Colosenses 2 - Tz'utujil (Ja Cꞌacꞌa Chominem)

¹ Como anin nwajoꞌ chi newotakij wachꞌalal, congana jun nimlaj lucha nintajini nban pan ecuenta in pa quicuenta chakajaꞌ ja kachꞌalal ja recꞌo pa Laodicea in pa quicuenta chakajaꞌ ja juleꞌ chic kachꞌalal ja mta jutij rtzꞌaton ta riꞌ kawach cuqꞌuin.

² Nmajon rbanic jun lucha utzcꞌa chi bien nquexim quiꞌ chipan ja rajoben riꞌil xin Dios in rmaltariꞌ ncowir quewiꞌ canma chipan ja utzlaj tzij xin Jesucristo. Ja kas nwajoꞌ chique, kas ta nqꞌuejeꞌe ja quiseguro, kas ta nchꞌobtaj cumal nak rbanic ja rkꞌalasan chic ja katataꞌ Dios chikawach jariꞌ caniꞌ jun nimlaj mebaꞌil nuyaꞌ chake como arjaꞌ rkꞌalasan chic chikawach nak rbanic ja Cristo.

³ Ruqꞌuin ja Cristo nkawil wiꞌ ja naꞌoj xin Dios pro ni nojelal, ruqꞌuin arjaꞌ nkawil wiꞌ nojelal ja nrajoꞌ ja Dios chake chi nkotakij jariꞌ caniꞌ jun nimlaj mebaꞌil nkawil. Pro solo ruqꞌuin ja Cristo nkawil wiꞌ.

⁴ Queriꞌ nbij chewe utzcꞌa chi maquixban engañar cumal juleꞌ winak ja ncajoꞌ nixqueban puersa chi nenimaj ja tijonem ja nqueyaꞌ ejeꞌeꞌ.

⁵ Como anin masqui ma incꞌo ta ewqꞌuin camic pro ja respíritu wxin jariꞌ cꞌol ewqꞌuin in congana ninquicot chewij. Ninquicot chewij como wotak chi mta división ebanon in wotak chakajaꞌ chi cow ixpaꞌli tre ja yukulbal ecꞌuꞌx ruqꞌuin ja Cristo.

⁶ Rmalcꞌariꞌ nbij chewe, caniꞌ xeban ja kas nabey xa jun xeban ruqꞌuin ja kajaw Jesucristo ni ta quirwariꞌ neban, ni ta jun wiꞌ neban ruqꞌuin chijutij xa nak ta neban chipan ja recꞌaslemal.

⁷ Quixtiqueꞌe chi utz ruqꞌuin caniꞌ rbanic jun cheꞌ ja nat benak rcꞌamal pa tokꞌulew in caniꞌ rbanic jun jay ja bien tzꞌubul parwiꞌ ja rsimientoꞌil. Ticowiri chi utz ja recꞌuꞌx ruqꞌuin ja tijonem xin Jesucristo ja caniꞌ cꞌutun chic chewach in ni ta nemaltioxij wiꞌ tre ja Dios nojelal.

* * * * * * * * * *

⁸ Maxta cꞌo jun achi xquixruchꞌec ta tre juleꞌ tijonem ja junwiꞌ chi na como cꞌoli ja tijonem ja utzlaj tijonem neꞌxi, pro ni majun rsamaj, xa engaño rcꞌamonto, juleꞌ tijonem ja xa winakarsan cumal achiꞌiꞌ, xa juleꞌ costumbre ja nocꞌo rukꞌij in ma ruqꞌuin ta Cristo penak wiꞌ.

⁹ Maxta quixban engañar como xa ruqꞌuin Cristo nkatzꞌat wiꞌ nak ja kas mero rbanic ja Dios como arjaꞌ ocnak kach winak in nojel ja cꞌo pa ranma ja Dios ni majun ja maquita cꞌo pa ranma ja Cristo chakajaꞌ.

¹⁰ Ja cꞌa rixix como xa jun ebanon chic ruqꞌuin ja Cristo chewiꞌ tok ewilon chic nojel xa nak ta ncꞌatzin tre ja recꞌaslemal como arjaꞌ ni majun kꞌetbaltzij ja maquita cꞌo pa rukꞌaꞌ.

¹¹ In jun chic como xa jun ebanon chic ruqꞌuin chewiꞌ tok xixba̱n circuncidar pro jun circuncisión ja ma winak ta ebanyon, jun circuncisión xin Cristo, jariꞌ tok lasaxel chewe nojelal ja ritzelal ja rewcꞌan.

¹² Queriꞌ cꞌa rbanic como xixban bautizar in tok xixban bautizar jariꞌ caniꞌ ixix jun xixmuk ruqꞌuin ja Cristo, caniꞌ ixix jun xixcꞌastaj ruqꞌuin chakajaꞌ. Queriꞌ xeban como cꞌoli ja yukulbal ecꞌuꞌx ruqꞌuin ja nimlaj poder ja xucoj ja Dios ja tok xucꞌas ja Cristo chiquicojol camnakiꞌ.

