2 Pedro 1 - Tz'utujil (Ja Cꞌacꞌa Chominem)

¹ Anin in Simón Pedro, in ajsamajel rxin ja Jesucristo in chakajaꞌ in apóstol rxin. Anin ntzꞌibaj ja carta riꞌ in ntakel ewqꞌuin ixix ja rewilon chic ja lokꞌlaj yukulbal ecꞌuꞌx ruqꞌuin ja Jesucristo. Ja yukulbal ecꞌuꞌx ruqꞌuin ja Jesús nim rukꞌij, junan ruqꞌuin ja caniꞌ kawilon ajoj. Ja Jesucristo arjaꞌ Dios, arjaꞌ Toꞌonel kaxin in rmal ja rutzil rcꞌamonto tok nokcꞌuli rmal ja Dios in rmalariꞌ tok ewilon chic ja yukulbal ecꞌuꞌx ruqꞌuin.

² Xtiqꞌuiy ta xtiwachin ta ja rutzil in quicotemal xin Dios pa tak ewanma. Ja wi kꞌij kꞌij newotakij más janiꞌ rnaꞌoj ja Dios, wi newotakij más janiꞌ rnaꞌoj ja kajaw Jesús triꞌ newil wiꞌ ja rutzil in quicotemal xin Dios.

* * * * * * * * * *

³ Ja Dios cꞌo pa rukꞌaꞌ nojelal, arjaꞌ nojel ryaꞌon chake ja ncꞌatzin chake chi nokcowini nkucꞌaj jun utzlaj cꞌaslemal ja utz ntzꞌa̱t rmal. Queriꞌ nuban ja Dios chawe ja tok nawotakij janiꞌ rnaꞌoj. Arjaꞌ xokrsiqꞌuij utzcꞌa chi nokoc rachbil chipan ja sakil utzcꞌa chakajaꞌ chi nkucꞌaj jun utzlaj anma ja caniꞌ ranma arjaꞌ.

⁴ Queriꞌ rbanon, cꞌoli ja rtzujun jeꞌe chake caniꞌ jun nimlaj mebaꞌil in congana nimak rukꞌij. Rmal cꞌa ja rtzujunto chake rmalariꞌ tok nokcowini nkatoꞌ kiꞌ chipan ja ritzelal xin rwachꞌulew como ja rwachꞌulew xa yojtajnak rmal ja ritzel tak yarinem ja cꞌo pa tak canma winak. Queriꞌ xuban ja Dios chake utzcꞌa chi nkaqꞌuex kanaꞌoj in ni jaꞌ chic rnaꞌoj ja Dios nkucꞌaj.

⁵ Rmalcꞌariꞌ nbij chewe, tetijaꞌ ekꞌij chi rbanic ja xtinbij chewe riꞌ utzcꞌa chi nqꞌuiyi nwachini ja rnaꞌoj Dios pa tak ewiꞌ pa tak ewanma. Ixix cꞌo yukulbal ecꞌuꞌx ruqꞌuin ja Jesucristo pro tebanaꞌ chakajaꞌ ja juleꞌ chic ja xtinbij chewe quewariꞌ. Cow quixpeꞌi chi rbanic ja rutzil. Tewotakij nak ja utz in nak ja ma utz ta.

⁶ Techꞌoboꞌ rij rwach nak neban chi mateyaꞌ ewiꞌ tre ja ritzelal chi xquixrucꞌamel ta. Tecochꞌoꞌ xa nak ta npi chewij. Ni jaꞌ wiꞌ Dios techꞌoboꞌ.

⁷ Lokꞌ queꞌenaꞌaꞌ ja rewachꞌalal. In tiqꞌuejeꞌe tisamaji ja rajoben riꞌil xin Dios pa tak ewanma.

⁸ Nojel ja cꞌa xintzꞌibaj chewe riꞌ ja wi nqꞌuiyi wi nwachini pa tak ewanma triꞌ cꞌa nixtzꞌat wiꞌ chi bien ewotak janiꞌ rnaꞌoj ja kajaw Jesucristo in triꞌ nkꞌalajin wiꞌ chakajaꞌ chi congana xetij ekꞌij chi rotakixic.

⁹ Pro ja winak ja mta chique ja xintzꞌibaj riꞌ ejeꞌeꞌ e caniꞌ moyaꞌ, xa matiquetzꞌat ja rtzujunto ja Dios, xa jaꞌ nquetzꞌat ja cꞌo chiquinakaj ja xin rwachꞌulew. Matinataj chic chique chi xechꞌachꞌojirsax chipan ja rojer quil quemac.

