Colosenses 1 - Tz'utujil (Ja Cꞌacꞌa Chominem)

¹ Anin ja rin Pablo, Dios inrcojon chi inocnak apóstol rxin ja Jesucristo. Anin wachbil ja kachꞌalal Timoteo nkatzꞌibaj jawaꞌ carta riꞌ

² in ntakel ewqꞌuin wachꞌalal ja rix aj Colosas. Ixix ix tinamit xin Dios, cꞌoli ja yukulbal ecꞌuꞌx ruqꞌuin ja Cristo Jesús, xa jun ebanon ruqꞌuin. Ja rutzil ja nsipaj ja Dios chake rachbil ja quicotemal xin Dios ja tariꞌ xtecochij más tre ja katataꞌ Dios in tre ja kajaw Jesucristo.

* * * * * * * * * *

³ Ajoj ni nkaban wiꞌ oración pan ecuenta in ni nkamaltioxij wiꞌ tre ja Dios ja Tatixel rxin ja kajaw Jesucristo.

⁴ Nkamaltioxij tre como xurkaj rbixic kuqꞌuin chi ja rixix ni yukul wiꞌ ecꞌuꞌx ruqꞌuin ja Cristo Jesús in congana neꞌewajoꞌ canojel ja kachꞌalal ja re tinamit xin Dios.

⁵ Queriꞌ neban como cꞌo jun nimlaj herencia xin Dios ewayben ja cꞌolon chilaꞌ chicaj. Jawaꞌ herencia riꞌ ecꞌwaxan chic nak rbanic, tokoriꞌ xecꞌwaxaj ja tok bix chewe ja utzlaj tzij xin Jesucristo pro juleꞌ tzij ja ni majun tzꞌakoj tzij rcꞌan.

⁶ Jawaꞌ utzlaj tzij riꞌ ekajnak chic rbixic ewqꞌuin in benak nat nakaj chakajaꞌ nojel rwachꞌulew, congana utzil ntajini nwinakarsaj pa tak canma ja winak in e qꞌuiy ja netajini nquinimaj. Queriꞌ rbanon ja utzlaj tzij checojol ixix chakajaꞌ, congana utzil rwinakarsanto checojol, tokoriꞌ xumajto ja tok kas xecꞌwaxaj nabey ja utzlaj tzij tok chꞌobtaj emwal chi utz ja kas mero rubey ja rutzil ja nsipax chake rmal ja Dios.

⁷ Jariꞌ chꞌob chewach rmal ja chakꞌlaj kachꞌalal Epafras. Ja Epafras arjaꞌ kachbil chipan ja samaj como nuban ja samaj xin Cristo pro emwal ixix tok nsamaji, arjaꞌ jun achi ja ni nuban wiꞌ cumplir ja ntzujuj.

⁸ Arjaꞌ xurbin chake chi ja rixix congana neꞌewajoꞌ ja kachꞌalal como ntajini nsamaji ja rEspíritu Santo pa tak ewanma.

⁹ Ja cꞌa tok xurkaj rbixic kuqꞌuin chi queriꞌ ebanon ni kamajto wiꞌ rbanic oración pan ecuenta, quewaꞌ ja roración nkaban riꞌ. Dios ta xtiyoꞌ chewe chi bien newotakij ja rvoluntad, ja ta rEspíritu Santo xtiyoꞌ chewe ja renaꞌoj in xtuchꞌob ta chewach nak ja rubey in nak ja ma rubey ta.

¹⁰ Xtewcꞌaj ta jun utzlaj cꞌaslemal como ni yatal wiꞌ chakij chi queriꞌ nkaban ja tok kaniman chic ja kajaw Jesucristo. Xtewcꞌaj ta jun cꞌaslemal ja congana utz ntzꞌa̱t rmal ja Dios, jun cꞌaslemal ja nwinakarsaj nojel rwach ja rutzil. Kꞌij kꞌij ni ta xtewotakij wiꞌ más janiꞌ rnaꞌoj ja Dios.

