Efesios 3 - Tz'utujil (Ja Cꞌacꞌa Chominem)

¹ Rmalcꞌariꞌ tok anin nmajon rbanic orar pan ecuenta. Anin ja rin Pablo incojon preso camic rumac ja samaj xin Cristo Jesús ja xinban pan ecuenta ja ma ix aj Israel ta.

² Turkaj chewe chi ecꞌwaxan chic chi anin yaꞌon chi nukul chi nenyaꞌaꞌ rbixic chewe nak rbanic ja rutzil xin Dios ja nsipaj ja Dios chake.

³ Ecꞌwaxan chi cꞌoli ja kꞌalasax chinwach rmal ja Dios ja ma kꞌalasan ta nabey, jariꞌ ntzꞌiban chic jalal tre.

⁴ Ja cꞌa tok nesiqꞌuij ja ntzꞌiban chic, triꞌ netzꞌat wiꞌ chi anin bien kꞌalaj chic chinwach ja ma kꞌalasan ta nabey tre ja Cristo.

⁵ Pro jariꞌ ma xkꞌalasax ta chiquewach ja winak ja xeqꞌuejeꞌ chipan juleꞌ chic tiempo, ma xkꞌalasax ta chiquewach ejeꞌeꞌ ja caniꞌ kꞌalasan chic camic rmal ja rEspíritu Santo chiquewach ja santilaj tak apóstol in profeta.

⁶ Quewaꞌ rbanic ja kꞌalasan chic chikawach riꞌ, ja rixix ja ma ix aj Israel ta ix kachbil chic ja rok aj Israel tre ja herencia xin Dios ja nyataj na chake, xa jun cuerpo kabanon chic ewqꞌuin, ixix jun nyataj na chewe ja tzujunto ojer rmal ja Dios pro xa rmal ja xa jun ebanon ruqꞌuin ja Cristo chewiꞌ tok nyataj chewe. Jariꞌ yataj chewe ja tok xecꞌwaxaj ja utzlaj tzij xin Jesucristo.

⁷ Jawaꞌ utzlaj tzij riꞌ jawaꞌ yaꞌon chi nukul chi nyaꞌ rbixic, jawaꞌ jun samaj xincochij tre ja Dios, ni majun nak ta xinchꞌecbej ta in janila samaji ja Dios pa ncꞌaslemal chi rbanic jawaꞌ samaj riꞌ.

⁸ Chwe anin yatajnak wiꞌ jawaꞌ samaj riꞌ masqui xa ma nim ta nukꞌij nnaꞌ kaj chiquewach ja juleꞌ chic kachꞌalal ja re xin Dios, chwe anin yataj wiꞌ chi ninbe ewqꞌuin ja ma ix aj Israel ta chi nenyaꞌaꞌ rbixic chewe nojel ja nkawil ruqꞌuin ja Cristo, jariꞌ caniꞌ jun nimlaj mebaꞌil nkawil pro jun mebaꞌil ja mta qꞌuisic trij.

⁹ Jawaꞌ samaj yatajnak chwe utzcꞌa chi anin nchꞌob chiquewach canojel ja winak nak rbanic ja rchominto ja Dios ja ma kꞌalasan ta chipan ja juleꞌ chic tiempo ja kꞌaxnak can pro xa ruyon Dios otakyon triꞌ nak rbanic pro jariꞌ jun Dios arjaꞌ winakarsyon nojelal.

¹⁰ Queriꞌ xuban ja Dios utzcꞌa chi ja lokꞌlaj tak ángel ja recꞌo chilaꞌ chicaj ejeꞌeꞌ nkꞌalasax chic chiquewach ja nimak tak naꞌoj xin Dios ja xucoj ja Dios chi rbanic cumplir ja rchominto ojer chi nuban pro kumal ajoj ja rok iglesia tok necowini ja ángel nquechꞌob ja wariꞌ.

¹¹ Ja Dios ni rchominto wiꞌ ojer chi nuban jawaꞌ ja nmajon rbixic chewe riꞌ, jawaꞌ ni rchominto wiꞌ ja tok majaꞌn titzꞌucarsaj ja rwachꞌulew. Ja cꞌa tok xutakto ja kajaw Jesucristo waweꞌ chwachꞌulew tokoriꞌ xurbantaj cumplir ja rchominto ojer.

