Hebreos 6 - Tz'utujil (Ja Cꞌacꞌa Chominem)

¹ Koqꞌuiy cꞌa wachꞌalal. Ja tok kas kanimajto ja utzlaj tijonem nabey chꞌob chikawach jeꞌe nak rbanic ja Jesucristo. Jariꞌ tijonem yaꞌ chake caniꞌ rsimientoꞌil jun jay ticon chic. Pro ma chaka ta jaꞌ tikaqꞌuis tikacꞌam rtiquic wachꞌalal, joꞌ koqꞌuiy más, ma koqꞌuejeꞌ ta chi queriꞌ. Quewaꞌ ja rsimientoꞌil, quewaꞌ ja nabey tijonem ja ticon chic riꞌ, jun, ja naqꞌuex anaꞌoj, nayaꞌ can nojel ja raniman ja ni majun rcꞌamonto in nyukeꞌ chic acꞌuꞌx ruqꞌuin ja Dios.

² In jun chic, ja nchꞌo̱b chawach nak rbanic ja bautismo jeꞌe in chakajaꞌ ja nayaꞌ akꞌaꞌ pa quewiꞌ ja kachꞌalal. In jun chic, nak rbanic ja tok natcꞌastaj chipan ja camíc in chakajaꞌ tre ja nimlaj juicio ja mta qꞌuisic trij.

³ Maxta chaka rsimientoꞌil tikatic wachꞌalal, joꞌ koqꞌuiy más. Anin wotak chi queriꞌ xtikaban, Dios ta cꞌa xtitoꞌo kaxin chi rbanic.

⁴ Ja cꞌa winak ja nqueyaꞌ can ja Jesucristo mta moda xtiyataj chi ta chique chi xtiqueqꞌuex chi ta jutij ja quinaꞌoj. Ja nabey kꞌalasax chiquewach janiꞌ ja katataꞌ Dios chi ja rbanic caniꞌ jun nimlaj luz nsakirsaj ja quebey chiquewach. Quenaꞌ chakajaꞌ janiꞌ rquiꞌil ja rutzil ja quicochij tre ja Dios. Chakajaꞌ yataj chique chi qꞌuejeꞌe ja rEspíritu Santo pa tak canma.

⁵ Bien quenaꞌ janiꞌ rquiꞌil ja rtzobal Dios chi congana utzil rcꞌamonto in quenaꞌ chakajaꞌ janiꞌ ja nimlaj poder rcꞌan ja tiempo ja penak chikawach ja rcꞌamonto ja Cristo.

⁶ Ja cꞌa wi nqueyaꞌ can jariꞌ kas kꞌalawachili nquemaj chic jutij ripic ja Ralcꞌwal Dios chwach cruz in nqueyaꞌ ruqꞌuix chiquewach ja winak chakajaꞌ chewiꞌ tok matiyataj chic chique ja xtiquinimaj chi ta jutij.

⁷ Ejeꞌeꞌ e caniꞌ juleꞌ chenoj ja mta noc wiꞌ. Pro ja chenoj wi nutij jab in wi nwachij nakun jeꞌe ja utz nti̱j cumal ja nejoskꞌin rpan jariꞌ Dios nuyaꞌ rutzil parwiꞌ.

⁸ Pro ja chenoj ja wi xa qꞌuix nuyaꞌ mta cꞌa noc wariꞌ, ni majun winak cꞌo ta rgana ruqꞌuin in mta rutzil nuyaꞌ parwiꞌ, ja cꞌa rayben xa rporoxic pa kꞌakꞌ. Queriꞌ cꞌa quibanic ja winak ja nqueyaꞌ can ja Jesucristo.

* * * * * * * * * *

⁹ Chakꞌlaj wachꞌalal, masqui cowlaj tzij ja katzꞌibanel chewe riꞌ pro kotak chi ma ix junan ta ruqꞌuin ja chenoj ja mta noc wiꞌ. Ja tok nattotaji rmal ja Jesucristo cꞌoli ja rutzil ja nwachini pan awanma, ja cꞌariꞌ kayben chewe camic.

¹⁰ Ja cꞌa Dios mta moda xtuban ta ja ma utz ta xtimestaj ta ja rutzil ja rebanonto, arjaꞌ matimestaj chi congana xetij ekꞌij chi quitoꞌic ja kachꞌalal in cꞌa emajon na quitoꞌic camic. Como congana newajoꞌ ja Dios chewiꞌ tok neꞌetoꞌ.

