2 Timoteo 4 - Tz'utujil (Ja Cꞌacꞌa Chominem)

^1-2 Congana nban recomendar chawe chi ni nayaꞌ wiꞌ rbixic ja rtzobal Dios nojel tiempo. Tachꞌaꞌaꞌ ja tijonem ja ma katzij ta, tachꞌaꞌaꞌ chique ja nqueban quil in tayukbaꞌ quecꞌuꞌx. Tiqꞌuejeꞌ apaciencia in tachꞌoboꞌ chiquewach nak rjawaxic chi nqueban. Jawaꞌ xinban recomendar chawe riꞌ Dios nutzꞌat in nutzꞌat chakajaꞌ ja kajaw Jesucristo ja xtipi chi na jutij, arjaꞌ nimlaj Rey in nukꞌet tzij chiquij chi ecꞌasli chi e camnakiꞌ.

³ Como nerilaꞌ na jun tiempo ja tok matiqueyaꞌ chic quixquin ja winak tre ja utzlaj tijonem, xa jaꞌ chic nel quecꞌuꞌx chi rcꞌaxaxic ja mta rcꞌamonto tre ja quicꞌaslemal. Rmalariꞌ tok e qꞌuiy ja winak nequicanoj na juleꞌ maestro ja netijon quixin pro juleꞌ maestro ja xa nqueyaꞌ quigana.

⁴ Ejeꞌeꞌ riꞌ xa nqueyaꞌ can ja utzlaj tijonem xin Jesucristo in nqueyaꞌ caso tre juleꞌ tzij ja mta noc wiꞌ.

⁵ Pro atat tabanaꞌ cuenta awiꞌ, tachꞌoboꞌ chi utz ja naban. Tacochꞌoꞌ ja rpokonal ja npi chawij, maxta tatanbaꞌ rbixic ja utzlaj tzij xin Jesucristo, tabanaꞌ nojel ja samaj ja banon recomendar chawe rmal ja Dios.

⁶ Anin xajalal majaꞌn quincamsaxi, xajalal majaꞌn tinyaꞌ can ja rwachꞌulew.

⁷ Congana xintij nukꞌij chi rbixic ja utzlaj tzij xin Jesucristo, xinban nojel ja samaj ja banon recomendar chwe rmal ja Dios, ma xinqꞌuex ta rbixic ja utzlaj tijonem ja kaniman.

⁸ Cꞌo jun rtojbalil ja rcꞌamonto ja utzlaj cꞌaslemal in camic wotak chi nyataj na chwe. Ja kajaw Jesucristo arjaꞌ utzlaj kꞌetol tzij, arjaꞌ xtiyoꞌ chwe ja rtojbalil tokoriꞌ tok xtipi chic jutij. Pro ja rtojbalil ma nuyon ta anin xtiyataj chwe in xtiyataj chique chakajaꞌ canojelal ja nel quecꞌuꞌx chi raybexic ja Jesucristo ja tok xtipi chic jutij.

* * * * * * * * * *

⁹ Tatijlaꞌto akꞌij chi natpi wqꞌuin chanim

¹⁰ como ja Demas arjaꞌ be chipan ja tinamit Tesalónica, xinruyaꞌ can xa rmal ja congana nel rucꞌuꞌx trij ja quicotemal xin rwachꞌulew. Ja Crescente jariꞌ xintak pa tak tinamit ja cꞌo pa rcuenta Galacia in xintak ja Tito chakajaꞌ pa tak tinamit ja cꞌo pa rcuenta Dalmacia.

¹¹ Ja cꞌa camic xa ruyon Lucas ja cꞌo wqꞌuin. Tacꞌamaꞌto ja Marcos, tawachbilajto tok xcatpeti como arjaꞌ utzlaj ajsamajel in ncowini ninrutoꞌ tre ja samaj.

¹² Ja Tíquico chakajaꞌ xintak chipan ja tinamit Efeso.

¹³ Ja tok xcatpeti nacꞌamto ja nchaqueta ja nyaꞌon can pa Troas chi rochoch ja Carpo in nacꞌamto ja juleꞌ libro chakajaꞌ in ja más rjawaxic chwe nacꞌamto chic ja juleꞌ ja tzꞌibtal chwach tzꞌum.

¹⁴ Ja rAlejandro ja chꞌayol chꞌichꞌ arjaꞌ congana itzel xuban chwe, ja kajaw Dios arjaꞌ xtiyoꞌ rjil rcꞌaxel tre

¹⁵ in atat tabanaꞌ cuenta awiꞌ chwach como arjaꞌ congana rcꞌulel ja utzlaj tijonem nkayaꞌ.

¹⁶ Ja tok xinsiqꞌuixi nabey mul chiquewach ja kꞌetol tak tzij ni majun toꞌo wxin, xebe canojelal, xinqueyaꞌ can. Pro matinwajoꞌ chi Dios xtuyaꞌ ta rcꞌaxel chique.

¹⁷ Pro ja kajaw Jesucristo arjaꞌ toꞌo wxin in xuyaꞌ wachokꞌakꞌ in rmalariꞌ xincowini xinqꞌuis nojel ja samaj ja xuban recomendar chwe chi rbixic ja utzlaj tzij ja rcꞌamonto. Queriꞌ xuban chwe utzcꞌa chi canojel ja winak ja ma e aj Israel ta nquicꞌaxaj ja utzlaj tzij. Queriꞌ xinban, ja kajaw Jesucristo arjaꞌ toꞌo wxin chipan ja nimlaj rcꞌayewal.

¹⁸ In bien wotak chi nij arjaꞌ wiꞌ nintoꞌowi pa quekꞌaꞌ xa nak ta xquetzelan wxin. Bien wotak chi nij arjaꞌ wiꞌ nbano cuenta wxin utzcꞌa chi nineqꞌuejeꞌ na chipan ja rgobierno ja xin chilaꞌ chicaj. Kas ta xtiyaꞌ rukꞌij camic, chwak in chijutij. Amén.

* * * * * * * * * *

¹⁹ Tayaꞌaꞌ rutzil quewach ja Prisca in Aquila in tayaꞌaꞌ rutzil quewach chakajaꞌ canojel ja recꞌo pa rochoch ja Onesíforo.

²⁰ Ja Erasto arjaꞌ qꞌuejeꞌ can chipan ja tinamit Corinto. Ja cꞌa Trófimo arjaꞌ yawaꞌ in xinyaꞌ can chipan ja tinamit Mileto.

²¹ Tatijlaꞌto akꞌij chi natpeti chanim ja tok majaꞌn tumaj rtiempo tew. Ja Eubulo, Pudente, Lino in Claudia in canojel ja kachꞌalal waweꞌ ejeꞌeꞌ nquetakel rutzil awach.

²² Kas ta xtiqꞌuejeꞌe pan awanma ja kajaw Jesucristo. Kas ta xtiqꞌuejeꞌe ja rutzil xin Dios awqꞌuin. Amén.