Apocalipsis 2 - Tz'utujil (Ja Cꞌacꞌa Chominem)

¹ In xbij chic chwe: —Ja ángel ja nchajin rxin ja riglesia ja cꞌo pa Efeso quewaꞌ ja natzꞌibajel tre riꞌ: —Ja Jesucristo ja recꞌo wukuꞌ chꞌumil pa riquikꞌaꞌ in bien erchajin in nbini chicojol ja wukuꞌ candelero ja oro ocnak, arjaꞌ quewaꞌ nbij tre ja riglesia riꞌ:

² —Anin bien wotak ja rebanon, wotak chi janila jun cꞌayewalaj samaj xin Dios ja remajon rbanic, wotak chi janila ecochꞌon ewach chipan in wotak chi ni majun egana cuqꞌuin ja ritzel tak winak pro ja rebanon xeꞌecꞌambajaj ja winak ja nebini chi e apóstol pro ma e apóstol ta in xewotakij chi xa e tzꞌakol tak tzij.

³ Ecochꞌon ja penak jeꞌe chewij in cꞌol epaciencia chi rcochꞌic in mwal anin congana ixsamajnak pro ni ma capujnak ta wiꞌ ecꞌuꞌx.

⁴ Pro cꞌo jun ja nchꞌaꞌ chewe camic riꞌ, ixix eyaꞌon can ja rajoben riꞌil xin Dios ja cꞌo chewe nabey.

⁵ Kas cꞌa bien turkaj chewe ja bar ixtzaknak wiꞌ, teqꞌuexaꞌ ja renaꞌoj in tebanaꞌ ja caniꞌ ebanonto nabey. Nowi mateban, can ninbe ewqꞌuin chanim, ja cꞌa candelero ewxin jariꞌ nwasajel chipan ja rlugar. Queriꞌ nban chewe ja wi mateqꞌuex ja renaꞌoj.

⁶ Pro makanaꞌ cꞌo chic jun ja utz ebanon jariꞌ ja xa itzel netzꞌat ja nqueban ja winak ja nicolaítas necheꞌxi, in anin chakajaꞌ itzel ntzꞌat ja nqueban.

⁷ Ja cꞌo quixquin tiquicꞌaxaj cꞌa ja ntajini nbij ja rEspíritu Santo chique ja riglesia. Xa nak ta ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta, anin nyaꞌ na chique chi nquetij rwach ja cheꞌ ja rcꞌamonto ja utzlaj cꞌaslemal ja mta qꞌuisic trij. Jariꞌ cheꞌ ja cꞌo pa nicꞌaj tre ja lugar paraíso ja bar cꞌo wiꞌ ja Dios. Queriꞌ ja natzꞌibajel tre ja ángel rxin ja riglesia ja cꞌo pa Efeso, neꞌ chwe.

* * * * * * * * * *

⁸ In xbij chic chwe: —Ja ángel ja nchajin rxin ja riglesia ja cꞌo pan Esmirna quewaꞌ ja natzꞌibajel tre riꞌ: —Ja Jesucristo ja ni cꞌo chi wiꞌ ja tok tzꞌucarto ja rwachꞌulew in ni cꞌo wiꞌ ja tok xteqꞌuisi ja rwachꞌulew chakajaꞌ, ja cami pro cꞌastaji, arjaꞌ quewaꞌ nbij tre ja riglesia riꞌ:

⁹ —Anin bien wotak ja rebanon, wotak chi congana rpokonal etijon, wotak chi congana ix tak mebaꞌiꞌ pro ix biyomaꞌ chwach ja Dios rmal ja yukulbal ecꞌuꞌx ruqꞌuin. In wotak chakajaꞌ chi congana itzel tak tzij nbix chewe cumal ja winak ja nebini chi e aj Israel pro ma cucꞌan ta jun anma ja caniꞌ yatal chique ja raj Israel chi ncucꞌaj. Pro ejeꞌeꞌ xa jun molbal riꞌil rxin ja Satanás eꞌocnak wiꞌ.

¹⁰ Ma texbej ta ewiꞌ chwach ja rpokonal ja nixkꞌax na chipan. Bien tecꞌwaxaj ja xtinbij chewe riꞌ, ecꞌoli chewe ja diablo arjaꞌ nerucoj na pa cheꞌ jariꞌ nixrtakchibej chi neyaꞌ can ja yukulbal ecꞌuꞌx ruqꞌuin ja Dios in lajuj kꞌij nixqꞌuejeꞌ na chipan ja rpokonal. Ni ta yukul wiꞌ ecꞌuꞌx ruqꞌuin ja Dios chijutij, ni ta quirwariꞌ ebanon ja tok xquixcami. Ja wi queriꞌ neban cꞌo jun corona ja nyataj chewe jariꞌ ja utzlaj cꞌaslemal ja mta qꞌuisic trij.