¹¹ Ja cꞌa nwajoꞌ chewe camic chejujunal, tetijaꞌ ekꞌij chakajaꞌ chi rchꞌobic ja tzujun can chake rmal ja Dios ja kayben camic. Tiyukeꞌ ecꞌuꞌx chijutij ruqꞌuin ja rtzujun can chake. Ni ta quirwariꞌ ebanon ja tok xtipi chic jutij ja Jesucristo.

¹² Maxta quixsakꞌorini, tetijaꞌ más ekꞌij. Tecꞌamaꞌ cꞌa ja rejemplo quixin ja winak ja ni yukul wiꞌ quecꞌuꞌx ruqꞌuin ja Dios in ni nquecochꞌ wiꞌ ja npi jeꞌe chiquij, ejeꞌeꞌ riꞌ ja nyataj chique ja tzujun can jeꞌe rmal ja Dios.

¹³ Ja tok cꞌoli ntzujuj ja Dios ni nuyaꞌ wiꞌ caniꞌ xuban tre ja rAbraham ojer ja tok cꞌoli xtzujuj tre cꞌo jun juramento xuban pro rubiꞌ arjaꞌ xucoj ja xbanbej ja juramento como mchita jun ja más chi ta nim rukꞌij chwach arjaꞌ in quewaꞌ xbij tre ja rAbraham riꞌ:

¹⁴ —Pa nubiꞌ anin nbij chawe camic, seguro chi nyaꞌ ja wutzil pan awiꞌ, nenuyaꞌ na ja rawalcꞌwal, nebe pa nim, congana nquesep na quiꞌ. Queriꞌ xbij tre.

¹⁵ In queriꞌ xuban ja rAbraham, ni yataj wiꞌ tre nojel ja tzujux tre rmal ja Dios pro congana xucochꞌ na rwach chi raybexic.

¹⁶ Ja cꞌa winak tok nqueban jun juramento cꞌamonnak chique chi nquecoj rubiꞌ ja Dios ja nquibanbej ja juramento como ja Dios arjaꞌ más na nim rukꞌij in tok cꞌoli ja nquichꞌabej quiꞌ pa kꞌetbaltzij in tok cꞌo jun juramento nnatax cumal, ejeꞌeꞌ nqueban respetar in nechomtaj rmal.

¹⁷ Ja cꞌa Dios ma chaka ta xuban ja juramento, rumac chi bien nchꞌobtaj kumal ja rchꞌobon chakij chi ni mta wiꞌ qꞌuextajic trij, ni nuban wiꞌ cumplir. Queriꞌ nrajoꞌ chake ja nyataj chake nojel ja rtzujun can.

¹⁸ Queriꞌ cꞌa xuban ja Dios, caꞌiꞌ ja xbij can, jun, cꞌoli ja xtzujuj in jun chic, cꞌo jun juramento xuban ja ncꞌutbej chi ni nuyaꞌ wiꞌ ja xtzujuj in ni mta wiꞌ qꞌuextajic trij awaꞌ ja caꞌiꞌ riꞌ ja xbij can como ja Dios mta moda xtutzꞌak ta juleꞌ tzij. Queriꞌ xuban pro kumal ajoj ja xokanmaj chwach ja il mac in xekatoꞌoꞌ kiꞌ ruqꞌuin. Queriꞌ xuban chi ryukbaxic kacꞌuꞌx utzcꞌa chi nyukeꞌe ja kacꞌuꞌx chijutij ruqꞌuin ja rtzujun can chake ja kayben camic.

¹⁹ Nojel ariꞌ ja kayben camic bien kotak chi nekawilaꞌ na, ni mta wiꞌ qꞌuextajic trij. Nojel ariꞌ ja kayben jariꞌ nkajunsaj ruqꞌuin jun chꞌichꞌ ja chapbal lancha. Jariꞌ chꞌichꞌ nbe cꞌa xeꞌ mar, nuchap ja lancha, matuyaꞌ chic lugar tre ja lancha ja bar ta xticꞌamarel chi wiꞌ. Ja kayben ajoj camic cꞌa chilaꞌ chicaj ekajnak wiꞌ ja bar cꞌo wiꞌ ja Dios, congana chi na nuyaꞌ kaseguro.

²⁰ Cꞌa triꞌ ekajnak wiꞌ ja Jesús nabeyal chikawach, rjakon jun bey chikawach. Arjaꞌ ocnak lokꞌlaj sacerdote pro ni chijutij, ja cꞌa rsacerdoteꞌil arjaꞌ ni mta wiꞌ qꞌuisic trij, xa junan ruqꞌuin ja rsacerdoteꞌil ja Melquisedec.