Hebreos 11 - Tz'utujil (Ja Cꞌacꞌa Chominem)

¹ Ja yukulbal cꞌuxlal quewaꞌ rbanic riꞌ, ja wi cꞌo jeꞌe ja yukul kacꞌuꞌx ruqꞌuin jariꞌ ni nkaybej na wiꞌ in bien kotak chi nekawilaꞌ na, owi tre ja matitzꞌattaji ruqꞌuin kawach ja wi yukul kacꞌuꞌx ruqꞌuin jariꞌ bien kotak chi cꞌoli masqui matikatzꞌat.

² Ja katiꞌt kamamaꞌ ojer, rmal ja yukulbal quecꞌuꞌx ruqꞌuin ja Dios chewiꞌ tok utz xetzꞌa̱t rmal.

³ Ja rajoj chakajaꞌ, rmal ja yukulbal kacꞌuꞌx ruqꞌuin ja Dios chewiꞌ tok chꞌobtajnak kumal chi ja tok tzꞌucarsaxi ja caj in rwachꞌulew, ja tzij ja bix pon rmal ja Dios jariꞌ tzꞌucarsbexi. Queriꞌ cꞌa rbanic, ja Dios xa xbij pon ja tzij in jariꞌ tzij xoqui chi rtzꞌucarsaxic, ma ja tariꞌ xoqui chi rtzꞌucarsbexic ja ntzꞌattaji ruqꞌuin kawach.

⁴ Ja rAbel chakajaꞌ, rmal ja yukulbal rucꞌuꞌx ruqꞌuin ja Dios chewiꞌ tok más na utz ja sacrificio ja xtzujuj tre ja Dios chwach ja tzujux rmal ja Caín. Ja cꞌa Dios arjaꞌ utz xutzꞌat ja sacrificio rxin ja rAbel in xucꞌam tre, triꞌ cꞌa nkatzꞌat wiꞌ chi ja rAbel utz tzꞌati rmal ja Dios. Ma chaka ta ban queriꞌ tre, rumac ja yukulbal rucꞌuꞌx. In masqui camnak chic ja rAbel pro rmal ja yukulbal rucꞌuꞌx ruqꞌuin ja Dios tok caniꞌ cꞌa ntzijon na kuqꞌuin camic.

⁵ Ja rEnoc chakajaꞌ, rmal ja yukulbal rucꞌuꞌx ruqꞌuin ja Dios chewiꞌ tok yataj tre chi ma xkꞌax ta chipan ja camíc pro chaka jalal ja tok ma xcanoy chi ta waweꞌ chwachꞌulew como Dios cꞌamoꞌel rxin chilaꞌ chicaj. Como ja Dios congana quicot trij ja rEnoc waweꞌ chwachꞌulew chewiꞌ tok xuban queriꞌ tre, caniꞌ tzꞌibtal can.

⁶ Ja Dios wi mta yukulbal acꞌuꞌx ruqꞌuin jariꞌ mta moda utz ta xtutzꞌat ja racꞌaslemal. Ja wi cꞌol agana nattiloc ruqꞌuin ja Dios rjawaxic chawe ja caꞌiꞌ riꞌ, jun, nanimaj chi cꞌoli ja Dios, in jun chic, nanimaj chi ja Dios, wi natij akꞌij chi rilic arjaꞌ nyoꞌ chawe ja rtojbalil.

⁷ Ja Noé chakajaꞌ, rmal ja yukulbal rucꞌuꞌx ruqꞌuin ja Dios arjaꞌ xnimaj ja Dios ja tok bix tre chi cꞌo jun juicio penak. Arjaꞌ bien xnimaj masqui majaꞌn tutzꞌat ja juicio penak. Rmal cꞌa ja yukulbal rucꞌuꞌx tok xuban jun nimlaj lancha, xeꞌoc chipan e rachbil canojel ja recꞌo pa rochoch, queriꞌ queban xetotaji chipan ja juicio. Triꞌ cꞌa nkatzꞌat wiꞌ chi ja ma xeniman ta ni pa quil wiꞌ ban chique xecamsaxi. Ja Noé yukeꞌ rucꞌuꞌx ruqꞌuin ja Dios xa chewiꞌ tok cꞌul rmal como queriꞌ nuban ja Dios chawe natrucꞌul ja tok nyukeꞌ acꞌuꞌx ruqꞌuin.

