Apocalipsis 16 - Tz'utujil (Ja Cꞌacꞌa Chominem)

¹ In cꞌo jun kulaj xincꞌwaxaj congana nim, penak chipan ja santilaj lugar in quewaꞌ xbij chique ja wukuꞌ ángel riꞌ: —Jix, tecꞌamaꞌel ja wukuꞌ vaso ewcꞌan ja nojnak ryewal Dios chipan, jetixaꞌ chwach ja rwachꞌulew.

² Be ja nabey ángel, xertixaꞌ chwach ja rwachꞌulew ja vaso ja cꞌo ryewal Dios chipan. Ja cꞌa winak ja cojon retal ja ritzel chicop chique ja nexuqueꞌ chwach ja rachbal ejeꞌeꞌ winakar juleꞌ itzel tak chꞌaꞌc chiquij, congana ruquiy.

³ In jun chic ángel ja vaso rcꞌan, ja cꞌo chipan jariꞌ xutix chipan ja mar. Ja cꞌa mar xoqui caniꞌ quicꞌ rmal caniꞌ rquiqꞌuel jun camnak in xa nak ta ja recꞌo chipan ja mar xecami pro ni canojelal.

⁴ In jun chic ángel ja vaso rcꞌan, ja cꞌo chipan jariꞌ xutix chipan ja binel tak yaꞌ in chipan ja tzꞌuquel tak yaꞌ chakajaꞌ. Ja cꞌa yaꞌ xoc quicꞌ rmal.

⁵ Ja ángel rxin ja yaꞌ cꞌoli xbij tre ja Dios xincꞌwaxaj quewariꞌ: —wajaw, atat ni majutij ja maquita atcꞌoli, atcꞌoli camic in nij atcꞌo wiꞌ ojer chakajaꞌ. Atat ni rubey wiꞌ ja cꞌa xaban riꞌ.

⁶ Queriꞌ nbij chawe como ja winak ejeꞌeꞌ quetix quiquiqꞌuel ja profeta awxin, xequicamsaj in queriꞌ queban chique juleꞌ chic tinamit awxin chakajaꞌ. Pro ja cꞌa camic xayaꞌ rjil rcꞌaxel chique, ja yaꞌ xacoj quicꞌ chiquewach in jariꞌ nquetij camic in jariꞌ ni yatal wiꞌ chiquij chi queriꞌ ban chique, neꞌe ja ángel.

⁷ In cꞌo chic jun kulaj xincꞌwaxaj, ni triꞌ nelto wiꞌ ja bar cꞌo wiꞌ ja raltar, quewaꞌ nbij riꞌ: —Queriꞌ wajaw Dios, atat at jun Dios ja ni majun poder ja maquita cꞌo pan akꞌaꞌ, nojel ja rpokonal natakto niquirwariꞌ ja caniꞌ abinto in ni rubey wiꞌ chakajaꞌ, neꞌe.

⁸ In jun chic ángel ja vaso rcꞌan, ja cꞌo chipan jariꞌ xutix trij ja kꞌij. Ja cꞌa kꞌij yataj tre chi janila pi más rchokꞌakꞌ, lawuloꞌ xuban chique ja winak tre ja cꞌatan.

⁹ Ja cꞌatan congana lawuloꞌ, xecꞌati ja winak rmal. Ja cꞌa winak ejeꞌeꞌ quemaj rbixic juleꞌ tzij ja xa ofensa rcꞌamonto tre rubiꞌ ja Dios pro jariꞌ Dios pa rukꞌaꞌ cꞌo wiꞌ nojel awaꞌ ja rpokonal riꞌ. Pro ejeꞌeꞌ ma xqueqꞌuex ta ja quinaꞌoj, ma xqueyaꞌ ta rukꞌij ja Dios.

¹⁰ In jun chic ángel ja vaso rcꞌan, ja cꞌo chipan jariꞌ xutix trij ja trono rxin ja ritzel chicop. Xoc pa kꞌekuꞌm nojel ja gobierno jeꞌe ja cꞌo pa rukꞌaꞌ ja ritzel chicop. Ja cꞌa winak ejeꞌeꞌ quicachꞌachꞌej cakꞌ rmal ja congana lawuloꞌ quibanon.

¹¹ Quemaj rbixic juleꞌ tzij tre ja Dios ja xa ofensa rcꞌamonto tre, queriꞌ queban rumac ja rpokonal ja quimajon rtijic in rumac ja ritzel tak chꞌaꞌc ja cꞌo chiquij. Pro ni ma xqueyaꞌ can ta wiꞌ ja ritzelal ja quimajon rbanic.

