Apocalipsis 12 - Tz'utujil (Ja Cꞌacꞌa Chominem)

¹ Cꞌo cꞌa ja winakari chilaꞌ chicaj ja congana cꞌascꞌoꞌi xintzꞌat, cꞌo jun ixok congana ruchꞌaꞌ caniꞌ kꞌij rwekben riꞌ, ja cꞌa icꞌ ocnak rpalibal in cꞌo jun corona rcojon pa rwiꞌ rcꞌan cablajuj chꞌumil.

² In ja rixok arjaꞌ yawaꞌ chic, congana nurak ruchiꞌ como arjaꞌ majtajnak rmal ja rtiꞌobal jun ti ral ja xajalal majaꞌn tiqꞌuejeꞌe.

³ In cꞌo chi na jun retal ja winakari chilaꞌ chicaj, chaka jalal tok winakar jun nimlaj chicop, jun itzel chicop binaꞌan tre dragón, quiak rij, wukuꞌ rwiꞌ in lajuj rucꞌaꞌ. Ja jujun rwiꞌ jujun corona rcojon tre.

⁴ Ja chꞌumil ja recꞌo chicaj ja tercera parte chique xekajsaxto rmal ja dragón, rujey xucoj chi quikajsaxic, xerkajsajto chwachꞌulew. Ja cꞌa dragón arjaꞌ xpabaꞌ riꞌ chwach ja rixok ja xajalal majaꞌn tiqꞌuejeꞌ jun ti ral, queriꞌ xuban utzcꞌa tok xtiqꞌuejeꞌe ja tacꞌal chanim nutij.

⁵ Ja cꞌa rixok qꞌuejeꞌe ti ral talaꞌ. Ja ral ja rixok arjaꞌ cꞌo jun nimlaj poder qꞌuejeꞌ pa rukꞌaꞌ ja nucoj chiquij canojelal ja winak xa nak ta nación ecꞌo wiꞌ chi cow nerchapbej in nerbanbej mandar. Chaka jalal tok yataj tre ja ral chi joteꞌ chilaꞌ chicaj ja bar tzꞌubul wiꞌ ja Dios chipan ja rtrono.

⁶ Ja cꞌa rixok arjaꞌ xanmaji, be chipan ja lugar ja bar kas talan wiꞌ in chipan ariꞌ lugar cꞌo jun rlugar ja rixok chomin rmal ja Dios in triꞌ nba̱n wiꞌ cuenta tre jun mil doscientos sesenta kꞌij.

⁷ Cꞌo cꞌa jun nimlaj chꞌaꞌoj ja bantaji chilaꞌ chicaj. Ja Miguel e rachbil ja rach tak ángel nechꞌojin ruqꞌuin ja dragón. Ja cꞌa dragón e rachbil ja ritzel tak ángel ja recꞌo ruqꞌuin ejeꞌeꞌ xechꞌojini

⁸ pro xechꞌaqui in ma xyataj chi ta lugar chique chi xeqꞌuejeꞌ chi ta chilaꞌ chicaj.

⁹ Ja cꞌa nimlaj dragón arjaꞌ chꞌakixto. Jariꞌ dragón arjaꞌ ja rojer cumatz ja nbix tre chi Diablo in cꞌo jun chic rubiꞌ nbix tre, Satanás neꞌxi, arjaꞌ ja nbano engañar quixin canojel ja winak ja recꞌo chwachꞌulew. Chꞌakixto chwach ja rwachꞌulew e rachbil ja ritzel tak ángel rxin.

¹⁰ In cꞌo jun kulaj xincꞌwaxaj chilaꞌ chicaj fuerte rukul, quewaꞌ nbij riꞌ: —Camic xurwilaꞌ ja kꞌij chi ja totajem xin Dios nyataj chique winak in ntzꞌattaji ja nimlaj poder ja cꞌo pa rukꞌaꞌ, xurwilaꞌ ja kꞌij chi noqui ja gobierno rxin in nujach nojel pa rukꞌaꞌ ja Cristo ja rchaꞌon. Queriꞌ ja bantaji como chꞌakixto ja Diablo ja nbini ja quil ja kachꞌalal tre ja Dios como arjaꞌ chi pa kꞌij chi chakꞌaꞌ ni rmajonto wiꞌ quitzujuxic chwach ja Dios.

¹¹ Pro ja rejeꞌeꞌ quechꞌec ja Diablo, ja quichꞌecbej rxin jariꞌ ja rquiqꞌuel ja Carnelo in chakajaꞌ ja testigoꞌil queyaꞌ tre ja Jesucristo in ma xquipokonaj ta queyaꞌ quiꞌ pa camíc rmal.

¹² Camic congana quiꞌil ja chilaꞌ chicaj, quixquicot cꞌa ja rixcꞌo chilaꞌ. Pro congana lawuloꞌ chewe ja rixcꞌo chwachꞌulew in ja rixcꞌo parwiꞌ mar como ja camic kajnakto ja Diablo checojol in congana yictajnak ja ryewal como arjaꞌ rotak chi xa ma jaruꞌ tiempo ta nyataj tre chi nqꞌuejeꞌ chwachꞌulew. Queriꞌ xbij ja kulaj.

¹³ Ja cꞌa dragón tok xutzꞌat chi chꞌakixto chwach ja rwachꞌulew arjaꞌ xumaj rsaluxic ja rixok ja qꞌuejeꞌ ti ral talaꞌ chi nuban pokon tre.

¹⁴ Ja cꞌa rixok yataj tre ja caꞌiꞌ ruxicꞌ jun nimlaj águila utzcꞌa chi nrupupi, nanmaj chwach ja cumatz, nbe chipan ja lugar ja bar kas talan wiꞌ chi nekaj chipan ja rlugar ja bar nba̱n wiꞌ cuenta in triꞌ nba̱n wiꞌ cuenta oxiꞌ junaꞌ in nicꞌaj.

¹⁵ Ja cꞌa cumatz xlasajto juleꞌ yaꞌ pa ruchiꞌ caniꞌ binelyaꞌ, queriꞌ xuban utzcꞌa ja yaꞌ nbe, nucꞌamel ja rixok.

¹⁶ Pro ja rwachꞌulew xutoꞌ ja rixok, ja xuban, jaktaj jun jul, ja cꞌa binelyaꞌ kaj chipan, ja xelto pa ruchiꞌ ja dragón.

^17-18 Ja cꞌa dragón congana pi ryewal trij ja rixok, be chi nerbanaꞌ chꞌaꞌoj cuqꞌuin ja juleꞌ chic ral ja rixok, ejeꞌeꞌ riꞌ ja nquinimaj ja mandamiento rxin ja Dios in nqueyaꞌ testigoꞌil tre ja Jesucristo.