Apocalipsis 7 - Tz'utujil (Ja Cꞌacꞌa Chominem)

¹ Ja cꞌa tok tzꞌattaj mwal awaꞌ wariꞌ cꞌacꞌariꞌ xintzꞌat chic ecꞌo quijiꞌ ángel, jun chique triꞌ paꞌl wiꞌ ja bar nelto wiꞌ kꞌij, in jun chic ja bar nkaj wiꞌ, in jun chic triꞌ paꞌl wiꞌ pa norte in jun chic pa sur. In cꞌo quijiꞌ nimak tak ikꞌ rxin ja rwachꞌulew quichapon utzcꞌa chi matijaktajto ja ikꞌ trij ja rwachꞌulew in trij mar in nixtacꞌa trij ta jun cheꞌ.

² In cꞌo chic jun ja ángel xintzꞌat, xelto ja bar nelto wiꞌ kꞌij, arjaꞌ rcꞌan jun sello rxin ja cꞌaslic Dios. In xurak ruchiꞌ chiquij ja re quijiꞌ ángel ja rechapyon ja quijiꞌ ikꞌ ja yatajnak poder pa quekꞌaꞌ chi nqueban camíc chwach ja rwachꞌulew in pa mar chakajaꞌ

³ in quewaꞌ xbij chique riꞌ: —Maxta teban camíc chwach ja rwachꞌulew nixtacꞌa pa mar in nixtacꞌa tre ta jun cheꞌ. Cꞌa tokoriꞌ neban ja tok xticojtaji sello kumal ja nkacojbej quetal ja rajsamajelaꞌ rxin ja Dios chi quipalaj, neꞌ chique.

⁴ In xencꞌwaxaj e jaruꞌ ja coj sello chique, e ciento cuarenticuatro mil, ejeꞌeꞌ riꞌ epenak chiquicojol ja cablajuj tribu xin Israel.

⁵ Ja chiquicojol ja jun tribu Judá ecꞌo cablajuj mil ja coj sello chique, ja chiquicojol ja jun tribu Rubén ecꞌo cablajuj mil, ja chiquicojol ja jun tribu Gad ecꞌo cablajuj mil,

⁶ ja chiquicojol ja jun tribu Aser ecꞌo cablajuj mil, ja chiquicojol ja jun tribu Neftalí ecꞌo cablajuj mil, ja chiquicojol ja jun tribu Manasés ecꞌo cablajuj mil,

⁷ ja chiquicojol ja jun tribu Simeón ecꞌo cablajuj mil, ja chiquicojol ja jun tribu Leví ecꞌo cablajuj mil, ja chiquicojol ja jun tribu Isacar ecꞌo cablajuj mil,

⁸ ja chiquicojol ja jun tribu Zabulón ecꞌo cablajuj mil, ja chiquicojol ja jun tribu José ecꞌo cablajuj mil, in ja chiquicojol ja jun tribu Benjamín ecꞌo cablajuj mil.

* * * * * * * * * *

⁹ Ja cꞌa tok tzꞌattaj mwal awaꞌ wariꞌ ecꞌo juleꞌ winak xenutzꞌat pro congana e qꞌuiy, ni majun winak cowin ta xeralaj ta, nojel nación epenak wiꞌ, nojel tribu epenak wiꞌ, nojel tinamit epenak wiꞌ in nojel tzobal netzijon wiꞌ. Ejeꞌeꞌ epaꞌloc chwach ja trono in chwach ja Carnelo, quicojon juleꞌ tziak sak in cucꞌan rxak tak palma pa quekꞌaꞌ.

¹⁰ Ejeꞌeꞌ congana nquerak quechiꞌ in quewaꞌ nquibij riꞌ: —Ja kaDios ja tzꞌubul chipan ja trono in ja Carnelo cuqꞌuin npi wiꞌ ja totajem xin Dios, necheꞌe.

¹¹ Ja cꞌa ángel canojelal ejeꞌeꞌ epaꞌli, quisutin quiꞌ trij ja lugar ja bar cꞌo wiꞌ ja trono ja bar ecꞌo wiꞌ ja ranciano in bar ecꞌo wiꞌ ja re quijiꞌ. Xexuqueꞌ chwach ja trono in quemaj ryaꞌic rukꞌij ja Dios

¹² in quewaꞌ quibij riꞌ: —Amén. Ja kaDios ni ta xtibix wiꞌ utzlaj tak tzij tre, ni ta xtiyaꞌ wiꞌ rukꞌij, ni ta xtinatax wiꞌ chi janila nim rukꞌij in janila nim ja rnaꞌoj, ni ta xtimaltioxix wiꞌ tre, ni ta xtiban wiꞌ respetar, ni ta xtinatax wiꞌ ja nimlaj poder ja cꞌo pa rukꞌaꞌ in janila nim ja rchokꞌakꞌ. Ni ta quirwariꞌ xtiban tre camic, chwak in chijutij. Amén. Queriꞌ ja quibij.

¹³ Ja cꞌa ranciano cꞌo jun chique quewaꞌ xbij chwe riꞌ: —Ja winak leꞌ ja quicojon ja tziak sak ¿nak quibanic in bar epenak wiꞌ? neꞌ chwe.

¹⁴ —Señor, jariꞌ atat atotakyon, xincheꞌ tre. In xbij chic chwe: —Ejeꞌeꞌ laꞌ ja rekꞌaxnakto chipan ja nimlaj rpokonal. Ja quitziak sak como quichꞌajon chipan ja rquiqꞌuel ja Carnelo.

¹⁵ Rmalcꞌariꞌ ja tok ecꞌoloc chwach ja trono rxin ja Dios in chi pa kꞌij chi chakꞌaꞌ nesamaj pa rcuenta chipan ja rtemplo. Ja tzꞌubul chipan ja trono nij arjaꞌ ja nqꞌuejeꞌ cuqꞌuin chi quichajixic.

¹⁶ Mchita waꞌal mchita chakichiꞌ xtiquetij, mchita rwakꞌij xtiquetij chi ta pokon pa rukꞌaꞌ nixtacꞌa cꞌatan chi ta xtiquenaꞌ.

¹⁷ Queriꞌ xtiqueban como ja Carnelo ja cꞌo mero pa nicꞌaj ja bar cꞌo wiꞌ ja trono arjaꞌ xtiyukꞌun quixin. Arjaꞌ xquerucꞌaj ja bar cꞌo wiꞌ tzꞌuquel tak yaꞌ pro jariꞌ yaꞌ rcꞌamonto ja utzlaj cꞌaslemal. Ja cꞌa Dios arjaꞌ xtisuꞌuwi ja riyaꞌl quewach pro ni nojelal in ni mchita wiꞌ okꞌej xtiqueban. Queriꞌ xbij chwe ja ranciano.