¹¹ Ja cꞌo quixquin tiquicꞌaxaj cꞌa ja ntajini nbij ja rEspíritu Santo chique ja riglesia. Xa nak ta ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta ejeꞌeꞌ mta rukꞌaꞌ ja rcab camíc chique xtuban ta pokon chique. Queriꞌ ja natzꞌibajel tre ja ángel rxin ja riglesia ja cꞌo pan Esmirna, neꞌ chwe.

* * * * * * * * * *

¹² In xbij chic chwe: —Ja ángel ja nchajin rxin ja riglesia ja cꞌo Pérgamo quewaꞌ ja natzꞌibajel tre riꞌ: —Ja Jesucristo ja cꞌo jun espada elnakto pa ruchiꞌ, jun espada ja congana is rutzaꞌm in caꞌiꞌ rwarey, arjaꞌ quewaꞌ nbij tre ja riglesia riꞌ:

¹³ —Anin bien wotak ja rebanon in masqui triꞌ ixcꞌo wiꞌ ja bar cꞌo wiꞌ ja trono rxin ja Satanás pro ni ma ineyaꞌon can ta wiꞌ in tok bix chewe chi neyaꞌ can ja yukulbal ecꞌuꞌx wqꞌuin ni ma xeyaꞌ can ta wiꞌ. In nixtacꞌa xeyaꞌ can ta ja yukulbal ecꞌuꞌx wqꞌuin chakajaꞌ ja tok camsaxi ja rAntipas, arjaꞌ jun testigo wxin in ni ma xuyaꞌ can ta wiꞌ ja yukulbal rucꞌuꞌx wqꞌuin in camsax checojol triꞌ chipan ja lugar ja bar cꞌo wiꞌ ja Satanás.

¹⁴ Pro cꞌo jun ja nchꞌaꞌ chewe camic riꞌ. Ecꞌo jujun ja recꞌo checojol netajini nquinimaj ja tijonem rxin ja Balaam. Como ja Balaam ojer arjaꞌ xuchꞌob chwach ja Balac nak nuban chi nerkajsaj ja tinamit Israel chipan ja ritzelal. Queriꞌ xuban in rmalariꞌ tok cꞌoli quetij ja tinamit Israel ja tzujun chiquewach cachbal tak winak owi chwach rachbal tak nakun in xeꞌoc cuqꞌuin juleꞌ ixokiꞌ ja ma quixjayilal ta.

¹⁵ In chakajaꞌ ecꞌo chic jujun checojol ja netajini nquinimaj ja tijonem quixin ja nicolaítas in jariꞌ tijonem congana itzel ntzꞌat anin.

¹⁶ Teqꞌuexaꞌ cꞌa ja renaꞌoj nowi mateqꞌuex, can ninbe ewqꞌuin chanim ninechꞌojin cuqꞌuin ja nebano queriꞌ in ja respada ja elnakto pa nuchiꞌ jariꞌ ncoj chiquij.

¹⁷ Ja cꞌo quixquin tiquicꞌaxaj cꞌa ja ntajini nbij ja rEspíritu Santo chique ja riglesia. Xa nak ta ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta, anin nyaꞌ na chique chi nquetij ja maná ja rawatali in nyaꞌ na jujun abaj sak chique chakajaꞌ in jariꞌ abaj cꞌo jun biꞌaj cꞌacꞌa tzꞌibtal chwach ja majun otakyon, xa ruyon ja njach wiꞌ ja rabaj arjaꞌ notakini. Queriꞌ ja natzꞌibajel tre ja ángel rxin ja riglesia ja cꞌo Pérgamo, neꞌ chwe.

* * * * * * * * * *

¹⁸ In xbij chic chwe: —Ja ángel ja nchajin rxin ja riglesia ja cꞌo Tiatira quewaꞌ natzꞌibajel tre riꞌ: —Ja Jesucristo ja Ralcꞌwal Dios ja cꞌo parwach caniꞌ rxak kꞌakꞌ in cꞌo rkan ja congana nraproti caniꞌ chꞌichꞌ ocnak ja tok bien nsuꞌi utzcꞌa chi nraproti, arjaꞌ quewaꞌ nbij tre ja riglesia riꞌ:

¹⁹ —Anin bien wotak ja rebanon, wotak chi cꞌoli ja rajoben riꞌil xin Dios chewe, wotak chi yukul ecꞌuꞌx ruqꞌuin ja Dios, wotak chi eꞌetoꞌon ja cꞌo rjawaxic chique, wotak chi ecochꞌon ja penak jeꞌe chewij in wotak chi más chi na nim ja samaj xin Dios neban camic chwach ja caniꞌ ebanonto nabey.

