Efesios 1 - Tz'utujil (Ja Cꞌacꞌa Chominem)

¹ Anin ja rin Pablo camic ntzꞌibajel jawaꞌ carta riꞌ chewe ixix wachꞌalal ja rixcꞌo pa Efeso. Anin incojon rmal ja Dios chi inocnak apóstol rxin ja Jesucristo. Ixix ix tinamit xin Dios, cꞌoli ja yukulbal ecꞌuꞌx ruqꞌuin ja Cristo Jesús, xa jun ebanon ruqꞌuin.

² Ja rutzil ja nsipaj ja Dios chake rachbil ja quicotemal xin Dios ja tariꞌ xtecochij más tre ja katataꞌ Dios in tre ja kajaw Jesucristo.

* * * * * * * * * *

³ Kas ta xtiyaꞌ rukꞌij ja Dios ja Tatixel rxin ja kajaw Jesucristo. Arjaꞌ jun Dios janila xuyaꞌ rutzil chake ja tok xa jun kaban ruqꞌuin ja Cristo. Xuyaꞌ chake nojel rwach ja rutzil ja rcꞌamonto ja rEspíritu Santo, xuyaꞌ chake chipan jun cꞌacꞌa cꞌaslemal ja xin chilaꞌ chicaj.

⁴ Ja tok majaꞌn titzꞌucarsaj ja rwachꞌulew tokoriꞌ xokruchaꞌto como bien rotakpi chic chi nkaban na jun ruqꞌuin ja Jesucristo. Xokruchaꞌto utzcꞌa chi noc na chake ja mero cꞌaslemal xin Dios utzcꞌa chi ni majun nak ta nokchapbexi ja tok nokqꞌuejeꞌ chwach.

⁵ Arjaꞌ ni nokrajoꞌ wiꞌ, ni rchominto wiꞌ chi nokoc na ok ralcꞌwal, ni rchominto wiꞌ chi rumac ja Jesucristo chewiꞌ tok nokoc ok ralcꞌwal. Como nijawariꞌ rvoluntad chewiꞌ tok xuban queriꞌ chake.

⁶ Queriꞌ xuban chake utzcꞌa chi nkatzꞌat chi janila nim rukꞌij ja rutzil ja nsipaj chake utzcꞌa chi nkayaꞌ rukꞌij rmal. Rmal cꞌa ja rutzil ja nsipaj chake tok xokrucꞌul. Como xa jun kaban ruqꞌuin ja Jesucristo ja chakꞌlaj Ralcꞌwal chewiꞌ tok xokrucꞌul.

⁷ Ja tok xa jun kabanon ruqꞌuin ja Jesucristo jariꞌ okwasanel chic libre pa rukꞌaꞌ ja il mac como arjaꞌ xutoj ja kil kamac tre ja rquiqꞌuel. Ja tok xa jun kabanon ruqꞌuin jariꞌ cuytajnak chic ja kil kamac. Ja Dios tok xuban queriꞌ chake jariꞌ caniꞌ jun nimlaj mebaꞌil xsipaj chake.

⁸ Janila jun nimlaj utzil rsipan chake in rmalariꞌ tok nokcowini nkachꞌob nojel ja nimak tak naꞌoj xin Dios in nokcowini nkachꞌob nak rjawaxic chi nkaban.

⁹ Arjaꞌ rkꞌalasan chic chikawach ja rchominto ojer ja xa wawan chikawach nabey. Como nijawariꞌ ja rvoluntad chewiꞌ tok xuban queriꞌ.

¹⁰ Ni rchominto wiꞌ ja tiempo jeꞌe in tok xtitzꞌakati ja tiempo arjaꞌ nchomarsaj na nojelal ja yojtajnak jeꞌe in xa ruyon chic ja Cristo npeꞌe chic trij nojelal tanto tre ja cꞌo jeꞌe chilaꞌ chicaj in tre chakajaꞌ ja cꞌo jeꞌe chwachꞌulew.

¹¹ In chakajaꞌ como xa jun kabanon ruqꞌuin ja Jesucristo chewiꞌ tok cꞌo jun herencia xin Dios ja yatajnak chake. Ja Dios ni rchominto wiꞌ ojer chi nuyaꞌ chake ja herencia, nijawariꞌ rchꞌobonto chakij. Xa nak ta ja nbantaj jeꞌe mta ariꞌ ja maquita nsamaji ja Dios chipan chi rbanic cumplir ja rvoluntad arjaꞌ.

¹² Quewaꞌ nrajoꞌ ja Dios riꞌ, chi ajoj ja kayben ja Cristo nabey nokoc ok yaꞌbal rukꞌij ja Dios.

