2 Timoteo 1 - Tz'utujil (Ja Cꞌacꞌa Chominem)

¹ Anin in Pablo ntzꞌibajel chawe ja carta riꞌ Timoteo. Anin in apóstol rxin ja Jesucristo. Jariꞌ nsamaj yaꞌon chwe rmal ja Dios. Arjaꞌ xinruchaꞌ chi nenyaꞌaꞌ rbixic ja utzlaj cꞌaslemal ja nuyaꞌ ja Cristo Jesús chique ja nyukeꞌ quecꞌuꞌx ruqꞌuin.

² Atat Timoteo at ncꞌajol chwach Dios in lokꞌ natnunaꞌ. Ja rutzil ja nsipaj ja Dios chake rachbil ja quicotemal xin Dios ja tariꞌ xtacochij más tre ja katataꞌ Dios in tre ja kajaw Jesucristo. Ejeꞌeꞌ ta xtiquipokonaj awach.

* * * * * * * * * *

³ Anin ni nban wiꞌ oración pan acuenta chi pa kꞌij chi chakꞌaꞌ, ni naturkaj wiꞌ chwe in tok naturkaj chwe ni nmaltioxij wiꞌ tre ja Dios amwal. Arjaꞌ Dios anin in ajsamajel rxin, ni nyaꞌon wiꞌ caso tre tok ntzijoni ja Dios pa wanma caniꞌ queban chakajaꞌ ja watiꞌt nmamaꞌ ojer.

⁴ In nurkaj chwe chakajaꞌ tok xinawokꞌej tokoriꞌ tok xinelto awqꞌuin in rmalariꞌ congana ngana nutzꞌat chic jutij riꞌ kawach awqꞌuin utzcꞌa congana chi na xquinquicoti amwal.

⁵ In chakajaꞌ nurkaj chwe chi ni katzij wiꞌ chi cꞌoli ja yukulbal acꞌuꞌx ruqꞌuin ja Dios caniꞌ tre ja rawatiꞌt Loida in tre ja rateꞌ Eunicia ejeꞌeꞌ yukeꞌ quecꞌuꞌx nabey ruqꞌuin ja Dios. In bien wotak chi yukul acꞌuꞌx atat ruqꞌuin chakajaꞌ.

⁶ Rmalariꞌ ja nwajoꞌ chawe chi ni naban wiꞌ cuenta tre ja rutzil ja yatajnak chawe rmal ja Dios tokoriꞌ tok xinyaꞌ nukꞌaꞌ pan awiꞌ in yataj chawe chi xatoc jun ajsamajel rxin ja Dios.

⁷ Como ja rEspíritu Santo ja yatajnak chake rmal ja Dios ma ja ta xbeben riꞌil rcꞌamonto chake pro quewaꞌ rcꞌamonto chake riꞌ, nuyaꞌ kachokꞌakꞌ, nuyaꞌ ja rajoben riꞌil xin Dios pa tak kacꞌaslemal in nuyaꞌ chake chi bien nkachꞌob ja nkaban.

⁸ Rmalariꞌ nbij chawe, maxta qꞌuixbal tanaꞌ ja nayaꞌ rbixic ja Jesucristo. Ja camic in preso rmal ja rtzobal Dios, maxta qꞌuixbal tanaꞌ mwal anin chakajaꞌ. Ma tapokonaj ta cꞌa ja npi jeꞌe chawij rmal ja ramajon rbixic ja utzlaj tzij xin Jesucristo pro ja rawachokꞌakꞌ ja yatajnak chawe rmal ja Dios xa ruqꞌuin ariꞌ nacochꞌ nojelal.

⁹ Ja Dios arjaꞌ xokrutoꞌ, xokruchaꞌ chi nkaban ja nrajoꞌ chake chi nkaban pro ma rmal ta chi cꞌo ta kachꞌecbej tok xuban queriꞌ chake, xa rmal ja rchomarsanto ojer in rmal ja rutzil arjaꞌ tok xuyaꞌ chake. Jariꞌ nij ojer wiꞌ rchomarsanto ja tok majaꞌn titzꞌucarsaj ja rwachꞌulew tok xchomarsaj chi nutakto ja Cristo Jesús chi katoꞌic.

¹⁰ In ja rchomarsanto ojer jariꞌ rkꞌalasan chic camic jariꞌ tok xutakto ja Jesucristo ja Toꞌonel kaxin. Ja Jesucristo arjaꞌ xkajsaj rchokꞌakꞌ ja camíc in ja utzlaj tzij ja rcꞌamonto jariꞌ xkꞌalasbej nak rbanic ja utzlaj cꞌaslemal ja mta qꞌuisic trij.

¹¹ In rmal ja utzlaj tzij xin Jesucristo chewiꞌ tok xinchaꞌi chi xinoc apóstol rxin chi nyaꞌ rbixic in yataj chwe chi xinbe cuqꞌuin ja winak ja ma e aj Israel ta in jariꞌ utzlaj tzij xentijoj tre.

¹² Rmalariꞌ tok incꞌo chipan ja rpokonal camic pro ma qꞌuixbal ta nnaꞌ como anin bien wotak rwach chok qꞌuin yukul wiꞌ nucꞌuꞌx in bien wotak chakajaꞌ chi arjaꞌ ni ninruban wiꞌ cuenta tre nojelal ja njachon pa rukꞌaꞌ. Wotak chi niquirwariꞌ nuban chwe in niquirwariꞌ rbanon chwe ja tok xtipi chic jutij.

¹³ Ja utzlaj tijonem ja xincꞌut chawach jariꞌ ocnak abase chi quitijoxic ja winak, maxta tayaꞌ can in ni ta nyukeꞌ wiꞌ acꞌuꞌx ruqꞌuin ja Jesucristo, ni ta nqꞌuejeꞌ wiꞌ ja rajoben riꞌil xin Dios pan acꞌaslemal como jariꞌ rcꞌamonto chake ja Cristo Jesús ja yukul kacꞌuꞌx ruqꞌuin.

¹⁴ Tabanaꞌ cuenta nojel ja ban recomendar chawe rmal ja Dios, ja rEspíritu Santo arjaꞌ ni cꞌo wiꞌ kuqꞌuin, arjaꞌ ta xcattoꞌowi chi rbanic cuenta.

¹⁵ Atat awotak chi canojel ja recꞌo pa rcuenta ja departamento Asia ejeꞌeꞌ ma xinquetoꞌ chi ta pro xinqueyaꞌ can caniꞌ chique Figelo in Hermógenes.

¹⁶ Pro ja Onesíforo arjaꞌ ma queriꞌ ta xuban chwe chewiꞌ tok nwajoꞌ chi ja kajaw Dios xtipokonan ta quewach ja rfamilia. Ja Onesíforo qꞌuiylaj mul xyukbaꞌ nucꞌuꞌx in ma qꞌuixbal ta xunaꞌ mwal chi inocnak preso.

¹⁷ Caniꞌ xuban tok xurkaj waweꞌ pa Roma arjaꞌ congana xoclaꞌ il chi ncanoxic in xinruwil na chi puersa.

¹⁸ Ja kajaw Dios xtipokon ta rwach ja tok xtipi chic jutij ja Jesucristo. Atat bien awotak chi congana xokrutoꞌ chakajaꞌ tok xokqꞌuejeꞌ pa Efeso.