Colosenses 3 - Tz'utujil (Ja Cꞌacꞌa Chominem)

¹ Ja cꞌa wi ixix jun ixcꞌastajnak ruqꞌuin ja Cristo kas ta cꞌa nel ecꞌuꞌx ariꞌ trij ja xin chilaꞌ chicaj ja bar tzꞌubul chi wiꞌ ja Cristo pa riquikꞌaꞌ ja Dios.

² Ruqꞌuin ta ja xin chilaꞌ chicaj nqꞌuejeꞌ wiꞌ ja repensar in maquita ruqꞌuin ja xin rwachꞌulew.

³ Queriꞌ nbij chewe como ixix jun xixcam ruqꞌuin ja Cristo, cꞌacꞌa chic ja recꞌaslemal, pro jun cꞌaslemal ja bien banon cuenta rmal ja Cristo como xa jun ebanon ruqꞌuin in como arjaꞌ xa jun quibanon ruqꞌuin ja Dios.

⁴ Ja Cristo arjaꞌ mismo ocnak kacꞌaslemal camic in tok xtipi chic jutij congana nchꞌaꞌani ntzꞌati, janila nim rukꞌij in queriꞌ chewe ixix chakajaꞌ, newachbilajto in queriꞌ nixtzꞌati ja caniꞌ ntzꞌa̱t arjaꞌ.

* * * * * * * * * *

⁵ Como ixcamnak chic chwach ja il mac ma teban chi ta ixix ja ritzelal ja caniꞌ nqueban winak waweꞌ chwachꞌulew. Quewaꞌ nqueban riꞌ, xa il mac nqueban achiꞌiꞌ cuqꞌuin ixokiꞌ, xa nquitzꞌilorsaj ja quinaꞌoj, chaka benak chi nquiyarij quiꞌ, solo itzelal ja ncajoꞌ. In jun chic nqueban, chaka benak chi nquiyarij quinakun winak. Ja tok chaka benak chi nquiyarij quinakun winak jariꞌ xa nakun jeꞌe nqueyaꞌ rukꞌij, xa jariꞌ ocnak quidios.

⁶ Queriꞌ cꞌa rbanic ja ritzelal ja nqueban ja winak ja maqueniman rxin ja Dios in xa rmalariꞌ tok penak ryewal ja Dios chiquij.

⁷ In queriꞌ xeban ixix nabey chakajaꞌ ja tok cꞌa ewcꞌan na jun itzel cꞌaslemal como xeban ja juleꞌ itzelal ja cꞌa xinbij kaj chewe riꞌ.

⁸ Pro ja camic teyaꞌaꞌ can ixix chakajaꞌ nojel awaꞌ wariꞌ. Ma teban ta ja rewayewal, ma quixkuluj ta, maxta kas kꞌalawachili teban itzel chique winak, ma queꞌetzijoj ta in ma tebij ta ja ritzel tak tzij.

⁹ Ma tetzꞌak ta tzij chibil tak ewiꞌ como eyaꞌon can chic ja tzabuklaj cꞌaslemal, eyaꞌon can chic ja banoj itzelal ja caniꞌ xeban nabey

¹⁰ in camic ewcꞌan chic jun cꞌaslemal cꞌacꞌa. Kꞌij kꞌij nba̱n más cꞌacꞌa tre ja cꞌaslemal ja rewcꞌan camic in tok nqꞌuiswani queriꞌ neli ja caniꞌ rcꞌaslemal ja Dios. Queriꞌ rbanic utzcꞌa chi newotakij janiꞌ ja kas mero rbanic ja Dios.

¹¹ Xa ok jun kanojelal ja kucꞌan jawaꞌ cꞌacꞌa cꞌaslemal ja cꞌa xinbij kaj chewe riꞌ wi ok aj Israel owi ma ok aj Israel ta, wi okbanon circuncidar owi ma okbanon ta circuncidar, wi makocowini noktzijon pa griego, wi congana lawuloꞌ ja tinamit ja rokpenak wiꞌ, wi ok libre owi ok esclavo, pro xa ok jun kanojelal ja kucꞌan ja cꞌacꞌa cꞌaslemal como ja Cristo arjaꞌ nqꞌuejeꞌ pa tak kanma kanojelal in nuban jun chake, solo Cristo ja nim rukꞌij.