⁸ Ja rAbraham chakajaꞌ, rmal ja yukulbal rucꞌuꞌx ruqꞌuin ja Dios chewiꞌ tok xnimaj ja Dios. Tokoriꞌ xnimaj ja tok bix tre chi neli in nbe chipan jun chic nación ja xtiyaꞌ na tre como herencia. Arjaꞌ nimani in be masqui ma rotak ta nak chi lugaril ja nbe wiꞌ.

⁹ Tok xekaj chipan ja nación ja tzujux tre triꞌ qꞌuejeꞌ wiꞌ masqui ma rtinamit ta pro rmal ja yukulbal rucꞌuꞌx ruqꞌuin ja Dios ja tok xuban queriꞌ. Qꞌuejeꞌ na pa tak jay jeꞌe ja tzꞌum ocnak e rachbil Isaac in Jacob, ejeꞌeꞌ chakajaꞌ junan tzujux chique ja caniꞌ tzujux tre ja rAbraham.

¹⁰ Ja tinamit ja kas rayben ja rAbraham jariꞌ ja tinamit ja xin chilaꞌ chicaj ja cꞌo jun rsimientoꞌil ja ni mta wiꞌ qꞌuisic trij, jariꞌ tinamit Dios chomarsani in Dios banowi.

¹¹ Ja cꞌa Sara ja rxjayil Abraham cꞌo yukulbal rucꞌuꞌx ruqꞌuin ja Dios chakajaꞌ chewiꞌ tok yataj tre rmal ja Dios chi xoc na jun teꞌej masqui congana ti riꞌj chic in mta alanem trij pro xalax na jun ti ral. Yukeꞌ rucꞌuꞌx ruqꞌuin ja Dios, rotak chi ja ntzujuj ni nuyaꞌ wiꞌ chewiꞌ tok yataj tre ja ti ral.

¹² Queriꞌ cꞌa xuban ja rAbraham masqui congana ti riꞌj chic pro yataj na tre chi qꞌuejeꞌ jun ti ralcꞌwal, xeqꞌuejeꞌ na riy rumam chakajaꞌ in congana quesep quiꞌ, cꞌayew chi neꞌaltaji caniꞌ chique chꞌumil ja recꞌo chicaj in caniꞌ tre ja raxasnayiꞌ ja cꞌo chi tak mar.

¹³ Ejeꞌeꞌ riꞌ winak ja tok xecami majaꞌn tiquewil ja tzujun chique rmal ja Dios pro masqui majaꞌn tiquewil pro ni yukul na wiꞌ quecꞌuꞌx ruqꞌuin ja Dios chi ja xtzujuj chique ni nuyaꞌ na wiꞌ. Ja quenaꞌ kaj pa tak canma caniꞌ ecꞌo pon chic ruqꞌuin ja tzujux chique in congana nequicot pon trij. Quewaꞌ quibij riꞌ: —Mta jun katinamit waweꞌ chwachꞌulew, xa ok kꞌaxel chwach, necheꞌe.

¹⁴ Ja tok queriꞌ nabij triꞌ cꞌa ncꞌaxax wiꞌ chi cꞌa amajon na rcanoxic jun tinamit ja mero tinamit awxin.

¹⁵ Ja tinamit ja bar eꞌelnakto wiꞌ nabey wixta quichꞌobon chi triꞌ nemeloj wiꞌ xecowin ta cꞌariꞌ xemeloji pro ma queriꞌ ta quichꞌobon.

¹⁶ Pro ja mero quitinamit ja kas nel quecꞌuꞌx trij jariꞌ más utz chi na, jariꞌ ja tinamit ja xin chilaꞌ chicaj. Ja cꞌa Dios ma junwiꞌ ta nunaꞌ nbij chi arjaꞌ Dios quixin como cꞌo jun quitinamit ja rchomarsan ja mero tinamit quixin.