¹³ Ja cꞌa rixix ixcamnak nabey chipan ja rewil emac, ma ixbanon ta circuncidar triꞌ pro cꞌa ewcꞌan na ja ritzelal, pro ja Dios arjaꞌ xuyaꞌ jun cꞌacꞌa cꞌaslemal chewe tokoriꞌ tok xucꞌas ja Cristo chiquicojol camnakiꞌ in xucuy ja rewil emac ewanojelal.

¹⁴ Quewaꞌ xuban ja Dios riꞌ, arjaꞌ xokrutoꞌ pa rukꞌaꞌ ja juleꞌ costumbre ja tzꞌibtal can chipan ja ley xin Dios ja tzꞌibtal can rmal ja Moisés como ja nuban ja ley xa nnataj chake chi ok ajꞌil ok ajmaquiꞌ, xa nokruban condenar pro ja Dios xchomarsaj nojelal utzcꞌa chi mchita rukꞌaꞌ ja costumbre chake pro xa rumac ja rcamic ja Cristo chwach cruz chewiꞌ tok xuban queriꞌ chake.

¹⁵ Arjaꞌ xkajsaj quichokꞌakꞌ ja cꞌo kꞌetbaltzij pa quekꞌaꞌ, bien xkꞌalasaj chiquewach winak chi arjaꞌ chꞌocmaji tokoriꞌ tok camsaxi ja Cristo chwach cruz.

¹⁶ Rmalcꞌariꞌ nbij chewe maxta teyaꞌ caso chique ja winak ja tok nquechꞌaꞌ chewe nak ja netij jeꞌe owi nquechꞌaꞌ chewe chi matecꞌul juleꞌ nmakꞌij ja ncꞌuli chi junaꞌ owi chi icꞌ owi chi semana.

¹⁷ Jawaꞌ xa juleꞌ costumbre quiniman, xa caniꞌ rnatuꞌ cꞌopi chic ja rutzil ja tzujunto rmal ja Dios pro ja tok peti ja Cristo arjaꞌ xucꞌamto ja mero utzil ja tzujunto rmal ja Dios.

¹⁸ Ecꞌoli winak quewaꞌ nquibij chewe riꞌ: —Ja wi mateban ixix ja caniꞌ nkaban ajoj jariꞌ matiyataj chewe ja premio xin Cristo, necheꞌe, pro maxta teyaꞌ caso chique. Jawaꞌ winak riꞌ congana nquikꞌalasaj quiꞌ chi xa taknoꞌy quibanon in nexuqueꞌ chiquewach ángel. In jun chic ja nqueban, xa nqueyaꞌ kaj quekꞌij queyon rmal ja kꞌalasan jeꞌe chiquewach pro ma Dios ta ja kꞌalasyon chiquewach. Congana e nimak nquenaꞌ kaj pro ni majun quibase tok queriꞌ nqueban. Como xa yojtajnak ja quinaꞌoj rmal il mac chewiꞌ tok kas e nimak nquenaꞌ kaj.

¹⁹ Queriꞌ nqueban como ma bien ta jun quibanon ruqꞌuin ja Cristo. Ja Cristo arjaꞌ wiꞌaj kaxin kanojelal ja rok cuerpo rxin in rmal arjaꞌ tok nokqꞌuiyi. Caniꞌ rbanic jun cuerpo xa jun rbanon, rximon riꞌ chibil tak riꞌ in nnimaj ja nbix tre rmal ja wiꞌaj chi nuban utzcꞌa chi nqꞌuiyi. In queriꞌ cꞌa chake ajoj chakajaꞌ, ja tok nkanimaj ja nbix chake rmal ja Cristo chi nkaban jariꞌ nokqꞌuiy rmal pro jun qꞌuiyem ja utz ntzꞌa̱t rmal ja Dios.

²⁰ Ja cꞌa wi katzij chi ixix jun xixcam ruqꞌuin ja Cristo, wi katzij chi ma ixcꞌo chi ta pa rukꞌaꞌ juleꞌ costumbre ja xa nocꞌo rukꞌij ¿nak cꞌa tre tok cꞌa cꞌo na jeꞌe neban caniꞌ cꞌa yukul na ecꞌuꞌx ruqꞌuin ja rwachꞌulew? ¿Nak tre tok nenimaj ja juleꞌ costumbre ja nbix chewe cumal winak? como quewaꞌ nquibij chewe riꞌ:

²¹ —Ma tecꞌam ta ja laleꞌ, in ma tetij ta ja laleꞌ in nixtacꞌa jutzꞌit ta nechap ja laleꞌ, xajan, necheꞌe.

²² Pro ma queꞌenimaj ta como jawaꞌ nakun riꞌ xa nqꞌuisi ja tok natij, mta nuban chawe. Jawaꞌ winak riꞌ xa quinaꞌoj ejeꞌeꞌ ja nquecoj, xa tijonem quixin winak ja nqueyaꞌ.

²³ Cꞌo jeꞌe nquiwinakarsaj nojoj queyon ja nquecoj como quireligión, congana nquikꞌalasaj quiꞌ chi xa taknoꞌy quibanon in cꞌo jeꞌe nqueban kaj pokon tre ja quicuerpo queyon. Jawaꞌ tijonem riꞌ utzlaj tijonem necheꞌe winak, pro ni maticowin wiꞌ xcatrutoꞌ ta chi xcatrukꞌil ta chi rbanic ja ritzelal.