Filemón 1 - Tz'utujil (Ja Cꞌacꞌa Chominem)

¹ Anin in Pablo, inocnak preso pa cheꞌ pro rmal ja Jesucristo tok queriꞌ nbanon. Filemón, anin wachbil ja kachꞌalal Timoteo nkatzꞌibaj awaꞌ carta riꞌ in camic ntakel awqꞌuin. Atat at kachbil chipan ja samaj xin Jesucristo in congana natkajoꞌ.

² Ja carta, rxin chakajaꞌ ja chakꞌlaj kachꞌalal Apia, in rxin chakajaꞌ ja rArquipo. Ja rArquipo arjaꞌ ok soldado rxin ja Jesucristo ruqꞌuin. Ja carta, quixin chakajaꞌ ja riglesia ja nquemol quiꞌ pan awochoch.

³ Ja rutzil ja nsipaj ja Dios chake rachbil ja quicotemal xin Dios ja tariꞌ xtecochij más tre ja katataꞌ Dios in tre ja kajaw Jesucristo.

* * * * * * * * * *

⁴ Filemón, anin congana nmaltioxij tre ja Dios amwal, ni natnnataj wiꞌ pan oración.

⁵ Congana nmaltioxij tre rumac ja rabanon como xurkaj rbixic wqꞌuin chi atat congana neꞌawajoꞌ ja tinamit xin Dios in ni yukul wiꞌ acꞌuꞌx ruqꞌuin ja kajaw Jesucristo.

⁶ Anin ncꞌutuj tre ja Dios chi ja yukulbal acꞌuꞌx ruqꞌuin ja Jesucristo más chi na nsamaji, xtikꞌalajin ta chi utz nojel ja rutzil ja cꞌo pa tak ewanma in xtiyaꞌ ta rukꞌij ja Jesucristo rmal.

⁷ Anin nmaltioxij tre ja Dios ja rabanon wachꞌalal como ajoj congana nokquicoti rumac ja rajoben riꞌil xin Dios ja cꞌo chawe, congana nxucꞌuxuꞌi ja kanma amwal. Queriꞌ nbij chawe como xurkaj rbixic kuqꞌuin chi ja kachꞌalal janila nxucꞌuxuꞌi ja canma rumac nojel ja rutzil abanon chique.

* * * * * * * * * *

^8-9 Wachꞌalal Filemón, como atat congana neꞌawajoꞌ ja kachꞌalal chewiꞌ tok congana nban recomendar chawe, ja tok xtekaji ja rOnésimo awqꞌuin kas ta quiꞌil rcꞌulic xtaban. Jariꞌ ni yatal wiꞌ chawij chi nacꞌul. Tzucꞌa wixta cꞌo ngana nbij chawe chi puersa nacꞌul ja queriꞌ matinnaꞌ wiꞌ nbij chawe como yatajnak chwe rmal ja Cristo chi queriꞌ nbij chawe. Pro mta ngana ja xcatnuban ta mandar. Mejor ja nkaban, rumac ja rajoben riꞌil xin Dios ja yatajnak chake rmal ja Jesucristo chewiꞌ tok congana nban recomendar chawe chi nacꞌul ja rOnésimo. Kas turkaj chawe chi anin in Pablo, in riꞌj chic in chakajaꞌ inocnak preso pa cheꞌ rmal ja Jesucristo.

¹⁰ Tabanaꞌ jun utzil, tacꞌuluꞌ paki jutzꞌit ja rOnésimo. Arjaꞌ ncꞌajol chwach ja Dios como waweꞌ pa cheꞌ xoc wiꞌ ralcꞌwal Dios pro mwal anin tok xuban queriꞌ.

¹¹ Ja nabey mta rsamaj chawe ja rOnésimo pro ja camic chic cꞌo chic rsamaj chawe in chwe anin chakajaꞌ.

¹² Camic ntakel chic jutij awqꞌuin in tacꞌuluꞌ, tabanaꞌ tre caniꞌ anin ja ninacꞌul.

