2 Pedro 2 - Tz'utujil (Ja Cꞌacꞌa Chominem)

¹ Pro ecꞌoli ja profeta ojer chakajaꞌ chiquicojol ja tinamit Israel ja ma Dios ta takyonto quixin in queriꞌ chewe ixix chakajaꞌ newinakar na checojol juleꞌ maestro pro ma katzij ta chi tijonem xin Dios ja nqueyaꞌ. Ejeꞌeꞌ pan awatali xtiquecoj ja ritzel tak tijonem chicojol ja rtzobal Dios, ja cꞌariꞌ tijonem xtiqueyaꞌ xa nyojtaji ja recꞌaslemal rmal. Ejeꞌeꞌ riꞌ winak matiquinimaj chic chi ja Jesucristo xutoj ja quil quemac. Jariꞌ jun nimlaj juicio nquisiqꞌuij chiquij pro mta quinaben ja tok xtikaj chiquij.

² In chakajaꞌ e qꞌuiy ja winak ja xqueniman quixin, necachbilaj chipan ja ritzelal ja xtiqueban. Xcꞌa rmal ja ritzel cꞌaslemal cucꞌan ja maestro ja tok xa itzel xtitzꞌati ja utzlaj bey ja cꞌutun chikawach rmal ja Dios.

³ Ejeꞌeꞌ riꞌ ja ritzel tak maestro xa pwok nquiyarij in rmalariꞌ congana xquixquekꞌol, xtiquibij buen tak tzij chewe ja nquiwasbej ja pwok chewe. Pro ja Dios ojer cꞌo jun juicio rchominto quixin, ejeꞌeꞌ nequilaꞌ na jun kꞌij tok xqueꞌekaj chwach ja rpokonal.

⁴ Caniꞌ xuban ja Dios ojer chique ja ángel ja xemacun chwach ma xpokonaj ta quewach, xerutakel chipan ja rpokonal pa jun lugar kꞌekumal, ebacꞌon pa cadena chi raybexic ja nimlaj kꞌij xin juicio.

⁵ In chakajaꞌ ja pa rtiempo Noé ojer Dios xutakto jun juicio pa quewiꞌ ja ritzel tak winak, xutakto jun nimlaj kꞌekaljab pa quewiꞌ in xecami canojel. Ruyon ja Noé ja totaji. Ja tok majaꞌn tipeti ja juicio ja Noé arjaꞌ xuyaꞌ rbixic chique ja winak chi rjawaxic nqueyaꞌ can ja ritzelal in ncucꞌaj chic jun utzlaj cꞌaslemal. In ecꞌo chi na wukuꞌ rachbil chakajaꞌ ja xetotaji.

⁶ In chakajaꞌ ja Dios ojer xutakto jun juicio parwiꞌ ja caꞌiꞌ tinamit Sodoma in Gomorra. Congana lawuloꞌ ban tre ja caꞌiꞌ tinamit, cꞌati, ni chaj ban tre. Queriꞌ xuban ja Dios jariꞌ xucoj ejemplo chiquewach ja juleꞌ chic itzel tak winak ja majaꞌn queꞌalaxi.

⁷ Pro ja Dios cꞌo jun achi xutoꞌ chipan ja cꞌatic ja bantaji rbinaꞌan Lot, arjaꞌ jun utzlaj achi in congana tiꞌon tre ja ritzelal ja queban ja winak.

⁸ Ja Lot arjaꞌ nij utzlaj achi wiꞌ. Nojel tak kꞌij tok nutzꞌat ja ritzelal ja nqueban in tok ncꞌaxaj ja ritzel tak tzij ja nquibij como cꞌo jun utzlaj anma rcꞌan chewiꞌ tok ntiꞌon tre ja nqueban.

⁹ Triꞌ cꞌa nkatzꞌat wiꞌ chi ja Dios arjaꞌ bien rotak nerutoꞌ ja nebano respetar rxin in bien rotak chakajaꞌ neruyaꞌ ja ritzel tak winak chipan ja rpokonal chi raybexic ja nimlaj kꞌij xin juicio.

¹⁰ In más chi na lawuloꞌ nuban chique ja winak ja xa nqueyaꞌ quiꞌ tre ja ritzel tak yarinem ja cꞌo pa tak canma. Ejeꞌeꞌ xa itzel nquenaꞌ ja neba̱n mandar rmal ja kajaw Jesucristo. Ejeꞌeꞌ matiquixbej quiꞌ nqueban ja ritzelal, ni nqueban wiꞌ xa nak ta ja cꞌo quigana nqueban. Queriꞌ quibanic matiquixbej quiꞌ nquibij itzel tak tzij chique ja nimak quekꞌij.

¹¹ Pro xnaꞌ ma queriꞌ ta netzijoni ángel masqui más chi na kꞌaxnak quichokꞌakꞌ in más nimak quekꞌij chiquewach winak. Ja ángel tok neꞌekaj chwach ja Dios ejeꞌeꞌ mta itzel tak tzij nquibij ja nkꞌetbex tzij chiquij ja nimak quekꞌij.

