Gálatas 2 - Tz'utujil (Ja Cꞌacꞌa Chominem)

¹ Cꞌa chi catorce junaꞌ ja tok xinbe chic jutij ja pa Jerusalén wachbil ja Bernabé in kacꞌamel ja Tito chakajaꞌ.

² Ja Dios arjaꞌ kꞌalasan chinwach chi nban jawaꞌ viaje riꞌ. Ja cꞌa tok xokekaji pa Jerusalén xinchꞌob chiquewach ja kachꞌalal nak rbanic ja utzlaj tzij xin Jesucristo ja nmajon rbixic anin chique ja winak ja ma e aj Israel ta xarwariꞌ ja más nimak quekꞌij chiquicojol ja kachꞌalal kayonaj kiꞌ cuqꞌuin ja tok xinchꞌob chiquewach. Queriꞌ xinban utzcꞌa chi nkacꞌam kiꞌ cuqꞌuin utzcꞌa maquita nyojtaji ja samaj xin Dios ja nbanon chic in chakajaꞌ ja samaj ja majaꞌn tinban.

³ Ejeꞌeꞌ chꞌobtaj cumal ja xinbij chique como ja Tito ja wachbil arjaꞌ ma aj Israel ta in tok laj ban puersa tre chi nba̱n circuncidar pro nixtacꞌa yataj ta lugar chique chi queban ta circuncidar.

⁴ Laj ban puersa tre cumal juleꞌ winak ja kachꞌalal necheꞌxi, pro ma katzij ta chi e kachꞌalal. Ejeꞌeꞌ pan ekal xeꞌoc chikacojol, ncajoꞌ nokquicꞌambajaj in nokqueyoj como ajoj kaniman chi okwasanel chic libre pa rukꞌaꞌ ja ley xin Dios ja tzꞌibtal can rmal ja Moisés como xa jun kabanon chic ruqꞌuin ja Jesucristo. Pro ejeꞌeꞌ cajoꞌ ta xokquecoj chi ta jutij pa rukꞌaꞌ ja ley.

⁵ Pro ja cꞌa rajoj nixtacꞌa kanimaj ta jutzꞌit ja ncajoꞌ chake, ma xekanimaj ta pro emwal ixix utzcꞌa chi ja utzlaj tzij xin Jesucristo matiqꞌuextaji rbixic ja tok ncꞌu̱t chewach.

⁶ Xoktzijon cuqꞌuin ja kachꞌalal ja más na nimak quekꞌij netzꞌa̱t cumal ja juleꞌ chic pro ja chwe anin xa junan wi nimak quekꞌij owi ma nimak ta quekꞌij como ja Dios arjaꞌ ma jun ta utz nutzꞌat in ma jun ta itzel. In tok xoktzijon cuqꞌuin ni majun nak ta quibij ta chwe ja majaꞌn tikꞌalasax chic chinwach triꞌ rmal ja Dios.

⁷ Pro ja queban chake congana xequicot chakij. Como ejeꞌeꞌ bien chꞌobtaj cumal chi ja Dios arjaꞌ ryaꞌon chi nukul anin chi nenyaꞌaꞌ rbixic ja utzlaj tzij xin Jesucristo chique ja ma e aj Israel ta como caniꞌ ryaꞌon chi rukul Pedro chi arjaꞌ nuyaꞌ rbixic chique ja wach tak aj Israel.

⁸ Bien chꞌobtaj cumal como ejeꞌeꞌ bien kꞌalaj chic chiquewach chi congana samaji ja Dios ja tok xinyaꞌ rbixic ja utzlaj tzij chique ja ma e aj Israel ta. Caniꞌ tre ja Pedro congana samaji ja Dios tok xuyaꞌ rbixic chique ja raj Israel ni cꞌa queriꞌ xuban anin chwe chakajaꞌ.

⁹ Ja Jacobo, ja Pedro in Juan ejeꞌeꞌ xetzꞌati chi epaꞌl chiquij ja kachꞌalal in tok chꞌobtaj cumal nak rbanic ja samaj ja xincochij tre ja Dios cꞌacꞌariꞌ quechap kakꞌaꞌ ok caꞌiꞌ ruqꞌuin ja Bernabé jariꞌ quicꞌutbej chi xa jun chic kabanon cuqꞌuin. Xa jun kachꞌob cuqꞌuin, ajoj nokesamaj chiquicojol ja ma e aj Israel ta in ejeꞌeꞌ nesamaj chiquicojol ja raj Israel.

¹⁰ Xar ja queban recomendar chake chi: —Maxta queꞌemestaj jutzꞌit ja tak mebaꞌiꞌ, xecheꞌ chake, pro jariꞌ ni cꞌo wiꞌ ngana chi nenutoꞌ ja cꞌo rjawaxic chique.

* * * * * * * * * *

¹¹ Pro ja Pedro tok xekaj pan Antioquía cꞌoli xuban ja ma rubey ta jariꞌ xinchꞌaꞌ tre pro ni chi rpalaj xinbij wiꞌ.

¹² Ja ril xuban tokoriꞌ tok ecꞌo juleꞌ achiꞌiꞌ xeꞌekaji ja pan Antioquía, juleꞌ achiꞌiꞌ ja retakonel rmal ja Jacobo. Ja cꞌa tok xeꞌekaji ma xwaꞌ chi ta ja Pedro cuqꞌuin ja kachꞌalal ja ma e aj Israel ta pro ja xuban, pan ekal pan ekal xelel chiquicojol. Queriꞌ xuban como xbej riꞌ chiquewach ja rach tak aj Israel ja nquecoj pa chꞌaꞌoj chi neba̱n circuncidar ja kachꞌalal ja ma e aj Israel ta.

