2 Timoteo 2 - Tz'utujil (Ja Cꞌacꞌa Chominem)

¹ In atat ncꞌajol, tacochꞌoꞌ awach chipan ja rutzil xin Dios ja rcꞌamonto ja Jesucristo.

² Ja tijonem ja nyaꞌon chawe e qꞌuiy ja xecꞌaxani. Ja nwajoꞌ chawe tabanaꞌ chic recomendar ja tijonem chique juleꞌ chic achiꞌiꞌ ja cꞌol aconfianza cuqꞌuin, juleꞌ achiꞌiꞌ ja bien necowini nequitijoj chic juleꞌ winak tre.

³ Tacochꞌoꞌ ja rpokonal como atchaꞌon rmal ja Jesucristo chi natoc at caniꞌ jun soldado rxin.

⁴ Ja soldado tok nqꞌuejeꞌ chipan ja rejército mta moda xtucoj ta jun negocio como rjawaxic chi nnimaj ja nbano mandar rxin.

⁵ In tre jun achi ja rcojon riꞌ chipan jun tzꞌanem, ja wi matuban ja caniꞌ nrajoꞌ ja tzꞌanem chi nuban jariꞌ matuchꞌec ja premio, xa nlasaxi.

⁶ In queriꞌ tre jun ajchonlaꞌ chakajaꞌ ni cꞌo wiꞌ rukꞌaꞌ tre ja rtijcoꞌm ja tok nwachini.

⁷ Tachꞌoboꞌ chi utz ja xintzꞌibaj chawe riꞌ, ja cꞌa kajaw Jesucristo xtuyaꞌ na chawe chi nchꞌobtaj amwal nojel.

⁸ Ni turkaj wiꞌ chawe ja Jesucristo arjaꞌ cꞌastaji chiquicojol ja camnakiꞌ, arjaꞌ riy rumam can ja rojer rey David. Jawaꞌ ja utzlaj tzij xin Jesucristo ja nmajon rbixic

⁹ in congana ntijon ja rpokonal rmal. In camic inbacꞌon pa cadena rmal, banon chwe in caniꞌ jun itzel achi. Pro ja rtzobal Dios ni ma tzꞌapal ta wiꞌ.

¹⁰ In cumal ja rechaꞌon rmal ja Dios anin ncochꞌ nojel ja rpokonal utzcꞌa chi ejeꞌeꞌ nquewil ja totajem ja rcꞌamonto ja Cristo Jesús chake ja yukul kacꞌuꞌx ruqꞌuin utzcꞌa chi nyataj na chique ja gloria xin chilaꞌ chicaj pro ni chijutij.

¹¹ Jawaꞌ ja xtintzꞌibaj chawe riꞌ ni katzij wiꞌ: —Ja Jesucristo arjaꞌ cam pa kacuenta. Ja wi xa jun kabanon ruqꞌuin, wi kayaꞌon can chic ja kil kamac jariꞌ nokcꞌaseꞌ na ruqꞌuin.

¹² Ja wi nkacochꞌ ja rpokonal ja xtipi chakij jariꞌ xkoꞌoc rach kꞌetol tak tzij ja Jesucristo. Ja wi nkapokonaj nkabij chi okcꞌo pa rcuenta arjaꞌ nbij na chake chakajaꞌ chi ma ok rxin ta.

¹³ Masqui ajoj matikaban cumplir ja katzobal nkabij pro arjaꞌ ni nuban wiꞌ cumplir ja nbij. Como arjaꞌ ni rxin wiꞌ chi ni nuban wiꞌ cumplir ja rtzobal.

* * * * * * * * * *

¹⁴ Jawaꞌ ja xintzꞌibaj riꞌ ni tanataj wiꞌ chique. In quewaꞌ xtaban recomendar chique riꞌ: —Maxta teban chꞌaꞌoj xta rmal juleꞌ tijonem ja mta rcꞌamonto, Dios rotak ja nbij chewe riꞌ, xcatcheꞌ chique. Como jariꞌ tijonem mta noc wiꞌ, ja necꞌaxani xa neyojtaj rmal.

¹⁵ Tatijaꞌ akꞌij tre ja samaj xin Dios ja yatajnak chawe, utz tabanaꞌ tre utzcꞌa ja Dios utz nutzꞌat ja samaj naban. Kas rubey tabanaꞌ chi rcojic ja utzlaj tijonem ja rcꞌamonto ja Jesucristo. Ja wi queriꞌ xtaban jariꞌ matayaꞌ aqꞌuix.

