Hebreos 1 - Tz'utujil (Ja Cꞌacꞌa Chominem)

¹ Ja rojer ja Dios xerucoj profeta chi ejeꞌeꞌ nekꞌalasan chiquewach ja katiꞌt kamamaꞌ janiꞌ ja rnaꞌoj. Jariꞌ ma jutij ta xuban pro qꞌuiylaj mul in qꞌuiy rwach xuyaꞌ chique ja nquikꞌalasbej jeꞌe chiquewach janiꞌ ja rnaꞌoj.

² Pro ja rbanon ja Dios camic chipan awaꞌ qꞌuisbal tak kꞌij rxin ja tiempo ja rokcꞌo wiꞌ riꞌ xucoj ja Ralcꞌwal chi arjaꞌ kꞌalasan chikawach ajoj janiꞌ ja rnaꞌoj. Xuyaꞌ tre ja Ralcꞌwal chi mta nak ta ja maquita noc na pa rukꞌaꞌ in xucoj ja Ralcꞌwal chakajaꞌ chi arjaꞌ winakarsani ja caj in rwachꞌulew.

³ Caniꞌ tre ja ruchꞌaꞌ kꞌij ruqꞌuin nkatzꞌat wiꞌ nak rbanic ja kꞌij in queriꞌ cꞌa tre ja Ralcꞌwal Dios chakajaꞌ ruqꞌuin nkatzꞌat wiꞌ chi janila nim rukꞌij ja Dios. Ja Dios in ja Ralcꞌwal ni junan quinaꞌoj chi e caꞌiꞌ, ni majun nak ta rjalben ta riꞌ. Ja Ralcꞌwal Dios mta nak ta ja winakarsan jeꞌe ja maquita arjaꞌ chapyon rxin utzcꞌa chi matichictaji in matiyojtaji, ja cꞌa nchapbej jariꞌ ja rtzobal como ja tzij nbij congana poder rcꞌan. Ja cꞌa xuban nabey peti, xokurchꞌachꞌojirsaj chipan ja kil kamac cꞌacꞌariꞌ be chilaꞌ chicaj, xetzꞌabeꞌ pa riquikꞌaꞌ ja nimlaj katataꞌ Dios.

* * * * * * * * * *

⁴ Ja Ralcꞌwal Dios yataj tre chi más chi na nim rukꞌij arjaꞌ chiquewach ja ángel. In chakajaꞌ ja rubiꞌ yaꞌ tre jariꞌ más chi na nim rukꞌij chwach ja quebiꞌ ja ángel.

⁵ Ja Dios tzijonnak can tre ja Ralcꞌwal quewariꞌ: —Atat at Walcꞌwal. Camic nyaꞌon acꞌaslemal, chenak can tre. Pro ni majutij xbij ta walcꞌwal tre jun ángel. In chakajaꞌ tzijonnak can chic jutij tre quewariꞌ: —Anin in Tatixel rxin, arjaꞌ Walcꞌwal, chenak can tre. Pro ni majutij xbij ta queriꞌ tre jun ángel.

⁶ Ja cꞌa Ralcꞌwal ja congana nim rukꞌij tok xutakto waweꞌ chwachꞌulew quewaꞌ xbij riꞌ: —Canojelal ja ángel rxin Dios tiquiyaꞌaꞌ rukꞌij, neꞌe.

⁷ Ja chique ja ángel quewaꞌ tzꞌibtal can chique riꞌ: —Ja ángel, Dios nuban chique e caniꞌ rmoso, e caniꞌ xcomel, e caniꞌ rxak kꞌakꞌ, neꞌe.

⁸ Pro ja Ralcꞌwalaxel quewaꞌ tzꞌibtal can tre riꞌ: —Atat at Dios, atat at Rey in ja gobierno awxin atat jariꞌ ni mta wiꞌ qꞌuisic trij. Utz cucꞌaxic naban ja recꞌo pan akꞌaꞌ.

⁹ Nel acꞌuꞌx trij ja rutzil pro ja ritzelal itzel natzꞌat. Rmalcꞌariꞌ tok atnchaꞌon chi atocnak Rey, anin ja rin Dios awxin. Más chi na quiꞌil ja tok xatnuchaꞌ atat chwach ja tok xenuchaꞌ juleꞌ chic awach tak rey. Queriꞌ tzꞌibtal can tre.

¹⁰ Cꞌo chi na jun tzꞌibtal can tre chakajaꞌ quewaꞌ nbij riꞌ: —Wajaw, atat xatticowi ja rwachꞌulew, ruqꞌuin akꞌaꞌ xawinakarsbej ja caj.

¹¹ Ja caj in rwachꞌulew xa cꞌo qꞌuisic trij pro ja ratat nij at cꞌo wiꞌ, ni mta wiꞌ qꞌuisic chawij. Ja caj in rwachꞌulew xa cꞌo yojtajic trij caniꞌ nuban jun tziak xa ntzabukari.

¹² Ja xtaban tre queriꞌ caniꞌ nba̱n tre jun tzabuklaj chaqueta mchita noc wiꞌ, nqꞌuextaji chijutij. Pro ja ratat ma at queriꞌ ta, mta qꞌuextajic chawij, macatrajiꞌxi.

¹³ Ja Dios quewaꞌ xbij tre ja Ralcꞌwal riꞌ: —Cattzꞌabeꞌe waweꞌ pa wiquikꞌaꞌ, congana nim akꞌij. Waweꞌ natqꞌuejeꞌ wiꞌ in nenucoj na ja racꞌulel xeꞌ awakan, neꞌe. Pro ni majutij xbij ta queriꞌ tre jun ángel.

¹⁴ Ja quibanic ja ángel ejeꞌeꞌ xa e moso, e espíritu, ja Dios nerutak chi quichajixic ja winak ja nyataj na chique chi nquewil ja totajem xin Dios.