Filipenses 3 - Tz'utujil (Ja Cꞌacꞌa Chominem)

¹ Camic wachꞌalal nbij chewe quixquicoti pa rubiꞌ ja kajaw Jesucristo. Cꞌoli ja ntzꞌiban chic ja recꞌwaxan chic pro ma itzel ta nnaꞌ ntzꞌibaj chic jutij camic in congana ncꞌatzin chewe.

² Tebanaꞌ cuenta ewiꞌ chiquewach ja winak ja xa e caniꞌ tzꞌiꞌ, xa e itzel tak ajsamajelaꞌ. Ejeꞌeꞌ chaka nquikupijel jutzꞌit ja quichꞌacul jariꞌ circuncisión necheꞌ tre.

³ Pro ajoj ja kas katzij chi okbanon circuncidar, ma ejeꞌeꞌ ta. Queriꞌ nbij chewe como ajoj nkayaꞌ lugar tre ja rEspíritu Santo chi arjaꞌ nsamaji pa tak kanma in ruqꞌuin kanma nkaban ja samaj xin Dios. Ajoj nkayaꞌ rukꞌij ja Cristo Jesús in ma kuqꞌuin ta ajoj yukul kaj wiꞌ kacꞌuꞌx kayon.

⁴ Ja cꞌa chwe anin sobre ja razón cꞌo wqꞌuin ja wixta cꞌo ngana nyukeꞌ kaj nucꞌuꞌx wqꞌuin anin nuyon. Más chi na nrazón chwach xa nak ta chi winakil ja nuchꞌob chi cꞌo razón ruqꞌuin chi nyukeꞌ kaj rucꞌuꞌx ruqꞌuin arjaꞌ ruyon.

⁵ Quewaꞌ nrazón riꞌ. Ja tok xuban waxakiꞌ kꞌij quinalaxi xinba̱n circuncidar. Anin in aj Israel, in rjaꞌtzul can ja Benjamín ja rcꞌajol Israel. Anin in puro hebreo como ja nataꞌ nuteꞌ ejeꞌeꞌ e puro rjaꞌtzul can ja rAbraham. Congana xintijoj wiꞌ tre ja ley xin Dios ja tzꞌibtal can rmal ja Moisés como xinoc fariseo.

⁶ Janila xinyaꞌ rukꞌij ja kareligión ja rok fariseo como congana pokon xinban chique ja riglesia rmal. Ni xinban wiꞌ cumplir ja ley, ni majun nak ta ninchapbexi ja xinchꞌob anin.

⁷ Nojel awaꞌ ja cꞌa xinbij kaj chewe riꞌ congana nim rukꞌij ja xinchꞌob anin nabey pro ja camic nbanon tre ja ni mchita pro xa rmal ja Cristo tok nbanon queriꞌ tre.

⁸ In ma ruyon tariꞌ, queriꞌ nbanon tre nojelal como jariꞌ ma vale ta chwach ja xinwotakij rwach ja wajaw Cristo Jesús. Ja tok xinwotakij rwach ja Cristo jariꞌ más na vale chwach nojelal. Rmal ja Cristo chewiꞌ tok nyaꞌon can nojelal in ja chwe anin nojel ja nyaꞌon can jariꞌ xa caniꞌ juleꞌ kꞌayis ja nel pa mes. Anin nyaꞌon can nojelal utzcꞌa chi nqꞌuejeꞌe ja Cristo pa wanma pro ni chijutij.

⁹ Anin nyaꞌon can nojelal utzcꞌa chi ni mta wiꞌ ja maquita jun kabanon ruqꞌuin ja Cristo utzcꞌa chi utz ninrutzꞌat ja Dios pro ma rmal ta ja nbanon cumplir ja tzꞌibtal chipan ja ley pro rmal ja yukulbal nucꞌuꞌx ruqꞌuin ja Jesucristo. Jariꞌ Dios nsipan chake in rmal ja yukulbal kacꞌuꞌx ruqꞌuin ja Jesucristo chewiꞌ tok nuyaꞌ chake.

