Efesios 6 - Tz'utujil (Ja Cꞌacꞌa Chominem)

¹ Ja cꞌa rixix ja rix alcꞌwalaxelaꞌ como xa jun ebanon ruqꞌuin ja kajaw Jesucristo rmalcꞌariꞌ nbij chewe, queꞌenimaj ja retataꞌ eteꞌ. Queriꞌ nbij chewe como jariꞌ ni rubey wiꞌ chi neꞌenimaj.

^2-3 Cꞌo jun mandamiento xin Dios quewaꞌ nbij chake riꞌ: —Queꞌenimaj ja retataꞌ eteꞌ, neꞌ chake. Pro jawaꞌ jun mandamiento wi nkanimaj cꞌoli ntzujuj chake in quewaꞌ ntzujuj chake riꞌ: —Nixquicot na in qꞌuiylaj tiempo nixcꞌaseꞌ na waweꞌ chwachꞌulew, queriꞌ nbij chake.

⁴ Ja cꞌa rixix ja rix tatixelaꞌ maxta queꞌechꞌujarsaj ja rewalcꞌwal, maxta teyic quiyewal. Pro ja neban, utz quiqꞌuittzixic tebanaꞌ, queꞌebanaꞌ corregir in queꞌepaxbaj xarwariꞌ tecojoꞌ ja rnaꞌoj ja kajaw Jesucristo chi quiqꞌuittzixic.

⁵ Ja cꞌa rixix ja rix moso queꞌenimaj ja repatrón ja recꞌo waweꞌ chwachꞌulew. Pro congana ta neꞌeban respetar, nojel ta ecꞌuꞌx nojel ta ewanma neꞌenimaj. Ja tok nqueyaꞌ samaj chewe ja ta neban tre caniꞌ ta samaj xin Cristo ja neban.

⁶ Ecꞌoli ja moso congana nesamaji tok cꞌoloc ja quipatrón cuqꞌuin utzcꞌa chi utz netzꞌa̱t rmal pro tok nbe ja quipatrón ma kas ta nesamaj can chic pro maxta queriꞌ teban ixix. Tebanaꞌ como caniꞌ Cristo ja repatrón, rvoluntad ta Dios ja neban in chakajaꞌ maxta xa caꞌiꞌ ecꞌuꞌx.

⁷ Quixquicoti chi rbanic ja samaj quixin ja repatrón, tebanaꞌ tre caniꞌ samaj rxin ja kajaw Jesucristo in ma quixin winak ta.

⁸ Queriꞌ nbij chewe como bien ewotak chi jun achi tok cꞌo jun utzil nuban xa nak ta chi utzilal jariꞌ cꞌo rtojbalil nyataj na tre rmal ja kajaw Jesucristo. Jariꞌ nyataj na tre wi libre ja rachi in nyataj na tre chakajaꞌ masqui xa esclavo.

⁹ Ja cꞌa rixix ja rix patroniꞌ queriꞌ tebanaꞌ chique ja remoso chakajaꞌ, maxta xa cowlaj tak tzij nebij chique como ixix bien ewotak chi cꞌo chi na jun ja Patrón ja cꞌo chilaꞌ chicaj, jariꞌ Quipatrón ja remoso in chakajaꞌ Epatrón ixix, pro jun Patrón ja ma jun ta utz nutzꞌat in ma jun ta itzel.

* * * * * * * * * *

¹⁰ Wachꞌalal, jawaꞌ qꞌuisbal paxbanem nyaꞌ chewe riꞌ, cow quixpeꞌi pa rubiꞌ ja kajaw Jesucristo, tecojoꞌ ja nimlaj poder ja nuyaꞌ.

¹¹ Tecojoꞌ nojel rwach ja banbal chꞌaꞌoj ja ryaꞌon ja Dios chake utzcꞌa chi cow nixpeꞌe chwach ja diablo xa nak ta nucoj jeꞌe chewij chi nixrtakchibej.

¹² Queriꞌ nbij chewe como ja kas mero kacꞌulel ja kamajon chꞌaꞌoj cuqꞌuin ma ejeꞌeꞌ tariꞌ ja kach tak winak. Pro ja kas mero kacꞌulel ejeꞌeꞌ riꞌ canojelal ja ritzel tak ángel, juleꞌ itzel ángel ja nebano mandar waweꞌ chwachꞌulew pa tak quewiꞌ pa tak canma ja winak ja xa kꞌekumal ecꞌayon, juleꞌ itzel tak espíritu ja neqꞌuejeꞌ chicaj chipan ja aire.

¹³ Rmalcꞌariꞌ nbij chewe, tecojoꞌ nojel rwach ja banbal chꞌaꞌoj ja ryaꞌon ja Dios chake utzcꞌa tok congana lawuloꞌ nuban ja diablo chewe nij ixix wiꞌ nixchꞌocmaji in cow ixpaꞌli ja tok ntzuri ja chꞌaꞌoj nojelal.