¹¹ Dios ta xtiyoꞌ chewe chi congana ewachokꞌakꞌ, xtoc ta chewe ja nimlaj poder ja cꞌo ruqꞌuin pa gloria utzcꞌa chi ni matiqꞌuis wiꞌ ja repaciencia utzcꞌa chi nixcowini necochꞌ xa nak ta newil chipan ja recꞌaslemal pro ruqꞌuin ta quicotemal.

¹² Ni ta nemaltioxij wiꞌ tre ja katataꞌ Dios como arjaꞌ ryaꞌon chake chi ajoj jun cꞌo kakꞌaꞌ tre ja herencia ja nuyaꞌ chake ja rok rtinamit, ryaꞌon chake chi nokqꞌuejeꞌ chipan jun gobierno ja bar nchꞌaꞌan wiꞌ ja gloria xin Dios.

¹³ Arjaꞌ xokrutoꞌ pa rukꞌaꞌ ja kꞌekumal in xokrucoj chic chipan ja gobierno xin Jesucristo ja chakꞌlaj Ralcꞌwal.

¹⁴ Como xa jun chic kabanon ruqꞌuin ja Jesucristo rmalcꞌariꞌ tok okwasanel chic libre, arjaꞌ xutix ja rquiqꞌuel pa kacuenta jariꞌ xokrlasbejel libre. Ok libre chic como cuytajnak chic ja kil kamac.

* * * * * * * * * *

¹⁵ Ruqꞌuin ja Ralcꞌwal Dios nkatzꞌat wiꞌ janiꞌ ja kas mero rbanic ja Dios ja matitzꞌattaji. Mchita jun nak chi ta nim ta rukꞌij chwach ja Ralcꞌwal Dios.

¹⁶ Queriꞌ nbij chewe como nojel ja tzꞌucarsanto jeꞌe mta ariꞌ ja maquita ruqꞌuin arjaꞌ tzꞌucarsanto wiꞌ. Caniꞌ tre ja cꞌo jeꞌe chicaj in chakajaꞌ ja cꞌo jeꞌe chwachꞌulew, caniꞌ tre nojel ja ntzꞌattaji in chakajaꞌ nojel ja matitzꞌattaji, caniꞌ chique ja ángel ja cꞌo kꞌetbaltzij pa quekꞌaꞌ xa nak ta chi angelil, ni majun nak ta ja maquita tzꞌucarsanto rmal ja Ralcꞌwal Dios, tzꞌucarsanto nojelal utzcꞌa chi noc yaꞌbal rukꞌij arjaꞌ.

¹⁷ Ni cꞌo chi wiꞌ ja Ralcꞌwal Dios ja tok majaꞌn titzꞌucarsaxi ja caj in rwachꞌulew. Arjaꞌ cꞌayon rxin nojelal ja tzꞌucarsanto jeꞌe in xa rmal ja nimlaj poder cꞌo ruqꞌuin chewiꞌ tok matiyojtaji nojelal.

¹⁸ Arjaꞌ nbano mandar kaxin ja rok iglesia caniꞌ nuban jun wiꞌaj nuban mandar ja cuerpo. Ruqꞌuin arjaꞌ winakarto wiꞌ ja cꞌacꞌa cꞌaslemal kucꞌan como arjaꞌ ja kas nabey cꞌastaji chijutij chiquicojol camnakiꞌ. Queriꞌ rbanic utzcꞌa chi nij arjaꞌ wiꞌ nnabeyaji utzcꞌa chi mchita jun nak chi ta nim ta rukꞌij chwach arjaꞌ.

¹⁹ Queriꞌ rbanic como nojelal ja nojnak pa ranma ja katataꞌ Dios jariꞌ nojnak pa ranma ja Ralcꞌwal Dios chakajaꞌ como queriꞌ rvoluntad ja Dios.

²⁰ Ja Dios xutakto ja Ralcꞌwal chi rchomarsaxic nojelal tanto tre ja cꞌo jeꞌe chwachꞌulew in tre chakajaꞌ ja cꞌo jeꞌe chicaj. Peti ja Ralcꞌwalaxel, xutix ja rquiqꞌuel chwach cruz in xokchomtaj ruqꞌuin ja katataꞌ Dios rmal chi nimlaj kanojelal.

