Apocalipsis 10 - Tz'utujil (Ja Cꞌacꞌa Chominem)

¹ Cꞌo chi na cꞌa jun ángel xintzꞌat congana rchokꞌakꞌ, arjaꞌ ntajini nkajto chilaꞌ chicaj, cꞌopi chipan juleꞌ sutzꞌ in cꞌo jun xconkꞌaꞌ parwiꞌ. Ja ncaꞌyi ja rpalaj caniꞌ ncaꞌy kꞌij in ja rkan caniꞌ kꞌakꞌ ocnak.

² In cꞌo jun ti libro jakali rcꞌan pa rukꞌaꞌ. Ja cꞌa rkan ja riquikꞌaꞌ jariꞌ xuyaꞌ parwiꞌ mar, ja cꞌa rxcon jariꞌ xuyaꞌ parwiꞌ ja rwachꞌulew.

³ Xurak ruchiꞌ pro congana fuerte ja rukul caniꞌ rukul jun cój tok nurak ruchiꞌ. Ja cꞌa tok xurak ruchiꞌ ja ángel cꞌacꞌariꞌ tzijoni ja wukuꞌ quiakolijay.

⁴ Ja cꞌa tok tzuri tzij rmal ja wukuꞌ quiakolijay anin laj xintzꞌibaj ja xbij pro cꞌo jun kulaj xincꞌwaxaj penak chilaꞌ chicaj quewaꞌ xbij chwe riꞌ: —Tacꞌoloꞌ pan awiꞌ pan awanma ja xbij ja wukuꞌ quiakolijay, ma takꞌalasaj ta in ma tatzꞌibaj ta, neꞌ chwe.

⁵ Ja cꞌa ángel ja xintzꞌat ja ryaꞌon jun rkan parwiꞌ mar in jun ryaꞌon parwiꞌ rwachꞌulew arjaꞌ xuyic nojoj rukꞌaꞌ chicaj

⁶ in xuban jun juramento pa rubiꞌ ja Dios. Jariꞌ Dios ja ni mta wiꞌ camíc trij, arjaꞌ winakarsyon ja caj in nojel ja rcꞌan in arjaꞌ winakarsyon ja rwachꞌulew in nojel ja rcꞌan in arjaꞌ winakarsyon ja mar in nojel ja cꞌo chipan chakajaꞌ. Quewaꞌ ja juramento ja xuban ja ángel riꞌ: —Ja Dios arjaꞌ matuyaꞌ chic tiempo tre ja nimlaj juicio

⁷ pro nutakto chanim. Ja cꞌa tok xterilaꞌ ja kꞌij tok ncꞌaxaxi rukul ja trompeta ja xtixulax rmal ja qꞌuisbal ángel tokocꞌariꞌ xtikꞌalajini nojelal ja rchominto ja Dios ja rawatali nabey, xtibantaj cumplir nojelal ja caniꞌ xbij can chique ja profeta ja rajsamajelaꞌ rxin. Queriꞌ xbij ja ángel.

⁸ Ja cꞌa kulaj ja xincꞌwaxaj ja penak chilaꞌ chicaj arjaꞌ tzijon chic jutij wqꞌuin in quewaꞌ xbij chic chwe riꞌ: —Camic jat, jacꞌamaꞌ ja libro ja cꞌo pa rukꞌaꞌ ja ángel ja cꞌo jun rkan ryaꞌon parwiꞌ mar in jun ryaꞌon parwiꞌ ja rwachꞌulew, neꞌ chwe.

⁹ In queriꞌ xinban, xinbe ruqꞌuin ja ángel, xinbij tre chi nuyaꞌ chwe ja libro in quewaꞌ xbij chwe riꞌ: —Tacꞌamaꞌ ja libro in tatijaꞌ. Ja cꞌa tok xtitijtaj amwal congana cꞌay xtunaꞌ apan rmal pro ja pan achiꞌ jariꞌ congana quiꞌ nunaꞌ caniꞌ raxcab natij, neꞌ chwe.

¹⁰ Cꞌacꞌariꞌ xincꞌam ja ti libro tre in xintij. Ja cꞌa tok tijtaj mwal ja pa nuchiꞌ congana quiꞌ xunaꞌ caniꞌ raxcab xintij pro ja nupan jariꞌ congana cꞌay xunaꞌ.

¹¹ In xbij chwe chi: —Atat, rjawaxic chi namaj chic jutij rbixic ja majaꞌn tibantaji. Caniꞌ chique ja tinamit jeꞌe qꞌuiy quewach ja nayaꞌ na rbixic chique ja xtiqueban na in caniꞌ chique nación jeꞌe in caniꞌ chique ja netzijon pa tak tzobal jeꞌe in caniꞌ chique rey, neꞌ chwe.