¹⁰ Queriꞌ nwajoꞌ anin utzcꞌa chi bien nwotakij janiꞌ rnaꞌoj ja wajaw Jesucristo utzcꞌa chi bien nwotakij nak rbanic ja poder xin Dios pro jun poder ja cꞌaso rxin ja Jesucristo chiquicojol camnakiꞌ. Anin nwajoꞌ nwachbilaj ja Jesucristo chi rtijic ja rpokonal, nwajoꞌ nwachbilaj chipan ja rcamic

¹¹ como ja kas ngana anin chi nuyaꞌ ja Dios chwe chi nincꞌastaj chiquicojol ja camnakiꞌ chakajaꞌ.

* * * * * * * * * *

¹² Pro ma ja ta nbij chi: —Wotakin chic nojelal, nincheꞌ ta, owi: —Majun ja maquita utz tre ja ncꞌaslemal, nincheꞌ ta chakajaꞌ. Pro congana nmajon rtijic nukꞌij utzcꞌa chi nchꞌec ja premio xin Cristo como queriꞌ rvoluntad ja Cristo Jesús chewiꞌ tok xinruchaꞌ.

¹³ Wachꞌalal, ja chwe anin cꞌa cꞌo na ja majaꞌn tinchꞌec pro caniꞌ jun cꞌamcꞌoj anim nmajon utzcꞌa chi nchꞌec ja premio ja chomin pon chic chinwach. Pro ni majun caso nyaꞌ tre ja njalon can chic

¹⁴ pro congana nmajon rtijic nukꞌij utzcꞌa chi nenwilaꞌ na ja bar xquinekaj wiꞌ ja bar xtiyaꞌ wiꞌ chwe ja premio como cꞌo jun premio nyataj chake ja tok xa jun kabanon ruqꞌuin ja Jesucristo jariꞌ nokban invitar rmal ja katataꞌ Dios chi nokeqꞌuejeꞌ na ruqꞌuin chilaꞌ chicaj.

¹⁵ Nojel awaꞌ xinbij chewe riꞌ quewaꞌ ta nkachꞌob jutzꞌit kanojelal wachꞌalal ja cowirnak chic kawiꞌ kanma chipan ja rtzobal Dios. Ja wi cꞌo jeꞌe ja ma junan ta nkachꞌob tre ewqꞌuin Dios nkꞌalasaj na chewach chakajaꞌ nak ja kas mero rubey.

¹⁶ Xarwariꞌ ja chꞌobtajnak chic kumal kacꞌamaꞌ kiꞌ chi rnimaxic, xa junan kabanaꞌ.

¹⁷ Camic wachꞌalal tecꞌamaꞌ ja rejemplo ja nyaꞌon chewach, kas teyaꞌaꞌ caso chique ja kachꞌalal ja junan quinaꞌoj wqꞌuin como okocnak ejemplo chewach.

¹⁸ Queriꞌ nbij chewe como e qꞌuiy ja xa ma utz ta quinaꞌoj. Qꞌuiylaj mul nbin chewe nak quibanic in camic pan okꞌej nbij chic jutij chewe chi ejeꞌeꞌ riꞌ winak xa quicꞌulel ja tijonem ja ncꞌutu chikawach nak rcꞌamonto ja cruz xin Cristo.

¹⁹ Pro ejeꞌeꞌ riꞌ winak xa nebe na chipan ja nimlaj rpokonal. Ja nyarij ja quicuerpo jariꞌ ocnak quidios. Cꞌo na nqueban ja xa qꞌuixbal rbanic pro nqueyaꞌ quekꞌij rmal, xa jaꞌ nquechꞌob ja xin rwachꞌulew.

²⁰ Pro ja rajoj okcꞌo pa rcuenta jun tinamit ja cꞌo chilaꞌ chicaj ja bar xtipi wiꞌ ja Toꞌonel jariꞌ ja kajaw Jesucristo in camic nojel kacꞌuꞌx kamajon raybexic.

²¹ Ajoj xok way xok yaꞌ pro ja Jesucristo nerilaꞌ na jun kꞌij tok xtuqꞌuex na ja kacuerpo. Caniꞌ xuban arjaꞌ tok qꞌuextaji ja rcuerpo congana chic ruchꞌaꞌ queriꞌ cꞌa xtuban tre ja kacuerpo ajoj chakajaꞌ. Jariꞌ bien ncowini nuban como ja rchokꞌakꞌ congana nim rmalariꞌ noc na pa rukꞌaꞌ nojelal.