²⁰ Pro cꞌoli ja nchꞌaꞌ chewe camic riꞌ. Ixix chaka quiꞌ chewe matechꞌaꞌ tre ja rixok Jezabel ja nuban. Arjaꞌ nbij chi cꞌoli nkꞌalasax jeꞌe chwach rmal ja Dios. Pro xa ma utz ta ja nucꞌut chiquewach ja rajsamajelaꞌ wxin, xa neruban engañar, nucꞌut chiquewach chi utz neꞌoc achꞌiꞌiꞌ cuqꞌuin ixokiꞌ ja ma quixjayilal ta in utz chakajaꞌ nquetiꞌ nakun ja tzujun chiquewach cachbal tak winak owi chwach rachbal tak nakun.

²¹ Anin nyaꞌon tiempo tre chi nuqꞌuex ja rnaꞌoj pro arjaꞌ ni matirajoꞌ wiꞌ nuqꞌuex, cꞌa rmajon na rbanic ja il mac cuqꞌuin ja rachiꞌiꞌ.

²² Bien tecꞌwaxaj ja xtinban tre, xtinkajsaj chipan jun yobil in ja nebanowi ja il mac ruqꞌuin ja wi matiqueyaꞌ can ja ritzelal ja caniꞌ nucꞌut chiquewach jariꞌ nenuyaꞌ chipan jun nimlaj rpokonal chakajaꞌ.

²³ Ja cꞌa xtinban chique ja ral jariꞌ nencamsaj in ja riglesia nojelal bien xtichꞌobtaj cumal chi anin nincowini ntzꞌat xa nak ta ja cꞌo pa tak quewiꞌ pa tak canma ja winak, ni majun awatal ta chinwach in anin nyaꞌ na rtojbalil chewe ja rebanon chejujunal, ja cꞌa rebanon jariꞌ ncꞌutuni janiꞌ ja rtojbalil ja xtinyaꞌ chewe.

²⁴ Pro ja cꞌa chewe ixix ja ma ebanon ta ja caniꞌ quibanon ja juleꞌ chic ja recꞌo Tiatira ja ma eniman ta ja tijonem rxin ja Jezabel in ma etijon ta ewiꞌ tre ja nimak tak tijonem xin Satanás neꞌxi, quewaꞌ nbij chewe camic riꞌ, anin mchita nak chi ta jun ijkaꞌm nyaꞌ chewij.

²⁵ Xarwariꞌ, ja utzlaj tijonem ja cꞌol ewqꞌuin ni tenimaj wiꞌ, ni ta quirwariꞌ ebanon ja tok xquinpi chic jutij.

²⁶ Ja nechꞌocmaji in matiqueyaꞌ quiꞌ tre ja ritzelal chi xqueruchꞌec ta in ni matiqueyaꞌ can wiꞌ ja mandamiento wxin, anin xtinyaꞌ chique chi neꞌoc e kꞌetol tak tzij pa quewiꞌ ja winak ja recꞌo pa tak nación jeꞌe.

²⁷ Congana jun nimlaj poder nqꞌuejeꞌ pa quekꞌaꞌ jariꞌ nquecoj chiquij ja winak chi cow nequechap tre in nequibanbej mandar caniꞌ poder rxin jun chꞌichꞌ nya̱ꞌ pa rukꞌaꞌ jun achi in npaxij juleꞌ bojoꞌy tre in ni nchictaji ja bojoꞌy rmal. Queriꞌ ja poder ja xtiyataj chique ja caniꞌ yataj anin chwe como cꞌoli ja poder ja yatajnak anin chwe rmal ja nataꞌ Dios.

²⁸ In chakajaꞌ xtinyaꞌ chique ja chꞌumil ja xin pa sakaric.

²⁹ Ja cꞌo quixquin tiquicꞌaxaj cꞌa ja ntajini nbij ja rEspíritu Santo chique ja riglesia. Queriꞌ ja natzꞌibajel tre ja ángel rxin ja iglesia ja cꞌo Tiatira, neꞌ chwe.