir jariꞌ bien kotak kanojelal.

⁸ Ja cꞌa riy rumam ja Leví, chique nja̱ch wiꞌ ja diezmo pro ja Melquisedec arjaꞌ más na nim rukꞌij chiquewach ejeꞌeꞌ chakajaꞌ. Ejeꞌeꞌ xa necami pro arjaꞌ mta nbij ja rtzobal Dios tre ja rcamic, caniꞌ cꞌa cꞌas na chijutij.

⁹ Ja riy rumam ja Leví, chique nto̱j wiꞌ ja diezmo pro ja cꞌa rAbraham pa rukꞌaꞌ ja Melquisedec xutoj wiꞌ ja diezmo, nel cꞌariꞌ caniꞌ cꞌopi chic triꞌ ja Leví, caniꞌ rtojonpi chic ja diezmo chakajaꞌ.

¹⁰ Como ja rAbraham tok xecꞌuli pa bey rmal ja Melquisedec majaꞌn talaxi triꞌ ja Leví pro masqui queriꞌ ni rjaꞌtzulpi chi wiꞌ ja rAbraham. Jariꞌ ncꞌambej tzij nbij chi ja Melquisedec más na nim rukꞌij chwach ja Leví chakajaꞌ.

¹¹ Ja sacerdoteꞌil rxin ja Aarón in quixin ja juleꞌ chic riy rumam ja Leví jariꞌ xoc rbase ja ley xin Dios ja tok Moisés xuyaꞌ ja ley chique ja raj Israel ojer. Pro jariꞌ sacerdoteꞌil xa nkꞌaxi, xa cꞌo qꞌuisic trij. Jariꞌ ma xcowin ta xerutoꞌ ta ja winak chijutij chwach ja Dios. Ja wixta cowini xerutoꞌ chijutij maquita cꞌa rjawaxic ariꞌ peti jun chic sacerdote ja xa junan ja rsacerdoteꞌil ruqꞌuin ja rsacerdoteꞌil ja Melquisedec ja junwiꞌ chi na chwach ja rxin Aarón.

¹² Ja cꞌa tok noqui jun cꞌacꞌa sacerdoteꞌil jariꞌ rjawaxic chi noc na jun ley cꞌacꞌa chakajaꞌ.

^13-14 Ja cꞌa kajaw Jesucristo arjaꞌ ja sacerdote ja junwiꞌ chi na. Arjaꞌ ma riy rumam can ta ja Leví, ni kꞌalaj wiꞌ chi arjaꞌ riy rumam can ja Judá. Pro ja riy rumam can ja Judá majun nak ta chique ocnak ta sacerdote, mta tzꞌibtal can chique chipan ja ley rmal ja Moisés chi neꞌoc ta sacerdote.

¹⁵ Ja cꞌacꞌa sacerdote ja penak camic arjaꞌ xa junan ja rsacerdoteꞌil ruqꞌuin ja rsacerdoteꞌil ja Melquisedec, triꞌ cꞌa nkatzꞌat wiꞌ chi xa nqꞌuis na ja sacerdoteꞌil quixin ja riy rumam can ja Leví.

¹⁶ Ja tok xoc sacerdote ma rmal ta jun ley ja xa cꞌo qꞌuisic trij. Arjaꞌ mta camíc trij, ja rcꞌaslemal ni matiqꞌuis wiꞌ in ja cꞌariꞌ ocnak rbase ja sacerdoteꞌil rxin.

¹⁷ Caniꞌ nbix tre chipan ja rtzobal Dios quewariꞌ: —Atat at sacerdote pro ni chijutij atocnak sacerdote. Ja rasacerdoteꞌil atat jariꞌ ni mta wiꞌ qꞌuisic trij, xa junan ruqꞌuin ja rsacerdoteꞌil ja Melquisedec. Queriꞌ nbix tre.

¹⁸ Ja ley ja xoqui nabey jariꞌ ma xcowin ta xokrutoꞌ ta chijutij chwach ja Dios chewiꞌ tok ma xoc chi ta.

¹⁹ Ja ley ja xoqui nabey ni majun nak ta xchomij ta chwach ja Dios ja ni ta chijutij xtzursaj ta. Pro ja rocnak chic pa rqꞌuexwach camic jariꞌ ja yukulbal kacꞌuꞌx ruqꞌuin ja Jesucristo jariꞌ más chi na utz chwach ja ley ja xoqui nabey, jaktajnak chic kabey rmal in rmalariꞌ cꞌa chwach ja Dios nokekaj chi wiꞌ.