¹⁷ Ja rAbraham, rmal ja yukulbal rucꞌuꞌx ruqꞌuin ja Dios chewiꞌ tok nimani ja tok cꞌambajaxi rmal ja Dios tokoriꞌ tok xtzujuj chwach Dios ja rIsaac ja ti rcꞌajol in jutzꞌit laj xcamsaj. Ja rAbraham arjaꞌ conforme chi ntzujuj ja ti rcꞌajol chipan ja camíc masqui xarariꞌ ti jun. Pro makanaꞌ maquita tzujun chic tre rmal ja Dios chi congana nquesep na quiꞌ ja riy rumam,

¹⁸ makanaꞌ maquita bin chic tre chi ja rIsaac nsepo quixin ja riy rumam.

¹⁹ Pro quewaꞌ xuchꞌob kaj ja rAbraham riꞌ, ja Dios masqui xcamsaj ta ja ti rcꞌajol pro cowin ta cꞌariꞌ xcꞌasbaꞌ chi ta jutij chipan ja camíc. Queriꞌ xuban ja ti rcꞌajol yataj chic jutij tre, caniꞌ kꞌax chipan ja camíc in caniꞌ cꞌastaji.

²⁰ Ja rIsaac chakajaꞌ, rmal ja yukulbal rucꞌuꞌx ruqꞌuin ja Dios chewiꞌ tok xeruban can bendecir ja Jacob in Esaú tokoriꞌ tok xkꞌalasaj can chiquewach nak ja majaꞌn tibantaji.

²¹ Ja tok xajalal majaꞌn ticami ja Jacob arjaꞌ chakajaꞌ rmal ja yukulbal rucꞌuꞌx ruqꞌuin ja Dios chewiꞌ tok xeruban can bendecir ja re caꞌiꞌ rcꞌajol ja José. Arjaꞌ rcꞌan ti rchꞌameꞌy, xtokꞌaj riꞌ tre, tiqueꞌe in xuyaꞌ rukꞌij ja Dios.

²² Ja tok xajalal majaꞌn ticami ja José arjaꞌ chakajaꞌ rmal ja yukulbal rucꞌuꞌx ruqꞌuin ja Dios chewiꞌ tok xbij can chique ja rchꞌalal chi nerilaꞌ na jun kꞌij tok xqueꞌeli ja raj Israel pan Egipto: —Jariꞌ kꞌij tok xqueꞌelel ncꞌamarel na ja nbakil anin chakajaꞌ. Queriꞌ xbij can chique.

²³ Ja rtataꞌ ruteꞌ ja Moisés chakajaꞌ cꞌo yukulbal quecꞌuꞌx ruqꞌuin ja Dios in rmalariꞌ ja Moisés tok xalaxi totaji pa rukꞌaꞌ ja rey. Como ja rey cꞌo jun orden ryaꞌon pro ejeꞌeꞌ ma xquixbej ta quiꞌ chwach. Quetzꞌat ja ti calcꞌwal chi congana ti buena chewiꞌ oxiꞌ icꞌ quiwawaj chwach ja rey.

²⁴ Ja Moisés banon tre rmal ja rmeꞌal ja rey Faraón caniꞌ jun chakꞌlaj ral congana nim rukꞌij. Pro tok xoc achi ma xpokonaj ta xuyaꞌ can. Rmal ja yukulbal rucꞌuꞌx ruqꞌuin ja Dios tok ma xpokonaj ta xuyaꞌ can.

²⁵ Xerachbilaj ja tinamit xin Dios chipan ja rpokonal. Quewaꞌ xuchꞌob kaj ja Moisés riꞌ: —Más na utz nenwachbilaj ja tinamit xin Dios chipan ja rpokonal chwach ja xquenwachbilaj ta ja raj Egipto chipan ja quicotemal ja xa il mac rcꞌamonto in xa nocꞌowi chakajaꞌ.

