Hebreos 13 - Tz'utujil (Ja Cꞌacꞌa Chominem)

¹ Wachꞌalal, ni tewajoꞌ wiꞌ ewiꞌ, maxta temestaj jutzꞌit.

² Kas queꞌurkaj chewe ja quimajon rcanoxic ja bar newar wiꞌ, queꞌecꞌuluꞌ pon pa tak ewochoch. Queriꞌ nbij chewe como ecꞌoli ja quiyaꞌon posada chique ángel pro ni majun nak ta quinaben ja wi ángel ja queyaꞌ quiposada.

³ Quenataj jutzꞌit emwal ja kachꞌalal ja rumac Jesucristo ecꞌo pa tak cheꞌ. Ja cꞌa neban, tenaꞌaꞌ kaj ixix como caniꞌ ixix jun ixcꞌo cuqꞌuin chipan ja cheꞌ. Quenataj emwal chakajaꞌ ja majtajnak rbanic pokon chique. Ja neban, tenaꞌaꞌ kaj caniꞌ ixix jun ixcꞌo cuqꞌuin chipan ja rpokonal.

⁴ Canojel ta xtiqueban ta respetar jutzꞌit ja cꞌulbic. Maxta teban rij tak quewiꞌ ja rewixjayilal owi ewachajilal. Queriꞌ nbij chewe como ja Dios arjaꞌ nukꞌet na tzij chiquij ja rachiꞌiꞌ in ixokiꞌ ja nemacuni, nukꞌet na tzij chawij wi natoc ruqꞌuin jun wi ma awixjayil ta owi ma awachajil ta.

⁵ Maxta congana tel ecꞌuꞌx trij ja pwok, ni quixquicot wiꞌ nojel tiempo chi cꞌoli owi mta cꞌol ewqꞌuin como ja Dios arjaꞌ nchajin awxin caniꞌ rbin can chipan ja rtzobal quewariꞌ: —Nij incꞌo wiꞌ awqꞌuin chijutij, ni macatnuyaꞌ can wiꞌ, neꞌe.

⁶ Rmalcꞌariꞌ tok ajoj quewaꞌ nkabij riꞌ: —Ja kajaw Dios arjaꞌ ntoꞌo wxin, ja winak xa nak ta ncajoꞌ nqueban chwe jariꞌ matinxbej wiꞌ chiquewach. Queriꞌ nkabij in nixtacꞌa jutzꞌit ta nkanaꞌ kiꞌ chi rbixic.

⁷ Quenataj emwal ja kachꞌalal ja xeꞌucꞌan ewxin, ejeꞌeꞌ quechꞌob chewach ja rtzobal Dios. Techꞌoboꞌ chi utz janiꞌ ja quicꞌaslemal tok xeqꞌuejeꞌ waweꞌ chwachꞌulew in caniꞌ queban congana yukeꞌ quecꞌuꞌx ruqꞌuin ja Dios ni ta quirwariꞌ neban ixix chakajaꞌ.

⁸ Ja Jesucristo arjaꞌ ni mta wiꞌ qꞌuextajic trij. Ja rnaꞌoj iwir niquirwariꞌ camic in niquirwariꞌ chwak cabij, ni mta wiꞌ qꞌuextajic trij.

⁹ Maxta chaka nojel ta tenimaj, maxta quixcꞌamarel rmal juleꞌ chic tijonem ja junwiꞌ chi na. Nojel ja nkatij jeꞌe ni majun nak ta rcꞌamonpi tre ja kanma ajoj nixtacꞌa cꞌo ta rcꞌamonto chique chakajaꞌ ja winak ja nquinimaj jariꞌ costumbre chi cꞌoli rcꞌamonto. Ma rmal ta cꞌa ja natij tok nqꞌuiyi ja rutzil pan awanma pro rumac ja rutzil ja nkacochij tre ja Dios.

¹⁰ Cꞌo jun altar kaxin pro ja sacerdote ja nesamaj chipan ja templo quixin ja raj Israel ejeꞌeꞌ mta quekꞌaꞌ tre chi nquetij ja sacrificio ja ntzujux chwach awaꞌ ja raltar riꞌ.

¹¹ Ejeꞌeꞌ cꞌoli nqueban nquitzujuj jun chicop chwach ja Dios, nquecꞌol can ja rquiqꞌuel pro ja rcuerpo nlasaxel chipan ja tinamit, junwiꞌ nporox wiꞌ. Ja cꞌa rquiqꞌuel jariꞌ ncꞌamarel chipan ja santilaj lugar rmal ja lokꞌlaj sacerdote, triꞌ ntzujux wiꞌ chwach ja Dios rmal ja quil quemac ja winak.

