2 Pedro 3 - Tz'utujil (Ja Cꞌacꞌa Chominem)

¹ Chakꞌlaj wachꞌalal, jawaꞌ rcab carta ntakel ewqꞌuin riꞌ junan rsamaj ruqꞌuin ja nabey carta ja ntakon chic ewqꞌuin. Quewaꞌ rsamaj riꞌ chi nnataj jeꞌe chewe ja chꞌobtajnak chic emwal como anin wotak chi ma eniman ta ja ritzel tak tijonem.

² Rmalariꞌ nbij chewe, tinataj jutzꞌit chewe ja quibin can ja rojer tak profeta xin Dios. In tinataj chewe chakajaꞌ ja mandamiento ja yaꞌon can rmal ja kajaw Jesucristo ja Toꞌonel kaxin jariꞌ kabin chic chewe ja rok apóstol.

³ Congana rjawaxic chi nchꞌobtaj emwal chi ja pa rqꞌuisbal tak kꞌij ecꞌoli winak ja nepi na xa e yokꞌonelaꞌ, xa nqueyaꞌ quiꞌ tre ja ritzel tak yarinem ja cꞌo pa tak canma.

⁴ Ejeꞌeꞌ quewaꞌ xtiquibij chique ja juleꞌ chic winak riꞌ: —Bin can chi npeti ja Cristo ¿la npi laꞌan nechꞌob ixix? Pro ja rwachꞌulew ni matiqꞌuextaj wiꞌ in matiqꞌuisi. Caniꞌ pa quitiempo ja katiꞌt kamamaꞌ in chakajaꞌ tok tzꞌucarto ja rwachꞌulew niquirwariꞌ rbanon camic, xquecheꞌe.

⁵ Pro ejeꞌeꞌ maticajoꞌ nquinataj chi ja caj in rwachꞌulew ma chaka ta cꞌoli pro ja Dios ja tzij xuban jariꞌ xwinakarsbej. Ja rwachꞌulew pa yaꞌ winakar wiꞌ in xelto parwiꞌ ja yaꞌ.

⁶ In yaꞌ chakajaꞌ yojowi ja rwachꞌulew ojer tokoriꞌ tok xuban ja nimlaj kꞌekaljab, be chic jutij chipan ja yaꞌ in qꞌuisi.

⁷ In rmal chakajaꞌ ja rbin can ja Dios ja caj in rwachꞌulew ja cꞌoli camic xa cꞌatic xa poroxic rayben. Tokoriꞌ xticꞌati ja tok xterilaꞌ ja nimlaj kꞌij xin juicio in canojel ja ritzel tak winak nebe chipan ja nimlaj rpokonal.

⁸ Chakꞌlaj wachꞌalal, ni ma temestaj ta wiꞌ ja xtinbij chewe riꞌ, jun mil junaꞌ masqui congana nim nkacꞌaxaj pro ja chwach Dios xa junan ruqꞌuin jun kꞌij.

⁹ Queriꞌ nbij chewe como ecꞌoli winak ja nebini chi ja kajaw Dios cꞌamalo nuban cumplir ja rbin can pro jariꞌ ma queriꞌ ta. Xar congana rpaciencia ja Dios kuqꞌuin ja rok winak como arjaꞌ matirajoꞌ chi cꞌo ta jun xtibe ta chipan ja nimlaj rpokonal. Ja nrajoꞌ chake kanojelal chi nkaqꞌuex kanaꞌoj in nkayaꞌ can ja ritzelal.

¹⁰ Pro cꞌa jaꞌ xtinaꞌi ja tok xterilaꞌ ja nimlaj kꞌij ja rchomin ja kajaw Dios caniꞌ tre jun alakꞌom mta nnabexi ja tok nerbanaꞌ alakꞌ. Jariꞌ kꞌij ncꞌati nojelal. Ja caj congana npakꞌloji xtuyaꞌ riꞌ in nqꞌuisi. Nojel ja rocnak ja rwachꞌulew nqꞌuis na rmal ja nimlaj cꞌatic, ncꞌat na ja rwachꞌulew in ncꞌat na nojelal ja cꞌo chwach ja rwachꞌulew chakajaꞌ, majun nak ta nutoꞌ ta riꞌ.