²⁰ Nojel ariꞌ tok xchomarsaj ja Dios arjaꞌ xuban jun juramento, mta moda ja maquita nuban cumplir.

²¹ Pro ma queriꞌ ta ban chique ja juleꞌ chic ja xeꞌoc sacerdote, mta jun juramento bani pro ja tre ja Ralcꞌwal Dios cꞌo jun juramento bani caniꞌ tzꞌibtal can chipan ja rtzobal Dios quewariꞌ: —Ja kajaw Dios arjaꞌ rbanon jun juramento, matuqꞌuex ja rnaꞌoj, quewaꞌ xbij riꞌ: —Atat at sacerdote pro ni chijutij, ja rasacerdoteꞌil ni mta wiꞌ qꞌuisic trij, junan ruqꞌuin ja rsacerdoteꞌil ja Melquisedec, neꞌe.

²² Rmal cꞌa ja juramento banon chewiꞌ tok ja Jesús arjaꞌ ocnak chic ja rseguro jun cꞌacꞌa chominem ja más chi na utz chwach ja jun chic chominem ja cꞌoli nabey.

²³ Ja sacerdote ja recꞌoli nabey ejeꞌeꞌ xa necami, tok ncam jun noc can chic jun pa rqꞌuexwach, queriꞌ queban, e qꞌuiy xeꞌocꞌo chipan ja sacerdoteꞌil.

²⁴ Ja cꞌa tre ja Jesús jariꞌ mchita camíc trij chewiꞌ cꞌa tok ni mta wiꞌ qꞌuisic trij ja rsacerdoteꞌil arjaꞌ.

²⁵ Rmalcꞌariꞌ tok ncowini nokrutoꞌ chijutij ja yukul kacꞌuꞌx ruqꞌuin chi arjaꞌ ncojo kaxin chwach ja Dios. Arjaꞌ ni cꞌas wiꞌ chijutij chi rbanic orar pa kacuenta chewiꞌ tok ncowini nokrutoꞌ chijutij.

²⁶ Queriꞌ cꞌa rbanic ja Jesús, nij arjaꞌ wiꞌ ja lokꞌlaj sacerdote ja ncꞌatzin chake. Arjaꞌ ni utz wiꞌ ntzꞌa̱t rmal ja Dios. Majun nak ta itzel rbanon ta. Ni majun ril rumac. Lasaxel chiquicojol ja rajꞌil ajmaquiꞌ, cꞌamarel chilaꞌ chicaj ja bar cꞌo wiꞌ ja Dios.

²⁷ Arjaꞌ ni junwiꞌ na wiꞌ chiquewach ja juleꞌ chic lokꞌlaj tak sacerdote. Ja sacrificio ja queban ejeꞌeꞌ kꞌij kꞌij xequicamsaj juleꞌ chicop, xequitzujuj chwach ja Dios. Ja nqueban nabey nquitzujuj na ja rxin ja quil quemac ejeꞌeꞌ cꞌacꞌariꞌ nquitzujuj chic ja rxin ja quil quemac ja winak. Pro ja Jesús ma rjawaxic ta tre xtuban ta queriꞌ caniꞌ queban ejeꞌeꞌ. Ja sacrificio ja xtzujuj ja Jesús xa jutij, maticꞌatzini xticamuluj chi ta jutij, tokoriꞌ tok xtzujuj riꞌ chipan ja camíc.

²⁸ Ja winak ja neba̱n nombrar rmal ja ley xin Dios chi neꞌoc lokꞌlaj tak sacerdote ejeꞌeꞌ xa e winak. Pro ja ley xin Dios jariꞌ ma nim ta rukꞌij chwach ja juramento ja cꞌa xuyaꞌ na después ja Dios, in ja ban nombrar rmal ja juramento chi noc lokꞌlaj sacerdote jariꞌ ja Ralcꞌwal Dios, arjaꞌ xoc jun sacerdote pro jun sacerdote ja ni majun ja maquita tzꞌakat tre, queriꞌ rbanic ni mta wiꞌ qꞌuextajic trij.