¹² Rmalcꞌariꞌ nbij chewe, como ixchaꞌon rmal ja Dios, como ix rxin chic ja Dios in congana nixrajoꞌ tepokonaj quewach ja winak, tebanaꞌ ja rutzil chique, maxta teyaꞌ ekꞌij chiquewach, xa nak ta ja newil chipan ja recꞌaslemal teyaꞌaꞌ pa rukꞌaꞌ ja Dios, tiqꞌuejeꞌe ja repaciencia

¹³ in tok chaka jalal neban ofender ewiꞌ tecochꞌoꞌ in tecuyuꞌ ewiꞌ. Quirtariꞌ neban ja caniꞌ xuban ja Cristo, como arjaꞌ xixrucuy chewiꞌ tok nbij chewe, tecuyuꞌ ewiꞌ ixix chakajaꞌ.

¹⁴ Pro cꞌo jun ja más chi na ncꞌatzini chwach nojelal jariꞌ ja rajoben riꞌil como ja tok newajoꞌ ewiꞌ jariꞌ nuban jun chewe in nojel rwach ja rutzil neban rmal.

¹⁵ Xtiqꞌuejeꞌ ta ja quicotemal xin Dios pa tak ewanma, ja tariꞌ xtucꞌan ewxin. Como ja Dios arjaꞌ xixruchaꞌ utzcꞌa chi nqꞌuejeꞌe ja quicotemal xin Dios checojol como arjaꞌ xa jun rbanon chewe, xa jun cuerpo ebanon. Maxta maquita nemaltioxij tre ja Dios ja rbanon chewe.

¹⁶ Kas ta xtinoji chi utz ja utzlaj tzij xin Cristo pa tak ewiꞌ pa tak ewanma. Tetijoj ewiꞌ in tepaxbaj ewiꞌ pro ruqꞌuin ta ja naꞌoj xin Dios. Tebanaꞌ salmo, tebanaꞌ himno, tebixaj ja bix ja nwinakarsax pa tak ewanma rmal ja rEspíritu Santo pro ruqꞌuin ta ewanma nebixaj rubiꞌ ja kajaw Jesucristo in nemaltioxij tre ja Dios.

¹⁷ Xa nak ta nebij jeꞌe in xa nak ta neban jeꞌe chakajaꞌ pro tebanaꞌ nojel pa rubiꞌ ja kajaw Jesucristo in rmal ta ja Jesucristo chakajaꞌ nemaltioxij tre ja katataꞌ Dios nojel ja rbanon chewe.

* * * * * * * * * *

¹⁸ Ixix ja rix ixokiꞌ queꞌebanaꞌ respetar ja rewachajilal como ja kajaw Jesucristo queriꞌ nrajoꞌ chewe chi neban.

¹⁹ Ja cꞌa rixix ja rix achiꞌiꞌ queꞌewajoꞌ ja rewixjayilal, maxta xa pokonlaj tak tzij tebij chique.

²⁰ Ja cꞌa rixix ja rix alcꞌwalaxelaꞌ ni queꞌenimaj wiꞌ ja retataꞌ eteꞌ como ja kajaw Jesucristo arjaꞌ congana nquicot chewij ja tok neꞌenimaj.

²¹ Ja cꞌa rixix ja rix tatixelaꞌ maxta queꞌechꞌujarsaj ja rewalcꞌwal matzij xa necapujsaj quecꞌuꞌx chijutij.

²² Ja cꞌa rixix ja rix moso ni queꞌenimaj wiꞌ ja repatrón ja recꞌo waweꞌ chwachꞌulew. Ecꞌoli moso congana nesamaji tok cꞌoloc ja quipatrón cuqꞌuin utzcꞌa chi utz netzꞌa̱t rmal pro tok nbe ja quipatrón ma kas ta nesamaj can chic pro maxta queriꞌ teban ixix. Pro ja neban, nojel ecꞌuꞌx nojel ewanma tebanaꞌ ja samaj in chwach Dios texbej wiꞌ ewiꞌ.

²³ Ja samaj neban xa nak ta chi samajil tetijaꞌ ekꞌij chi rbanic, tebanaꞌ tre caniꞌ rxin ja kajaw Jesucristo in ma quixin winak ta.

²⁴ Queriꞌ nbij chewe como ixix bien ewotak chi ruqꞌuin ja kajaw Jesucristo npi wiꞌ ja kas mero rtojbalil jariꞌ ja herencia ja rtzujun chake como ja Cristo ja kajaw jariꞌ ja kas mero Epatrón.

²⁵ Ja cꞌa winak ja nebanowi ja ritzelal Dios nyowi ja rjil rcꞌaxel chique ja nqueban, ma jun ta utz nutzꞌat in ma jun ta itzel.