¹² Pro jariꞌ winak ja nqueyaꞌ quiꞌ tre ja ritzelal ejeꞌeꞌ xa e caniꞌ chicop, xa mta quipensar. Ja chicop chaka bar ta nquemin wiꞌ quiꞌ, xa nechapi in necamsaxi como nijawariꞌ yatal chiquij. Ejeꞌeꞌ riꞌ winak tok cꞌoli nbix chique ja matichꞌobtaj cumal congana cowlaj tak tzij nquibij, xa nechaponi. Ja ritzelal nqueban jariꞌ nquisiqꞌuibej camíc chiquij

¹³ jariꞌ rtojbalil ja ritzelal nqueban. Ejeꞌeꞌ ma qꞌuixbal ta nquenaꞌ, congana nequicoti nquikꞌalasaj ja ritzelal masqui pa kꞌij. Ejeꞌeꞌ ja tok nixcachbilaj chi waꞌim xa ruqꞌuix ja Dios nqueyaꞌ, nequicoti nqueban ja ritzelal checojol, xa engaño rcꞌamonto ja nqueban.

¹⁴ Mta ariꞌ ja maquita nquiyarij rwach jun ixok, maquecos chi rbanic ja ritzelal. Ja winak ja ma cowirnak ta quewiꞌ canma chipan ja rtzobal Dios nequisiqꞌuij chipan ja ritzelal. Kas ntzuri nbantaj cumal chi rqꞌuiyirsaxic ja quimebaꞌil. Queriꞌ quibanic, ejeꞌeꞌ xa etzelan chic rmal ja Dios.

¹⁵ Quiyaꞌon can ja utzlaj bey, etzaknak. Ja bey cucꞌan jariꞌ xrucꞌaj ja rojer profeta rbinaꞌan Balaam ja rcꞌajol Beor, arjaꞌ congana xel rucꞌuꞌx trij ja chꞌecoj pwok masqui ma utz ta rchꞌaquic nuban.

¹⁶ Pro cꞌo jun ti bur yataj tre rmal ja Dios chi tzijoni in xuchꞌaꞌ tre ja Balaam ja ritzel naꞌoj ja rchꞌobon. In kꞌili ja Balaam rmal ja bur tre ja ritzel naꞌoj ja rchꞌobon.

¹⁷ Ejeꞌeꞌ riꞌ winak xa e junan ruqꞌuin jun tzꞌuquel yaꞌ ja chakijnak, xa mta neꞌoc wiꞌ, xa e caniꞌ juleꞌ sutzꞌ ja xa ncꞌamarel rmal ikꞌ. Ejeꞌeꞌ chomin chic jun lugar quixin ja congana kꞌekuꞌm, triꞌ neꞌeqꞌuejeꞌ wiꞌ chijutij.

¹⁸ Nquibij nimak tak tzij pro xa mta rcꞌamonto. Ja ritzel tak yarinem ja cꞌo pa tak canma jariꞌ nequisiqꞌuibej ja winak ja cꞌa ma jaruꞌ ta tiempo equiyaꞌon can ja cachbil ja xa itzelal cꞌayon quixin.

¹⁹ Quewaꞌ nquitzujuj chique riꞌ: —Ixix ix libre, majun nak ta cꞌo ta rukꞌaꞌ chewe, necheꞌ chique. Pro nixtacꞌa ejeꞌeꞌ ta e libre ta como xa echapon rmal ja ritzelal. Xa nak ta ja ritzelal ja ratchapyon ja wi macatcowin trij jariꞌ ma at libre ta, atcꞌo cꞌariꞌ pa rukꞌaꞌ ja chapyon awxin.

²⁰ Ejeꞌeꞌ riꞌ winak nabey quetoꞌ quiꞌ chipan ja ritzelal xin rwachꞌulew tokoriꞌ tok cotakij nak rbanic ja kajaw Jesucristo ja Toꞌonel kaxin. Pro wi nquitzꞌapij chic jutij quiꞌ chipan ja ritzelal in necha̱p chic jutij rmal xcꞌa rmalariꞌ ja tok más chi na lawuloꞌ ja quicꞌaslemal chwach ja caniꞌ quibanon nabey.

²¹ Más ta utz ja maquita cotakij nak rbanic ja utzlaj bey xin Dios chwach ja queban como ejeꞌeꞌ cotakij nak rbanic ja utzlaj bey in quicꞌaxaj ja rutzil ja ban mandar chique rmal ja Dios chi nqueban pro jariꞌ xa queyaꞌ can.

²² Ja queban caniꞌ nbij jun cꞌambal tzij ja tzꞌibtal can quewariꞌ: —Ja tzꞌiꞌ nmeloji chi nertijaꞌ chic jutij ja rxaꞌab, neꞌe. In jun chic: —Ja ak tok chaka maril nchꞌajtajel rij nbe chic jutij chipan ja chꞌabak. Queriꞌ nbij.