Apocalipsis 14 - Tz'utujil (Ja Cꞌacꞌa Chominem)

¹ In cꞌa cꞌo na más ja xintzꞌat, chaka jalal tok xintzꞌat ja Carnelo, arjaꞌ paꞌl parwiꞌ ja jayuꞌ ja binaꞌan tre Sión e rachbil jun ciento cuarenticuatro mil winak. Ejeꞌeꞌ riꞌ winak cꞌo jun quetal tzꞌibtal chi quipalaj, ja quetal jariꞌ rubiꞌ ja Carnelo in rubiꞌ ja Rtataꞌ chakajaꞌ.

² In cꞌo jun kulaj xincꞌwaxaj penak chilaꞌ chicaj in ja rukul ja ncꞌaxaxi congana nim caniꞌ juleꞌ yaꞌ nrojoji in caniꞌ rukul jun quiakolijay. Ja kulaj xincꞌwaxaj caniꞌ quekul juleꞌ winak ja netajini nqueban arpa,

³ quimajon rbixaxic jun cꞌacꞌa bix. Ja lugar ja bar nebixanoc wiꞌ, chwach ja trono rxin ja Dios in chiquewach ja re quijiꞌ in chiquewach ja ranciano. Majun nak chi ta xecowin ta xeꞌotakin ta ja cꞌacꞌa bix ja quibixaj, xa queyon ja jun ciento cuarenticuatro mil winak xeꞌotakini, ejeꞌeꞌ riꞌ ja xelokꞌi xetotaji chiquicojol ja winak ja recꞌo chwachꞌulew.

⁴ Ejeꞌeꞌ riꞌ ja ma emacunnak ta cuqꞌuin ixokiꞌ como ejeꞌeꞌ chꞌajchꞌoj ja quicꞌaslemal. Ejeꞌeꞌ ja ni netreꞌ wiꞌ trij ja Carnelo xa bar ta triꞌ nbe wiꞌ. Xelokꞌi xetotaji chiquicojol ja winak, eꞌocnak e caniꞌ nabey tak cosecha ja ntzujux tre ja Dios in tre ja Carnelo.

⁵ Ejeꞌeꞌ ni mta wiꞌ jun tzꞌakoj tzij nqueban, ni majun nak ta nechapbexi, epaꞌloc chwach ja trono rxin ja Dios.

* * * * * * * * * *

⁶ Cꞌo chi cꞌa jun ja ángel xintzꞌat mero pa ncꞌaj caj nrupup wiꞌ, arjaꞌ rcꞌamonto ja utzlaj tzij xin Jesucristo ja mta qꞌuisic trij chi nuyaꞌ rbixic chique ja winak ja recꞌo chwachꞌulew, nuyaꞌ rbixic chique xa nak ta nación ecꞌo wiꞌ, xa nak ta tribu ecꞌo wiꞌ, xa nak ta tzobal netzijon wiꞌ in xa nak ta tinamit ecꞌo wiꞌ,

⁷ cow tzijoni in quewaꞌ nbij chique riꞌ: —Texbej ewiꞌ chwach ja Dios in teyaꞌaꞌ rukꞌij como xurwilaꞌ ja hora chi nutakto ja nimlaj juicio. Chwach Dios quixxuqueꞌ wiꞌ como arjaꞌ winakarsyon ja caj in rwachꞌulew, arjaꞌ winakarsyon ja mar in tzꞌuquel tak yaꞌ, neꞌe.

⁸ In pi chic jun ja ángel quewaꞌ nbij riꞌ: —Kaji ja nimlaj tinamit Babilonia, yojtaji. Queriꞌ rbanon ja Babilonia como arjaꞌ caniꞌ jun itzel ixok xa xeruban engañar ja winak ja recꞌo nojel tak nación, puersa xuban chique chi junwiꞌ yukeꞌ wiꞌ quecꞌuꞌx, ma ruqꞌuin ta ja Dios ja katzij chi Dios in ja Dios arjaꞌ pi ryewal chiquij rmal, neꞌe.

⁹ In pi chic jun ja ángel, cow tzijoni in quewaꞌ nbij riꞌ: —Xa nak ta ja nexuqueꞌ chwach ja ritzel chicop in chwach ja rachbal in wi nqueyaꞌ lugar tre chi nco̱j quetal chi quipalaj owi chi quekꞌaꞌ,

¹⁰ ejeꞌeꞌ congana lawuloꞌ nba̱n chique, npi ryewal ja Dios chiquij pro ni ma jutzꞌit ja ryewal ja maquita nucoj chiquij. Congana nquetij na rpokonal pa kꞌakꞌ, cꞌoli caniꞌ kꞌol rmajon cꞌatem neqꞌuejeꞌ chipan pro ni chiquewach ja santilaj ángel in chwach ja Carnelo tok xtiban queriꞌ chique.