¹³ In yukeꞌ ecꞌuꞌx ixix ruqꞌuin ja Cristo chakajaꞌ tokoriꞌ tok xecꞌwaxaj ja tzij ja ni katzij wiꞌ chi tzij xin Dios, jariꞌ ja utzlaj tzij ja rcꞌamonto ja totajem xin Dios chewe. Queriꞌ xeban, yukeꞌ ecꞌuꞌx ruqꞌuin ja Cristo in xa jun xeban ruqꞌuin in rmalariꞌ tok cꞌo jun retal yataj chewe, jun retal ja ncꞌutu ewxin chi ix xin Dios. Ja cꞌa retal ja yataj chewe jariꞌ tok kajto ja rEspíritu Santo pa tak ewanma ja ni tzujunto wiꞌ ojer rmal ja Dios.

¹⁴ Como cꞌo chic ja rEspíritu Santo pa tak kanma rmalcꞌariꞌ tok cꞌo kaseguro chi ja Dios nuyaꞌ na chake nojelal ja herencia ja rtzujun chake tokoriꞌ tok xkoꞌel libre chijutij ja rok tinamit xin Dios ja roklokꞌon rmal. Queriꞌ cꞌa rchominto ja Dios utzcꞌa chi nkayaꞌ rukꞌij rmal.

* * * * * * * * * *

^15-16 Rmal cꞌa ja cꞌa xinbij kaj chewe riꞌ xajutij nmajon rmaltioxixic tre ja Dios emwal como xurkaj rbixic wqꞌuin chi ixix bien yukul ecꞌuꞌx ruqꞌuin ja kajaw Jesús in congana neꞌewajoꞌ canojel ja kachꞌalal ja re xin Dios. Ni nixnnataj wiꞌ pan oración.

¹⁷ Nintzijon ruqꞌuin ja Dios rxin ja kajaw Jesucristo, jariꞌ Dios ja Tatixel ja ni rxin wiꞌ chi congana nim rukꞌij. Anin ncꞌutuj tre chi arjaꞌ nuyaꞌ chewe chi ja rEspíritu Santo nucoj ja naꞌoj xin Dios pa tak ewiꞌ pa tak ewanma in ncꞌutuj tre chakajaꞌ chi bien nkꞌalasaj chewach nak ja kas mero rbanic ja Dios.

¹⁸ Ja nwajoꞌ anin chewe kas ta xtijaktaji chi utz ja rewiꞌ ewanma utzcꞌa chi nixcowini nechꞌob nak rbanic nojel ja rewayben ja rtzujun chewe ja Dios in ixrsiqꞌuin chi neꞌewilaꞌ na. Kas ta xtichꞌobtaj emwal nak rbanic ja herencia xin Dios ja nyataj chake ja rok tinamit xin Dios, pro jun herencia janila nim rukꞌij, caniꞌ jun nimlaj mebaꞌil ja nyataj chake.

¹⁹ Kas ta xtichꞌobtaj emwal chakajaꞌ nak rbanic ja poder xin Dios ja nsamaji pa tak kacꞌaslemal ja yukul kacꞌuꞌx ruqꞌuin ja Jesucristo, pro jun poder ja más kꞌaxnak chi na como jariꞌ poder ja samaji

²⁰ ja tok Dios xuyic ja Cristo chiquicojol camnakiꞌ in tok xjotbaꞌ chilaꞌ chicaj in triꞌ xtzꞌubaꞌ wiꞌ pa riquikꞌaꞌ.

²¹ Queriꞌ xuban ja Dios tre ja Cristo, xuyaꞌ tre chi noc pa rukꞌaꞌ ja kꞌetbaltzij pro ni majun kꞌetbaltzij ja maquita xoc pa rukꞌaꞌ, in xuyaꞌ tre chi más na nim rukꞌij arjaꞌ chiquewach canojelal ja kꞌetol tak tzij in ma queyon ta ja kꞌetol tak tzij ja re rxin awaꞌ tiempo riꞌ in queriꞌ chique ja re rxin chic jun tiempo ja majaꞌn tekawilaꞌ chakajaꞌ.

²² Ja Dios mta nak ta ja maquita rcojon xeꞌ rukꞌaꞌ rkan ja Cristo. Jawaꞌ Cristo riꞌ arjaꞌ chaꞌon rmal ja Dios chi nokruban cuenta ja rok iglesia pro jun Cristo ja paꞌl trij nojelal.

²³ Ajoj ja rok iglesia ok cuerpo rxin ja Cristo in ja rcꞌaslemal ja Cristo nnoji pa tak kacꞌaslemal ajoj como ok cuerpo rxin in ni majun bar ta triꞌ ja maquita cꞌo wiꞌ arjaꞌ.