¹⁰ Rmalcꞌariꞌ wachꞌalal, más chi ta na netij ekꞌij chi rbanic ja xintzꞌibaj riꞌ utzcꞌa chi cꞌol eseguro chi xixsiqꞌuixi in xixchaꞌi chi xixoc pa rukꞌaꞌ ja Dios. Ja wi queriꞌ neban jariꞌ ma quixkaj chipan ja il mac in

¹¹ congana quiꞌil ecꞌulic xtibani chipan ja gobierno rxin ja kajaw Jesucristo, arjaꞌ Toꞌonel kaxin, jun gobierno ja ni mta wiꞌ qꞌuisic trij.

¹² Rmalcꞌariꞌ tok ni nnataj wiꞌ chewe nojel ja xintzꞌibaj riꞌ. Queriꞌ nban masqui ewotak chic in masqui cowirnak chic ewiꞌ ewanma chipan ja utzlaj tzij eniman ja rcꞌamonto ja Jesucristo.

¹³ Ja nchꞌob anin ni rubey wiꞌ nban chi nnataj chewe. Ja tok xquincami cꞌa tokoriꞌ ntanbaꞌ rnataxic chewe.

¹⁴ Anin wotak chi xajalal majaꞌn tinyaꞌ can ja rwachꞌulew jariꞌ kꞌalasan chic chinwach rmal ja kajaw Jesucristo.

¹⁵ Anin nchomij can na ja ncꞌatzin chewe chi ni nenataj wiꞌ masqui incamnak chic.

* * * * * * * * * *

¹⁶ Ajoj kachꞌob chewach nak rbanic ja tok xtipi chic jutij ja kajaw Jesucristo chi congana chic kꞌaxnak ja rchokꞌakꞌ triꞌ. Ja kacoj kabase tok kabij chewe jariꞌ tok yataj chake chi katzꞌat ruqꞌuin kawach ja Jesucristo tok rucꞌaj ja ruchꞌaꞌ Dios. Ma ja ta kacoj kabase juleꞌ ojer tak tzij ja xa winakarsan cumal winak quibanon rbanic.

¹⁷ Ajoj katzꞌat ja Jesús ja tok kꞌalasax rmal ja Tatixel chi congana nim rukꞌij in tok rucꞌaj ja gloria xin Dios. Tokoriꞌ bantaji ja tok kacꞌaxaj rukul ja nimlaj Dios, quewaꞌ xbij tre ja Jesús riꞌ: —Jawaꞌ wariꞌ Walcꞌwal, congana nwajoꞌ in congana ninquicot trij, neꞌe.

¹⁸ Ajoj okcꞌo ruqꞌuin ja Jesús parwiꞌ ja jayuꞌ ja chaꞌon rmal ja Dios chewiꞌ tok kacꞌaxaj ja kulaj penak chilaꞌ chicaj.

¹⁹ In chakajaꞌ cꞌo chic jun ja nkacoj kabase ja más chi na seguro jariꞌ ja rtzobal Dios ja quibin can in quitzꞌiban can ja profeta xin Dios. Jariꞌ ja quitzꞌiban can yatal chewe chi congana neyaꞌ pa cuenta. Ja quitzꞌiban can jariꞌ caniꞌ jun kꞌakꞌ ja nsakirsaj abey chakꞌaꞌ, natrutoꞌ chipan ja kꞌekumal. Ja cꞌa tok npi rsakaric mchita kꞌekumal in tok nelto kꞌij nsakirsaj chi utz nojel. In queriꞌ cꞌa rbanic chakajaꞌ ja tok xtipi chic jutij ja Jesucristo arjaꞌ nsakirsaj chi utz ja rewanma.

²⁰ Ja quitzꞌiban can ja profeta chipan ja rtzobal Dios congana rjawaxic chewe chi nchꞌobtaj emwal chi ma jun winak ta kꞌalasani nak rbanic, jaꞌ Espíritu Santo kꞌalasan chiquewach.

²¹ Ma jun winak ta xucꞌan quixin ja profeta ojer chi rbixic ja tzꞌibtal can, ejeꞌeꞌ xechaꞌi rmal ja Dios in jaꞌ Espíritu Santo xucꞌan quixin chi rbixic.