¹¹ Congana sib neli chipan ja lugar ja bar nquetij wiꞌ rpokonal. Ja cꞌa sib njoteꞌe njoteꞌe, ni mta wiꞌ qꞌuisic trij. Nixtacꞌa nexulaꞌn ta jutzꞌit, chi pa kꞌij chi chakꞌaꞌ nij ecꞌo wiꞌ chipan ja rpokonal. Queriꞌ cꞌa nba̱n chique ja winak ja nexuqueꞌ chwach ja ritzel chicop in chwach ja rachbal chakajaꞌ in chique canojel xa nak ta ja neyoꞌ lugar tre chi nco̱j chique ja retal rubiꞌ ja ritzel chicop.

¹² Waweꞌ nkatzꞌat wiꞌ chi ja tinamit xin Dios ja ni nquinimaj wiꞌ ja rmandamiento in ni yukul wiꞌ quecꞌuꞌx ruqꞌuin ja Jesucristo ejeꞌeꞌ congana ncꞌatzin chique ja quipaciencia chi nquecochꞌ quewach chipan ja penak chiquij.

¹³ In cꞌo jun kulaj xincꞌwaxaj penak chilaꞌ chicaj quewaꞌ xbij chwe riꞌ: —Tatzꞌibaj ja xtinbij chawe riꞌ, tre ja tiempo ja numajel camic congana quiꞌil chique ja winak ja necami ja tok xa jun quibanon ruqꞌuin ja kajaw Jesucristo tok necami, neꞌ chwe. —Jariꞌ ni katzij wiꞌ, neꞌe ja rEspíritu Santo, —como ejeꞌeꞌ mchita cosic nqueban, nexulaꞌn tre ja quisamaj, ja cꞌa obra ja quibanonto nyataj na chique ja rtojbalil ja bar xqueꞌekaj wiꞌ, neꞌe.

* * * * * * * * * *

¹⁴ In cꞌa cꞌo na más xintzꞌat, chaka jalal tok xintzꞌat juleꞌ sutzꞌ sak in cꞌo jun tzꞌubul parwiꞌ, ja ncaꞌyi caniꞌ ncaꞌyi ja Ralcꞌwalaxel ja xoc alaxic cuqꞌuin ja winak. Arjaꞌ cꞌo jun corona rcojon puro oro ocnak in cꞌo jun woso rcꞌan congana is rutzaꞌm.

¹⁵ Cꞌo chi cꞌa jun ja ángel xelto chipan ja templo, arjaꞌ nurak ruchiꞌ trij ja tzꞌubul parwiꞌ sutzꞌ in xbij tre chi nerumol ja winak ja caniꞌ nba̱n tre cosecha tok nmo̱l ruchiꞌ, quewaꞌ xbij tre riꞌ: —Ja woso awcꞌan tacojoꞌ chi rbanic ja cosecha como xurwilaꞌ ja hora chi nbani ja cosecha como ja tijcoꞌm ja cꞌo chwachꞌulew kꞌen chic, neꞌ tre.

¹⁶ In queriꞌ xuban ja tzꞌubul parwiꞌ sutzꞌ, arjaꞌ xumaj rcojic ja woso chwachꞌulew in ja cosecha rxin ja rwachꞌulew mol ruchiꞌ.

¹⁷ In cꞌo chic jun ja ángel xelto chipan ja templo ja cꞌo chilaꞌ chicaj, arjaꞌ chakajaꞌ rcꞌan jun woso congana is rutzaꞌm.

¹⁸ In cꞌo chic jun ja ángel xelto ja bar cꞌo wiꞌ ja raltar, arjaꞌ cꞌo rukꞌaꞌ tre ja kꞌakꞌ ja cꞌo parwiꞌ altar. Arjaꞌ nurak ruchiꞌ trij ja jun chic ángel ja rcꞌan ja woso ja congana is rutzaꞌm in xbij tre chi nerumol ja winak ja xtikajpi rpokonal chiquij ja nutakto ja Dios, quewaꞌ xbij tre riꞌ: —Ja woso awcꞌan tacojoꞌ chi rbanic cosechar ja uva ja cꞌo chwachꞌulew como ja uva kꞌen chic, neꞌ tre.

¹⁹ In queriꞌ xuban ja ángel, xucoj ja woso chwachꞌulew, xumol ruchiꞌ ja uva. Ja cꞌa uva xuqꞌuiak chipan ja nimlaj lugar ja bar npa̱kꞌ wiꞌ chakan cumal winak chi rlasaxic ja riyaꞌl jariꞌ ncꞌambej tzij tre ja ryewal ja Dios ja xtikaj chiquij ja winak.

²⁰ Ja lugar ja bar pakꞌ wiꞌ ja uva chakan, chinakaj ja tinamit, ma chipan ta. Congana jun nimlaj quicꞌ xelto ja bar pakꞌ wiꞌ ja uva chakan in ja quicꞌ congana jun nimlaj pos xuban, tok nkaj jun quiej chipan cꞌa triꞌ nekaj wiꞌ tre ja bar ocnak wiꞌ freno tre in ja rimeꞌ wiꞌ cꞌo la oxiꞌ ciento kilómetro xucꞌam.