¹¹ Como ja caj in rwachꞌulew xa ncꞌati xa nqꞌuisi rmalcꞌariꞌ tok nbij chewe, congana rjawaxic chi nkucꞌaj jun utzlaj anma, rjawaxic chi ni ja wiꞌ ja Dios nkachꞌob.

¹² Koquicoti chi raybexic ja nimlaj kꞌij ja chomarsan rmal ja Dios, kabanaꞌ ja nrajoꞌ chake chi nkaban utzcꞌa chi xtipi ta jutzꞌit chanim. Masqui jariꞌ kꞌij xticꞌati ja caj in nqꞌuisi in masqui nojelal ja rocnak ja rwachꞌulew nqꞌuisi rmal ja cꞌatic

¹³ pro ja rajoj nokquicoti chi raybexic jun chic cꞌacꞌa caj in jun chic cꞌacꞌa rwachꞌulew caniꞌ rtzujun can ja Dios, jariꞌ majun itzelal chipan, nojel utz.

¹⁴ Rmalcꞌariꞌ nbij chewe chakꞌlaj wachꞌalal, como ajoj kayben jun cꞌacꞌa caj in cꞌacꞌa rwachꞌulew katijaꞌ cꞌa kakꞌij chi rbanic ja nrajoꞌ ja Dios chake chi nkaban utzcꞌa chi xa jun kabanon ruqꞌuin tok xkoꞌekaj chwach in chꞌajchꞌoj ja kanma in majun nak ta nokchapbexi.

¹⁵ Kas bien tichꞌobtaj emwal chi ja kajaw Dios ma chaka ta cꞌoli ja rpaciencia kuqꞌuin ja rok winak, ja nrajoꞌ chake chi noktotaji kanojelal. In queriꞌ bin chewe rmal ja chakꞌlaj kachꞌalal Pablo. Jariꞌ xbij chewe ja tok xutak ja carta ewqꞌuin in Dios yoyon tre ja rnaꞌoj chi rbixic.

¹⁶ Arjaꞌ xbij chewe ja nmajon rbixic anin chewe camic. Nijawariꞌ ntzꞌibaj arjaꞌ chipan nojelal ja carta ja nuban. Cꞌo jeꞌe ntzꞌibaj ja Pablo chipan ja carta ja cꞌayew rchꞌobic in ecꞌoli ja ma quitijon ta quiꞌ chi utz ja ma cowirnak ta quecꞌuꞌx chipan ja rtzobal Dios, ejeꞌeꞌ xa nqueqꞌuex rbixic ja rtzꞌiban ja Pablo caniꞌ nqueban tre ja juleꞌ chic rtzobal Dios. Jariꞌ nquisiqꞌuibej ja nimlaj rpokonal chiquij.

¹⁷ Rmalcꞌariꞌ chakꞌlaj wachꞌalal, como ixix ewotak chic tebanaꞌ cuenta, maxta quixkaj chipan ja ritzel tak tijonem ja nqueyaꞌ ja ritzel tak winak. Ixix cowirnak ecꞌuꞌx chipan ja rtzobal Dios, maxta quixyojtaji.

¹⁸ Pro ja neban, ni ta xtiqꞌuiy wiꞌ más ja rutzil xin Dios pa tak ewanma, ni ta xtewotakij wiꞌ más janiꞌ rnaꞌoj ja kajaw Jesucristo ja Toꞌonel kaxin. Arjaꞌ ni ta xtiyaꞌ wiꞌ rukꞌij camic, chwak in chijutij. Amén.