Efesios 2 - Tz'utujil (Ja Cꞌacꞌa Chominem)

¹ Ja cꞌa rixix nabey ixcamnak chipan ja rewil emac pro arjaꞌ xuyaꞌ jun cꞌacꞌa cꞌaslemal chewe.

² Ja il mac ni chipan wiꞌ ixcꞌo wiꞌ nabey, xeban ja ritzelal ja caniꞌ nqueban ja winak ja xa ruqꞌuin rwachꞌulew yukul wiꞌ quecꞌuꞌx. Xa rvoluntad ja diablo xeban, jariꞌ diablo ja jefe quixin ja ritzel tak espíritu ja neqꞌuejeꞌ chicaj chipan ja aire. Jariꞌ itzel tak espíritu ja nesamaj pa tak canma ja winak ja maquenimani camic.

³ In queriꞌ kabanto ajoj nabey chakajaꞌ, xa kavoluntad ajoj kaban kaj kayon, xa nak ta xuyaꞌ gana chake chi nkaban jariꞌ kaban. Kayaꞌ rgana ja ncꞌutuj ja kacuerpo, kanimaj ja ritzel tak naꞌoj kucꞌan in ni kaxin wiꞌ chi ok yicol ryewal ja Dios, nij ok junan cuqꞌuin ja juleꞌ chic winak triꞌ.

⁴ Pro ja Dios arjaꞌ congana npokonaj kawach ja rok winak, janila nokrajoꞌ in quewaꞌ xuban chake riꞌ.

⁵ Masqui okcamnak chipan ja kil kamac nabey pro ja tok xuyic ja Cristo chipan ja camíc tokoriꞌ xuyaꞌ ajoj chake chi nkachbilaj ja Cristo chipan jun cꞌacꞌa cꞌaslemal. Pro jawaꞌ wariꞌ puro cochinem xin Dios como xa rmal ja rutzil ja xecochij tre chewiꞌ tok ewilon ja totajem xin Dios camic.

⁶ Ja Dios xuyaꞌ chake chi nkachbilaj ja Cristo, xuyaꞌ chake chi xokcꞌastaj ruqꞌuin, xokrtzꞌubaꞌ ruqꞌuin chilaꞌ chicaj, xa jun kabanon ruqꞌuin.

⁷ Queriꞌ cꞌa xuban chake utzcꞌa ja winak ja majaꞌn queqꞌuejeꞌ chipan awaꞌ tiempo ja rokcꞌo wiꞌ riꞌ ejeꞌeꞌ tok xqueqꞌuejeꞌ na chwachꞌulew jariꞌ bien nchꞌobtaj cumal ja rutzil ja xuban chake, bien nchꞌobtaj cumal chi ja Dios congana jun nimlaj utzil nsipaj chawe ja tok xa jun naban ruqꞌuin ja Cristo Jesús.

⁸ Queriꞌ nbij chewe como xa rmal ja rutzil ja nsipaj ja Dios chake ja tok ewilon chic ja totajem xin Dios in ja yukulbal ecꞌuꞌx ruqꞌuin ja Jesucristo jariꞌ ecꞌamben jawaꞌ totajem riꞌ. Pro jawaꞌ ni majun nak ta xeban ja xechꞌecbej ta, puro cochinem xin Dios.

⁹ Ni majun winak cꞌo ta nak ta xtuban ja xtichꞌecbej ta ja totajem xin Dios. Queriꞌ rbanic utzcꞌa tok xtuwil ja totajem mta moda xtuyaꞌ kaj ta rukꞌij ruyon rmal.

¹⁰ Queriꞌ nbij chewe como ja utzlaj cꞌaslemal ja kucꞌan camic Dios winakarsyon, ma ajoj ta como arjaꞌ xuyaꞌ jun cꞌacꞌa cꞌaslemal chake, tokoriꞌ xuyaꞌ chake ja tok xa jun kaban ruqꞌuin ja Cristo Jesús. Xuyaꞌ jun cꞌacꞌa cꞌaslemal chake utzcꞌa chi nkaban chic ja rutzil pro juleꞌ utzil ja ni rchominto wiꞌ ojer chi nkaban.

* * * * * * * * * *

¹¹ Rmalcꞌariꞌ nbij chewe, kas turkaj chewe chi ja nabey ma ix tinamit ta xin Dios. Ixix ma ix aj Israel ta, ma ixbanon ta circuncidar, xa xixban despreciar cumal ja raj Israel: —Ja rixix xa ma ixbanon ta circuncidar, xecheꞌ chewe. Pro ja circuncisión ja cꞌo chique ja raj Israel jariꞌ jun circuncisión ja xa winak ebanyon.