¹² In jun chic ángel ja vaso rcꞌan, ja cꞌo chipan jariꞌ xutix chipan ja nimlaj binelyaꞌ rbinaꞌan Eufrates. Ja cꞌa yaꞌ chupi, chakij rmal. Queriꞌ xuban ja yaꞌ utzcꞌa chi ja rey ja repenak pa tak lugar ja cꞌo pan oriente njaktaj jun bey chiquewach chi nepeti nurquibanaꞌ jun nimlaj chꞌaꞌoj.

¹³ Ecꞌo cꞌa oxiꞌ itzel tak espíritu xenutzꞌat e caniꞌ xpek. Ja neꞌelto wiꞌ ja ritzel tak espíritu, pa ruchiꞌ ja dragón, pa ruchiꞌ ja ritzel chicop in pa ruchiꞌ ja profeta neꞌxi, pro ma katzij ta chi profeta.

¹⁴ E itzel tak espíritu como ejeꞌeꞌ e espíritu quixin demonio. Ejeꞌeꞌ cꞌo juleꞌ milagro nqueban, nebe cuqꞌuin canojel ja rey ja recꞌo chwachꞌulew neꞌequimoloꞌ. Queriꞌ nqueban utzcꞌa chi ja rey nqueban ja nimlaj chꞌaꞌoj ja xtibani ja tok xterilaꞌ ja nimlaj kꞌij rxin ja Dios, jariꞌ Dios ja ni majun poder ja maquita cꞌo pa rukꞌaꞌ.

¹⁵ Ja cꞌa Jesucristo quewaꞌ nbij riꞌ: —Bien tecꞌwaxaj, anin ninbe chic jutij chwachꞌulew, ja cꞌa winak cꞌa jaꞌ xtiquenaꞌ ja tok xquinekaj cuqꞌuin caniꞌ tre jun alakꞌom chaka jalal tok nekaji. Congana quiꞌil chique ja winak ja ni necꞌascꞌot wiꞌ in ni ma quiyaꞌon can ta wiꞌ ja yukulbal quecꞌuꞌx wqꞌuin utzcꞌa tok xquinekaj cuqꞌuin ma qꞌuixbal ta nquenaꞌ chinwach, neꞌe.

¹⁶ In xerumol ja rey chipan jun lugar binaꞌan tre Armagedón, jariꞌ rubiꞌ nbix tre chipan ja tzobal hebreo.

¹⁷ In jun chic ángel ja vaso rcꞌan, ja cꞌo chipan jariꞌ xutix chicaj in cꞌo jun kulaj cꞌaxaxi congana nim, xelto chipan ja templo ja cꞌo chilaꞌ chicaj, triꞌ xelto wiꞌ ja bar cꞌo wiꞌ ja trono xin Dios, quewaꞌ xbij riꞌ: —Camic chomtajnak chic chi npeti ja rpokonal pro ni nojelal, neꞌe.

¹⁸ In congana kꞌakꞌ nuqꞌuiak riꞌ, cꞌo jeꞌe kulaj ncꞌaxaxi, fuerte rukul, cꞌo juleꞌ quiakolijay xuban in xuban jun nimlaj cubarkan pro congana nim. Jaruꞌ pa tiempo ja recꞌoli winak chwachꞌulew ni mta wiꞌ jun cubarkan ja queriꞌ chi ta rbanon.

¹⁹ Ja cꞌa nimlaj tinamit oxiꞌ xuban rmal ja cubarkan in ja juleꞌ chic nimak tak tinamit ja cꞌo pa tak nación jeꞌe jariꞌ be pa tokꞌulew rmal chakajaꞌ. Ja cꞌa Dios arjaꞌ xurkaj tre ja nimlaj tinamit Babilonia, janila xcꞌotsaj ryewal trij. Ja cꞌa xuban, nojel ja rpokonal ja rchomarsanto chi nutakto trij ja tinamit Babilonia puersa xutij na.

²⁰ Ja lugar jeꞌe ja cꞌo pa mar ba la xoc wiꞌ, sachi, in queriꞌ xuban ja jayuꞌ jeꞌe chakajaꞌ, matatzꞌat chic.

²¹ In chakajaꞌ cꞌo nimak tak sakboch pi chicaj, kajpi chiquij ja winak. Ja sakboch congana ralal, ja jujun chirwach cꞌo la jun quintal npajoni. Ja cꞌa winak quemaj rbixic juleꞌ tzij tre ja Dios ja xa ofensa rcꞌamonto tre. Queriꞌ queban rumac ja rpokonal ja quetij pa rukꞌaꞌ ja sakboch como ja rpokonal más chi na lawuloꞌ.