Gálatas 3 - Tz'utujil (Ja Cꞌacꞌa Chominem)

¹ Wachꞌalal ja rix aj Galacia, ixix xa ma ix chꞌobol ta. ¿Nak xixbano engañar chewiꞌ tok xeyaꞌ can ja utzlaj tzij xin Jesucristo? Pro bien chꞌobtaj chewach nak rbanic ja Jesucristo, caniꞌ waꞌan rip chwa cruz chewach.

² Camic cꞌoli nwajoꞌ ncꞌwaxaj chewe riꞌ, ja tok kajto ja rEspíritu Santo ewqꞌuin ¿la rmal ja xeban cumplir ja ley chewiꞌ tok kajto ewqꞌuin? Mni, ma queriꞌ ta. Pro ja xeban, xecꞌwaxaj ja utzlaj tzij xin Jesucristo in yukeꞌ ecꞌuꞌx ruqꞌuin xa chewiꞌ tok kajto ja rEspíritu Santo ewqꞌuin.

³ Ja tok kas xemajto ja bey xin Jesucristo nabey jaꞌ Espíritu Santo xucꞌanto ewxin. Ja cꞌa camic chic ¿la jaꞌ chic ja ley ntoꞌo ewxin chi rqꞌuisic ja bey xin Jesucristo nechꞌob ixix? Ja wi queriꞌ nechꞌob xcꞌa ma ix chꞌobol ta ariꞌ.

⁴ Ja tok xenimaj ja Jesucristo congana rpokonal xetij rmal pro camic ¿la chaka queriꞌ tok xetij ja rpokonal? Maquita chaka queriꞌ wachꞌalal.

⁵ Ja Dios arjaꞌ takyonto ja rEspíritu Santo ewqꞌuin, cꞌoli milagro ja rbanon jeꞌe checojol ¿nak tre tok queriꞌ rbanon ja Dios checojol nechꞌob ixix? ¿La rmal chi cꞌoli ja ley ebanon jeꞌe cumplir? Mni, ma rmal ta ja ley pro como xecꞌwaxaj ja utzlaj tzij xin Jesucristo in yukeꞌ ecꞌuꞌx ruqꞌuin chewiꞌ tok queriꞌ rbanon ja Dios checojol.

⁶ Bien turkaj chewe ja rAbraham, arjaꞌ yukeꞌ rucꞌuꞌx ruqꞌuin ja Dios in rmal ja yukulbal rucꞌuꞌx chewiꞌ tok Dios xutoꞌ, xwasajel libre in xuban tre caniꞌ mta ril rumac rbanon.

⁷ Rmalcꞌariꞌ tok nbij chewe, wi cꞌo yukulbal acꞌuꞌx ruqꞌuin ja Dios jariꞌ at ralcꞌwal can ja rAbraham.

⁸ Tzꞌibtal can ojer chipan ja rtzobal Dios chi ja winak ja ma e aj Israel ta ejeꞌeꞌ nerilaꞌ na jun kꞌij ja tok nyukeꞌ na quecꞌuꞌx ruqꞌuin ja Dios in rmal ja yukulbal quecꞌuꞌx chewiꞌ tok nerutoꞌ ja Dios, nerwasajel libre in nuban chique caniꞌ mta quil quemac quibanon. Rmalcꞌariꞌ tok cꞌoli ja utzlaj tzij xin totajem ja bix tre ja rAbraham ojer rmal ja Dios, quewaꞌ bix tre riꞌ: —Abraham, amwal atat tok cꞌoli ja rutzil ja nyataj na chique ja winak ja recꞌo nojel tinamit waweꞌ chwachꞌulew, neꞌxi ja Abraham. Queriꞌ tzꞌibtal can.

⁹ Queriꞌ cꞌa rbanic, ja winak ja cꞌo yukulbal quecꞌuꞌx ruqꞌuin ja Dios ejeꞌeꞌ riꞌ ja nyataj chique ja rutzil xin Dios ja caniꞌ yataj tre ja rAbraham ojer como ja rAbraham arjaꞌ ni yukul wiꞌ rucꞌuꞌx ruqꞌuin ja Dios.

¹⁰ Pro canojel ja winak ja yukul quecꞌuꞌx ruqꞌuin ja nqueban kaj ejeꞌeꞌ queyon chi rbanic cumplir ja ley ejeꞌeꞌ cꞌo maldición cꞌo ryewal ja Dios chiquij. Caniꞌ tzꞌibtal can chipan ja rtzobal Dios quewaꞌ nbij riꞌ: —Rjawaxic chi ni naban wiꞌ cumplir nojelal ja tzꞌibtal chipan ja libro xin ley. Ja winak xa nak ta chi winakil wi matiqueban cumplir nojelal ja nbij ja ley chi nqueban jariꞌ cꞌo maldición cꞌo ryewal ja Dios chiquij.