^14-17 Caniꞌ nuban jun soldado qꞌuiy rwach nucoj ja ntobej riꞌ chipan jun chꞌaꞌoj, cꞌo rcincha, cꞌoli ja ntobej rwarucꞌuꞌx, cꞌoli ja ntobej rkan, cꞌo jun chꞌichꞌ ja ncꞌulbej ja flecha ja rcꞌan kꞌakꞌ tok nqꞌuia̱k trij, cꞌoli ja ntobej rwiꞌ in cꞌo jun espada rcꞌan. In queriꞌ cꞌa chewe ixix chakajaꞌ, cꞌoli ja banbal chꞌaꞌoj ja nebanbej chꞌaꞌoj ruqꞌuin ja diablo, quewaꞌ rbanic ja banbal chꞌaꞌoj riꞌ, ni ta katzij wiꞌ ja nebij, ni ta rubey wiꞌ ja neban, ni ta nenataj wiꞌ ja utzlaj tzij xin Jesucristo ja nuyaꞌ quicotemal chake utzcꞌa chi ix listo chi rbanic ja chꞌaꞌoj ruqꞌuin ja diablo. In jun chic chakajaꞌ, congana rjawaxic chi nyukeꞌ ecꞌuꞌx ruqꞌuin ja Jesucristo utzcꞌa tok cꞌoli nqꞌuia̱k chewij rmal ja diablo pro maquixmajtaj rmal. Tecꞌamaꞌ ja totajem ja nsipaj ja Dios chewe in tecojoꞌ ja rtzobal Dios ja yatajnak chake rmal ja rEspíritu Santo. Tecojoꞌ nojel rwach ja banbal chꞌaꞌoj ja cꞌa xinbij kaj chewe riꞌ in cow quixpeꞌi.

¹⁸ In chakajaꞌ, ni tebanaꞌ wiꞌ ja roración nojel tiempo, xa nak ta ja nemaltioxij tre ja Dios owi xa nak ta ja necꞌutuj tre pro ja ta Espíritu Santo xtucꞌan ewxin chi rbanic ja roración. Ja nwajoꞌ chewe chi ni nixcꞌascꞌot wiꞌ in ni ma tetanbaꞌ ta wiꞌ ja roración, nwajoꞌ chewe chi neban orar pa quicuenta canojel ja kachꞌalal ja re xin Dios.

¹⁹ In tebanaꞌ orar pa ncuenta anin chakajaꞌ, tecꞌutuj tre ja Dios chi arjaꞌ ninrutoꞌ chi rbixic ja utzlaj tzij xin Jesucristo, jariꞌ ja utzlaj tzij ja rawatali nabey pro kꞌalasan chic camic. Ja tok xtinyaꞌ rbixic, Dios ta xtiyoꞌ chwe ja tzij ja nbij in xtuyaꞌ ta chwe chakajaꞌ chi matinxbej wiꞌ chi rbixic.

²⁰ Rmal ja utzlaj tzij xin Jesucristo chewiꞌ tok inocnak jun ajsamajel rxin ja Jesucristo pro jun ajsamajel ja bacꞌon pa cadena como incojon pa cheꞌ camic. Tebanaꞌ orar pa ncuenta utzcꞌa chi ni matinxbej wiꞌ wiꞌ chi nyaꞌ más rbixic ja utzlaj tzij como nijawariꞌ ja yatal chwe chi nban.

²¹ Camic nwajoꞌ chi newotakij nak ja nbanon waweꞌ, nwajoꞌ chi newotakij nak ja nintajini nban in rmalcꞌariꞌ tok ntakonel ja Tíquico ewqꞌuin chi nerchꞌoboꞌ chewach nojelal. Ja Tíquico arjaꞌ jun chakꞌlaj kachꞌalal, jun ajsamajel ja xa jun rbanon ruqꞌuin ja kajaw Jesucristo, jun ajsamajel ja ni nuban wiꞌ cumplir ja ntzujuj.

²² Rmalcꞌariꞌ tok ntakonel ewqꞌuin utzcꞌa chi newotakij nak kabanon waweꞌ utzcꞌa chakajaꞌ chi neryukbaꞌ ecꞌuꞌx.

²³ Tiqꞌuejeꞌ más ja quicotemal chiquicojol ja kachꞌalal, tiqꞌuejeꞌ más ja yukulbal quecꞌuꞌx ruqꞌuin ja Jesucristo pro jun yukulbal cꞌuxlal rachbil ta ja rajoben riꞌil xin Dios. Ja tariꞌ xtiquicochij más tre ja katataꞌ Dios in tre ja kajaw Jesucristo.

²⁴ Ja rutzil xin Dios xtiqꞌuejeꞌ ta cuqꞌuin canojel ja neꞌajoꞌn rxin ja kajaw Jesucristo pro jun ajoben riꞌil ja ni mta wiꞌ qꞌuextajic trij. Amén.