2 Timoteo 3 - Tz'utujil (Ja Cꞌacꞌa Chominem)

¹ In rjawaxic chi nawotakij ja xtintzꞌibaj chic riꞌ tre ja qꞌuisbal rwachꞌulew congana rcꞌayewal rcꞌamonto.

² Treriꞌ tiempo quewaꞌ quibanic ja winak riꞌ, xa ejeꞌeꞌ nquilokꞌokꞌoj kaj quiꞌ queyon, congana nel quecꞌuꞌx trij ja pwok in congana nqueyaꞌ quekꞌij chakajaꞌ, kas e nimak nquenaꞌ kaj. In chakajaꞌ xa itzel netzijoni, maquequinimaj quitataꞌ queteꞌ, matiquimaltioxij ja rutzil nba̱n chique, xa e itzel tak winak chwa Dios.

³ Ejeꞌeꞌ matiquipokonaj quewach ja winak, ni maquecuyun wiꞌ, nqueban jolon tak tzij, xa jaꞌ chic ja ritzelal cꞌayon quixin, e cꞌaꞌniꞌ in nojel ja utz xa itzel necheꞌ tre.

⁴ Ejeꞌeꞌ nequitzujuj can ja camigo chipan ja rcꞌayewal in matiquechꞌob nquemin quiꞌ chipan ja rcꞌayewal chakajaꞌ. Congana e nimak nquenaꞌ in más na ncajoꞌ ja quicotemal xin rwachꞌulew chwach ja ncajoꞌ ja Dios.

⁵ Nepeti pa tak culto pro xa matiquinimaj chi ja Dios nuyaꞌ poder chake ja rok winak chi nkaqꞌuex ja kanaꞌoj. Ejeꞌeꞌ riꞌ winak maxta tacoj awiꞌ cuqꞌuin.

⁶ Como ecꞌoli chiquicojol ja nquicanoj nak nqueban chi nebe jeꞌe cuqꞌuin ixokiꞌ chi cochoch nequibanaꞌ engañar. Ja rixokiꞌ xa matiquechꞌob ja nqueban, congana pokon nquenaꞌ pa tak canma rmal ja quil quemac in chaka nak ta chi tijonemal nel quecꞌuꞌx trij.

⁷ Ejeꞌeꞌ ni nel wiꞌ quecꞌuꞌx trij ja tijonem jeꞌe pro ni maticotakij wiꞌ ja utzlaj tijonem xin Jesucristo.

⁸ Ja rachiꞌiꞌ ja nebe cuqꞌuin ja rixokiꞌ ejeꞌeꞌ ni nquechꞌaꞌ wiꞌ ja utzlaj tijonem ja caniꞌ queban ojer ja Janes in Jambres tok quechꞌaꞌ tre ja Moisés ja xbij chique. Xa yojtajnak quinaꞌoj rmal ja ritzelal, ni kꞌalaj wiꞌ chi mta ja yukulbal quecꞌuꞌx ruqꞌuin ja Jesucristo.

⁹ Pro ma chijutij ta nenimax cumal ja winak, xa neya̱ꞌ can in canojel ja winak xtiqueyaꞌ cuenta chique chi ja tijonem nqueyaꞌ mta noc wiꞌ in mta rcꞌamonto caniꞌ ban chique ja Janes in Jambres ojer.

* * * * * * * * * *

¹⁰ Pro atat bien xawotakijto ja tijonem ja nmajon ryaꞌic in nak rbanic ja ncꞌaslemal chakajaꞌ. Bien awotak chi anin cꞌo ngana nban nojel ja rbanon recomendar chwe ja Dios. Awotak chi yukul nucꞌuꞌx ruqꞌuin ja Jesucristo in cꞌo npaciencia in cꞌoli ja rajoben riꞌil xin Dios pa ncꞌaslemal.

¹¹ Xintzelaxi in xintij ja rpokonal pro nojel ncochꞌon. Nojel ariꞌ bien awotak. In chakajaꞌ awotak nojel ja ban chwe chipan ja roxiꞌ tinamit Antioquía, Iconio in Listra. Triꞌ congana rpokonal xintij pro ja kajaw Jesucristo arjaꞌ toꞌo wxin chipan nojel.

¹² Katzij ja nbij chawe riꞌ, ja wi cꞌo jun nyukeꞌ rucꞌuꞌx ruqꞌuin ja Jesucristo in wi nuban ja rvoluntad ja Dios jariꞌ seguro chi ntzelaxi cumal ja winak.

¹³ Pro ja ritzel tak winak in ja banol tak engaño ejeꞌeꞌ xa janiꞌ neyojtaj más, nequeban engañar ja winak in queriꞌ chique ejeꞌeꞌ chakajaꞌ neba̱n engañar.

¹⁴ Pro atat utzlaj tijonem ja yaꞌ chawe in xanimaj jariꞌ maxta tayaꞌ can. Atat bien awotak nak xetijon awxin

¹⁵ in cꞌa at tinoꞌy na ja tok xawotakijto nojel ja tzꞌibtal can chipan ja santilaj rtzobal Dios. Ja rtzobal Dios nuyaꞌ chawe chi npi más anaꞌoj in nawil ja totajem rmal ja tok nyukeꞌ acꞌuꞌx ruqꞌuin ja Jesucristo.

¹⁶ Nojel ja tzꞌibtal chipan ja rtzobal Dios, ja xetzꞌibani Dios cꞌayon quixin chi rtzꞌibaxic in qꞌuiy rcꞌamonto chake quewariꞌ, noqui chi quitijoxic ja winak tre ja utzlaj tijonem in chi rchꞌaꞌic ja ritzel tak tijonem, noqui chi quichomixic ja winak ja nqueban quil in chi rcꞌutic nojelal ja rutzil.

¹⁷ Queriꞌ rcojic ja rtzobal Dios utzcꞌa ja rajsamajel xin Dios nojel nyataj tre utzcꞌa chi ncowini nuban ja rutzil xa nak ta ja najoꞌx tre chi nuban.