¹⁶ Maxta tayaꞌ caso chique ja winak ja neyowi ja tijonem ja mta rcꞌamonto in mta noc wiꞌ como ejeꞌeꞌ xa janiꞌ nebe más chipan ja ritzelal.

¹⁷ Ja ritzel tijonem nqueyaꞌ nojel nbe wiꞌ, npaxij riꞌ caniꞌ jun itzel yobil nbe pa nim. Queriꞌ queban ja Himeneo in Fileto.

¹⁸ Ejeꞌeꞌ sach quinaꞌoj, queyaꞌ can ja utzlaj tijonem. Ja nquibij ejeꞌeꞌ chi yatajnak chic chake chi okcꞌastajnak chic in mchita jun kꞌij xtekilaꞌ ta ja xkocꞌastaj chi ta jutij, necheꞌe. Cumal ejeꞌeꞌ ecꞌoli ja kachꞌalal yojtaji ja yukulbal quecꞌuꞌx ruqꞌuin ja Jesucristo.

¹⁹ Pro ja chake ajoj ja yukul kacꞌuꞌx ruqꞌuin ja Jesucristo, ja rbanon ja Dios chake ok caniꞌ jun jay bien tiquili ja rsimientoꞌil in mta yojtajic trij in caniꞌ tzꞌibtal chwach ja rsimientoꞌil quewariꞌ: —Ja kajaw Dios arjaꞌ rotak quewach ja winak nak chique ja katzij chi e rxin. In chakajaꞌ caniꞌ tzꞌibtali: —Canojel ja winak ja nquibij chi e xin Cristo rjawaxic chi nqueyaꞌ can ja ritzelal, neꞌe.

²⁰ Qꞌuiy rwach ja waꞌbal ja cꞌo chipan jun nimlaj jay. Cꞌoli congana nimak rukꞌij caniꞌ tre oro ocnak owi plata. In cꞌoli ja waꞌbal chakajaꞌ ja ma kas ta nimak rukꞌij caniꞌ tre cheꞌ ocnak owi ulew.

²¹ Ja wi cꞌo jun npartiꞌij riꞌ chi matuban ja ritzelal arjaꞌ noc jun ajsamajel ja nim rukꞌij, junan ruqꞌuin ja waꞌbal ja nimak rukꞌij. Arjaꞌ partiꞌin chi nuban ja samaj ja congana ncꞌatzin tre ja rajaw. Arjaꞌ ncowini nuban ja rutzil xa nak ta ja najoꞌx tre chi nuban.

²² Rmalariꞌ nbij chawe, tabanaꞌ cuenta ja racꞌaslemal como ecꞌoli chique ja cꞌajolaꞌ ni cꞌo wiꞌ itzel tak naꞌoj nwinakar pa tak canma in e qꞌuiy chique nqueyaꞌ quiꞌ tre. Pro maxta queriꞌ taban atat. Ja naban quewariꞌ, nacꞌut ja rawutzil chiquewach ja winak, ni tiyukeꞌ wiꞌ acꞌuꞌx ruqꞌuin ja Jesucristo in tiqꞌuejeꞌe ja rajoben riꞌil xin Dios pan acꞌaslemal. In xa jun tabanaꞌ cuqꞌuin ja cꞌo utzlaj tak anma cucꞌan ja ni nqueyaꞌ wiꞌ rukꞌij ja Dios.

²³ Maxta tayaꞌ caso tre ja tzij ja mta rcꞌamonto in mta noc wiꞌ como bien awotak chi xa chꞌaꞌoj rcꞌamonto.

²⁴ Pro jun ajsamajel rxin ja kajaw Jesucristo arjaꞌ ma ajchꞌolaꞌ ta. Ja nuban ja rajsamajel rxin Dios ekal nerchomij canojelal. Arjaꞌ bien ncowini nertijoj ja kachꞌalal in cꞌo rpaciencia.

²⁵ Ja tok ecꞌoli nechꞌaꞌo rxin arjaꞌ nuchꞌob chiquewach pan ekal, ma pan ayewal ta. Queriꞌ nuban como chaka jalal maxla Dios nuyaꞌ chique chi nqueqꞌuex ja quinaꞌoj in nqueyaꞌ can ja ritzelal in ncotakij ja utzlaj tzij xin Jesucristo.

²⁶ In maqueban chic engañar rmal ja diablo in netotaj pa rukꞌaꞌ como ja diablo erchapon utzcꞌa chi nqueban xa nak ta ja cꞌo rgana chique chi nqueban.