Gálatas 5 - Tz'utujil (Ja Cꞌacꞌa Chominem)

¹ Rmalcꞌariꞌ nbij chewe, como ja Cristo arjaꞌ yoyon chake chi xokel libre pa rukꞌaꞌ ja ley cow cꞌa quixpeꞌe jutzꞌit, maxta quixmeloj chic jutij chewij, maxta cꞌoli nak ta xquixruchap chic jutij xquixrucoj chi ta jutij esclavo.

² Teyaꞌaꞌ ewxquin tre ja xtinbij chewe riꞌ, ja wi xquixban circuncidar in wi nyukeꞌ chic ecꞌuꞌx ruqꞌuin ja circuncisión jariꞌ majun nak ta rcꞌamonpi ta ja Cristo chewe.

³ Camic nbij chic jutij chewe, jun achi xa nak ta chi achiꞌal wi xtiban circuncidar in wi nyukeꞌ chic rucꞌuꞌx ruqꞌuin ja circuncisión jariꞌ puersa nuban na cumplir nojel ja tzꞌibtal can chipan ja ley.

⁴ Ja wi nyukeꞌ chic ecꞌuꞌx ruqꞌuin ja ley in wi rmalariꞌ tok nechꞌob chi nixrutoꞌ ja Dios in nixrwasajel libre chipan ja rewil emac jariꞌ xeyaꞌ can ariꞌ ja Cristo, xeyaꞌ can ariꞌ ja rutzil ja xecochij tre ja Dios.

⁵ Queriꞌ nbij chewe como ajoj ma ja chi ta ja ley okucꞌayon pro jaꞌ Espíritu Santo cꞌayon chic kaxin chi raybexic ja kꞌij ja tok Dios xkorutoꞌ chijutij tokoriꞌ tok ni majun chic kil kamac in rmal ja yukulbal kacꞌuꞌx ruqꞌuin ja Jesucristo tok nba̱n queriꞌ chake, jariꞌ kas nokquicoti chi raybexic.

⁶ Ja tok xa jun naban ruqꞌuin ja Cristo Jesús jariꞌ macatrutoꞌ ja natban circuncidar in macatrutoꞌ chakajaꞌ ja macatban circuncidar. Pro ja ntoꞌo awxin jariꞌ tok nyukeꞌ acꞌuꞌx ruqꞌuin ja Jesucristo, tok nsamaji ja yukulbal acꞌuꞌx chi rwinakarsaxic ja rajoben riꞌil xin Dios pan acꞌaslemal.

⁷ Ixix kas waꞌan jic ixbenak nabey pro ¿nak cꞌa xixyojowi chi matenimaj chic ja utzlaj tijonem xin Jesucristo?

⁸ Ja cꞌa ritzel tijonem ja xixtakchibexi jariꞌ ma ruqꞌuin ta ja Dios penak wiꞌ como ja Dios arjaꞌ rmajon esiqꞌuixic chi nenimaj ja utzlaj tijonem xin Jesucristo.

⁹ Tebanaꞌ cuenta ewiꞌ como ja ritzel tijonem jariꞌ xa nbe pa nim ja caniꞌ nuban jutzꞌit levadura npaxij riꞌ nbe chipan ja kꞌor nojelal.

¹⁰ Anin cꞌo nseguro chi ja kajaw Dios arjaꞌ nuyaꞌ chi na chewe chi nenimaj ja nmajon rchꞌobic chewach. Pro ja winak ja nyojo ewxin xa nak ta chi winakil puersa nkꞌe̱t na tzij trij, xa kꞌetoj tzij chic cajal chwach.

¹¹ Wachꞌalal, ecꞌoli ja nebin chwe chi anin cꞌa nmajon na rbixic chique winak chi rjawaxic chi neba̱n circuncidar. Ja wi queriꞌ nbij chique winak ¿nak cꞌa tre tok cꞌa cꞌo na pokon nba̱n chwe cumal ja wach tak aj Israel? Ja wixta nbij chique winak chi neba̱n circuncidar maquita cꞌa npi quiyewal ariꞌ ja wach tak aj Israel ja tok nnataj chique ja rcamic ja Jesucristo chwach cruz.

¹² Pro ja kas ngana anin camic xtiquilasajel ta quiꞌ checojol ja winak ja netakchiꞌin ewxin.

¹³ Queriꞌ nbij chewe wachꞌalal como ja Dios xixrsiqꞌuij chi nixqꞌuejeꞌ libre. Pro ma ruqꞌuin ta ja rix libre ja chaka ta nojel ta xteban ja cꞌol egana neban. Pro ja cꞌa neban, tetoꞌoꞌ ewiꞌ chibil tak ewiꞌ pro ruqꞌuin ta ja rajoben riꞌil xin Dios.

¹⁴ —Caniꞌ chawe atat nawajoꞌ kaj awiꞌ ayon queriꞌ cꞌa tabanaꞌ chique ja juleꞌ chic winak queꞌawajoꞌ chakajaꞌ, queriꞌ nbij ja rtzobal Dios. Ja wi xenimaj awaꞌ jun mandamiento ja cꞌa xinbij kaj chewe riꞌ xa ruqꞌuin ariꞌ xeban cumplir nojel ja nbij ja ley chewe chi neban.

