Efesios 4 - Tz'utujil (Ja Cꞌacꞌa Chominem)

¹ Rmal cꞌa nojel awaꞌ ja nmajon rbixic chewe riꞌ congana nban recomendar chewe chi newcꞌaj jun utzlaj cꞌaslemal. Anin ja rincojon preso camic rmal ja samaj rxin ja kajaw Jesucristo congana nban recomendar chewe chi newcꞌaj jun cꞌaslemal ja bien nucꞌam riꞌ ruqꞌuin ja utzlaj cꞌaslemal ja nrajoꞌ ja Dios chewe chi newcꞌaj ja tok xixrsiqꞌuij.

² Maxta kas ix nimak tenaꞌ kaj, xa nak ta ja newil chipan ja recꞌaslemal teyaꞌaꞌ pa rukꞌaꞌ ja Dios, tiqꞌuejeꞌe ja repaciencia in tok chaka jalal neban ofender ewiꞌ tecochꞌoꞌ pro ruqꞌuin ta ja rajoben riꞌil.

³ Bien tebanaꞌ cuenta, maxta tetzak ja yatajnak chewe rmal ja rEspíritu Santo como ja rEspíritu Santo arjaꞌ ryaꞌon chewe chi xa jun ebanon, kas ta xtiqꞌuejeꞌe ja quicotemal xin Dios checojol jariꞌ caniꞌ jun caloꞌ nixximbexi in xa jun neban rmal.

⁴ Xa jun cuerpo rxin ja Jesucristo, xa jun Espíritu Santo, in caniꞌ tre ja gobierno xin Dios ja kayben jariꞌ xa jun chakajaꞌ, jariꞌ Dios xokrsiqꞌuij chi nokqꞌuejeꞌ chipan.

⁵ Xa jun ja Kajaw, xa jun ja bar yukul wiꞌ kacꞌuꞌx, xa jun ja bautismo

⁶ in xa jun ja Dios chakajaꞌ, pro jun Dios arjaꞌ Tatixel kaxin kanojelal, arjaꞌ cꞌo pa kawiꞌ kanojelal, arjaꞌ mta bar ta triꞌ ja maquita nsamaj wiꞌ, arjaꞌ cꞌo pa tak kanma kanojelal.

⁷ Pro ma junan ta rwach ja samaj ja kacochij tre ja Cristo chi nkaban chikajujunal pro arjaꞌ xsipaj jun samaj chake chikajujunal janiꞌ kas cꞌo rgana chi nsipaj chake.

⁸ Caniꞌ rbin can ja Dios quewariꞌ: —Ja tok joteꞌe chilaꞌ chicaj e qꞌuiy ja winak xerucꞌamel, juleꞌ winak ja rercojon preso, in chakajaꞌ cꞌo jeꞌe ja xsipaj chique winak, queriꞌ nbij.

⁹ Ja cꞌa tok nbij chi joteꞌe chilaꞌ chicaj ¿la matibij cꞌa tzij ariꞌ chi ja nabey xurkaj kaj waweꞌ chwachꞌulew?

¹⁰ Queriꞌ rbanic como ja Cristo ja xurkaj kaj waweꞌ chwachꞌulew arjaꞌ mismo ja joteꞌ chic chilaꞌ chicaj pro más chi na chicaj xekaj nojoj wiꞌ, ni majun bar ta triꞌ ja maquita xekaj nojoj wiꞌ.

¹¹ Arjaꞌ sipan chake ja samaj nkaban jeꞌe quewariꞌ, juleꞌ chake xeꞌoc apóstol, juleꞌ chic chake xeꞌoc profeta, juleꞌ chic xuyaꞌ chique chi nebe pa tak lugar chi nequiyaꞌaꞌ rbixic ja utzlaj tzij xin Jesucristo, in juleꞌ chic xuyaꞌ chique chi nequiyukꞌuj ja kachꞌalal in nequitijoj.

