Apocalipsis 13 - Tz'utujil (Ja Cꞌacꞌa Chominem)

¹ Anin xinpeꞌe chiꞌ mar pa snayiꞌ, cꞌo chi na jun itzel chicop xintzꞌat, ntajini nelto pa mar, wukuꞌ rwiꞌ in lajuj rucꞌaꞌ. Ja jujun rucꞌaꞌ jujun corona rcꞌan. Ja jujun rwiꞌ jujun biꞌaj rcꞌan, ja cꞌa biꞌaj xa ofensa rcꞌamonto tre ja Dios.

² Ja ritzel chicop xintzꞌat caniꞌ rbanic jun balam pro ja rkan caniꞌ rkan oso in ja rwarey caniꞌ rwarey cój. Ja cꞌa dragón, ja poder ja cꞌo pa rukꞌaꞌ in ja rtrono jariꞌ xujach tre ja ritzel chicop in congana nim ja kꞌetbaltzij xujach tre chakajaꞌ.

³ Ja cꞌa ritzel chicop, ja wukuꞌ rwiꞌ cꞌo jun tre ja rwiꞌ soctajnak, ja xintzꞌat anin rcꞌamonto camíc tre. Pro jariꞌ soctajic tzuri. Ja cꞌa winak congana cꞌascꞌoꞌi quetzꞌat pro ni canojelal in xetreꞌel trij.

⁴ Xexuqueꞌ chwach ja dragón rumac ja nimlaj poder ja rjachon tre ja ritzel chicop. In xexuqueꞌ chwach ja ritzel chicop chakajaꞌ in quewaꞌ nquibij tre riꞌ: —Ja chicop mta bar ta triꞌ xtikajunsaj chi ta wiꞌ in majun nak ta ncowin ta trij, xecheꞌ tre.

⁵ Ja cꞌa ritzel chicop yaꞌ lugar tre chi nbij juleꞌ nimak tak tzij ja nyabej rukꞌij ruyon in ja tzij nbij congana itzel ncꞌaxaxi in yaꞌ lugar tre chi cuarentidós icꞌ noc pa rukꞌaꞌ ja kꞌetbaltzij.

⁶ Ja tzij ja nbij xa ofensa rcꞌamonto tre ja Dios, xa ruyon ncanoj kaj rubiꞌ pro ja rubiꞌ ja ncanoj xa ruyon Dios yatal tre chi queriꞌ nbix tre, xa ofensa rcꞌamonto tre ja rochoch Dios, xa ofensa rcꞌamonto chique ja recꞌo chilaꞌ chicaj.

⁷ In yaꞌ lugar tre chakajaꞌ chi chꞌojin cuqꞌuin ja tinamit xin Dios, yaꞌ lugar tre chi arjaꞌ cowin chiquij xercamsaj. In yataj tre chakajaꞌ chi neꞌoc pa rukꞌaꞌ canojelal ja winak xa nak ta tribu ecꞌo wiꞌ, xa nak ta tinamit ecꞌo wiꞌ, xa nak ta tzobal netzijon wiꞌ in xa nak ta nación ecꞌo wiꞌ.

⁸ In canojel ja recꞌo chwachꞌulew xexuqueꞌ chwach, queriꞌ queban canojel ja mta quebiꞌ tzꞌibtal chipan ja libro ja bar tzꞌibtal wiꞌ quebiꞌ ja yatajnak chique ja utzlaj cꞌaslemal ja mta qꞌuisic trij. Jariꞌ libro rxin ja Carnelo ja xoc jun sacrificio, ja camsaxi, in tok majaꞌn titzꞌucarsaxi ja rwachꞌulew ni chominto chi wiꞌ triꞌ chi queriꞌ nba̱n tre.

⁹ Ja cꞌo quixquin tiquicꞌaxaj cꞌa ja nbij awaꞌ jun tzij riꞌ.