¹⁵ Pro wi xa sícꞌ chꞌaꞌoj ja neban jariꞌ maxcoꞌ matetij ewiꞌ. Ma teban ta queriꞌ, tebanaꞌ cuenta, maxta teyoj kaj ewiꞌ eyon.

* * * * * * * * * *

¹⁶ Quewaꞌ nwajoꞌ chewe riꞌ wachꞌalal, teyaꞌaꞌ lugar tre ja rEspíritu Santo chi arjaꞌ nucꞌan ewxin chipan ja recꞌaslemal. Ja wi queriꞌ neban jariꞌ maticowin chewij ja ritzel tak yarinem ja cꞌo chipan ja tzabuklaj cꞌaslemal ja kucꞌan ja rok winak, maticowini xquixruban ta mandar.

¹⁷ Ja tzabuklaj cꞌaslemal ja kucꞌan ja rok winak jariꞌ xa rcꞌulel ja rEspíritu Santo. Ja tok cꞌol agana naban ja rutzil ja cꞌa tzabuklaj cꞌaslemal awcꞌan nrajoꞌ natruyoj chi mataban ja rutzil. Ja tok cꞌol agana naban ja ritzelal ja cꞌa rEspíritu Santo nukꞌil ja tzabuklaj cꞌaslemal awcꞌan chi mataban ja ritzelal. Rmalcꞌariꞌ tok nbij chewe, ja neban jeꞌe chipan ja recꞌaslemal ma chaka ta egana tok neban.

¹⁸ Pro ja wi neyaꞌ lugar tre ja rEspíritu Santo chi arjaꞌ nucꞌan ewxin tibij cꞌa tzij ariꞌ chi ix libre pa rukꞌaꞌ ja ley.

¹⁹ Bien kꞌalaj nak rbanic ja tzabuklaj cꞌaslemal ja cucꞌan ja winak, quewaꞌ rbanic riꞌ. Achiꞌiꞌ neꞌoc cuqꞌuin ixokiꞌ ja ma e quixjayilal ta in cꞌa cꞌo na más nqueban ja rachiꞌiꞌ in ixokiꞌ ja xa ntzꞌilorsaj ja canma.

²⁰ In jun chic, nexuqueꞌe ja winak chiquewach cachbal tak winak in chwach rachbal tak nakun in nequinimaj ja rajꞌitzaꞌ. In juleꞌ chic rwach ja ritzelal nqueban caniꞌ tre cꞌullaꞌan tak riꞌil, chꞌaꞌoj, aquiakarem, ayewal. In cꞌoli nqueban xa por interés. Cꞌoli nquejach quiꞌ como junwiꞌ nquechꞌob juleꞌ in junwiꞌ chi na nquechꞌob juleꞌ chic.

²¹ E camsanelaꞌ. In cꞌoli nqueban nimak tak waꞌim, nechꞌujar rmal tijoj yaꞌ, nquerak quechiꞌ, nqueban sícꞌ chꞌaꞌoj. In cꞌa cꞌo na más nqueban ja winak ja nij itzel wiꞌ. Anin nbij chic jutij chewe como nbin chic chewe, ja winak ja nebanowi ja ritzelal ja caniꞌ cꞌa xintzꞌibaj riꞌ ejeꞌeꞌ matiyataj chique chi xqueꞌoc ta chipan ja gobierno xin Dios.

²² Pro ja rEspíritu Santo quewaꞌ nwachij pa tak kacꞌaslemal riꞌ, nkajoꞌ kiꞌ, cꞌoli ja quicotemal xin Dios pa tak kanma, mta chꞌaꞌoj nkaban, cꞌo kapaciencia, cꞌo jun quiꞌlaj anma kucꞌan, nkatoꞌ kiꞌ chibil tak kiꞌ, nkaban cumplir ja nkatzujuj,

²³ nkayaꞌ nojel pa rukꞌaꞌ ja Dios in nkakꞌil kiꞌ chakij chi rbanic ja ritzelal. Majun ley xtuchꞌaꞌ ta chake ja wi queriꞌ nkaban.

²⁴ In kanojel ja rok xin Jesucristo kayaꞌon can ja tzabuklaj cꞌaslemal ja kucꞌan nabey rachbil nojelal ja ritzelal ja kayarij jariꞌ caniꞌ karipon chic chwach cruz.

²⁵ Ja rEspíritu Santo como arjaꞌ ryaꞌon jun cꞌacꞌa cꞌaslemal chake kayaꞌaꞌ cꞌa lugar tre chakajaꞌ chi arjaꞌ nucꞌan kaxin chipan ja kacꞌaslemal.

²⁶ Maxta congana ok nimak tikanaꞌ kaj como tok queriꞌ nkaban jariꞌ xa nkaminbej kiꞌ pa sícꞌ pa chꞌaꞌoj rmal. Maxta tiquiakir kanma chibil tak kiꞌ.