¹² Ja tok xa jun kabanon ruqꞌuin ja Jesucristo jariꞌ matikanaꞌ kiꞌ nokekaj chwach ja Dios in cꞌo kaconfianza noktzijon ruqꞌuin pro xa rmal ja yukulbal kacꞌuꞌx ruqꞌuin ja Jesucristo chewiꞌ tok nkaban queriꞌ.

¹³ Rmal cꞌa nojel awaꞌ ja nmajon rbixic chewe riꞌ chewiꞌ tok nbij chewe, masqui anin incꞌo chipan ja rpokonal emwal camic pro maxta ticapuj ecꞌuꞌx rmal como ja rpokonal ja nmajon rtijic pan ecuenta jariꞌ gloria xin Dios rcꞌamonto chewe.

* * * * * * * * * *

¹⁴ Rmalcꞌariꞌ ja tok ninxuqueꞌ chwach ja Tatixel chi nban orar pan ecuenta, ninxuqueꞌ chwach ja Tatixel rxin ja kajaw Jesucristo.

¹⁵ Arjaꞌ jun Tatixel in rmalariꞌ tok nbix chake chi ok familia xin Dios tanto chique ja recꞌo chilaꞌ chicaj in chake ajoj chakajaꞌ ja rokcꞌo waweꞌ chwachꞌulew.

¹⁶ Ja Tatixel janila jun nimlaj gloria cꞌo ruqꞌuin, arjaꞌ ta xtiyoꞌ chewe ja rpoder, xtuyaꞌ ta chewe chi ja rEspíritu Santo ncowirsaj chi utz ja cꞌacꞌa cꞌaslemal ewcꞌan pa tak ewanma.

¹⁷ Ni ta xtiyukeꞌ wiꞌ ecꞌuꞌx ruqꞌuin ja Cristo in rmaltariꞌ ni ta xtiqꞌuejeꞌ wiꞌ ja Cristo pa tak ewanma. Ja wi queriꞌ neban jariꞌ nixtiqueꞌe chi utz chipan ja rajoben riꞌil xin Dios caniꞌ rbanic jun cheꞌ ja nat benak ja rcꞌamal pa tokꞌulew in caniꞌ rbanic jun jay ja bien tzꞌubul parwiꞌ ja rsimientoꞌil.

¹⁸ Quirtariꞌ neban utzcꞌa chi ixix ewachbil canojel ja kachꞌalal ja re xin Dios nixcowini nechꞌob nak rbanic ja rajoben riꞌil xin Cristo chi congana nim in mta bar ta triꞌ ja maquita nekaj wiꞌ in nixtacꞌa cꞌo ta jun tiempo ja maquita cꞌoli chakajaꞌ.

¹⁹ Ja nwajoꞌ chewe chi newotakij nak rbanic ja rajoben riꞌil xin Cristo, jun ajoben riꞌil ja más kꞌaxnak chi na, jun ajoben riꞌil ja xa nqꞌuisi ja rapensar chi rchꞌobic. Kas ta xtewotakij nak rbanic ja rajoben riꞌil xin Cristo utzcꞌa chi xtinoj ta pa tak ewanma ixix chakajaꞌ nojelal ja nojnak pa ranma ja Dios.

²⁰ Ja cꞌa camic kas ta xtiyaꞌ rukꞌij ja Dios, arjaꞌ jun Dios janila nim ja poder cꞌo pa rukꞌaꞌ, jun poder ja ntajini nsamaji pa tak kacꞌaslemal camic. In rmal ja poder ja cꞌo pa rukꞌaꞌ mta nak ta ja maquita ncowini nuban. Xa nak ta nkacꞌutuj tre ncowini nuyaꞌ más chake chwach ja nkacꞌutuj tre. Xa nak ta nkachꞌob ja congana cꞌayew chi rbanic pro arjaꞌ ncowini nuban ja más na cꞌayew chwach ja nkachꞌob ajoj.

²¹ Kas ta xtiyaꞌ rukꞌij kumal ja rok iglesia ja xa jun kabanon ruqꞌuin ja Cristo Jesús. Ni ta xtiyaꞌ wiꞌ rukꞌij chwak, cabij in nojel tiempo. Amén.