Colosenses 4 - Tz'utujil (Ja Cꞌacꞌa Chominem)

¹ Ja cꞌa rixix ja rix patroniꞌ tebanaꞌ chique ja remoso ja caniꞌ nrajoꞌ Dios chewe chi neban chique, utzil ta neban chique. Queriꞌ nbij chewe como ixix bien ewotak chi cꞌo jun Epatrón ixix chakajaꞌ chilaꞌ chicaj.

* * * * * * * * * *

² Camic wachꞌalal ni ma tetanbaꞌ ta wiꞌ rbanic ja roración, quixcꞌascꞌoti chi rbanic in ni temaltioxij wiꞌ tre ja Dios ja rbanon chewe.

³ In tebanaꞌ orar pa kacuenta ajoj chakajaꞌ, tecꞌutuj tre ja Dios chi arjaꞌ nujak jun bey chikawach utzcꞌa chi nkayaꞌ más rbixic ja rtzobal. Ajoj nkajoꞌ nkayaꞌ más rbixic ja kꞌalasan chic tre ja Cristo ja ma kꞌalasan ta nabey. Rmalariꞌ tok incꞌol anin pa cheꞌ camic.

⁴ Tebanaꞌ orar pa ncuenta utzcꞌa chi nincowini nkꞌalasaj chi utz nak rbanic ja Cristo como nijawariꞌ ja yatal chwe chi nban.

⁵ Tecojoꞌ ja naꞌoj xin Dios ja tok nixtzijon cuqꞌuin ja winak ja ma quiniman ta ja Jesucristo. Maxta chaka queriꞌ tikꞌax jun kꞌij chewach pro kꞌij kꞌij ni tebanaꞌ wiꞌ ja rutzil.

⁶ Ja tok nixtzijoni ni ta utz wiꞌ ja tzij nebij, cꞌo ta rcꞌamonto chique ja necꞌaxani. Ni ta quirwariꞌ neban utzcꞌa tok cꞌoli ncꞌaxax chewe cumal winak xa nak ta chi winakil pro bien ewotak nak nrajoꞌ ja Dios chewe chi nebij chique.

* * * * * * * * * *

⁷ Ja cꞌa tok xtekaji ja kachꞌalal Tíquico ewqꞌuin arjaꞌ nbij chewe nak ja nbanon waweꞌ. Arjaꞌ jun chakꞌlaj kachꞌalal, jun wach ajsamajel ja xa jun rbanon ruqꞌuin ja kajaw Jesucristo, jun ajsamajel ja ni nuban wiꞌ cumplir ja ntzujuj.

⁸ Rmalcꞌariꞌ tok ntakonel ewqꞌuin utzcꞌa chi nerotakij nak ja rebanon utzcꞌa chakajaꞌ chi neryukbaꞌ ecꞌuꞌx.

⁹ In ja Onésimo ntakonel chakajaꞌ rachbilanel ja Tíquico. Ja Onésimo arjaꞌ ewach aj tinamit, arjaꞌ jun chakꞌlaj kachꞌalal chakajaꞌ ja ni nuban wiꞌ cumplir ja ntzujuj. Ja tok xqueꞌekaj ewqꞌuin ejeꞌeꞌ nquibij chewe nojel ja majtajnak rbanic waweꞌ.

¹⁰ Ja kachꞌalal Aristarco arjaꞌ wachbil waweꞌ pa cheꞌ, arjaꞌ nutakel rutzil ewach. Ja kachꞌalal Marcos ja rchꞌalal Bernabé arjaꞌ nutakel rutzil ewach chakajaꞌ. Caniꞌ nbin chic chewe, ja wi xtekaji ja Marcos ewqꞌuin kas quiꞌil rcꞌulic tebanaꞌ.

¹¹ Ja Jesús ja cꞌo chic jun rubiꞌ Justo neꞌxi, arjaꞌ nutakel rutzil ewach chakajaꞌ. Jawaꞌ roxiꞌ kachꞌalal ja cꞌa xenbij kaj chewe riꞌ ejeꞌeꞌ ninquetoꞌ chipan ja samaj waweꞌ utzcꞌa chi nkayaꞌ rbixic ja gobierno xin Dios pro ma ecꞌo chi ta ja wach tak aj Israel ja rinquitoꞌon ta waweꞌ, xa queyon ejeꞌeꞌ, congana quiyukban nucꞌuꞌx.

¹² Ja kachꞌalal Epafras arjaꞌ ewach aj tinamit, arjaꞌ jun ajsamajel rxin ja Cristo in nutakel rutzil ewach chakajaꞌ. Arjaꞌ congana nutij rukꞌij chi rbanic orar pan ecuenta, ni nixrnataj wiꞌ pan oración. Queriꞌ nuban utzcꞌa chi cow nixpeꞌi utzcꞌa chi nixqꞌuiyi chi utz in nixwachini chipan ja rtzobal Dios utzcꞌa chi ni ta ja wiꞌ neban ja xa nak ta nrajoꞌ ja Dios chewe chi neban.

¹³ Anin bien wotak in nbij chewe chi ja kachꞌalal Epafras arjaꞌ congana jun nimlaj lucha ntajini nuban pan ecuenta ixix in pa quicuenta ja recꞌo pa Laodicea in pa quicuenta chakajaꞌ ja recꞌo pa Hierápolis.

¹⁴ Ja chakꞌlaj kachꞌalal Lucas ja doctor arjaꞌ nutakel rutzil ewach in queriꞌ nuban ja kachꞌalal Demas chakajaꞌ.

¹⁵ Teyaꞌaꞌ rutzil quewach ja kachꞌalal ja recꞌo pa Laodicea in queriꞌ ta neban tre ja kachꞌalal Ninfas chakajaꞌ in chique ja riglesia ja nquemol quiꞌ pa rochoch.

¹⁶ Jawaꞌ carta ja ntakel ewqꞌuin riꞌ tok xtisiqꞌuitaj emwal cꞌacꞌariꞌ netakel chic ruqꞌuin ja riglesia ja cꞌo pa Laodicea utzcꞌa chi ejeꞌeꞌ nquisiqꞌuij chakajaꞌ. In cꞌo chic jun ja carta ntakonel cuqꞌuin ja kachꞌalal ja recꞌo pa Laodicea in nwajoꞌ chi ixix nesiqꞌuij chakajaꞌ.

¹⁷ In tebij tre ja kachꞌalal Arquipo: —Catcꞌascꞌoti, tabanaꞌ cumplir ja samaj ja yatajnak chawe pa rubiꞌ ja kajaw Jesucristo, quixcheꞌ tre.

¹⁸ In camic anin ja rin Pablo ntakel rutzil ewach pro jariꞌ anin nintzꞌibanel ruqꞌuin nukꞌaꞌ. Maxta temestaj chi anin inbacꞌon pa cadena waweꞌ pa cheꞌ. Ja rutzil xin Dios xtiqꞌuejeꞌ ta ewqꞌuin. Amén.