2 Tesalonicenses 3 - Tz'utujil (Ja Cꞌacꞌa Chominem)

¹ Camic wachꞌalal tebanaꞌ orar pa kacuenta utzcꞌa ja rtzobal ja kajaw Dios nbe chanim nat nakaj in nya̱ꞌ rukꞌij chakajaꞌ caniꞌ xeban ixix tre.

² In tecꞌutuj tre ja Dios chi arjaꞌ nokrutoꞌ pa quekꞌaꞌ ja ritzel tak achiꞌiꞌ ja xa itzelal cꞌayon quixin como ma canojel ta yukul quecꞌuꞌx ruqꞌuin ja Jesucristo.

³ Pro ja kajaw Jesucristo arjaꞌ ni nuban wiꞌ cumplir ja ntzujuj, arjaꞌ ncowirsaj ecꞌuꞌx chipan ja rtzobal Dios in nixrchajij chipan nojelal ja ritzelal ja npi chewij.

⁴ Ajoj yukul kacꞌuꞌx ruqꞌuin ja kajaw Jesucristo, arjaꞌ ryaꞌon chake chi cꞌo kaconfianza ewqꞌuin chakajaꞌ. Rmalcꞌariꞌ tok kotak chi ixix eniman ja tijonem ja kayaꞌ chewe in kotak chakajaꞌ chi ni mateyaꞌ can wiꞌ.

⁵ Ja kajaw Jesucristo xtuyaꞌ ta chewe chi nchꞌobtaj más emwal nak rbanic ja rajoben riꞌil xin Dios in xtuyaꞌ ta chewe chakajaꞌ chi necochꞌ nojel caniꞌ xuban ja Cristo.

* * * * * * * * * *

⁶ Camic wachꞌalal pa rubiꞌ ja kajaw Jesucristo nkabij chewe, ja wi cꞌo jun kachꞌalal ja matirajoꞌ nutzuk riꞌ tebanaꞌ tre chaka nqꞌuejeꞌ chic checojol como ma queriꞌ ta ja paxbanem kayaꞌ chewe.

⁷ Ixix bien ewotak chi rjawaxic chi necꞌam ja rejemplo ja kayaꞌ can chewach como ajoj tok xokqꞌuejeꞌ ewqꞌuin xoksamaji.

⁸ Nojel ja xeyaꞌ chake ja katij jariꞌ katoj chewe. Congana xoksamaji chi pa kꞌij chi chakꞌaꞌ chewiꞌ ni majun nak ta kayaꞌ ta chi ekul ja nkatzukbej kiꞌ.

⁹ Masqui ajoj yatal chake chi nkacꞌutuj chewe ja noketobej pro ma queriꞌ ta kaban. Ja kaban, xoksamaji utzcꞌa chi queriꞌ neban ixix necꞌam ja rejemplo.

¹⁰ Como ja tok xokqꞌuejeꞌ ewqꞌuin kabij chewe: —Ja matirajoꞌ nsamaji matiwaꞌ cꞌariꞌ, xokcheꞌe.

¹¹ Como kacꞌaxaj chi ecꞌo jujun chewe ja xa nesakꞌorini, maticajoꞌ nesamaji, xa nquemin quiꞌ cuqꞌuin winak pa tak jay tok cꞌoli nbantaji.

¹² Ja nebano queriꞌ, pa rubiꞌ ja kajaw Jesucristo nkabij chique in congana nkaban recomendar chique chi nesamaji nquetzuk quiꞌ, maquita sícꞌ chꞌaꞌoj xtiqueban.

¹³ Ja cꞌa rixix wachꞌalal ma quixcos ta chi rbanic ja rutzil.

¹⁴ Ja wi cꞌo jun ja matinimaj ja kabij chipan ja carta riꞌ teyaꞌaꞌ cuenta tre, tebanaꞌ tre chaka nqꞌuejeꞌ chic checojol utzcꞌa chi nqꞌuixi.

¹⁵ Pro ma teban ta tre caniꞌ ecꞌulel, ja nrajoꞌ tepaxbaj como arjaꞌ kachꞌalal.

* * * * * * * * * *

¹⁶ Ja kajaw Jesucristo arjaꞌ nyowi ja quicotemal, arjaꞌ xtuyaꞌ ta chewe ja quicotemal nojel tiempo xa nak ta npi chewij, xtiqꞌuejeꞌ ta ewqꞌuin ewanojelal.

¹⁷ Ja rutzil ewach nyaꞌ chewe riꞌ anin ja rin Pablo nintzꞌibani in nban firmar chakajaꞌ jariꞌ eseguro chi anin xintakoꞌel ewqꞌuin. Niquirwariꞌ nbanon jeꞌe tre ja ncarta, quewaꞌ rtzꞌibaxic nbanon jeꞌe tre nojel caniꞌ ja wariꞌ.

¹⁸ Wachꞌalal, kas ta xtiqꞌuejeꞌe ja rutzil rxin ja kajaw Jesucristo ewqꞌuin ewanojel. Amén.