¹¹ Ja rtzobal Dios bien nkꞌalasaj chikawach chi majun nak ta xtitotaj ta xtiwasaxel ta libre rmal ja Dios ja xta rmal nuban jeꞌe cumplir ja tzꞌibtal chipan ja ley. Bien kꞌalaj chi queriꞌ rbanic como ja rtzobal Dios quewaꞌ nbij chake riꞌ: —Ja winak ja netotaji in newasaxel libre rmal ja Dios ejeꞌeꞌ xa rmal ja yukulbal quecꞌuꞌx ruqꞌuin ja Dios tok nquewil ja utzlaj cꞌaslemal ja mta qꞌuisic trij, neꞌe.

¹² Junwiꞌ na ja ley in junwiꞌ chi na ja yukulbal kacꞌuꞌx ruqꞌuin ja Dios. Como ja ley quewaꞌ tzꞌibtal can tre riꞌ: —Ja wi naban cumplir nojelal ja nbij ja ley chi naban jariꞌ nawil ja utzlaj cꞌaslemal ja mta qꞌuisic trij. Queriꞌ ja tzꞌibtal can.

¹³ Ja nabey cꞌoli ja maldición kajnak chakij rmal ja ma xkaban ta cumplir nojelal ja nbij ja ley chi nkaban pro ja Cristo arjaꞌ xutoj ja kil kamac, xlasaj chakij ja maldición, arjaꞌ xoc chuxeꞌ ja maldición pa kaqꞌuexwach. Ja tok camsaxi ja Cristo chwach cruz cꞌoli ja maldición qꞌuejeꞌ trij caniꞌ tzꞌibtal can chipan ja rtzobal Dios quewariꞌ: —Jun winak xa nak ta chi winakil ja wi njecbax chwach jun cheꞌ chi ncamsaxi jariꞌ retal chi cꞌo maldición trij, neꞌe.

¹⁴ Queriꞌ xuban ja Jesús utzcꞌa chi ixix ja ma ix aj Israel ta nyataj na chewe ja rutzil ja tzujun can tre ja rAbraham ojer rmal ja Dios. Queriꞌ xuban utzcꞌa chi xa rmal ja yukulbal kacꞌuꞌx ruqꞌuin ja Dios chewiꞌ tok nkacochij ja rEspíritu Santo ja tzujun can ojer.

* * * * * * * * * *

¹⁵ Camic wachꞌalal cꞌo jun cꞌambal tzij nyaꞌ chewach riꞌ. Ja tok cꞌo jun chominem nbani masqui xa winak nebanowi pro wi nba̱n rwujal in tok nba̱n firmar jariꞌ ni majun xtiyojo ta xtiqꞌuexo ta.

¹⁶ Ja Dios arjaꞌ cꞌo jun chominem xuban ruqꞌuin ja rAbraham ojer, cꞌoli ja rutzil xin Dios xtzujuj tre ja rAbraham in tre rjaꞌtzul chakajaꞌ. Xa jun rjaꞌtzul ja rAbraham ja xtzujuj wiꞌ, ma xtzujuj ta chique canojel: —Tre ja rawijaꞌtzul ntzujuj wiꞌ, neꞌxi ja rAbraham rmal ja Dios. Ja cꞌa rjaꞌtzul ja rAbraham jariꞌ ja Cristo.

¹⁷ Camic nchꞌob chewach nak rcꞌamonto ja cꞌa xinbij kaj chewe riꞌ. Ja Dios arjaꞌ cꞌo jun chominem xuban ruqꞌuin ja rAbraham in xuyaꞌ rseguro chi ni nuban wiꞌ cumplir ja xtzujuj tre. Pro ja ley jariꞌ cꞌa chi cuatrocientos treinta junaꞌ winakar chi wiꞌ. Rmalcꞌariꞌ tok nbij chewe, ja ley mta moda xtuyoj ta ja chominem ja xuban ja Dios ruqꞌuin ja rAbraham, mta moda xtuyoj ta ja xtzujuj can tre.

¹⁸ Wixta jaꞌ ley cꞌamoto ja herencia xin Dios maquita cꞌa jaꞌ ririꞌ cꞌamoto ja xtzujuj can ja Dios tre ja rAbraham. Pro ja Dios como arjaꞌ rtzujun ja herencia tre ja rAbraham xa rmalariꞌ tok xuyaꞌ tre.

