Apocalipsis 8 - Tz'utujil (Ja Cꞌacꞌa Chominem)

¹ Ja cꞌa Carnelo arjaꞌ xlasaj ja qꞌuisbal sello. Ja cꞌa tok lastaj rmal ni majun nak chi ta ncꞌaxaxi ja chilaꞌ chicaj, ncꞌaj hora xuban chi queriꞌ.

² Ja cꞌa ranin xenutzꞌat ja wukuꞌ ángel ja repaꞌl chwach ja Dios in cꞌo jujun trompeta jach chique chiquijujunal.

³ In pi chic jun ja ángel, arjaꞌ peꞌeꞌoc chwach ja raltar, rcꞌan jun rcꞌolbal incienso oro ocnak. In qꞌuiy ja rincienso jach tre jariꞌ nuyaꞌ parwiꞌ ja raltar ja oro ocnak ja cꞌo chwach ja Dios, ja cꞌa rincienso nrachbilaj ja roración ja nqueban canojel ja rtinamit Dios.

⁴ Ja cꞌa rsibel ja rincienso xelto pa rukꞌaꞌ ja ángel rachbil ja roración quixin ja rtinamit Dios in joteꞌe, cꞌa chwach ja Dios xekaj wiꞌ.

⁵ Ja cꞌa ángel arjaꞌ xucꞌam ja rcꞌolbal incienso in xucꞌam ja rchakꞌakꞌ ja cꞌo parwiꞌ altar, xnojsaj chipan in xutix chwach ja rwachꞌulew. Ja cꞌa tok tixtaj rmal cꞌo juleꞌ quiakolijay xuban, fuerte rukul in cꞌo kꞌakꞌ nuqꞌuiak riꞌ in xuban jun cubarkan.

* * * * * * * * * *

⁶ Ja cꞌa wukuꞌ ángel ja cꞌo jujun trompeta cucꞌan ejeꞌeꞌ quichomarsaj quiꞌ chi nquixulaj.

⁷ Ja nabey ángel xulaj ja rtrompeta. Ja cꞌa tok xultaj rmal cꞌo juleꞌ sakboch rachbil kꞌakꞌ ryujun riꞌ ruqꞌuin juleꞌ quicꞌ jariꞌ tixi chwach ja rwachꞌulew, ja cheꞌ ja cꞌo chwachꞌulew cꞌati ja tercera parte rmal, ja cꞌa rax tak kꞌayis jariꞌ cꞌati nojelal.

⁸ Jun chic ángel xulaj ja rtrompeta. Ja cꞌa tok xultaj rmal cꞌoli caniꞌ jun nimlaj jayuꞌ rmajon cꞌatem qꞌuiakel pa mar, ja cꞌa mar xoc quicꞌ ja tercera parte rmal.

⁹ In ja chicop ja recꞌo pa mar xecami ja tercera parte in ja juleꞌ lancha ja cꞌo parwiꞌ mar yojtaji ja tercera parte chakajaꞌ.

¹⁰ Jun chic ángel xulaj ja rtrompeta. Ja cꞌa tok xultaj rmal cꞌo jun nimlaj chꞌumil tzakto chicaj, rmajon cꞌatem caniꞌ nuban jun kꞌakꞌ, kaj chipan ja tercera parte rxin ja binel tak yaꞌ in chipan ja tercera parte rxin ja tzꞌuquel tak yaꞌ chakajaꞌ.

¹¹ Ja rubiꞌ ja chꞌumil, Ajenjo neꞌxi, in ja yaꞌ xoc cꞌay ja tercera parte rmal. E qꞌuiy ja winak xecam rmal ja yaꞌ rumac ja xoc cꞌay.

¹² Jun chic ángel xulaj ja rtrompeta. Ja cꞌa tok xultaj rmal cꞌoli xuban ja kꞌij rmal como yojtaji ja tercera parte rmal. In queriꞌ tre icꞌ in chique chꞌumil chakajaꞌ yojtaji ja tercera parte rmal. Ja kꞌij, icꞌ in chꞌumil yojtaji ja quechꞌaꞌ in ma xchꞌaꞌan chi ta ja tercera parte rmal. Ja pa kꞌij in ja chakꞌaꞌ ma xchꞌaꞌan chi ta ja tercera parte rxin ja kꞌij nixtacꞌa ja tercera parte quixin ja chꞌumil in icꞌ.

¹³ Ja cꞌa ranin xintzꞌat, cꞌo jun ángel mero pa ncꞌaj caj nrupup wiꞌ in nurak ruchiꞌ xincꞌwaxaj, quewaꞌ nbij riꞌ: —Congana lawuloꞌ chique ja winak ja recꞌo chwachꞌulew rumac ja juleꞌ chic trompeta ja majaꞌn tixulaxi cumal ja roxiꞌ ángel como oxiꞌ rwach ja rpokonal ja xtiban chique ja ni lawuloꞌ, neꞌe.