¹⁰ Ja nechapo quixin ja winak chi nequecoj preso pa quekꞌaꞌ jariꞌ necha̱p chic ejeꞌeꞌ chakajaꞌ, neꞌoc na preso. Ja re cojol tak espada chi quicamsaxic ja winak jariꞌ necamsax chic ejeꞌeꞌ chakajaꞌ tzaꞌn tak espada. Waweꞌ cꞌa nkatzꞌat wiꞌ chi ja tinamit xin Dios rjawaxic chi nquecochꞌ quewach chipan ja rpokonal, rjawaxic chi ni nyukeꞌ wiꞌ quecꞌuꞌx ruqꞌuin ja Jesucristo.

¹¹ Cꞌacꞌariꞌ cꞌo chi na jun itzel chicop xintzꞌat, ntajini nelto pan ulew. Ja cꞌa chicop cꞌo caꞌiꞌ rucꞌaꞌ caniꞌ rucꞌaꞌ jun carnelo in ja ntzijoni caniꞌ ntzijon jun dragón.

¹² Jawaꞌ chicop riꞌ congana nim ja kꞌetbaltzij jach pa rukꞌaꞌ rmal ja jun chic itzel chicop in ni chwach tok nucoj ja rautoridad. Nojel ja kꞌetbaltzij ja cꞌo pa rukꞌaꞌ ja jun chic itzel chicop yaꞌ lugar trewaꞌ ja jun chicop riꞌ chi nucoj. Arjaꞌ puersa nuban chique canojel ja winak ja recꞌo chwachꞌulew chi nexuqueꞌ chwach ja jun chic itzel chicop ja cꞌo jun soctajic xkajbej ja rcꞌamonto camíc tre pro tzuri, ma xcam ta.

¹³ In chakajaꞌ nuban nimak tak milagro, cꞌo nariꞌ nuban, nkajto kꞌakꞌ rmal chicaj pro ni chiquewach winak tok nuban queriꞌ.

¹⁴ In xa neruban engañar ja winak ja recꞌo chwachꞌulew. Ja cꞌa nerbanbej engañar jariꞌ ja milagro nuban jeꞌe ja yatajnak tre chi nuban pro ni chwach ja jun chic itzel chicop tok nuban. In neruban mandar ja winak ja recꞌo chwachꞌulew chi nqueban rachbal ja jun chic itzel chicop ja soctajnak tzaꞌn espada nabey pro cꞌaseꞌe.

¹⁵ In yataj tre chi cowini xuyaꞌ rxulanbal ja rachbal ja jun chic itzel chicop in cowini ja rachbal tzijoni chi nuyaꞌ orden chi necamsaxi ja winak ja maquexuqueꞌ chwach ja rachbal ja jun chic itzel chicop.

¹⁶ In chakajaꞌ neruban mandar canojel ja winak chi nco̱j quetal chi quekꞌaꞌ ja quiquikꞌaꞌ owi chi quipalaj, pro ni canojelal ja winak nba̱n queriꞌ chique wi e nimak tak winak owi mani, wi e biyomaꞌ owi xa e tak mebaꞌiꞌ, wi e libre owi xa ecꞌayin pa quekꞌaꞌ winak.

¹⁷ Queriꞌ ja nbantaji, ja winak wi mta quetal cojon chique rmal ja chicop jariꞌ matiyaꞌ lugar chique chi nqueban lokꞌoninem nixtacꞌa nya̱ꞌ ta lugar chique chakajaꞌ chi nqueban cꞌayinem. Ja retal ja nco̱j chique ja winak jariꞌ ja rubiꞌ ja chicop owi ja número rxin ja rubiꞌ.

¹⁸ Jawaꞌ wariꞌ rjawaxic chi nawasaj anaꞌoj trij. Ja cꞌo rnaꞌoj tilasaj cꞌa rnaꞌoj trij ja número rxin ja chicop como ja rnumeroꞌil jariꞌ número xin winak in quewaꞌ ja número riꞌ, wakiꞌ ciento sesentiséis.