Gálatas 4 - Tz'utujil (Ja Cꞌacꞌa Chominem)

¹ Quewaꞌ rbanic riꞌ wachꞌalal. Jun alcꞌwalaxel tok cꞌa tinoꞌy na jariꞌ mta herencia nja̱ch tre chanim pro arja xa caniꞌ jun ti moso. Ma jun nak ta nja̱ch tre chanim masqui rxin nojelal pro cꞌa nerilaꞌ na jun tiempo ja nja̱ch wiꞌ tre.

² Pro ecꞌoli ja repaꞌl trij ja ralcꞌwalaxel chi rchajixic in nqueban cuenta ja herencia. Ja herencia cꞌa tokoriꞌ nja̱ch tre ja ralcꞌwalaxel ja tok nerilaꞌ ja tiempo ja chomarsan rmal ja tatixel ja nba̱n wiꞌ ja jachonem.

³ In queriꞌ cꞌa chake ajoj chakajaꞌ nabey ok caniꞌ tak acꞌalaꞌ, xokqꞌuejeꞌ na pa rukꞌaꞌ juleꞌ costumbre ja xa xocꞌo rukꞌij.

⁴ Pro ja Dios tok tzꞌakati ja tiempo ja chomarsanto rmal tokocꞌariꞌ xutakto ja Cristo ja Ralcꞌwal. Xalaxi ja Ralcꞌwal Dios chwirukꞌaꞌ jun ixok in qꞌuejeꞌ na pa rukꞌaꞌ ja ley ja yaꞌon can tre ja Moisés ojer rmal ja Dios.

⁵ Queriꞌ xuban ja Dios utzcꞌa chi xokrwasajel libre ja xokqꞌuejeꞌ pa rukꞌaꞌ ja ley in rmalariꞌ tok nuban chic chake ok caniꞌ chakꞌlaj ralcꞌwal.

⁶ Como ix alcꞌwalaxelaꞌ chic chewiꞌ tok Dios rtakonto ja rEspíritu Santo rxin ja Ralcꞌwal pa tak ewanma: —Nataꞌ, Padre, neꞌ kaj ja rEspíritu Santo pa tak ewanma.

⁷ Rmalcꞌariꞌ tok ma ix caniꞌ chi ta moso, ix alcꞌwalaxelaꞌ chic chewiꞌ tok cꞌo chic ekꞌaꞌ tre ja herencia xin Dios pro rmal ja Cristo tok banon queriꞌ chewe.

* * * * * * * * * *

⁸ Pro ja nabey tok majaꞌn tewotakij rwach ja Dios xixqꞌuejeꞌ na pa quekꞌaꞌ cachbal tak winak in rachbal tak nakun, xeꞌecoj como e dios pro ma katzij ta chi e dios.

⁹ Ja cꞌa camic chic ewotak chic rwach ja Dios, o ja más rubey, arjaꞌ xurotakij kaj ewach nabey pro ¿nak cꞌa nechꞌob ja tok nixmeloj chic jutij chewij como nixtajini nenimaj chic juleꞌ costumbre ja rocꞌowinak chic rtiempo pro jariꞌ majun totajem majun utzil rcꞌamonpi ta chewe? Pro cꞌo takaꞌan egana nixoc chic jutij pa rukꞌaꞌ.

¹⁰ Takaꞌan ruqꞌuin juleꞌ nmakꞌij yukul chi wiꞌ ecꞌuꞌx.

¹¹ Anin nxbej wiꞌ emwal, matzij xa mta noc wiꞌ ja congana xintij nukꞌij chi etijoxic.

¹² Wachꞌalal, tebanaꞌ jun utzil, tebanaꞌ ixix ja caniꞌ nbanon anin como anin inocnak in caniꞌ ewach aj tinamit ja ma ix aj Israel ta. Ja cꞌa tok xinqꞌuejeꞌ checojol ni majun itzel nak ta xeban ta chwe.

¹³ Ixix bien ewotak chi rmal jun yobil xinkajbej chewiꞌ tok xinqꞌuejeꞌ na checojol, xa rmalariꞌ yobil ja tok kas xinyaꞌ rbixic ja utzlaj tzij xin Jesucristo chewe nabey.

¹⁴ Jariꞌ yobil congana lawuloꞌ xuban chwe pro ixix ma itzel ta xinetzꞌat, ma xinesalujel ta. Ja xeban chwe, nojel ecꞌuꞌx nojel ewanma xinecꞌul, xeban chwe in caniꞌ jun ángel rxin Dios, xeban chwe in caniꞌ Jesucristo.

¹⁵ Congana xixquicot chwij triꞌ. Ja wixta xixcowini xecꞌotpi ta ja rewach triꞌ wotak chi ix conforme xeyaꞌpi ta chwe. ¿Pro ja camic bar cꞌa xoc wariꞌ ja quicotemal?

¹⁶ Pro ja xinbij chewe chipan awaꞌ jun carta riꞌ ni rubey wiꞌ, maxta techꞌob chwij chi in ecꞌulel chic, maquirtariꞌ.

