Gálatas 6 - Tz'utujil (Ja Cꞌacꞌa Chominem)

¹ Wachꞌalal, wi cꞌo jun chewe chaka jalal tok kaj pa ril quirtawaꞌ neban tre riꞌ, ixix ja rixucꞌan rmal ja rEspíritu Santo jix ruqꞌuin, jeyukbaꞌ rucꞌuꞌx utzcꞌa chi nyictaji. Techꞌoboꞌ chwach pan ekal, kas turkaj chewe chi matzij chaka jalal tok xquixkaj chic ixix chakajaꞌ.

² Cꞌoli ja nkakajbej jeꞌe chipan ja kacꞌaslemal caniꞌ ralal jun nimlaj ijkaꞌm nkaj chakij nkanaꞌ kaj pro tetoꞌoꞌ ewiꞌ chibil tak ewiꞌ chi rchꞌijic ja rijkaꞌm. Ja wi queriꞌ neban jariꞌ nebanbej cumplir ja ley xin Cristo.

³ Pro wi cꞌo jun nuchꞌob kaj chi mta ril in wi kas nim nunaꞌ kaj pro como xcꞌa winak jariꞌ xa nuban kaj engañar riꞌ ruyon.

⁴ Ja rjawaxic chi nkaban, kanaꞌaꞌ kaj janiꞌ elnak ja kacꞌaslemal chikajujunal. Ja wi kas katzij chi utz elnak ja racꞌaslemal xcꞌa rmalariꞌ catquicoti, ma rjawaxic ta chawe chi najunsaj awiꞌ cuqꞌuin juleꞌ chic la más na utz ja racꞌaslemal chiquewach ejeꞌeꞌ.

⁵ Queriꞌ nbij chewe como kanojel nkajach na cuenta chwach ja Dios chikajujunal.

⁶ Canojel ja winak ja netijox tre ja rtzobal Dios xa nak ta cꞌo cuqꞌuin tiquiyaꞌaꞌ quixin ja netijon quixin.

⁷ Maxta teban kaj engañar ewiꞌ eyon, xa nak ta netic chipan ja recꞌaslemal nijawariꞌ neban cosechar. Ja Dios maquixcowini xteban ta engañar.

⁸ Queriꞌ nbij chewe como ja wi nayaꞌ rgana ja tzabuklaj cꞌaslemal awcꞌan itzel cꞌaslemal nawachij ariꞌ, jariꞌ xa cꞌayiric xa chuwiric cajal chawach. Pro wi nayaꞌ rgana ja rEspíritu Santo utzlaj cꞌaslemal nawachij ariꞌ pro jun cꞌaslemal ja mta qꞌuisic trij.

⁹ Wachꞌalal, ma kocos ta chi rbanic ja rutzil. Queriꞌ nbij chewe como ja wi ma xticapuj ta kacꞌuꞌx chi rbanic ja rutzil jariꞌ cꞌo jun rtojbalil nkawachij na ja tok xterilaꞌ ja tiempo.

¹⁰ Como cꞌo tiempo chake chi nkaban ja rutzil chique ja winak rmalcꞌariꞌ nbij chewe, kabanaꞌ ja rutzil chique canojelal in más na kabanaꞌ utzil chique ja yukul quecꞌuꞌx ruqꞌuin ja Jesucristo como ejeꞌeꞌ e familia xin Dios.

* * * * * * * * * *

¹¹ Tetzꞌataꞌ ja nimak tak letra ja nmajon rtzꞌibaxic chipan awaꞌ carta riꞌ, jawaꞌ retal chi anin xintzꞌibani.

¹² Ja winak ja cꞌo quigana nquikꞌalasaj quiꞌ chi congana nqueban cumplir ja costumbre rxin ja ley ejeꞌeꞌ riꞌ ja nebin chewe chi puersa nixban circuncidar. Ejeꞌeꞌ xa nquixbej quiꞌ xtiquetij ta rpokonal rmal ja Cristo xtiquibij ta chi solo rcamic ja Cristo chwach cruz nattoꞌowi chipan ja rawil amac.

¹³ Queriꞌ nbij chewe como ejeꞌeꞌ masqui ebanon circuncidar pro nixtacꞌa ejeꞌeꞌ ta nqueban ta cumplir ja ley. Xar ja ncajoꞌ chewe chi nixban circuncidar utzcꞌa chi ejeꞌeꞌ nqueyaꞌ kaj quekꞌij queyon ja tok nixquechꞌec in necoj chic ewiꞌ cuqꞌuin.

¹⁴ Pro anin nat cꞌo wariꞌ chwe ja xtinban ta queriꞌ. Pro ja rcamic ja kajaw Jesucristo chwach cruz solo jariꞌ ja nyaꞌ rukꞌij anin. Ja chwe anin caniꞌ ripon chic chwach cruz ja ritzelal xin rwachꞌulew in queriꞌ chwe anin chakajaꞌ in caniꞌ inripon chic chwach cruz, caniꞌ incamnak chic chwach ja ritzelal, mchita ngana ruqꞌuin.

¹⁵ Ja tok xa jun naban ruqꞌuin ja Cristo Jesús jariꞌ macatrutoꞌ ja natban circuncidar in macatrutoꞌ chakajaꞌ ja macatban circuncidar. Pro ja ntoꞌo awxin jariꞌ jun cꞌacꞌa cꞌaslemal ja nacochij tre ja Dios.

¹⁶ Jariꞌ ja kas mero rubey in canojel ja winak ja cucꞌan awaꞌ jun bey riꞌ xtiyataj ta chique ja nimlaj quicotemal xin Dios in Dios ta xtipokonan quewach chakajaꞌ. Ejeꞌeꞌ riꞌ winak e tinamit xin Dios ja katzij chi e rtinamit Dios.

¹⁷ Camic maxta cꞌo chic jun ja xquinruban ta molestar como ja ncuerpo congana yuc rcꞌan jariꞌ ncꞌutbej chi in ajsamajel rxin ja kajaw Jesús.

¹⁸ Wachꞌalal, kas ta xtiqꞌuejeꞌe ja rutzil rxin ja kajaw Jesucristo pa tak ewanma. Amén.