¹³ Xa caꞌiꞌ rpalaj xuban ja Pedro in queriꞌ queban chic chakajaꞌ ja juleꞌ chic kachꞌalal ja raj Israel in pior cꞌa ja Bernabé arjaꞌ xuyaꞌ riꞌ chique chakajaꞌ, caniꞌ queban ejeꞌeꞌ queriꞌ xuban arjaꞌ chakajaꞌ.

¹⁴ Ja cꞌa ranin ja tok chꞌobtaj mwal chi matucꞌam riꞌ ruqꞌuin ja utzlaj tzij xin Jesucristo ja queban cꞌacꞌariꞌ xinchꞌaꞌ tre ja Pedro pro ni chiquewach canojelal: —Ja xaban chique ja kachꞌalal riꞌ ja ma e aj Israel ta, ja nel chiquewach chi puersa noqui ja kacostumbre ajoj ja rok aj Israel. ¿Nak cꞌa tre tok xaban quelaꞌ? Pro makanaꞌ maquita xeꞌawachbilaj nabey, xatwaꞌ waꞌan cuqꞌuin masqui at aj Israel, makanaꞌ maquita xatel conforme nabey chi matiyukeꞌ chic acꞌuꞌx ruqꞌuin ja ley.

^15-16 Ajoj chꞌobtajnak chic kumal chi xa rmal ja nyukeꞌ acꞌuꞌx ruqꞌuin ja Jesucristo chewiꞌ tok Dios natrutoꞌ, natrwasajel libre in nuban chawe caniꞌ mta awil amac abanon, ma rmal ta ja ley xin Dios ja kas ta xtaban jeꞌe cumplir tok nuban queriꞌ chawe. Ajoj masqui ok aj Israel pro ruqꞌuin ja Jesucristo yukul chi wiꞌ kacꞌuꞌx utzcꞌa chi ja Dios nokrutoꞌ nokrucꞌul pro xa rmal ja yukulbal kacꞌuꞌx ruqꞌuin ja Cristo, ma rmal ta ja ley ja kas ta xtikaban jeꞌe cumplir como ni majun winak xtitotaj ta xticꞌul ta rmal ja Dios xta rmal ja ley ja kas ta xtuban jeꞌe cumplir. Queriꞌ kabanon ja ni pa kalaxic wiꞌ chi ok aj Israel. Ajoj ok aj Israel nokcheꞌe, in xa cꞌamonnak chake chi nkabij chi ma ok junan ta cuqꞌuin ja ma e aj Israel ta como ejeꞌeꞌ mta ja ley xin Dios cuqꞌuin, xa e ajꞌil xa e ajmaquiꞌ, okchenakto chique.

¹⁷ Pro ajoj wi nkajoꞌ chi nokrutoꞌ ja Dios in nokrwasajel libre chipan ja kil kamac pro wi rmal ja xa jun nkaban ruqꞌuin ja Cristo tok nkaban queriꞌ jariꞌ matiyukeꞌ chic kacꞌuꞌx ruqꞌuin ja ley, xa ek ok junan cuqꞌuin ja ma e aj Israel ta, xa ok ajꞌil xa ok ajmaquiꞌ chakajaꞌ. Ja cꞌa wi queriꞌ rbanic ¿la tibij cꞌa tzij ariꞌ chi xa il mac xucoj can chakij ja Cristo? Mni, ma queriꞌ ta.

¹⁸ Pro anin wi ninel conforme chi matiyukeꞌ chic nucꞌuꞌx ruqꞌuin ja ley pro wi nmaj chic jutij ryaꞌic rukꞌij ja ley chiquewach ja winak jariꞌ in ajꞌil in ajmac nineli chwach ja ley.

¹⁹ Queriꞌ nbij chawe como anin, rumac ja ley chewiꞌ ja tok camsaxi ja tzabuklaj cꞌaslemal ja cꞌo chwe nabey, xinel libre pa rukꞌaꞌ ja ley utzcꞌa chi xtinmaj chic jun cꞌaslemal cꞌacꞌa pa rukꞌaꞌ ja Dios.

²⁰ Ja chwe anin, anin jun xincamsax ruqꞌuin ja Cristo chwach ja cruz. Ja cꞌaslemal ja cꞌo chic chwe camic jariꞌ ma anin chi ta ja rincꞌasli, Cristo chic ja cꞌas pa wanma. Ja yukulbal nucꞌuꞌx ruqꞌuin ja Cristo ja Ralcꞌwal Dios jariꞌ cꞌayon chic wxin chipan awaꞌ cꞌaslemal ja cꞌo chic chwe waweꞌ chwachꞌulew. Janila ninrajoꞌ ja Cristo como arjaꞌ ma xpokonaj ta xuyaꞌ riꞌ pa camíc mwal.

²¹ Queriꞌ rbanic ja rutzil ja rsipan ja Dios chake in mta moda xtinban ta tre ja ni ta majun rsamaj. Queriꞌ nbij chawe como ja Dios wixta rmal ja ley tok nokrutoꞌ in nokrwasajel libre chipan ja kil kamac maquita cꞌa rjawaxic ariꞌ ja camsaxi ja Cristo chi katoꞌic. Queriꞌ xinbij tre ja Pedro.