¹² Jawaꞌ samaj xsipaj chake chi nkaban utzcꞌa chi bien ntzꞌakat chake ja rok xin Dios xa nak ta ja ncꞌatzin chake chi nokcowini nkaban ja samaj xin Dios utzcꞌa chi nokqꞌuiy rmal ja rok cuerpo rxin ja Cristo.

¹³ Queriꞌ rbanic in nerilaꞌ na jun kꞌij ja tok mta ariꞌ ja maquita jun nkaban rmal ja yukulbal kacꞌuꞌx ruqꞌuin ja Ralcꞌwal Dios in rmal ja bien nkotakij na ja kas mero rnaꞌoj. Queriꞌ cꞌa xtikaban, congana xtitzꞌakat na chi utz ja kanaꞌoj, xtinoj na pa tak kanma ajoj nojelal ja nojnak pa ranma ja Cristo.

¹⁴ Pro bien ntzꞌakat na ja kanaꞌoj utzcꞌa chi ma ok caniꞌ chi ta juleꞌ acꞌalaꞌ utzcꞌa chi ma chaka ta nojel tijonem ta nkanimaj caniꞌ tre juleꞌ tijonem ja xa quixin juleꞌ winak ja rebanol engaño, juleꞌ winak ja congana e listo in natqueyaꞌ pa jun bey ja ma xin Dios ta.

¹⁵ Pro ja cꞌa nkaban, kas ta katzij nojel ja nkabij pro rachbil ta ja rajoben riꞌil xin Dios tok nkabij. Queriꞌ ta cꞌa nkaban utzcꞌa chi nokqꞌuiyi chi utz in nkaxim más kiꞌ ruqꞌuin ja Cristo como arjaꞌ ocnak wiꞌaj rxin ja cuerpo.

¹⁶ Arjaꞌ nqꞌuiyirsan kaxin ja rok cuerpo rxin, pro jun cuerpo ja bien banon rbanic, xa jun rbanon, rximon riꞌ chibil tak riꞌ in nutoꞌ riꞌ chibil tak riꞌ chakajaꞌ. Ja jujun miembro rxin ja cuerpo tok nuban ja samaj ja yatajnak tre chi nuban jariꞌ nqꞌuiyi chi utz ja cuerpo rmal, kas nrajoꞌ riꞌ chibil tak riꞌ.

* * * * * * * * * *

¹⁷ Ja cꞌa xtinbij chic chewe riꞌ congana nban recomendar chewe pa rubiꞌ ja kajaw Jesucristo, maxta tewcꞌaj chic jun cꞌaslemal ja caniꞌ quicꞌaslemal ja juleꞌ chic winak ja ma e aj Israel ta como ja quinaꞌoj ejeꞌeꞌ mta noc wiꞌ.

¹⁸ Ja quewiꞌ canma xa kꞌekumirnak, cꞌa nat cꞌo wiꞌ chique ja cꞌaslemal xin Dios. Nat cꞌo wiꞌ como matichꞌobtaj cumal janiꞌ rnaꞌoj ja Dios pro xa rumac ja congana e cow chewiꞌ tok queriꞌ quibanon.

¹⁹ Matiquenaꞌ chic ja ritzelal ja nqueban. Ja rachiꞌiꞌ cachbil ixokiꞌ xa janiꞌ quiyaꞌon quiꞌ chi rbanic ja il mac. Ni majun rwach ja ritzelal ja maquita nqueban, xa nak ta nuyaꞌ gana chique chi nqueban jariꞌ nqueban.

²⁰ Pro ja cꞌa rixix xewotakij rwach ja Cristo chi ma queriꞌ ta ja rcꞌaslemal arjaꞌ ja xewotakij.

²¹ Ja cꞌa wi xeyaꞌ ewxquin tre ja Cristo tok tzijon pa tak ewanma, wi arjaꞌ ocnak Emaestro, wi ja tijonem xewotakij nucꞌam riꞌ ruqꞌuin ja tijonem ja yaꞌon can rmal ja Cristo, ja wi queriꞌ ebanon jariꞌ bien ewotak chi ja Cristo ma queriꞌ ta ja rcꞌaslemal ja caniꞌ quicꞌaslemal ja juleꞌ chic winak ja cꞌa xinbij chewe riꞌ.

