Apocalipsis 4 - Tz'utujil (Ja Cꞌacꞌa Chominem)

¹ Ja tok tzꞌattaj mwal nojel awaꞌ wariꞌ chaka jalal tok cꞌoli xintzꞌat ja cꞌut chic chinwach, cꞌo jun puerta jakali chilaꞌ chicaj. In tzijon chic wqꞌuin ja kulaj ja tzijon wqꞌuin nabey ja caniꞌ rukul jun trompeta, quewaꞌ xbij chic chwe riꞌ: —Catjoteꞌto waweꞌ, anin ncꞌut chawach ja majaꞌn tibantaji, neꞌ chwe.

² Chaka maril xinqꞌuejeꞌ pa rukꞌaꞌ ja rEspíritu Santo in ja xintzꞌat cꞌo jun trono chomin chilaꞌ chicaj in cꞌo jun tzꞌubul chipan.

³ Ja tzꞌubul chipan ja trono ja ncaꞌyi ni queriꞌ caniꞌ caꞌiꞌ abaj ja congana nimak rjil, jun rbinaꞌan jaspe in jun chic rbinaꞌan cornalina. In cꞌo jun xconkꞌaꞌ rsutin riꞌ trij ja trono in ja ncaꞌyi ja xconkꞌaꞌ ni queriꞌ caniꞌ ja rabaj ja congana nim rjil rbinaꞌan esmeralda.

⁴ Ja cꞌa trono cꞌo chic veinticuatro trono rsutin riꞌ trij in ecꞌo veinticuatro anciano e jujun etzꞌubul chipan. Ejeꞌeꞌ quicojon sakatak tziak in quicojon jujun corona pa quewiꞌ oro ocnak.

⁵ In ja chipan ja trono congana kꞌakꞌ nuqꞌuiak riꞌ nelto chipan in quiakolijay chakajaꞌ fuerte rukul. Ja chwach ja trono cꞌo wukuꞌ lámpara tzijili, ja wukuꞌ lámpara jariꞌ ja wukuꞌ espíritu rxin ja Dios.

⁶ In cꞌoli caniꞌ jun mar ja cꞌo chwach ja trono pro jun mar ja vidrio ocnak, puro cristal ncaꞌyi. In chakajaꞌ ecꞌo quijiꞌ ja recꞌoloc ruqꞌuin ja trono, ejeꞌeꞌ quisutin quiꞌ trij. Ejeꞌeꞌ nojel necaꞌy wiꞌ como ja paquewach congana qꞌuiy. Ja cꞌa paquewach ma ruyon ta chiquipalaj cꞌo wiꞌ, cꞌoli chi tak quewiꞌ chakajaꞌ.

⁷ Ja nabey arjaꞌ ncaꞌyi caniꞌ ncaꞌy jun cój, ja rucab caniꞌ ncaꞌy jun wacax, ja rox ja rpalaj caniꞌ rpalaj jun achi, ja cꞌa rucaj arjaꞌ ncaꞌyi caniꞌ ncaꞌy jun águila nrupupi.

⁸ In cꞌo wakiꞌ tak quexicꞌ chiquijujunal in ja paquewach chaka bar ta cꞌo wiꞌ, cꞌoli trij ja quexicꞌ in cꞌoli chuxeꞌ chakajaꞌ, in xajutij quimajon bix chi pa kꞌij chi chakꞌaꞌ, quewaꞌ nquibixaj riꞌ: —Santo, santo, santo, queriꞌ rbanic ja kajaw Dios. Arjaꞌ ni majun poder ja maquita cꞌo pa rukꞌaꞌ. Arjaꞌ ni cꞌo wiꞌ ojer in ni cꞌo wiꞌ camic in ni cꞌo wiꞌ chwak, cabij in chijutij, necheꞌe.

⁹ Queriꞌ nqueban chi e quijiꞌ, ni nqueyaꞌ wiꞌ rukꞌij ja Dios ja tzꞌubul chipan ja trono ja ni mta wiꞌ camíc trij in nquimaltioxij tre.

¹⁰ Ja tok nqueban queriꞌ ja cꞌa veinticuatro anciano ejeꞌeꞌ nexuqueꞌ chwach ja Dios ja tzꞌubul chipan ja trono in nqueyaꞌ rukꞌij como arjaꞌ ni mta wiꞌ camíc trij. Nquiwasaj ja quicorona, nqueyaꞌoc chwach ja trono in quewaꞌ nquibixaj riꞌ:

¹¹ —Atat at kajaw, atat at kaDios, ni yatal wiꞌ chawe chi natkaban respetar in nkayaꞌ akꞌij in ni yatal wiꞌ chawe chi nkanataj ja nimlaj poder ja cꞌo pan akꞌaꞌ. Queriꞌ nkabij chawe como atat xatwinakarsani ja caj in rwachꞌulew, ni majun nak ta ja maquita atat xatwinakarsani. Como niquirwariꞌ ja ravoluntad chi xawinakarsaj xa rmalariꞌ tok cꞌoli nojelal camic in xa rmalariꞌ tok winakarsaxi nojelal, xecheꞌe.