¹² Queriꞌ cꞌa ban tre ja Jesús chakajaꞌ lasaxel chipan ja tinamit, junwiꞌ xecamsax wiꞌ. Ja cꞌa rquiqꞌuel jariꞌ xchꞌachꞌojirsbej ja kanma ja rok winak chipan ja kil kamac.

¹³ Camic koꞌel cꞌa ajoj chakajaꞌ chipan ja tinamit, joꞌ ruqꞌuin ja Jesús, xa jun kabanaꞌ ruqꞌuin chipan ja rpokonal ja xutij tokoriꞌ tok yaꞌ ruqꞌuix chiquewach ja winak.

¹⁴ Ja cꞌa waweꞌ chwachꞌulew mta jun katinamit ja maquita nkꞌaxi pro cꞌo jun ja katinamit ja majaꞌn tiyaꞌ chake jariꞌ kayben camic.

¹⁵ Como jakon chic kabey rmal ja Jesucristo koꞌekaji cꞌa chwach ja Dios: —Nataꞌ Dios congana nmaltioxij chawe nojelal, xkocheꞌ ta tre, ja tariꞌ xtikabij tre nojel tiempo chi ryabexic rukꞌij. Jariꞌ junan neli ruqꞌuin jun sacrificio nkatzujuj tre.

¹⁶ Pro ni tecꞌutuꞌ wiꞌ ja rewutzil chakajaꞌ in queꞌetoꞌoꞌ ja cꞌo rjawaxic chique, maxta temestaj chi rbanic ja wariꞌ. Ja cꞌa tok neban ja wariꞌ junan neli ruqꞌuin jun sacrificio chakajaꞌ pro jun sacrificio ja congana nel rucꞌuꞌx ja Dios trij.

¹⁷ Queꞌenimaj ja kachꞌalal ja recꞌayon ewxin, teyaꞌaꞌ ewiꞌ pa quekꞌaꞌ. Ejeꞌeꞌ echajyon rxin ja rewanma in emwal nequijachaꞌ na cuenta chwach ja Dios. Queꞌenimaj utzcꞌa chi nequicoti chi ewucꞌaxic, maxta quebison emwal. Ni majun rcꞌamonto chewe ja wi xa pa bis neꞌeyaꞌ wiꞌ.

¹⁸ Wachꞌalal, ni tebanaꞌ wiꞌ jutzꞌit orar pa kacuenta. Chwach Dios nbij chewe chi ni majun nak ta ntiꞌon ta pa tak kanma, ja cꞌa nkajoꞌ ni ta ja wiꞌ xtikaban ja utz ntzꞌa̱t rmal ja Dios.

¹⁹ Congana nban recomendar chewe chi neban orar pa ncuenta utzcꞌa chi nintak chic jutij ewqꞌuin chanim.

* * * * * * * * * *

²⁰ Ja Dios arjaꞌ Yoꞌl quicotemal, arjaꞌ yico rxin ja kajaw Jesús chipan ja camíc. Ja Jesús arjaꞌ lokꞌlaj Pastor, arjaꞌ yukꞌul kaxin ja rok caniꞌ tak rcarnelo. Rmal ja rquiqꞌuel ja xutix chwach cruz chewiꞌ tok queriꞌ rbanon. Jariꞌ quicꞌ yaꞌbal rseguro ja chominem ja ni mta wiꞌ qꞌuisic trij ja chomarsax rmal ja Dios.

²¹ Dios ta cꞌa xtiyoꞌ chewe chi nnoji nojel rwach ja rutzil pa tak ewanma utzcꞌa chi nixcowini neban ja rvoluntad, xtuyaꞌ ta chewe chi nsamaji ja Jesucristo pa tak ewanma chi rwinakarsaxic jeꞌe nak ja nel rucꞌuꞌx trij. Ni ta xtiyaꞌ wiꞌ rukꞌij camic, chwak in chijutij. Amén.

²² Wachꞌalal, anin nban recomendar chewe, kas tiqꞌuejeꞌe ja repaciencia chi rcꞌaxaxic ja paxbanem ja ntzꞌiban chipan awaꞌ carta riꞌ como xa ma nim ta.

²³ In jun chic nbij chewe, ja kachꞌalal Timoteo arjaꞌ elnakpi chic libre camic. Ja cꞌa wi xturkaji chanim can ncꞌamel ja tok xquinbe ewqꞌuin.

²⁴ Teyaꞌaꞌ cꞌa rutzil quewach canojel ja recꞌayon ewxin. Teyaꞌaꞌ rutzil quewach canojel ja juleꞌ chic ja re tinamit xin Dios. Ja kachꞌalal ja recꞌo pa tak tinamit ja cꞌo pa rcuenta Italia ejeꞌeꞌ nquetakel rutzil ewach ixix chakajaꞌ.

²⁵ Dios ta cꞌa xtuyaꞌ rutzil pan ewiꞌ ewanojelal. Amén.