²⁶ Más na vale ja ntij rpokonal rumac ja Cristo chwach ja xtinchꞌec ta nojelal ja mebaꞌil ja cꞌo pan Egipto, neꞌ kaj. Arjaꞌ kas tzꞌel pon rwach trij ja rtojbalil ja nya̱ꞌ na tre rmal ja Dios chewiꞌ tok queriꞌ xuchꞌob.

²⁷ Rmal ja yukulbal rucꞌuꞌx ruqꞌuin ja Dios chewiꞌ tok xeli ja pan Egipto, ma xbej ta riꞌ chwach ja rey masqui ja rey congana yictaj ryewal. Cow peꞌi, rotak chi ja Dios cꞌo ruqꞌuin, xuban ja caniꞌ xutzꞌat rwach ja Dios masqui ja Dios matitzꞌattaji.

²⁸ Ja Moisés, rmal ja yukulbal rucꞌuꞌx ruqꞌuin ja Dios chewiꞌ tok xucꞌul ja nmakꞌij rbinaꞌan pascua. Rmal ja yukulbal rucꞌuꞌx chakajaꞌ tok quewaꞌ xbij chique ja winak riꞌ: —Techicaj rquiqꞌuel jun carnelo chiꞌ tak puerta rxin ewochoch. Quirtariꞌ neban utzcꞌa ja tok xtipeti ja ángel chi quicamsaxic ja ralaꞌiꞌ ja nabey tak winak maquercamsaj ja rewalcꞌwal ixix, neꞌ chique.

²⁹ Ja raj Israel chakajaꞌ, rmal ja yukulbal quecꞌuꞌx ruqꞌuin ja Dios chewiꞌ tok xecowini xekꞌax chipan ja nimlaj yaꞌ rbinaꞌan Quiakamar pro nixtacꞌa xechꞌakeꞌ ta jutzꞌit, caniꞌ xa nak ta chi beyal xekꞌax wiꞌ. Pro ja raj Egipto laj xekꞌax ejeꞌeꞌ chakajaꞌ pro xejikꞌ chipan ja yaꞌ.

³⁰ Ja raj Israel, rmal ja yukulbal quecꞌuꞌx ruqꞌuin ja Dios chewiꞌ tok be chi tokꞌulew ja nimlaj tabia ja sutin trij ja tinamit rbinaꞌan Jericó. Ja tre wukuꞌ kꞌij ni queyaꞌ wiꞌ jeꞌe vuelta trij ja tabia in tok tzꞌakati ja yaꞌoj vuelta cumal be ja tabia chi tokꞌulew.

³¹ Ja rixok ja raj Jericó rbinaꞌan Rahab ja ritzel rcꞌaslemal nabey arjaꞌ cꞌo yukulbal rucꞌuꞌx ruqꞌuin ja Dios chakajaꞌ. Arjaꞌ xerutoꞌ ja soldado ja raj Israel ja xeꞌekaji ja pa Jericó chi rcꞌambajaxic ja tinamit pro xa pan awatali xeꞌekaji. Ja cꞌa Rahab quiꞌil quicꞌulic xuban, xerucoj pa rochoch in rmal ja yukulbal rucꞌuꞌx chewiꞌ tok ma xcamsax ta pro xecamsaxi ja rach tak aj Jericó como ejeꞌeꞌ ma xquinimaj ta ja Dios.

³² In ecꞌo na más ja winak ja quiyaꞌon can jun utzlaj ejemplo chikawach tre ja yukulbal quecꞌuꞌx ruqꞌuin ja Dios pro matuyaꞌ tiempo chwe xquintzijon ta chique juleꞌ chic caniꞌ chique Gedeón, Barac, Sansón, Jefté, David, Samuel in chique juleꞌ chic profeta.