¹³ Ntakel awqꞌuin masqui anin congana ta quiꞌil chwe ja xtiqꞌuejeꞌ ta más wqꞌuin. Congana ngana chi ninrutoꞌ waweꞌ jaruꞌ pa tiempo xquinqꞌuejeꞌ pa cheꞌ rumac ja utzlaj tzij xin Jesucristo. Ja wixta nqꞌuejeꞌ na más wqꞌuin jariꞌ caniꞌ jun ayuda natakto atat chi ntoꞌic.

¹⁴ Xarwariꞌ mta ngana ja xta puersa nban chawe chi ninatoꞌ pro mejor, nojel acꞌuꞌx nojel awanma naban ja nwajoꞌ chawe chi naban. Rmalcꞌariꞌ tok nbij chawe, mta nak ta nban trewaꞌ wariꞌ ja maquita at conforme.

¹⁵ Como ja rOnésimo maxla ma chaka ta queriꞌ ja tok xanmajel jun tiempo awqꞌuin, maxla ja rcꞌamonto chawe chi nmeloj chic jutij awqꞌuin camic pro ni chijutij, ma jun tiempo chi ta.

¹⁶ Arjaꞌ nmeloj awqꞌuin pro ma caniꞌ chi ta jun moso pro más chi na vale chwach jun moso como arjaꞌ chakꞌlaj kachꞌalal chic. Arjaꞌ jun kachꞌalal ja congana nel nucꞌuꞌx trij in pior cꞌa chawe atat como ja tok xtekaj awqꞌuin jariꞌ jun ajsamajel ja nmeloj awqꞌuin in chakajaꞌ ruqꞌuin ja Jesucristo yukul wiꞌ ecꞌuꞌx chi ix caꞌiꞌ.

¹⁷ Ja cꞌa camic ja wi nanaꞌ kaj chi anin in awachbil tacꞌuluꞌ cꞌa ja rOnésimo, tabanaꞌ tre caniꞌ anin ja ninacꞌul.

¹⁸ Ja wi cꞌoli ja ma utz ta rbanon can chawe owi cꞌo rucꞌas awqꞌuin jariꞌ tayaꞌaꞌ chi nukul anin.

¹⁹ Waweꞌ nyaꞌ wiꞌ ja nfirma chi anin ja rin Pablo nintojowi. In atat chakajaꞌ cꞌol acꞌas wqꞌuin como mwal anin tok xawil jun cꞌacꞌa cꞌaslemal ruqꞌuin ja Jesucristo pro ma ja ta nwajoꞌ chawe chi nanaꞌ awiꞌ rmal.

²⁰ Queriꞌ rbanic wachꞌalal, tabanaꞌ paki jutzꞌit ja rutzil ja nintajini ncꞌutuj chawe, tacꞌuluꞌ paki jutzꞌit ja rOnésimo. Ja wi nacꞌul jariꞌ nxucꞌuxuꞌi ja wanma amwal pro rumac ja xa jun kabanon ruqꞌuin ja kajaw Jesucristo tok nbij queriꞌ chawe.

²¹ Ja camic riꞌ anin nintajini nmajon rtzꞌibaxic awaꞌ carta riꞌ in tok xtekaj awqꞌuin wotak chi atat nanimaj ja xinbij chipan, wotak chi más na xtocꞌo rwiꞌ xtaban tre chi rnimaxic.

²² In chakajaꞌ tachomij pon paki jutzꞌit ja bar xquinwar wiꞌ ja tok xquinekaj awqꞌuin como ja wayben anin camic chi ncꞌaxaxi ja roración ja remajon rbanic pan ncuenta, jariꞌ wayben chi nya̱ꞌ lugar chwe chi ninbe ewqꞌuin.

* * * * * * * * * *

²³ Ja kachꞌalal Epafras nutakel rutzil ewach, arjaꞌ wachbil waweꞌ pa cheꞌ pro rumac ja xa jun rbanon ruqꞌuin ja Cristo Jesús tok cꞌo pa cheꞌ.

²⁴ In nquetakel rutzil ewach chakajaꞌ ja kachꞌalal Marcos, Aristarco, Demas in Lucas, ejeꞌeꞌ e wach tak ajsamajelaꞌ.

²⁵ Kas ta nqꞌuejeꞌ ewqꞌuin ja rutzil ja nsipaj ja kajaw Jesucristo chake. Amén.