¹² Kas turkaj chewe nak ja rebanon nabey. Jun, ma ewotak ta triꞌ chi cꞌo jun Cristo. In jun chic, ma ix cachbil ta ja tinamit xin Dios, mta ekꞌaꞌ tre ja xchomarsaj jeꞌe ja Dios ruqꞌuin ja rtinamit ja bar xtzujuj wiꞌ chique chi nerilaꞌ na jun kꞌij ja tok nequilaꞌ ja totajem xin Dios. Ni majun totajem ewayben ta triꞌ, ixcꞌo chipan ja rwachꞌulew in cꞌuluto ma ewotak ta rwach ja Dios triꞌ.

¹³ Pro ja cꞌa camic xa jun chic ebanon ruqꞌuin ja Cristo Jesús in masqui ja nabey cꞌa cꞌa nat ixcꞌo wiꞌ tre ja Dios pro ja camic xa nakaj chic ixcꞌo wiꞌ tre pro xa rmal ja rquiqꞌuel ja Cristo tok yatajnak queriꞌ chewe.

¹⁴ Queriꞌ rbanic como ja Jesucristo rmal arjaꞌ tok quiꞌil chic nokqꞌuejeꞌe ja rok aj Israel ewqꞌuin ja ma ix aj Israel ta, xa jun tinamit xuban chake. Cꞌo jun cꞌullaꞌan riꞌil chikacojol nabey caniꞌ jun nimlaj tabia kacoj chikacojol jariꞌ xuban caꞌiꞌ chake pro ja Jesucristo arjaꞌ xokrchomarsaj ewqꞌuin.

¹⁵ Arjaꞌ cam chwach cruz in rmal ja rcamic tok xocꞌo rukꞌij ja ley xin Dios ja tzꞌibtal can rmal ja Moisés ja rcꞌan juleꞌ mandamiento in juleꞌ costumbre, jariꞌ xokrchomarsbej ewqꞌuin. Queriꞌ xuban chake utzcꞌa chi jun cꞌacꞌa tinamit xuban chake, ma ok caꞌiꞌ tinamit chi ta pro xa jun kabanon ruqꞌuin utzcꞌa chi kas quiꞌil chic nokqꞌuejeꞌ ewqꞌuin.

¹⁶ Queriꞌ xuban chake utzcꞌa chi caniꞌ xa jun cuerpo nkaban ja rok caꞌiꞌ tinamit in nokchomtaj ruqꞌuin ja Dios chi ok caꞌiꞌ pro xa rmal ja rcamic chwach cruz chewiꞌ tok nokchomtaji como ja rcamic jariꞌ xlasbej ja cꞌullaꞌan riꞌil ja cꞌo chikacojol nabey.

¹⁷ Cꞌacꞌariꞌ peti, xuryaꞌaꞌ rbixic ja utzlaj tzij ja nyoꞌ chake chi quiꞌil nokqꞌuejeꞌe, xuyaꞌ rbixic chewe ixix ja cꞌa cꞌa nat ixcꞌo wiꞌ tre ja Dios in xuyaꞌ rbixic chique chakajaꞌ ja recꞌo chirnakaj.

¹⁸ Queriꞌ rbanic como xa rmal ja Jesucristo tok nokrucꞌul ja katataꞌ Dios chi ok caꞌiꞌ tinamit in xa jun mismo Espíritu Santo ucꞌayon kaxin chi nokekaj chwach.

¹⁹ Queriꞌ cꞌa rbanic, ma queriꞌ chi ta ebanon ja caniꞌ ebanon nabey como ja nabey ma ix tinamit ta xin Dios in nixtacꞌa cꞌo ta ekꞌaꞌ tre chakajaꞌ. Pro ja rebanon chic camic, ewach aj tinamit chic ewiꞌ cuqꞌuin ja re xin Dios, ixcꞌo chic chipan ja familia xin Dios.

²⁰ Ixtiquil parwiꞌ ja rsimientoꞌil jun templo. Ja rsimientoꞌil jawaꞌ templo riꞌ jariꞌ cojon cumal ja rapóstol in cumal ja profeta in cꞌo jun abaj cojon tre ja más chi na nim rukꞌij, jariꞌ abaj ja Cristo Jesús.

²¹ Xa rmal ja Cristo tok bien rchapon riꞌ ja templo chi jun, xa rmal ja Cristo tok rmajon qꞌuiyem ja templo in noc na jun templo xin Dios pro jun templo ja xa jun nuban ruqꞌuin ja kajaw Jesucristo.

²² In ixix chakajaꞌ como xa jun ebanon ruqꞌuin ja Jesucristo jariꞌ majtajnak ecojic chi rbanic ja templo pro jun templo espiritual chi noc rochoch ja Dios.