³³ Ejeꞌeꞌ chakajaꞌ rmal ja yukulbal quecꞌuꞌx ruqꞌuin ja Dios chewiꞌ tok yataj chique chi quechꞌec ja gobierno jeꞌe ja rocnak quicꞌulel, chewiꞌ tok utz queban chi cucꞌaxic ja winak in chewiꞌ chakajaꞌ tok quewil jeꞌe ja tzujunto ojer rmal ja Dios. Rmal ja yukulbal quecꞌuꞌx chakajaꞌ tok xecowini quitzꞌapij quechiꞌ ja cój.

³⁴ Chewiꞌ chakajaꞌ tok mta xoc chique tok xeya̱ꞌ pa kꞌakꞌ, ma xecꞌat ta. Chewiꞌ chakajaꞌ tok xecowini quetoꞌ quiꞌ pa quekꞌaꞌ ja winak ja xcajoꞌ ta xequicamsaj tzaꞌn tak espada. Ja cꞌa tok ni majun ja quichokꞌakꞌ yataj chique quichokꞌakꞌ, cow xepeꞌi chipan ja chꞌaꞌoj in xecowini xequisalujel ja quicꞌulel ja neꞌurchꞌojin jeꞌe cuqꞌuin chipan ja quitinamit.

³⁵ Ecꞌo jeꞌe ixokiꞌ chakajaꞌ, rmal ja yukulbal quecꞌuꞌx ruqꞌuin ja Dios tok yataj jeꞌe chique chi xecꞌastaji camnakiꞌ cuqꞌuin. Ecꞌo juleꞌ chic ja winak, rmal ja yukulbal quecꞌuꞌx tok xechapi, más kꞌaxnak chi na ja rpokonal ban chique in bix chique chi nesokpixel pro wi nqueyaꞌ can ja Dios. Pro ejeꞌeꞌ ma xeniman ta: —Mejor nokcamsaxi, xecheꞌe. Queriꞌ queban utzcꞌa chi nquewil ja cꞌaslemal ja más utz chi na.

³⁶ Ecꞌoli ja congana xetzꞌuji, xeyokꞌi, xechꞌa̱y tzaꞌn tak asial in chakajaꞌ xeba̱cꞌ pa tak cadena, xeco̱j pa tak cheꞌ.

³⁷ Ecꞌoli xecamsax tzaꞌn tak abaj. Ecꞌoli xekꞌe̱t tzaꞌn tak sierra. Janila chi xeba̱n puersa chi nqueyaꞌ can ja yukulbal quecꞌuꞌx ruqꞌuin ja Dios. Ecꞌoli xecamsax tzaꞌn tak espada. Ecꞌoli xebinyaj na pa tak lugar jeꞌe, xa quitzꞌumal carnelo xa quitzꞌumal qꞌuisicꞌ quicojon chic, mchita nak chi ta nquitzukbej quiꞌ, congana lawuloꞌ ban chique, congana cꞌayew ja quicꞌaslemal.

³⁸ Ja cꞌa winak ja xa mta quigana ruqꞌuin ja Dios ejeꞌeꞌ ma yatal ta chique ja xeqꞌuejeꞌ ta awaꞌ winak riꞌ chiquicojol. Congana cꞌayew ja queban, xebinyaj na pa tak chakijlaj ulew, xebinyaj na chwitakjayuꞌ, xeqꞌuejeꞌ na pa tak jul.

³⁹ Ejeꞌeꞌ canojel, rmal ja yukulbal quecꞌuꞌx ruqꞌuin ja Dios chewiꞌ tok congana utz xetzꞌa̱t rmal. Pro jariꞌ tiempo masqui utz xetzꞌati pro majaꞌn tiquewil triꞌ ja tzujunto ojer rmal ja Dios.

⁴⁰ Ejeꞌeꞌ caybej na chi nquewil como ja Dios arjaꞌ rchꞌobonto chi cꞌa pa katiempo ajoj nwinakarsaj wiꞌ ja cꞌacꞌa chominem ja más chi na utz. Queriꞌ xuban utzcꞌa chi junan nyataj chake kanojel ja totajem pro jun totajem ja ni majun ja maquita tzꞌakat tre, ma ejeꞌeꞌ ta xewilowi chikawach nabey.