¹⁷ Pro ja cꞌa winak ja neyojo ewxin ejeꞌeꞌ ni katzij wiꞌ chi congana nel quecꞌuꞌx chewij pro xa quewach nquecꞌam chewe. Ja ncajoꞌ chewe chi neyaꞌ can ja tijonem ja xinyaꞌ anin chewe in ejeꞌeꞌ chic nel ecꞌuꞌx chiquij.

¹⁸ Ni rubey wiꞌ ja tok wi cꞌo jun ja nel rucꞌuꞌx chewij pro xarwariꞌ wi utzil ja nrajoꞌ chewe pro tibanaꞌ cꞌa nojel tiempo in ma ruyon tariꞌ ja tok incꞌol anin ewqꞌuin.

¹⁹ Chakꞌlaj tak walcꞌwal, jutij chic inmajtajnak rmal ja rpokonal emwal ixix. Caniꞌ tre jun ixok tok majaꞌn talaxi ti ral arjaꞌ nmajtaj rmal ja rpokonal in queriꞌ cꞌa chwe anin chakajaꞌ congana ntiꞌon chwe chi raybexic nak kꞌij xtiqꞌuiyi chi utz ja Cristo pa tak ewanma.

²⁰ Kas ta incꞌo pon chic ewqꞌuin camic riꞌ, kas ta pan ekal nchꞌob chewach nojelal nak rbanic. Pro ja camic maticanoy mwal nak la nbij chic chewe.

* * * * * * * * * *

²¹ Camic cꞌoli nwajoꞌ ncꞌwaxaj chewe ixix ja cꞌol egana nixqꞌuejeꞌ pa rukꞌaꞌ ja ley ¿la ma ewotak ta cꞌa nak rbanic ja ley?

²² Anin nchꞌob na chewach nak rbanic. Caniꞌ tzꞌibtal can chipan ja rtzobal Dios ecꞌo caꞌiꞌ rcꞌajol ja rAbraham, jun qꞌuejeꞌ chwirukꞌaꞌ ja rajꞌicꞌ in jun chic qꞌuejeꞌ chwirukꞌaꞌ ja rxjayil. Ja rajꞌicꞌ jariꞌ xa esclava pa rukꞌaꞌ pro ja rxjayil arjaꞌ libre.

²³ Ja ral ja rixok esclava arjaꞌ chaka xalaxi pro ma chaka ta xalaxi ja ral ja rixok libre como arjaꞌ tzujun can tre ja rAbraham rmal ja Dios.

^24-26 Jariꞌ nkacꞌambej tzij tre caꞌiꞌ chominem. Jun chominem cꞌo jun jayuꞌ rbinaꞌan Sinaí ja bar chomarsax wiꞌ pro jariꞌ chominem nerwinakarsaj juleꞌ winak ja xa neꞌoc esclavo. Ja jun chic chominem triꞌ chomarsax wiꞌ chipan jun tinamit rbinaꞌan Jerusalén pro jun tinamit ja cꞌo chilaꞌ chicaj. Ja jayuꞌ rbinaꞌan Sinaí pa rcuenta Arabia cꞌo wiꞌ in triꞌ chomarsax wiꞌ ja ley, jariꞌ nkacꞌambej tzij tre ja rixok esclava rbinaꞌan Agar. Jariꞌ nkacꞌambej tzij tre chakajaꞌ ja tinamit Jerusalén pro jun tinamit ja cꞌo chwachꞌulew camic como ja winak ja raj Jerusalén camic xa e caniꞌ esclavo. Pro ja jun chic Jerusalén ja cꞌo chilaꞌ chicaj jariꞌ ma esclava ta, libre. Jariꞌ kateꞌ chi nimlaj kanojelal ja yukul kacꞌuꞌx ruqꞌuin ja Jesucristo.

²⁷ Caniꞌ tzꞌibtal can chipan ja rtzobal Dios quewariꞌ: —Atat ja majun tawal, catquicoti. Catquicoti masqui ni mta wiꞌ alanem chawij. Como ja rixok ja yaꞌon can rmal ja rchajil nerilaꞌ na jun kꞌij tok más chi na ja ral xqueqꞌuejeꞌ chwirukꞌaꞌ chwach ja rixok ja cꞌo rchajil ruqꞌuin, queriꞌ nbij.

²⁸ Wachꞌalal, ajoj ok ralcꞌwal chic ja Dios rmal ja rtzujun can ojer, xa ok junan ruqꞌuin chic ja rIsaac como arjaꞌ ma chaka ta xalaxi pro tzujun can tre ja rAbraham rmal ja Dios.

²⁹ Pro ja ralcꞌwalaxel ja chaka xalaxi arjaꞌ itzel xuban tre ja ralcꞌwalaxel ja tzujun can ja xalax rmal ja rEspíritu Santo. In queriꞌ nba̱n ajoj chake camic chakajaꞌ.

³⁰ Pro bien tecꞌwaxaj ja nbij ja rtzobal Dios quewariꞌ: —Tasalujel ja rixok esclava e caꞌiꞌ in ral. Como ja ral ja rixok libre cꞌo jun herencia nyataj na tre pro ja ral ja rixok esclava arjaꞌ mta herencia xtiyataj ta tre. Queriꞌ nbij.

³¹ Queriꞌ rbanic wachꞌalal, ajoj ma ok ral ta ja rixok esclava, ok ral ja rixok libre.