Gálatas 1 - Tz'utujil (Ja Cꞌacꞌa Chominem)

¹ Anin in Pablo, inocnak apóstol rxin ja Jesucristo. Pro ma cuqꞌuin winak ta penak wiꞌ chi inocnak apóstol in chakajaꞌ ma winak ta etakyonel wxin chi rbanic jawaꞌ samaj riꞌ. Ja Jesucristo rachbil ja katataꞌ Dios ejeꞌeꞌ etakyonel wxin chi rbanic. Jariꞌ mismo Dios ja yico rxin ja Jesucristo chipan ja camíc.

² Anin ntakel rutzil ewach ewanojelal ja rix iglesia ja rixcꞌo pa rcuenta Galacia in canojel ja kachꞌalal ja recꞌo wqꞌuin ejeꞌeꞌ nquetakel rutzil ewach chakajaꞌ.

³ Ja rutzil ja nsipaj ja Dios chake rachbil ja quicotemal xin Dios ja tariꞌ xtecochij más tre ja katataꞌ Dios in tre ja kajaw Jesucristo.

⁴ Ja Jesucristo arjaꞌ xuyaꞌ riꞌ pa camíc, camsax rmal ja kil kamac. Queriꞌ xuban jariꞌ xokrtobej pa rukꞌaꞌ ja ritzelal ja cꞌo chipan awaꞌ tiempo ja rokcꞌo wiꞌ riꞌ in tok xuban queriꞌ jariꞌ ni rvoluntad wiꞌ ja katataꞌ Dios ja xuban.

⁵ Kas ta xtiyaꞌ rukꞌij ja katataꞌ Dios camic, chwak in chijutij. Amén.

* * * * * * * * * *

⁶ Kas takaꞌan junwiꞌ nnaꞌ emwal wachꞌalal como ixix nixtajini neyaꞌ can ja katataꞌ Dios pro ma cꞌa jaruꞌ ta waꞌan tiempo tenimaj pro makanaꞌ maquita arjaꞌ xixsiqꞌuini in xixrucoj chipan ja rutzil ja recochin tre ja Cristo. Pro camic emajon chic rnimaxic jun tijonem ja junwiꞌ chi na, utzlaj tzij xin Cristo neꞌxi.

⁷ Pro jariꞌ ma katzij ta chi utzlaj tzij, xar ecꞌo juleꞌ winak ja netajini nixqueyoj como ejeꞌeꞌ ncajoꞌ nqueqꞌuex ja utzlaj tzij ja ncꞌutu chikawach nak rbanic ja Cristo.

⁸ Pro ajoj kachꞌobon chic waꞌan chewach nak rbanic ja utzlaj tzij xin Cristo. Xa nak ta xtiqꞌuexo rbixic jawaꞌ utzlaj tzij riꞌ ja kachꞌobon chic chewach xtipi ta ryewal ja Dios trij. Quirtariꞌ xtiban tre masqui ajoj owi masqui jun ángel xin chilaꞌ chicaj chakajaꞌ.

⁹ Caniꞌ kabin chic chewe camic nbij chic jutij chewe, xa nak ta xtiyowi jun chic tijonem chewe in wi arjaꞌ nbij chewe chi utzlaj tzij xin Cristo pro wi junwiꞌ chi na chwach ja xenimaj nabey xtipi ta ryewal ja Dios trij.

¹⁰ Ja cꞌa xinbij chewe riꞌ triꞌ cꞌa netzꞌat wiꞌ chi ma ja ta ninoclaꞌ il tre ja xtinchꞌec ta quigana winak pro ja nintajini nyaꞌ rgana jariꞌ ja Dios. Ja wixta cꞌa ninoclaꞌ il tre ja xtinchꞌec quigana winak jariꞌ ma in ajsamajel ta cꞌariꞌ rxin ja Cristo.

* * * * * * * * * *

¹¹ Bien tecꞌwaxaj wachꞌalal, ja utzlaj tzij xin Cristo ja xinyaꞌ rbixic chewe jariꞌ ma jun winak ta winakarsyon

¹² como ma jun winak ta bin chwe in ma xintijox ta na tre chakajaꞌ, ja Jesucristo arjaꞌ kꞌalasan chinwach.