²¹ Caniꞌ chewe ixix nabey nat ixcꞌo wiꞌ tre ja Dios, ni majun egana ruqꞌuin ja nbij ja Dios pa tak ewiꞌ pa tak ewanma, xa itzelal ja xeban. Pro ja camic ixtzurnak chic ruqꞌuin ja Dios, quewaꞌ xuban ja Dios chi echomarsaxic riꞌ,

²² xutakto ja Ralcꞌwal chi xoc kach winak in cam pa kacuenta. Queriꞌ xuban utzcꞌa chi congana nuban rbanic ja rewanma utzcꞌa kas rwekon riꞌ ja rewanma ja tok nixekaj chwach, mero cꞌaslemal xin Dios ewcꞌan triꞌ, ni majun falta chewe in ni majun nak ta nixchapbexi.

²³ Xarwariꞌ, rjawaxic chi mateyaꞌ can ja yukulbal ecꞌuꞌx ruqꞌuin ja Jesucristo, rjawaxic chi bien nixtiqueꞌe in cow nixpeꞌi, maxta ma quixquicot chi ta chi raybexic ja tzujun chake rmal ja Dios ja caniꞌ ncꞌu̱t chikawach rmal ja utzlaj tzij xin Jesucristo. Ekajnak chic rbixic ja utzlaj tzij ewqꞌuin in chakajaꞌ elnak rbixic chique canojel ja winak ja recꞌo chwachꞌulew. Anin ja rin Pablo yatajnak chwe chi nintajini nyaꞌ rbixic jawaꞌ utzlaj tzij riꞌ.

* * * * * * * * * *

²⁴ Ja cꞌa camic incꞌo chipan ja rpokonal chi etoꞌic pro ninquicot rmal. Como anin in rachbil ja Cristo chi rtijic ja rpokonal ja majaꞌn tikꞌax trij como cꞌa ntiꞌon na tre ja Cristo nojel ja nba̱n chake ja rok cuerpo rxin ja rok iglesia.

²⁵ Ja Dios arjaꞌ ryaꞌon chwe chi inocnak jun ajsamajel rxin ja riglesia utzcꞌa chi ninbe ewqꞌuin ewanojel ja ma ix aj Israel ta utzcꞌa chi bien nenchꞌoboꞌ chewach ja rtzobal Dios.

²⁶ Como cꞌoli chipan ja rtzobal Dios ja ma kꞌalaj ta chiquewach ja winak chipan ja rojer tak tiempo ja kꞌaxnak can pro ja camic kꞌalasan chic chiquewach ja tinamit xin Dios

²⁷ como ja Dios arjaꞌ rchꞌobon chic chiquewach ja rtinamit chi cꞌo chic ja Cristo pa tak ewanma ja ma ix aj Israel ta in rmalariꞌ ewotak chic chi nixeqꞌuejeꞌ na pa gloria ruqꞌuin ja Dios. Jawaꞌ ja cꞌa xinbij chewe riꞌ xa awatali nabey pro ja Dios rkꞌalasan chic chikawach camic utzcꞌa chi triꞌ nkatzꞌat wiꞌ chi janila nim ja gloria xin Dios ja nsamaji checojol ixix ja ma ix aj Israel ta.

²⁸ Ja cꞌa rajoj xa ni ruyon wiꞌ ja Cristo ja nkayaꞌ rbixic, nekapaxbaj ja kachꞌalal chiquijujunal in nekatijoj chiquijujunal chakajaꞌ como ja Dios arjaꞌ nuyaꞌ kanaꞌoj chi quitijoxic. Queriꞌ nkaban utzcꞌa tok nekaban presentar chwach ja Dios pro bien tzꞌakat ja quicꞌaslemal triꞌ chiquijujunal rmal ja xa jun quibanon ruqꞌuin ja Cristo Jesús.

²⁹ Rmalcꞌariꞌ tok nmajon jun nimlaj lucha, congana ntij nukꞌij pro ja nyoꞌ wachokꞌakꞌ jariꞌ Jesucristo como arjaꞌ congana nsamaji pa ncꞌaslemal chi rbanic jawaꞌ samaj ja nmajon rbanic riꞌ.