²² Pro quewaꞌ ja tijonem ja chꞌob chewach riꞌ, chi rjawaxic chi nechꞌakij can ja tzabuklaj cꞌaslemal ja rewcꞌan nabey, jun cꞌaslemal ja xa chuwirnak como xeyaꞌ ewiꞌ chi rbanic chaka nojel ta xeyarij ja xa engaño rcꞌamonto.

²³ Pro ja rjawaxic chewe camic, kꞌij kꞌij neyaꞌ lugar tre ja rEspíritu Santo chi arjaꞌ nucoj cꞌacꞌa tak naꞌoj pa tak ewiꞌ pa tak ewanma.

²⁴ Rjawaxic chi newcꞌaj ja cꞌacꞌa cꞌaslemal ja winakarsan rmal ja Dios, jun cꞌaslemal ja caniꞌ rcꞌaslemal arjaꞌ. Ja tok nawcꞌaj awaꞌ jun cꞌacꞌa cꞌaslemal riꞌ jariꞌ naban ja rutzil in nawcꞌaj jun chꞌajchꞌojlaj anma pro ni katzij wiꞌ ja naban, mta engaño rcꞌamonto.

²⁵ Rmalcꞌariꞌ nbij chewe, ni ta xtel wiꞌ chewe chijutij ja tzꞌakoj tak tzij in ni ta katzij wiꞌ nebij chibil tak ewiꞌ. Queriꞌ nbij chewe como kaximon kiꞌ, xa jun cuerpo kabanon.

²⁶ Ja tok xtipeti ja rewayewal maxta teyaꞌ lugar tre chi xquixrucꞌamel ta chi rbanic ja il mac. Maxta tiyeloji ja rewayewal, tecuyuꞌ chanim,

²⁷ maxta teyaꞌ lugar tre ja diablo chi xquixrtakchiꞌij ta.

²⁸ Ja re banol tak alakꞌ chewe nabey maxta tiqueban chic ja ralakꞌ. Ja nqueban, quesamaji ruqꞌuin quekꞌaꞌ pro utzlaj samaj tiquibanaꞌ utzcꞌa chi cꞌoli nquechꞌec ja nequitobej ja winak ja cꞌo rjawaxic chique.

²⁹ Ni ta majun itzel tak tzij nelto pan echiꞌ, ni ta buen tak tzij wiꞌ nebij, juleꞌ tzij ja cꞌo qꞌuiyem rcꞌamonto, juleꞌ tzij ja cꞌoli noc wiꞌ. Quirtariꞌ neban jutzꞌit utzcꞌa chi cꞌol utzil xin Dios rcꞌamonto chique ja necꞌaxan ewxin.

³⁰ In maxta cꞌoli teban ja xa nuyaꞌ bis tre ja rEspíritu Santo xin Dios como ja rEspíritu Santo arjaꞌ kajto pa tak ewanma in rmalariꞌ tok yatajnak chewe ja retal chi ix rxin chic ja Dios in cꞌol eseguro chi newilaꞌ na ja kꞌij ja tok xtitzꞌakat na chake chijutij ja totajem xin Dios.

³¹ Techupuꞌ nojelal ja ntiꞌon chewe chibil tak ewiꞌ, teyaꞌaꞌ can ja kulujem, ja rayewal, ja banoj sícꞌ, ja neꞌatzijoj winak, teyaꞌaꞌ can nojel rwach ja ritzelal.

³² Ja neban, kas lokꞌ tenaꞌaꞌ ewiꞌ, tipokonaj riꞌ ewach, tecuyuꞌ ewiꞌ caniꞌ xuban ja Dios chewe xixrucuy pro xa rmal ja xa jun ebanon ruqꞌuin ja Cristo chewiꞌ tok xixrucuy.