¹³ Como ixix ecꞌwaxan wachꞌalal janiꞌ ja ncꞌaslemal nabey ja tok xinqꞌuejeꞌ chipan ja religión ja quiniman ja wach tak aj Israel. Bien ecꞌwaxan ja xinban chique ja riglesia ja rtinamit Dios, más kꞌaxnak chi na ja rpokonal xinban chique, ja ta xinwajoꞌ xenuqꞌuis ta pro ni ta canojelal.

¹⁴ In jun chic, congana xintijoj wiꞌ trij ja quireligión ja wach tak aj Israel, e qꞌuiy chique ja wach tak qꞌuiyic congana xinkꞌax chiquewach chi rotakixic. Queriꞌ xinban como congana xinmakꞌeꞌ chipan ja costumbre ja quiyaꞌon can ja katiꞌt kamamaꞌ.

^15-16 Pro ja cꞌa Dios tok xerilaꞌ ja tiempo ja rchꞌobon chwij arjaꞌ xkꞌalasaj chinwach janiꞌ rnaꞌoj ja Jesucristo ja Ralcꞌwal utzcꞌa chi anin xtinyaꞌ rbixic ja Ralcꞌwal chique ja winak ja ma e aj Israel ta. Arjaꞌ nij inrchaꞌonto wiꞌ ja tok majaꞌn quinalaxi in xa rmal ja rutzil ja xincochij tre chewiꞌ tok xinrsiqꞌuij chi nban jawaꞌ samaj riꞌ. Ja cꞌa tok kꞌalasax chinwach nak rbanic ja Ralcꞌwal Dios ni majun winak xinbe ta ruqꞌuin xincꞌwaxaj ta razón tre nak rbanic como jariꞌ kꞌalasan chic chinwach rmal ja Dios.

¹⁷ Nixtacꞌa xinbe ta pa Jerusalén chakajaꞌ xencꞌwaxaj ta razón chique ja xeꞌoc apóstol nabey chinwach anin. Xar ja xinban, xinbe chipan ja tinamit Arabia cꞌacꞌariꞌ xinmeloj chic jutij pa Damasco.

¹⁸ Cꞌa chi oxiꞌ junaꞌ xinbe wiꞌ pa Jerusalén, triꞌ xinbe wiꞌ utzcꞌa chi nwotakij rwach ja Pedro, olajuj kꞌij xenbanaꞌ ruqꞌuin.

¹⁹ Pro ma ecꞌo chi ta juleꞌ chic ja rapóstol xintzꞌat can ta quewach xarwariꞌ ja Jacobo ja rchꞌalal ja kajaw Jesucristo jariꞌ xintzꞌat can rwach.

²⁰ Ja nintajini nbij chewiꞌ riꞌ wachꞌalal chwach Dios nbij, ma npayil ta.

²¹ Cꞌacꞌariꞌ xinbe chic chipan ja tinamit jeꞌe ja cꞌo pa rcuenta Siria in ja cꞌo pa rcuenta Cilicia.

²² In chakajaꞌ chipan ariꞌ tiempo ja riglesia ja xa jun quibanon ruqꞌuin ja Jesucristo ja recꞌo chipan ja departamento Judea ejeꞌeꞌ majaꞌn tiquetzꞌat nwach triꞌ.

²³ Xarwariꞌ cꞌoli quicꞌaxan chic chwe chi: —Ja Pablo ja maxcoꞌ chi pokon xuban chake nabey pro ja camic ntajini nbij chic chique ja winak chi: —Tiyukeꞌ ecꞌuꞌx ruqꞌuin ja Jesucristo, neꞌ chic chique. Pro ja nabey rajoꞌ ta xuyoj ta ja yukulbal kacꞌuꞌx ruqꞌuin ja Jesús. Queriꞌ ja quicꞌaxan chic chwe

²⁴ in queyaꞌ rukꞌij ja Dios mwal.