Filipenses 2 - Tz'utujil (Ja Cꞌacꞌa Chominem)

¹ Wachꞌalal, ja tok xa jun kabanon ruqꞌuin ja Cristo ¿la matiyukbaꞌ cꞌa riꞌ kacꞌuꞌx ariꞌ rmal? ¿La matikanaꞌ cꞌariꞌ ja rajoben riꞌil xin Dios ja rcꞌamonto chake in nxucꞌuxuꞌi kanma rmal? ¿La makoquicot cꞌariꞌ rmal ja rEspíritu Santo chi arjaꞌ nokrachbilaj? ¿La ma lokꞌ ta cꞌa nkanaꞌ kiꞌ ariꞌ, la matipokonaj cꞌa riꞌ kawach ariꞌ rmal?

² Queriꞌ rbanic wachꞌalal rmalcꞌariꞌ tok congana nban recomendar chewe chi xta jun neban, tewajoꞌ ewiꞌ chibil tak ewiꞌ, xta jun ewiꞌ xta jun ewanma neban. Quirtariꞌ neban utzcꞌa chi nnoji ja quicotemal xin Dios pa wanma emwal.

³ Maxta cꞌo chꞌaꞌoj teban, maxta teyaꞌ kaj ekꞌij eyon pro ja neban, tebanaꞌ taknoꞌy ewanojelal. Quirtawaꞌ xtechꞌob kaj pa tak ewanma riꞌ: —Ja wachbil ejeꞌeꞌ ja más na e utz canojelal chinwach anin, xquixcheꞌ kaj ta chejujunal.

⁴ Maxta xa jaꞌ quixoclaꞌ kaj il tre ja rewxin chejujunal pro ja rubey neban quixoclaꞌ il tre ja quixin chic juleꞌ ewachbil.

⁵ Ja caniꞌ rnaꞌoj ja Cristo Jesús quirtariꞌ ja renaꞌoj ixix chakajaꞌ.

⁶ Arjaꞌ xuban tinoꞌy pro makanaꞌ maquita Dios. Arjaꞌ masqui xa e junan ruqꞌuin ja Dios chilaꞌ chicaj pro ma xpokonaj ta xuyaꞌ can, peti waweꞌ chwachꞌulew.

⁷ Ja chilaꞌ chicaj congana nim rukꞌij pro jariꞌ ma xpokonaj ta xuyaꞌ can nojelal, peti waweꞌ chwachꞌulew, xoc kach winak in xoc jun ilinel.

⁸ Queriꞌ cꞌa xuban xoc kach winak, xuban tinoꞌy, ni xnimaj wiꞌ ja Tatixel, nixtacꞌa xpokonaj ta camsaxi pro jun camíc ja más chi na lawuloꞌ ban tre como chwach cruz camsax wiꞌ.

⁹ Rmalcꞌariꞌ ja Dios tok arjaꞌ rcojon chic ja Jesús chilaꞌ chicaj como jun nimlaj Rey, rcojon chic como Rajaw nojelal, mta jun nak chi ta ja más chi ta nim rukꞌij chwach ja Jesucristo.

¹⁰ Queriꞌ rbanon ja Dios utzcꞌa chi majun nak ta ja maquita nxuqueꞌ chwach ja Jesús pro puersa nexuqueꞌ na chwach canojelal tanto chique ja recꞌo chilaꞌ chicaj in chique ja recꞌo chwachꞌulew in chique ja recꞌo xeꞌ ulew chakajaꞌ.

¹¹ Queriꞌ rbanon ja Dios utzcꞌa chi canojelal ja winak quewaꞌ xtiquibij riꞌ: —Ja Jesucristo arjaꞌ Rajaw nojelal. Queriꞌ xtiquibij na tre xa nak ta chi tzobalil netzijon wiꞌ. Ja tok queriꞌ nqueban jariꞌ noc yaꞌbal rukꞌij ja Dios ja Tatixel.

* * * * * * * * * *

¹² Rmalcꞌariꞌ chakꞌlaj wachꞌalal camic nbij chewe, como ni xinenimaj wiꞌ ja tok xinqꞌuejeꞌ checojol pro ja camic más chi na nixnuban animar chi ninenimaj masqui ma incꞌo chi ta checojol. Chewiꞌ tok nbij chewe camic, tetijaꞌ ekꞌij chi rilic nojel ja totajem ja rchomin ja Dios chi nuyaꞌ chewe pro xarwariꞌ texbej ewiꞌ chwach ja Dios, ni turkaj wiꞌ chewe chi ma quixcowini newil ja xta eyon.

¹³ Queriꞌ nbij chewe como ja katataꞌ Dios arjaꞌ nsamaji pa tak ewanma chi rbanic ja rvoluntad, arjaꞌ nyoꞌ chewe chi npit egana ruqꞌuin ja rutzil ja najoꞌx chewe rmal chi neban in nuyaꞌ ja rewachokꞌakꞌ chakajaꞌ chi nixcowini neban cumplir ja rvoluntad.

¹⁴ Tebanaꞌ nojel ja yatajnak chewe chi neban pro makanaꞌ wixwotem, makanaꞌ sícꞌ chꞌaꞌoj.