¹⁹ Ja wi queriꞌ rubey ¿nak cꞌa noc wiꞌ ja ley? Jariꞌ ni cꞌo wiꞌ rsamaj pro ja Dios cꞌa después na xwinakarsaj ja ley utzcꞌa chi nkotakij nak rbanic ja il mac ja nkaban ja rok winak. Pro ja ley xa pajtali ja tiempo rxin, tokoriꞌ xurqꞌuisaꞌ ja tok peti ja Cristo ja rjaꞌtzul can ja rAbraham como tre arjaꞌ tzujun can wiꞌ ja rutzil xin Dios. In jun chic chakajaꞌ, ja Dios tok xuyaꞌto ja ley ma ni ta arjaꞌ tzijon cuqꞌuin ja winak, ángel xecꞌamoto, xurquiyaꞌaꞌ tre ja Moisés in jaꞌ Moisés xuyaꞌ chic chique ja winak.

²⁰ Pro ja xuban ja Dios tok xtzujuj ja rutzil tre ja rAbraham nij arjaꞌ tzijon ruqꞌuin.

* * * * * * * * * *

²¹ ¿La tibij cꞌa tzij ariꞌ chi xa nchꞌojij riꞌ ja ley ruqꞌuin ja rutzil ja tzujun can rmal ja Dios? Mni, ma queriꞌ ta. Wixta cꞌo jun ley ja cowin ta xuqꞌuex ta ja kanaꞌoj in xuyaꞌ ta chake ja utzlaj cꞌaslemal ja mta qꞌuisic trij rmal ta cꞌariꞌ ley tok xoktotaji in xokwasaxel libre rmal ja Dios.

²² Pro quewaꞌ rubey riꞌ, ja ley chaka nbij chake kanojelal ja rok winak chi ok preso pa rukꞌaꞌ ja il mac. Queriꞌ nbij chake ja ley utzcꞌa chi kanojel ja nyukeꞌ kacꞌuꞌx ruqꞌuin ja Jesucristo nokquirtaj chipan ja kil kamac in nkacochij ja rutzil ja tzujun can rmal ja Dios in xa rmal ja yukulbal kacꞌuꞌx tok nba̱n queriꞌ chake.

²³ Pro ja tok majaꞌn tipeti ja Jesucristo okrchapon ja ley triꞌ in okrchajin. Pro ja tok peti ja Jesucristo, tok bix chake chi ruqꞌuin arjaꞌ nyukeꞌ chi wiꞌ kacꞌuꞌx tokoriꞌ xokjach can pa rukꞌaꞌ rmal ja ley.

²⁴ Queriꞌ cꞌa rbanic ja ley caniꞌ jun ajyukꞌ okrbanonto cuenta, xokrujach can pa rukꞌaꞌ ja Cristo chi nyukeꞌ chic kacꞌuꞌx ruqꞌuin in xa rmal ja yukulbal kacꞌuꞌx ruqꞌuin ja Cristo chewiꞌ tok Dios nokrutoꞌ, nokrwasajel libre in nuban chake caniꞌ mta kil kamac kabanon.

²⁵ Pro camic penak chic ja Cristo, yukul chic kacꞌuꞌx ruqꞌuin, ma ja chi ta ja rajyukꞌ okbanyon cuenta.

²⁶ Como xa jun ebanon chic ruqꞌuin ja Cristo Jesús tibij cꞌa tzij ariꞌ chi ix ralcꞌwal Dios ewanojel pro xa rmal ja yukulbal ecꞌuꞌx ruqꞌuin tok banon queriꞌ chewe.

²⁷ Ja tok xixban bautizar jariꞌ xa jun xeban ruqꞌuin ja Cristo, tibij cꞌa tzij ariꞌ chi Cristo ewekben chic ewiꞌ.

²⁸ Xa ix jun chic chi ix aj Israel chi ma ix aj Israel ta, chi ix esclavo chi ix libre, chi ix achiꞌiꞌ chi ix ixokiꞌ, xa ix jun chic ewanojelal como xa jun chic ebanon ruqꞌuin ja Cristo Jesús.

²⁹ Ja cꞌa wi ix rxin chic ja Cristo jariꞌ ix rjaꞌtzul can ja rAbraham in cꞌol ekꞌaꞌ tre ja herencia ja tzujun can tre ja rAbraham ojer rmal ja Dios.