Hebreos 3 - Tz'utujil (Ja Cꞌacꞌa Chominem)

¹ Rmalcꞌariꞌ tok nbij chewe wachꞌalal, techꞌoboꞌ jutzꞌit ja Cristo Jesús, bien techꞌoboꞌ wachꞌalal ja rix tinamit xin Dios, ja rixchaꞌon rmal ja Dios chi nixeqꞌuejeꞌ na ruqꞌuin chilaꞌ chicaj. Ja cꞌa Jesús arjaꞌ takto, xucꞌamto ja tijonem ja kaniman in camic arjaꞌ ocnak jun lokꞌlaj sacerdote ja paꞌl trij jawaꞌ tijonem riꞌ.

² Ni xuban wiꞌ cumplir ja samaj ja yataj tre rmal ja Dios chi nuban caniꞌ tre ja Moisés ojer chakajaꞌ xuban cumplir ja samaj ja yataj tre tokoriꞌ tok xerucꞌaj ja tinamit xin Dios.

³ Pro yatal tre ja Jesús chi más chi na nya̱ꞌ rukꞌij chwach ja Moisés caniꞌ tre jun banol jay arjaꞌ más na nim rukꞌij chwach ja jay ja nuban.

⁴ Nojel ja jay ni cꞌo wiꞌ nak banyon rxin chijujunal pro ja Dios arjaꞌ majun nak ta ja maquita arjaꞌ winakarsyon.

⁵ Ja Moisés ni katzij wiꞌ chi arjaꞌ xuban cumplir ja samaj xin Dios, arjaꞌ xucꞌan quixin ja tinamit xin Dios. Arjaꞌ moso rxin Dios, ja cꞌa samaj xubanto jariꞌ jun testimonio canaj can, cꞌo jeꞌe xucꞌutto ja majaꞌn tikꞌalajini triꞌ.

⁶ Ja cꞌa Cristo chakajaꞌ xuban cumplir ja samaj xin Dios, arjaꞌ cꞌayon ja tinamit xin Dios pro ma moso ta, arjaꞌ Alcꞌwalaxel. In ajoj ok tinamit xin Dios ja wi cow xkopeꞌi, ja wi ni ma xtikayaꞌ can ta wiꞌ ja yukulbal kacꞌuꞌx ruqꞌuin, ja wi ni xkoquicot wiꞌ chi raybexic ja Jesús.

* * * * * * * * * *

⁷ Rmalcꞌariꞌ nbij chewe, kayaꞌaꞌ jutzꞌit kaxquin tre ja nbix chipan ja rtzobal Dios rmal ja Espíritu Santo quewariꞌ: —Ja wi camic ntzijoni ja Dios ewqꞌuin tenimaj cꞌa chanim,

^8-9 maxta ticowir ecꞌuꞌx ewanma chi rcꞌaxaxic caniꞌ queban ja rewatiꞌt emamaꞌ ojer tok queyic ja wayewal. Como queriꞌ queban chwe tokoriꞌ tok xeqꞌuejeꞌ chipan ja lugar chakijlaj ulew. Qꞌuiy rwach ja ritzelal queban, xinquicꞌambajaj ja wi katzij chi nenuban castigar. Queriꞌ queban chwe masqui quetzꞌat ruqꞌuin quewach ja nimak tak milagro xinban pa quicuenta tre ja caꞌwinak junaꞌ xeqꞌuejeꞌ triꞌ.

¹⁰ Rmalcꞌariꞌ ja tok congana pi wayewal chiquij. Nojel ja nquechꞌob kaj pa tak canma ni ma utz ta wiꞌ. Ja utzlaj bey ja ncꞌutun chiquewach jariꞌ ni ma cotakin ta wiꞌ, xincheꞌ kaj.

¹¹ Rmalcꞌariꞌ ja tok congana yictaj wayewal chiquij: —Katzij nbij chi ejeꞌeꞌ matinyaꞌ lugar chique chi xqueꞌoc ta chipan ja xulaꞌnbal lugar ja nchomin, xincheꞌ kaj. Queriꞌ tzꞌibtal can.

¹² Ja cꞌa rixix wachꞌalal tebanaꞌ jutzꞌit cuenta ewiꞌ, maxta ecꞌoli chewe ja xa itzel ja canma in matiyukeꞌ chic quecꞌuꞌx ruqꞌuin ja cꞌaslic Dios in nqueyaꞌ can.

¹³ Ja kas rubey neban, kꞌij kꞌij tepaxbaj ewiꞌ chibil tak ewiꞌ. Pro ma teyaꞌ ta tiempo tre, ni tebanaꞌ wiꞌ, ma cꞌa chwak ta. Queriꞌ nwajoꞌ chewe chi neban utzcꞌa chi maquixban engañar rmal ja il mac utzcꞌa chi maticowir ewiꞌ ewanma chipan.

¹⁴ Caniꞌ kabanonto ja kas nabey yukul kacꞌuꞌx ruqꞌuin ja Jesucristo, ja cꞌa wi ni cow wiꞌ xkopeꞌi chi ryukbaxic kacꞌuꞌx ruqꞌuin, ja wi ni matikayaꞌ can wiꞌ jariꞌ ni katzij wiꞌ chi xa jun kabanon ruqꞌuin.

¹⁵ Turkaj chake ja tzꞌibtal can, quewaꞌ nbij riꞌ: —Ja wi camic ntzijoni ja Dios ewqꞌuin tenimaj cꞌa chanim, maxta ticowir ecꞌuꞌx ewanma chi rcꞌaxaxic ja caniꞌ queban ja rewatiꞌt emamaꞌ ojer ja tok queyic ja wayewal, neꞌe.

¹⁶ ¿Nak cꞌa chi winakil ariꞌ ja xecꞌaxani tok tzijoni ja Dios cuqꞌuin pro xa queyic ja ryewal? Ja xebanowi ejeꞌeꞌ riꞌ canojel ja winak ja xetotajto pa quekꞌaꞌ ja raj Egipto ojer ja xeꞌucꞌax rmal ja Moisés.

¹⁷ Ejeꞌeꞌ riꞌ winak caꞌwinak junaꞌ yictaji ryewal ja Dios chiquij, xekaj chipan ja il mac chipan ja lugar chakijlaj ulew in triꞌ xecam wiꞌ.

¹⁸ Ejeꞌeꞌ riꞌ chakajaꞌ ja bix chique rmal ja Dios chi arjaꞌ matuyaꞌ lugar chique chi xqueꞌoc ta chipan ja xulaꞌnbal lugar ja rchomin, ejeꞌeꞌ ni ma xeniman ta wiꞌ.

¹⁹ Ni kꞌalaj wiꞌ chi rmal ja ma xyukeꞌ chi ta quecꞌuꞌx ruqꞌuin ja Dios chewiꞌ tok ma xeꞌoc ta chipan ja xulaꞌnbal lugar.