¹⁵ Queriꞌ nbij chewe utzcꞌa chi ni katzij wiꞌ chi ix ralcꞌwal Dios nixtzꞌati utzcꞌa chi majun nak ta nixchapbexi in ni chꞌajchꞌoj wiꞌ ja rewanma. Quirtariꞌ neban jutzꞌit utzcꞌa chi mta ja ritzelal pa tak ecꞌaslemal ixix masqui ixcꞌo chiquicojol juleꞌ winak ja xa yojtajnak quinaꞌoj, juleꞌ winak ja congana itzel quicꞌaslemal. Pro ja rixix ix caniꞌ jun luz ja nsakirsan quebey chiquewach chipan ja kꞌekumal

¹⁶ como emwal ixix ja tok nkꞌalajin chiquewach nak rbanic ja utzlaj tzij ja nyoꞌ jun cꞌacꞌa cꞌaslemal chake. Ja wi queriꞌ neban janila xquinquicot emwal ja tok xtipi chic jutij ja Jesucristo. Ninquicoti como triꞌ xtintzꞌat wiꞌ chi ma chaka ta queriꞌ ja tok congana ntijon nukꞌij chipan ja nimlaj samaj chi etoꞌic pro cꞌoli rcꞌamonto.

¹⁷ Pro masqui nincamsax na pro ni ninquicot wiꞌ chakajaꞌ. Como ja yukulbal ecꞌuꞌx ixix jariꞌ caniꞌ jun ofrenda ja netzujuj chwach ja Dios in wi anin nincamsaxi jariꞌ ninoc in caniꞌ jun ofrenda chakajaꞌ, jun ofrenda ja nrachbilaj riꞌ ruqꞌuin ja rofrenda ja netzujuj ixix. Jariꞌ ninquicoti wachꞌalal in ninquicot ewqꞌuin ewanojelal.

¹⁸ Quixquicot ixix chakajaꞌ wachꞌalal, quixquicot wqꞌuin.

* * * * * * * * * *

¹⁹ Ja wi rvoluntad ja kajaw Jesucristo chi ntakel ja Timoteo ewqꞌuin jariꞌ ntaklaꞌel chanim utzcꞌa kas nxucꞌuxuꞌi ja wanma tok xtincꞌwaxaj nak ja rebanon.

²⁰ Mchita jun kachꞌalal wqꞌuin camic ja junan ta quinaꞌoj ruqꞌuin ja Timoteo como arjaꞌ nojel rucꞌuꞌx nojel ranma ixryaꞌon pa cuenta nak ja ncꞌatzin chewe.

²¹ Pro canojel ja juleꞌ chic xa quixin kaj ejeꞌeꞌ nqueyaꞌ pa cuenta no ja xin Jesucristo jariꞌ matiqueyaꞌ pa cuenta.

²² Pro ixix bien ewotak janiꞌ rnaꞌoj ja Timoteo, bien ewotak chi arjaꞌ samajnak wqꞌuin caniꞌ jun alcꞌwalaxel nsamaj ruqꞌuin ja rtataꞌ, kachbilan kiꞌ ruqꞌuin chi rbixic ja utzlaj tzij xin Jesucristo chique ja winak.

²³ Rmalcꞌariꞌ tok nwajoꞌ ntakel ewqꞌuin chanim. Ja tok xtinwotakij nak ja xtiban chwe waweꞌ ja bar incꞌo wiꞌ camic tokocꞌariꞌ ntaklaꞌel ja Timoteo ewqꞌuin.

²⁴ In ninbe anin ewqꞌuin chanim chakajaꞌ wi rvoluntad ja kajaw Jesucristo chi ninbe.

²⁵ Pro ja xinchꞌob anin camic chi rjawaxic ntakel ja kachꞌalal Epafrodito ewqꞌuin nabey. Ja rEpafrodito arjaꞌ wachbil chipan ja samaj xin Dios, ok soldado xin Jesucristo ruqꞌuin. Ixix xixtakoto ja rEpafrodito chi arjaꞌ ninurtoꞌoꞌ chipan xa nak ta ncꞌatzin chwe.

²⁶ Pro camic ntakel chic ewqꞌuin como arjaꞌ congana rgana nutzꞌat chic jutij riꞌ ewach ruqꞌuin ewanojelal. Arjaꞌ tok xekaj rbixic ewqꞌuin chi cꞌo jun yobil xoc tre xa janiꞌ bison más.

²⁷ Ni katzij wiꞌ chi congana yawaji, jutzꞌit laj cami. Pro ja Dios xpokonaj rwach, ma xcam ta. In triꞌ xintzꞌat wiꞌ chi ja Dios xpokonaj nwach anin chakajaꞌ como ja wixta cami jariꞌ xta janiꞌ xinbison chic anin rmal.

²⁸ Rmalcꞌariꞌ tok congana ngana ntakel ja rEpafrodito ewqꞌuin utzcꞌa tok xtekaj ewqꞌuin janila nixquicot trij utzcꞌa chakajaꞌ chi ma kas ta ninbison chic anin.

²⁹ Ja cꞌa tok xtekaj ewqꞌuin tecꞌuluꞌ pa rubiꞌ ja kajaw Jesucristo, kas quiꞌil rcꞌulic tebanaꞌ. Kas lokꞌ tenaꞌaꞌ jutzꞌit in ma ruyon ta arjaꞌ ja neban queriꞌ tre pro quirtariꞌ neban chique chakajaꞌ ja juleꞌ chic ja xa junan quinaꞌoj ruqꞌuin.

³⁰ Queriꞌ nbij chewe como arjaꞌ laj cami pro rumac ja samaj xin Cristo. Ma xpokonaj ta xuyaꞌ riꞌ pa camíc chi ntoꞌic, xurjachaꞌ chwe ja rayuda ja xetakto como ma xixcowin ta xinekꞌijlaꞌ ewanojel.